《《一位台灣女信徒ê自述》》

| | | 轉寄

第三章_5)開辦齒科診所

Hit當時ê頭城,除了阮兩人,iáu有另外兩个醫生—鍾啓芳醫師kah楊乾巽醫師。鍾醫師是長期tī台北市馬偕病院服務ê助理醫生,戰後chiah徙來庄kha開業。日本政府原本規定已經有正規學校畢業生teh開設診所ê所在,bēsái koh開設新ê診所,m̄koh chit’ê規定tī戰後ê混亂中soah起亂。楊醫師是日本興亞醫學館ê畢業生,m̄koh該校並無得tio̍h日本政府ê認可,所以伊本來kantaⁿ ētàng成做一个醫生助理,m̄koh,伊kah政府進行談判來得tio̍h一張乙種執照。換一句話講,嘉代是hit當時頭城唯一ê正牌醫生。

Hit時,頭城有一間齒科診所。何醫師是南部人,日本大學ê齒科畢業了後,來chia開業。嘉代kah鍾啓芳、何醫師ê年紀真接近,互相真投機;tī業餘ê時間kah暗時,in經常聚集做伙,無所不談。有一工,嘉代去破病ê何醫師in tau往診;伊患tio̍h嚴重ê肺炎。Hit當時是iáu未發現青黴素(penicillin)ê時,嘉代ê老父to̍h是因為仝款ê病症來往生。嘉代每兩點鐘去kā伊注射一pái;康復ê何醫師非常感謝嘉代ê親身治療。有一工,伊用lî’ákah載齒科診療椅kah各種設備,來到阮tau,講:「我kā夫人開業ētàng用tio̍h ê器械kah藥品lóng chhoân來tī chia,請你使用。」我接受何醫師ê好意,就kā人客間裝修,改做小型ê齒科治療室,了後tī嘉代大看板ê另外一pêng,掛一塊小看板,頂面寫「齒科東洋女子醫學士吳月娥」。