《各各他e5目屎--苦難得安慰》

| | | 轉寄

上帝ê疼痛(愛)kap痛疼

上帝ê疼痛是tùi伊ê痛疼來表現,通過伊ê受苦、受死、受棄絕、受誤解來表明伊ê愛(疼痛)、伊ê接納、伊ê啟示。所以十字架是上帝痛疼ê記號,也是伊疼痛(愛)ê表明。無有足深ê痛疼,就bē當表現真強ê疼痛(愛)。今á日,咱會當瞭解上帝ê愛(疼痛)是因為十字架,各各他ê十字架ê痛疼。因為伊為咱受了chiah-ni̍h大ê痛疼,所以咱才知影伊ê愛(疼痛)真大。但伊所受ê痛疼,是啥人會真正瞭解呢?獨獨有受過真深ê痛疼ê人,才會當體會,也才會真正tam tio̍h上帝ê愛(疼痛)。

譬如來講,老母ê愛(疼痛)是由伊生產、扶養ê(痛疼)來表現。忍受ê痛疼愈大,表現ê疼痛愈大,愈有疼痛愈會忍受痛疼。聖經用上帝久長忍受人ê背約、放縱、無知,來講說伊ê疼痛,所以若無瞭解上帝這種痛疼,就無法度確認上帝ê疼痛(愛)。最後上帝只好以十字架,這個有形ê記號來表明伊ê痛疼,人才真正清楚伊ê疼痛(愛)有外大。

Tān-sī今á日,人對疼痛(愛)無法度瞭解,因為人無願意體驗痛疼。今á日人ê愛(ài),是一種ê慾望,是消費者ê心態。無kah意ê婚姻,隨時會tàng棄絕;無kah意ê關係,隨時會當斷絕。由痛疼去表現疼痛(愛)ê藝術 kap情操,tī人ê中間已經消失,因為an-ni,對上帝疼痛ê瞭解ê能力也喪失。對上帝ê疼ê瞭解,也只建立tī消費者ê心態。上帝必須是一位「有應公」,會hō͘我成功、豐富、家庭舒適、教會增長,才是一位有疼痛(愛)ê上帝。Àn十字架去瞭解ê上帝,已經離咱真遙遠,真生疏,甚至看做奇怪。有人甚至以受苦是無見證、無上帝同在ê記號。認為聖神ê同在,應該是滿有能力,滿有恩賜,滿有成功,無應該有失敗、痛苦悲傷、流目屎ê情形。

其實,滿有聖神同在ê時刻,通常是忍受苦痛ê時刻。舊約ê先知得tio̍h上帝靈ê同在kap氣力,是看見上帝選民beh面對ê苦痛;是看見上帝苦痛ê心情。所以家己也是一位苦痛ê先知。親像何西阿以婚姻苦痛ê經驗,來體會、表達上帝ê痛疼kap疼痛。以西結十六章,先知也用相kāng ê比喻來描寫。每一位先知lóng忍受tio̍h非常ê痛苦,體會tio̍h上帝ê苦痛,才講會出上帝ê疼痛(愛)。耶穌tī曠野ê試探,聖神ê同在,是忍受饑餓,撒旦ê譏刺,權力ê引誘。司提反聖神充滿ê時刻是hō͘石頭tìm死。Tān-sī伊跪落去大聲喝講:「主ah,莫得用chit-ê罪歸tī in」(徒七60)。Tī痛疼ê中間,講出上帝ê疼痛(愛)。

因此,當人拒絕痛疼ê時刻,就是拒絕瞭解上帝疼痛ê機會。保羅先生講:「既然做kiáⁿ就做後嗣,就是做上帝ê後嗣,kap基督同做後嗣;咱若kap伊同受苦,是beh hō͘咱kap伊同榮光。」(羅八17),使徒彼得講:「因為lín受召本是beh án-ni;因為基督也替lín受苦,留模樣hō͘ lín,beh hō͘ lín tè伊ê腳步;」(彼前二21),耶穌講:「人若服事我,就tio̍h tè我;我所tī-teh ê所在,服事我ê人亦beh tī hia;人若服事我,我ê父beh對重伊。」(約十二26)。人 beh瞭解、體驗上帝ê愛(疼痛)只有背十字架來跟tòe伊,行過各各他,tùi耶穌基督ê受苦痛kap家己肯受苦痛ê心志來領受。(彼前四1、12)