《《一位台灣女信徒ê自述》》

 | | | 轉寄

第一章 4）阿公吳萬成kah基督教信仰

作者 吳月娥, 台譯：Lîm Chùn-io̍k 2020.04.12

阮阿公吳萬成tī 1881年出世tī宜蘭郡頭圍庄ê sàn-chhiah家庭，排行次男，tī伊九歲，阿兄吳萬添11歲ê時，雙親過往。

當時tī台灣有teh流行pun sim-pū-á thang hō͘ ka-kī ê kiáⁿ做bó͘ ê風俗。阮阿祖有teh考慮伊兩个kiáⁿ ê未來，所以tī伊往生chìn前有pun兩个sim-pū-á；一个是萬添ê牽手，名叫游阿鳳；一个是萬成ê牽手，名叫李阿泉。In kan-taⁿ五、六歲ê時，to̍h被收養入門來做細kiáⁿ ê sim-pū-á。因為父母連續死亡，所以chit兩个kiáⁿ一定tio̍h直到in長大，而且有能力飼牽手ê時，chiah tńg來到in故鄉ê厝。 阿兄萬添11歲ê時，去tī街á ê一間雜貨á店工作，得到一kóa米糧來養飼伊ê小弟。阿兄疼伊ê小弟，小弟尊敬伊ê阿兄。Chit種美好ê兄弟疼支持阮kui个家庭。

萬成16歲hit年，發生一項事件；伊hō͘ 土匪掠去山頂。當時中國清朝ê台灣ē-sái講是無政府狀態。被勒索，要求五十日幣贖金ê阿兄萬添，為tio̍h伊ê小弟，四界走chông，m̄-koh卻無法度khêng到五十日幣。Tú-tio̍h麻煩ê萬添kā雜貨á店ê頭家拜託，講：「我kā你工作兩年，免薪水，請借我五十日幣。」就án-ne，伊真無簡單chiah chông-tio̍h贖金。Hông掠去土匪窟ê萬成，伊雙手ê大頭bú kah雙腳ê大頭bú hông縛tiâu-.leh，吊tī天pông頂面，實在有夠恐怖。佳哉tī in阿兄ê拚命努力之下，伊chiah ē-tàng安全得tio̍h釋放。

後來，萬成mā去做肉店ê gín-á工，tī 20歲ê時成做魚販á。當萬添mā開始tī市場賣豬肉ê時，in ê生活差不多穩定ā，兩人chiah kā故鄉ê阿鳳kah阿泉叫來，tī hit年ê農曆新年結婚。Hit時，游阿鳳17歲，李阿泉16歲。阿泉tī隔tńg年生阮老父，m̄-koh，阿鳳有娠無chē，kan-taⁿ tī五、六年後生一个cha-bó͘ kiáⁿ。後來，阿泉所生ê kiáⁿ中間ê兩个，tī戶籍登記做吳萬添ê大kiáⁿ kah二kiáⁿ。

吳萬成ê聲音真súi，tī娛樂場所真少ê hit當時，若有傳統ê漢樂、銅鑼、大鼓、品á kah絃á合奏所謂ê漢樂比賽，伊一定ē去參加，而且tī街á遊行。樂隊中間有一个聲音真好ê人，tī遊行中一直唱歌，hit-ê唱歌ê人to̍h是阮阿公吳萬成。伊身材koân大，生做好看，kiám-chhái有真chē cha-bó͘ gín-á teh意愛，m̄-koh，阮阿公是一个聖人君子，一生kan-taⁿ愛m̄是美人ê阿媽，而且創建一个有十个kiáⁿ兒ê家庭。

Hit年，萬成tú chiah 30歲。伊做魚販á經過頭圍公學校附近ê時，看tio̍h榕樹ê樹蔭下聚集真chē人，tī中心ê所在，有一个紅頭毛ê外國人teh phah拚講話；萬成mā因為好奇心行óa來。

「親愛ê朋友，今á日阮帶來一个好消息hō͘ lín；我來kā lín紹介一位創造天kah地，而且創造咱人類ê上帝。上帝講：『阮照阮ê形像創作人類，來治理海洋中ê魚、天頂ê飛鳥、cheng-seⁿ、地chiūⁿ所有ê野獸，以及地chiūⁿ所有ê生物。』上帝照ka-kī ê形像創造人，to̍h是照上帝ê形像創造男kah女，koh祝福in講：『Tio̍h生湠真chē，充滿tī地上，來贏過一切，mā tio̍h治理海裡ê魚、天頂ê鳥kah地上一切會振動ê活物。』上帝用土粉，照上帝ê靈造人ê形像，人ē-tàng有chiah-ê靈魂，而且ē-tàng控制任何動物。上帝to̍h是疼，祂chiah-ni̍h疼世間人，甚至kā祂ê獨生kiáⁿ賜hō͘ 世間人，這是因為所有信祂ê人lóng ē得永生，bē滅亡。」 吳萬成聽tio̍h伊從來m̄-bat聽講過ê「創造咱人類ê上帝」chit句話，kah-ná去hō͘ 雷公摃tio̍h，大驚一tiô。咱台灣人到taⁿ為止一直teh祭拜ê神靈，kám m̄是hiah-ê以前ê偉人？....Ǹg望聽koh khah詳細，soah會了後，萬成決定beh求教。

Hit-ê紅頭毛ê外國人是一位牧師，叫做馬偕博士；伊是1871年tùi加拿大一个人來海外傳教，tī 1872年tùi打狗（高雄）坐船到台灣北部ê淡水chiūⁿ陸，而且用hia做基點開始傳福音，後來koh tī淡水建立神學校、中學kah女學校。淡水女學校mā是我ê母校，台灣前總統李登輝先生mā是淡水中學出身。馬偕牧師mā tī淡水開設一間病院號做偕醫館；chit-má tī台北市ê馬偕病院是teh記念馬偕牧師。馬偕牧師致力tī台灣ê基督教傳教，koh kah一位五股坑ê cha-bó͘ gín-á張聰明結婚。我teh讀淡水女學院ê時，淡水中學ê校長to̍h是馬偕博士ê大kiáⁿ偕叡廉。

阮阿公一定是充滿上帝ê聖神，受tio̍h in ê教示感動，所以就án-ne進入信仰ê追求。Tio̍h算受tio̍h伊siōng敬疼ê阿兄反對，伊chit種宗教信仰mā是bē搖choah；準講生涯中tio̍h kah四kho͘ 圍ê人作戰，伊mā是一直盡力做上帝ê忠實奴僕。

萬成37歲ê時，伊kah阿兄萬添聯手tī頭圍庄車頭前購買土地，而且起造三棟厝宅。萬添koh tī khah對面ê所在買一塊koh khah大ê土地，而且開設一間建材商店。兄弟兩人就án-ne分開tòa；三棟厝宅中間ê兩棟屬tī萬成，一棟屬tī伊ê阿兄萬添。萬成kā中央hit棟厝宅提供做頭圍基督教ê禮拜堂；我tùi三、四歲to̍h開始讀ê主日學，to̍h是tī chit間禮拜堂。 進入基督教信仰chìn前，萬成為伊ê kiáⁿ號名ê時，因為ǹg望in將來ē-tàng成做一个好額人，所以大kiáⁿ號做來發，二kiáⁿ號做金隆，三kiáⁿ號做金枝，四kiáⁿ號做金水，五kiáⁿ號做金福；長女號做金鸞(出世後無gōa久to̍h hông做養女，m̄-koh因為養父母真sàn-chhiah，致使tī她14歲ê時beh kā她koh賣hō͘ 別人，所以，阮阿公阿媽koh kā她買tńg來）。六kiáⁿ號做天賜，伊kan-taⁿ比我大一歲，m̄-koh，伊是阮阿叔。Hit時，阮阿公已經入教，伊想講kiáⁿ兒是上帝賞賜ê禮物，所以chiah kā伊號做天賜；七kiáⁿ mā號做天來。續落來是一个cha-bó͘ kiáⁿ，號做仁愛，想beh hō͘ 她成做一个有溫柔koh有疼心ê cha-bó͘ 人。Siōng尾ê屘á-kiáⁿ號做天寶。天賜kah天寶後來成做牧師，kā in ê一生奉獻hō͘ 上帝，tī各地建立教會，為上帝ê教示teh奮鬥。

吳萬成是頭圍基督教會ê頭一任長老，伊對福音佈道非常熱心，邀請gâu講道理ê牧師來開佈道會。Tùi阮細漢ê時開始，阮to̍h跟tòe teh phah tùi台北買tńg來ê大鼓ê阿公ê kha脊後，ná se̍h街ná大聲hoah講：「來信耶穌，來信耶穌，chit-má來信耶穌，chit-má來信耶穌，chit-má來信耶穌。」，招人來參加佈道會。 阮阿公是一位模範基督徒，伊無pok薰，kan-taⁿ tī暗時有tang時á ē tī厝裡lim淡薄á酒，從來m̄-bat醉過。伊ê個性冷靜，我m̄-bat看過伊面紅kòng-kòng ê受氣。顛倒是阮阿媽真ài受氣，有時ē蹧躂她ê sim-pūkah阿公。M̄-koh，阿公從來m̄-bat kah她對chhiâng，mā bē恬恬tùi阿媽ê面前雄狂走開。

阮阿公有一个公認ê好聲音，親像前述，伊是台灣樂團ê歌手，m̄-koh，成做基督徒了後to̍h辭掉hit-ê職務。雖然人ē-tàng tī四、五間厝hit pêng to̍h聽tio̍h伊ta̍k禮拜tī聖歌隊唱歌ê歌聲，m̄-koh tī伊kah人交談ê時，伊ê聲音卻確實真溫和。伊受tio̍h頭圍庄人人ê尊敬，所以bat當選做頭圍庄第七區ê保正（區長），mā bat擔任庄ê調解委員。

阮阿公七十歲ê時患tio̍h大腸癌，到台北接受手術。因為癌細胞已經擴散，醫生甚至無法度kā開刀ê孔嘴thīⁿ好勢，醫生講：「你已經chhun無三工ê活命ā，tio̍h緊辦退院。」Τńg到厝ê時，阮翁嘉代真輕手kā伊ê孔嘴thīⁿ合，koh ta̍k工lóng真注意kā伊治療。Tī阿公本身堅強ê宗教信仰ê幫贊之下，伊漸漸康復，而且體重增加，ē-tàng做ka-kī ê tāi-chì，甚至kha脊phiaⁿ ē-tàng phāiⁿ一百斤ê白米。伊kah-ná奇蹟康復了後，tī續落來ê五年中間，全力投入各地去傳福音，歡歡喜喜teh過日子。