《Kah陳小小做伙讀台語》

 | | | 轉寄

什一，因為知一切lóng是恩惠

作者 陳小小，台譯：Lîm ChùnIo̍k 2025.07.13




什一，因為知一切lóng是恩惠

信耶穌三十gōa年，月月lóng行什一奉獻，tùi大學時代直到chitmá。M̄是出tī律法ê考量，卻是出tī聖經教導──tī以色列離開埃及去到西奈，上主iáu未頒律法chìn前ê數百年，信心之父亞伯拉罕tī一場戰役tńg去了後，kā所有ê戰利品the̍h出十分之一獻hō͘上主。伊chit个舉動背後深知「一切lóng是恩惠，m̄是理所當然ê」，出tī對上主ê感恩ê情。

創世記14章記載四王kah五王ê戰爭。四王ê戰力真強大，in bat phah敗利乏音人，這是巨人族。現代人ē掠準巨人是古早時代á是小說ê虛構人物。M̄ koh台灣siōng koân ê人張英武220公分。Chiná有張俊才，身koân 242公分，到taⁿ iáu健在。現代史記錄siōng koân者是美國ê Robert Pershing Wadlow身koân 272公分。細粒籽ê chabó͘ gíná身koân kantaⁿ到chiahê人ê腰部。Kantaⁿ ētàng講chitmá ê世界，巨人比較khah少，卻m̄是無存在。

Á四王戰力強大ê第二个證明，to̍h是in tùi北方遠遠去南方，距離kui千公里遠。經過長途奔波了後，照常持有戰鬥力phah敗五王！

當時亞伯拉罕（hit時名叫亞伯蘭）ê姪á羅得tòa tī所多瑪。四王大大phah敗五王了後，kā所多瑪kah蛾摩拉所有ê財產kah所有ê米糧the̍h到手，to̍h離開；mā kā亞伯拉罕兄弟ê kiáⁿ羅得kah羅得ê財產the̍h了了，to̍h走去。有一个逃脫ê人來kā 亞伯拉罕講，伊聽見親人hông lia̍h擄去，to̍h請kah kakī結盟ê幔利、以實各就ánne kah伊做伙去拯救羅得，而且帶領tī kakī ê厝裡出世hit 318名訓練有素ê奴僕全部傾巢á出動，行chiūⁿ千公里遠ê路長途，向北方追去。

到暗時jiok tio̍h四王。亞伯拉罕用分隊突襲法。伊kah奴僕分數隊kah四王對立，攻打in，jiok in。亞伯拉罕phah贏，kā四王搶奪ê一切財產奪回，mā kā親人羅得kah伊ê財產、婦女kah眾人lóng奪回。

亞伯拉罕凱旋tńg來，所多瑪王出來迎接，同時，koh有撒冷王麥基洗德the̍h出餅kah葡萄酒；麥基洗德是至koân者上主ê祭司。伊祝福亞伯拉罕講：「願至koân者上主、天地ê持有者，祝福hō͘亞伯蘭！願恩典歸tī至koân ê上主，祂kā你ê敵人交tī你手裡。」（自譯）

麥基洗德對亞伯拉罕祝福ê hit句「祂kā你ê敵人交tī你手裡」，提醒亞伯拉罕，伊ētàng phah敗四王，是出tī耶和華ê恩典！M̄是出tī亞伯拉罕ê夜間分隊突襲法；m̄是kah kakī結盟ê幔利、以實各kah亞乃；mā m̄是tī亞伯拉罕厝裡出世hit 318名訓練有素ê奴僕；卻是耶和華ê恩典，亞伯拉罕chiah ē tàng phah贏戰力強大ê四王。

亞伯拉罕隨時to̍h kā所有ê the̍h出十分之一hō͘至koân者上主ê祭司麥基洗德。Chitê行動to̍h是認同伊ê所講，上主chiah是戰役ê致勝關鍵！Chit時，所多瑪王厚面皮khiā出來，對亞伯拉罕講：「你kā人還我，財物你kakī the̍h去。」事實上，啥人phah贏，強擄奪物to̍h歸啥人。Phah輸食了敗仗ê所多瑪王，無任何權利主張chiahê 早to̍h被四王掠走ê財物kah人。

M̄koh亞伯拉罕對所多瑪王講：「我指耶和華－至koân者上主、天地ê持有者咒chōa：凡若你ê物件，to̍h是一條線、一條鞋帶，我lóng m̄ the̍h，免你講：『是我hō͘亞伯蘭富足！』我啥物lóng boài，只是奴僕所食ê，以及kah我做伙去ê亞乃、以實各、幔利所應得ê份，hō͘ in the̍h去lah！」（自譯）

信主以前，我感覺kakī性命中ê一切，大部分lóng是kakī phah拚爭取來ê，kakī chiah是kakī siōng該感謝ê人。信主了後，hiaupai ê目鏡pak落來，就ánne phah開目chiu所見性命中ê一切，lóng是恩惠，m̄是理所當然ê！

Chûn年八月，因為先生有感動beh kā伊真gâu ê電腦技術貢獻tī醫療資訊事工，kui家伙遷到屏東。入來tòa iáu未到一個月，chiah知影chit棟大樓無管理委員會，亂七八糟象欉生，chìn前大樓公共事務靠一位熱心住戶，也已經搬走。地下室角落、樓梯間khǹg雜物，電動停車位ê車梯故障，電梯ê狀況mā無好，柴油發電機年久失修，停電ê時bētàng起動緊急供電；另外，根據前六年ê siàu目資料，無清洗過水塔kah抽水肥。

回想chìn前tī台南sòe厝ê日子，有良善ê管理委員會維護ta̍k項公共設施，無頂面所講hō͘人心煩ê狀況發生；而且倒糞埽、資源回收ētàng集中tī定點，由管理清潔人員幫忙。Chitmá倒糞埽，ài tī街á角等糞埽車á是追糞埽車走。Ánne chiah明白，過去tī台南ê安居樂業，滿滿lóng是恩惠，背後是hit kóa擔任管理委員會ê區分所有權人（厝主）ê付出，以及生活品質真好ê厝邊共同維護公共區域衛生。一切lóng m̄是理所當然ê！

耶和華對亞伯拉罕講：「你tio̍h離開本地、本族、父家，往我所beh指示你ê地去。我一定叫你成做大國，我一定賜福hō͘你，叫你ê號做大；你mā tio̍h hō͘別人得福。」（創世記12:1-2）基督徒因為耶穌，lóng承受tio̍h亞伯拉罕ê約。「你mā tio̍h叫別人得福」，原文וֶהְיֵה בְּרָכָה是「你tio̍h成做祝福」。基督徒to̍h ē領受上主滿滿ê祝福，到hia to̍h ài成做hit所在ê祝福，ài kā上主ê恩惠分享出去！

就ánne，阮kah一對基督徒夫婦開始為tio̍h chitê大樓祈禱，召集有意願ê區分所有權人，照步來成立管理委員會。走市公所、縣政府城鄉發展處建築管理科kah公安使用科、郵局開戶、國稅局統一編號、消防局kah消防隊消防安檢、台電公司……，每辦一个過程，每遭受一个困難，tú tio̍h少數自私ê住戶，to̍h向上帝感謝祈禱，為tio̍h上主kah我同在，賞賜各種智慧、夠用ê疼kah忍耐，mā為tio̍h阮過去在台南白白得tio̍h ê恩惠感謝。

亞伯拉罕kā所有ê the̍h出十分之一獻hō͘上主，he是一種實際ê行動，宣告kakī清楚kakī ê一切lóng是至koân者上主ê恩惠，m̄是理所當然ê。Mā佩服亞伯拉罕對所多瑪王明確表示：「凡若你ê物件，to̍h是一條線、一條鞋帶，我lóng m̄ the̍h，免你講：是我hō͘亞伯蘭富足！」亞伯拉罕因為有上主to̍h無計較，因為伊深知耶和華是天地ê持有者！上帝beh hō͘亞伯拉罕有啥物恩惠，to̍h ē有啥物恩惠。

Á阮tau若是有疼kah物質有啥物豐盛，m̄是靠kakī，m̄是靠其他ê人，卻是來自上主ê恩惠。願阮一家chit世人lóng學亞伯拉罕ê所行。