《主編e5話》

| | | 轉寄

少年人+母語禮拜=教會有未來

Bat有關注母語ê學者強調:「失去母語,就失去民族ê根。」筆者m̄-nā煩惱台灣文化漸漸衰微,mā掛慮阮/咱台灣基督長老教會優良ê信仰傳統teh-beh流失,因此,「好膽」tī-chia呼籲各教會正視禮拜語言ê問題。

Chit幾年來,真chē教會lóng teh成立華語禮拜,理由免講lóng是「發現少年人流失」,「少年人聽m̄-bat台語」,「將禮拜程序簡化,hō͘少年人參加」等等。我想chiah-ê lóng是關心教會發展koh真用心思考ê人所提出ê觀察。無m̄-tio̍h!「少年人流失」ê現象的確是咱長老教會宣教上一個值得注意ê現象;但是,少年人流失ê因素,除了禮拜語言之外,iáu有其他真chē thang改進ê空間,特別是藉tio̍h禮拜ê多元化,來吸引少年人參加台語禮拜,chit方面已經有真chē專家提出真好ê建議,譬如講道內容ê生活化,少用神學術語、hō͘少年人參與禮拜中ê服事,使用power-point,多使用少年人喜愛ê音樂等等,lóng是少年人較喜愛ê禮拜方式。

多年前,筆者就已經teh思考「如何hō͘少年人歡喜做禮拜?」,「如何hō͘少年人聽bat講道?」等問題。當時,我發現語言kap型式確實是問題ê關鍵所在。思考一段時間了後,我ê感動kap心得是「語言是thang訓練ê!」後來,我馬上提出一個構想,mā馬上實施。我看tio̍h有kóa少年人(當我講「少年人」ê時,實際上lóng是指國中、高中以及一部分ê大學生)做禮拜ê時àⁿ頭teh sńg手機裡ê電動遊戲,甚至有時chhi-chhi-chhu̍h-chhu̍h講話,chit種現象實在令我憂心。我就kā家己假設為「少年人」,「如果我聽m̄-bat台語,我án怎做禮拜?」,「台語真正hiah-ni̍h oh bat mah?」

後來,我因為tio̍h堅持台語傳統,聖靈感動我想出一kóa thang行ê方案。我首先買一大疊ê空白筆記本交hō͘學生團契ê會長,並tī禮拜chìn前發hō͘每一位青年(in lóng是學生團契聖歌隊員),鼓勵in記錄我ê講道文章。我ê配套措施,第一是雙重獎勵;第二是改進我講道ê用語。所謂「雙重獎勵」是,請in做禮拜時記錄牧師ê講章,我每週閱讀並評分,一季了後,「特優」者頒hō͘ in三百元ê文具禮券,「優等」者hō͘二百元ê禮券,一季ê中間只寫一pái ê mā hō͘伊「參加獎」50元禮券。為tio̍h呼籲家長ê關心kap投入,我tī禮拜中當場提問:「你ê gín-á ē-tàng聽bat koh記落來牧師ê講道,看有gōa chán!如果教會發hō͘伊三百元ê文具禮券,lín是m̄是願意相對koh再hō͘伊三百元來獎勵in?」會眾中有真chē人興奮回答:「願意!」並且露出滿足ê bî-bî-á笑。

為tio̍h hō͘少年人歡喜聽講道,我開始放棄「講道八股」,無koh用填鴉式ê講法,放棄一kóa oh bat ê字眼,若一定ài使用,mā選擇少年人聽bat ê字眼,譬如「釋放」改成「解脫」或「hō͘內心輕鬆一kóa」,「事奉」改成「為主服務」或「為教會做一kóa事」、「屬靈」改成「koh-khah接近耶穌」或「心靈koh-khah接近天父」等等。講道中,我mā常利用生活化ê實例或信仰偉人ê見證,甚至引用一kóa現代科技ê問題,引申到信仰或心靈上ê思考,少年人lóng聽bat,並且記錄得真好,自然就願意參加台語禮拜。

為tio̍h達到教育訓練ê目的,我每一個禮拜評改作業簿。一開始,因為iáu未養成習慣,in大部分寫兩、三chōa,siōng好ê mā寫六、七chōa,就寫bē落去。但是,我hō͘ îne分數lóng「真甜」,寫兩、三chōa ê得A-,寫六、七chōa ê得A 。一開始,in會kā我抱怨講:「牧師!阮聽m̄-bat,所以bē曉寫!」我講:「lín tú-tú開始寫,ē-tàng寫án-ne已經真好loh!」經過不斷鼓勵了後,大約五∼十週了後,lóng能tùi兩、三chōa進步到十chōa左右,siōng好ê是寫完整一頁。實施三年後,已經有人寫到兩頁,目前平均有八成ê少年人lóng能the̍h到A++ê成績。這表示in不但聽bat台語講道,而且ē-tàng掠tiâu重點記錄落來。有一位少年人參加學校ê資優檢定,老師所提出包羅萬象ê問題,伊lóng答得真好。母親問伊:「妳怎麼會曉回答?」伊講:「我做禮拜ê時若認真聽牧師講道就會答ah!」感謝主!伊成全了「語言」kap「教育」兩方面ê事工! 猴能騎腳踏車,九官鳥能講「來食飯!」,我相信,靠tio̍h信心kap毅力行事,上帝凡事lóng能,當然,台灣ê少年人一定能聽bat台語講道,除非咱事先就投降或對家己母語早就存有自卑感。

使用台語禮拜真chē好處:第一,祖孫三代同聚一堂做禮拜。這是我tùi美國人ê禮拜中觀察ê心得,如今mā實現tī家己ê教會中。目前,本會一堂禮拜lóng超過320人,只ē-sái講是上主ê憐憫kap恩典。有一pái,一位他教會ê執事(執業醫師)到我教會來做禮拜,伊講tī伊ê教會無法度享受chit種氣氛:(一)少年人kap in ê父母同在一個聖殿敬拜主;(二)少年人lóng專心聽道並做筆記。Mā因此,伊kúi-nā-pái滴落來感動ê目屎,有真chē家長mā不時tī禮拜中享受chit-ê份感動。

第二,有kóa教會實施華語禮拜,少年人就真難kap父母或祖父母同齊敬拜上帝。此外,當in習慣tī家己tī另外一個時空做禮拜ê時,無形中形塑in家己ê信仰kap風格,甚至漸漸建立另外一種kap父母無仝ê思想kap信仰文化。我常聽tio̍h某一kóa教會華語禮拜ê同工kap小會以及長執會意見bē合(ha̍h),甚至造成分裂,實在遺憾。 容我直言,華語禮拜ê另外一缺點是講師大部分m̄是牧師,因為若安排tī同一時段,牧師就無法度分身,只好請長老或執事去「代打」,大家lóng認為只要有「華語」就好,禮拜ê形式kap講道ê內容就m̄是hiah-ni̍h重要,soah致使漸漸忽略長老教會堅實而正統ê信仰。 第三,當無仝年齡層ê少年人lóng參加華語禮拜而且實施十年、二十年了後,真難想像教會ê大禮拜中會koh再使用台語。Hit時,使用台語禮拜ê信徒kap使用華語禮拜ê信徒之間,必然形成某一kóa程度ê隔閡,甚至造成信仰斷層ê現象。

鼓勵少年人參與台語禮拜,並m̄是完全無容允in tī教會使用華語,譬如tī團契中、野外活動中、或查經研經中,lóng thang跟tòe語言ê理解程度使用華語,或台語kap華語並用。

根據以上ê思考、觀察、實驗了後,筆者以siōng真誠ê心建議各教會ê牧長kap同工,若m̄是不得已,請mài開設華語禮拜。雖然,堅持hō͘少年人參與台語禮拜所beh付出ê精神kap時間lóng相對khah-chē;但是看tio̍h少年人kap教會ê融和kap成長,絕對m̄是一句「享受」或「成就感」所ē-tàng形容!畢竟,信仰教育kap事工發展lóng bē-tàng抄短路便宜行事,必須一步一腳印、長期耕耘落去!咱大家同齊來phah拚pah!