《宋澤萊新著《天路拾穗》台譯版》

 | | | 轉寄

第一部：稱義得救_主題6：放棄「因信稱義」教義ê後果

作者 宋澤萊 2026.02.08



第一部 稱義得救


主題6：放棄「因信稱義」教義ê後果

我bat試想：m̄免siuⁿ看重「因信稱義」ê教義lah！橫直它只是開始信ê階段ê tāichì，任何信耶穌ê人，lóng已經被稱義à。只要ētàng kui世人維持一貫ê信仰，到siōng尾，當末世來臨ê時，in一定ētàng koh活，ētàng來到新天新地，ētàng進入新耶路撒冷聖城。這是無m̄ tio̍h，是完全thang確信ê。

像chiahni̍h簡單ê道裡，iáu有啥物好講leh？你若m̄講，別人iáu ē認為你ê基督教修養高深莫測；你一講出來，顛倒hō͘人摸清楚你ê底細，知影你真淺薄。別人ē講：「原來你kah信基督教ê庄kha阿婆仝款，tī基督ê教義裡kantaⁿ知影一直teh信，而且kā『信耶穌』chiahni̍h簡單ê tāichì，當做基督徒siōng koân ê道理，實在是淺薄kah驚人！」

當然，的確是ánne，「因信稱義」實在無gōa chē道理thang講。當你信耶穌，上主to̍h kā終極ê救恩hō͘你，一點á都bē虧待你。等於是講你做世界siōng bē食力ê tāichì（其實，你只要坐tī hia無振動to̍h ēsái）；m̄koh卻得tio̍h世界siōng寶貴ê物件（贏過得tio̍h純金打造ê一座光彩城池）。

所有ê事實kantaⁿ tī chia，所有ê道理mā kantaⁿ tī chia。每一个無智識ê庄kha阿婆信徒mā lóng知影chitê道理，he iáu有啥物thang koh再講ê leh？

M̄koh，當我想tio̍h一旦放棄「因信稱義」所帶來ê後果ê時，to̍h koh m̄敢肯定「因信稱義」，hiahni̍h無值得講à。它kahná ē致使基督教信仰進入另外一个拋荒時代oh！狀況ê嚴重性kiámchhái ē超過咱ê想像之外oh！

放棄「因信稱義」ê道理ê後果是ánne ê：

1. Tāi先信徒會放棄對基督ê信仰，另外chhōe耶穌以外ê其他信仰： 「因信稱義」ê「信」tī《舊約》裡當然mā有一定ê規範，m̄是隨便亂信，m̄koh tī chia咱無beh談。Tī《新約》mā有智識內容上ê規範，ánne chiah是咱beh談ê。咱一般信徒lóng知影tī《新約》，siōng廣義「信」ê內容是teh指相信《四福音書》裡ê耶穌各種言行；koh再狹義一點ê內容to̍h是teh指《使徒信經》hit類ê信經所講tio̍h ê耶穌一生；siōng狹義ê內容是teh指「信耶穌死去koh活」chit項tāichì。總講一句，信耶穌to̍h是稱義ê源頭，應該kā耶穌khǹg tī信仰ê siōng核心。保羅、馬丁路德á是加爾文mā lóng做過chitê規範（註1）。所以tùi無論tó一方面來看，咱ê「信」lóng是用「信耶穌」做基礎，kantaⁿ tī chitê基礎頂面，咱chiah比較khah有贏面。「信耶穌」ēsái講是咱得救ê siōng好門路。〈約翰福音〉14章6節耶穌講：「我to̍h是道路、真理、性命。」是siōng有力ê保證。假使咱無法度堅持「因信稱義」，ánne to̍h kiámchhái ē放棄對耶穌ê信靠，轉來立基tī五花十色ê其他信靠頂面，chit時咱ê「信」kiámchhái to̍h ē落空，就ánne失去救恩。

2.其次是信徒ē轉向以行為稱義，失去新教ê精神：

因為放棄「因信稱義」ê確認，咱得救ê標準to̍h ē親像一般ê宗教，落tī行為論上，siàu想beh用行為稱義。Chit時，咱基督教to̍h ē tńg去宗教改革chìn前ê天主教信仰，siàu想beh用善工，用苦修kah用贖罪券khah ē得救；甚至構想一个死了後ê「煉獄」世界，強調講tio̍h算已經得救ê人，mā tio̍h tī死後ê煉獄中hêng清伊所有ê小罪過，siōng尾chiah ē來到天堂。Siōng hō͘人恐怖ê，to̍h是tī罪頂面大做功夫，規範出大大細細ê罪，ài咱盡力去悔改，去告解，m̄koh事實上罪又koh是hêng清無夠額，最後帶來hō͘ 咱信仰ê負擔，陷落去一片幻暗ê信仰世界裡，m̄nā違背《聖經》ê道理，mā無法度hō͘人得tio̍h gōa chē好處。

3.Koh來是信徒組成ê教會慢慢á轉向嚴重ê階層分化：

因為無法度認知「因信稱義」是一種信徒真容易得tio̍h ê恩典，ēsái講是凡若真信徒tī得救上人人有份；所以教會ê信徒to̍h ē tī善工、苦修、神跡顯現上做競賽。掠準ētàng加做善工ê人、ētàng苦修ê人、ētàng顯神跡ê人，to̍h認為in比較khah ētàng得救；無法度加做善工、苦修、顯神跡ê to̍h比較khah bētàng得救。到siōng尾當然變成神職人員、khah有聖經智識ê人、苦行隱士、行神跡、有錢ê人地位khiā tī高層，其他ê人to̍h漸漸hông看做khiā tīkē ê地位。所以教會裡to̍h失去「信徒平等」ê活氣，kā「信徒lóng祭司」ê原則kui个hiatka̍k去，to̍h陷落去嚴重ê階層分化中，虛假kah欺騙to̍h氾濫成災tī教會內面，變成一个討厭ê集團à。這是無論án怎都真oh承受ê結果！

4. Koh來是致使信徒tī宣教上ê軟chiáⁿ無力：

因為信徒hiatka̍k「因信稱義」ê道理，to̍h bē明白事實上伊將來tī進入新天新地chit項tāichì有份，事實上伊chitmá已經kah chitê世界ê人隔了一條大坑，kah一般未信ê人已經有bētàng量ê距離，chitê大坑kah距離是用深kah bētàng測ê地獄深淵隔開。信徒iáu掠準伊kah一般未信ê人無gōa chē差別，因為看起來伊tī人品上、tī學問上、tī修身頂面無比一般未信ê人高明。To̍h tī chitê誤認下kha，伊m̄敢叫未信ê人來信耶穌，有時提出要求ê時mā軟chiáⁿ無力。你看！因為kā「因信稱義」ê道理埋無去，信徒to̍h長期處tī chitê軟chiáⁿ ê狀況下，對伊個人ê靈命lóng無一點增長作用，這tú好中tio̍h魔鬼ê詭計，gōa ni̍h'á可惜！

5. Siōng尾是hō͘教會ê聚會變成民間ê拜拜：

因為「因信稱義」ê教義是kah得救（也to̍h是末世論）整合做伙ê，它說明了咱信仰ê最後目的。一旦kā它hiatka̍k，信徒to̍h bē記得伊信仰上ê終極目標。大家m̄知信耶穌最後目標是ǹg望耶穌kā咱短暫ê此岸khǹg tī到永生ê對岸，是ǹg望有一个永遠得勝ê日子來到。而且chitê得勝，tī咱tú信耶穌ê時已經預示被完成à，咱當teh等待hitê 暫時隱密偏僻ê日子被phah開而已。咱ê敬拜lóng應該khiā tī對chit件to̍h是teh beh來臨ê大事ê感恩頂面ê，應該tī chitê救恩下kha唱歌oló，遠看súisúisúi遠景ê來到。因為bē明白chitê道裡，to̍h回頭過來，掠準信耶穌to̍h kah拜媽祖無兩樣，to̍h只是乞求thàn koh khah chē錢，庇祐身軀平安，調解夫妻糾紛，hō͘ gín'á ê功課進步……之類ê雜事。致使所有ê講話，lóng圍困tī現實ê功利上。Kachài tú開始，因為畢竟信耶穌mā有chitê功效，加上信徒之間畢竟iáu ētàng彼此關懷；m̄koh久了後，聚會to̍h充滿短視ê功利氣氛，á是加重彼此ê野心，á是有增加彼此ê負擔，hō͘人懷疑聚會ê實質意義，掠準進入一个買賣ê市場，實在hō͘人真心煩！

我所知影ê這五个現象，m̄是一種猜想，卻是tī目前真chē信徒身軀頂面kah教會內部看tio̍h ê，chiahê狀況真正真hō͘人困擾。我認為這是「因信稱義」道裡ê被埋沒所致。Mā是所以因信稱義ê道理有必要多多宣揚，ǹg望tī混亂ê基督信仰中，ētàng起一kóa激濁揚清ê作用！ 註1：保羅講：「 所以，各位兄弟姊妹，ánne lín應該知，赦罪ê道理是tùi chit位耶穌傳hō͘ lín。 摩西ê律法bētàng hō͘ lín得tio̍h稱做義，所有信靠耶穌ê人lóngē得tio̍h稱做義。」（使徒行傳13：38－39）；而且講：「你若用嘴告白耶穌是主，心內mā相信上帝hō͘祂tùi死人中koh活，你to̍h ē得tio̍h拯救。因為人若心信to̍h ē得tio̍h稱義，koh若用嘴公開表明，to̍h ē得tio̍h拯救。經典有ánne講：「信祂ê人lóng bē tú tio̍h失望。」偤太人kah外邦人lóng無差別，因為in有仝一个主，to̍h是萬民ê上帝，祂ē大大賜福hō͘所有求叫祂ê人。因為經典有記載：所有求叫主ê名ê人，lóngē得tio̍h拯救。」（羅馬書10：9─13）。

馬丁路德講：「信hō͘人稱義，因為它掠tio̍h基督。」（見阿爾扥伊玆原著‧段琦kah孫善玲合譯：《馬丁路德神學》〈台北：中華信義神學出版社，1999，頁320〉）koh講：「只有基督chiah是咱持有ê唯一有價值ê財富，是咱hông稱做基督徒ê唯一理由。無想beh認bat任何ê主──其他ê á是神聖。」（同上書頁311）koh講：「人tī基督以外chhōe bētio̍h上主，伊to̍h是命令升到chiahê天ê頂面á是落去到地獄裡，á是天邊地極mā chhōe bētio̍h。」（見克爾編定‧王敬軒譯：《路得神學類編》〈台北：道聲出版社，2000〉頁55）。

加爾文講：「我beh宣布，除非人持有基督（這是上主所賜無法度用言語來表達ê福分）若無，無人ētàng被稱義。」（見加爾文原著‧加爾文基督教要義翻譯小組譯：《基督教要義》〈台北：加爾文出版社，2007〉頁610）koh講：「人ê所以ētàng稱義是因為信心接受ê是基督。」（同上書頁607）。 ──2010、05、22貼tī《基督教通訊》