《宋澤萊新著《天路拾穗》台譯版》

 | | | 轉寄

第二部：聖靈灌AK_主題10：你mā ētàng教人講方言（靈語）！_3

作者 宋澤萊 2026.03.22




第二部 聖靈灌ak

主題10：你mā ētàng教人講方言（靈語）！_3

3）意外學ē曉教導別人講方言

2004年，仁宗牧師、成德夫婦、世勛兄tiāⁿtiāⁿ來阮tau聚會ê時，to̍h是我學ē曉教人講方言ê開始。第一个hō͘我教導ētàng講出方言ê人to̍h是世勛兄。

Hit時，阮聚會tiāⁿtiāⁿ講tio̍h講方言chit項tāichì，雖然當時信義會對信徒講方言chit項tāichì採取保守ê態度，m̄koh按照阮ê經驗，講方言對靈命ê成長有無比ê效力，當阮做伙祈禱ê時，mā tiāⁿtiāⁿ用方言祈禱。

所以就ánne引起iáu bē曉講方言ê世勛兄ê興趣。有一pái聚會ê時，世勛兄to̍h講伊想beh學方言，ài阮教伊。

Hit當時，方言講kah比較khah一流ê人，是我kah成德兄。M̄koh成德兄所以ē曉講方言ê原因，並m̄是來自念頌「哈里路亞」chit句oló詞；伊是經過一位新加坡佈道家ê hōaⁿ手，忽然間講起方言。也to̍h是講聖靈經過hit位佈道家ê手，傳達到承德兄ê身軀頂，伊因為ánne忽然ē曉講方言。伊講方言ê能力無親像真耶穌教會ê信徒，一定tio̍h辛苦念頌「哈里路亞」得tio̍h ê；換話講̄，伊m̄免學習to̍h ē曉講方言à。既然m̄是學習來ê，to̍h bô啥可能知影教導他人講方言ê方法！所以我to̍h自告奮勇講：「我來教lah！」

講實在話，hit當時我m̄是真有自信，因為我是經過真chē年奮鬥chiah ē曉講方言ê，心內知影講方言m̄是hiahni̍h簡單。M̄koh，既然世勛兄想beh學習，我to̍h應該教伊，tio̍h算當場無法度講出方言，以後mā thang按照我教ê方法，kakī加khah chē練習，到siōng尾mā一定ētàng講方言。

我先kā世勛兄講：「方言是tùi『哈里路亞』chit四字轉換過來做ê，當咱kā chit四字用極緊ê速度大聲連續念頌，到siōng尾，咱ê語音to̍h ē看起來霧霧無明；koh再加快速度，咱ê嘴舌to̍h ē捲起來，講出一種咱所無法度理解ê話。咱應該tī心內堅定認為我ētàng講出天使ê話語；唯一ài做ê動作to̍h是無所驚畏來大音量，而且加快速度來念」

我koh kā伊講，當伊念頌「哈里路亞」ê時，我ē一再hōaⁿ手tī伊ê頭殼頂面，當我hōaⁿ手ê時，伊to̍h加大音量、增快速度。

為tio̍h beh hō͘伊知影方言是啥物，我先示範一系列ê方言hō͘伊聽。我講只要頭起先發出一个母音，m̄管是A、E、I、O、U……ê中間任何一个，我to̍h ētàng講出一話句，毎話句lóng無仝，我mā m̄知in ê意思，m̄koh in ê共同點to̍h是舌音特別chē，因為hit kóa話主要是tùi嘴舌震動產生ê，嘴舌是講出方言ê秘密所在。我詳細示範講方言hō͘伊聽。

伊就ánne開始念起「哈里路亞」chit四字，我to̍h hōaⁿ手tī伊ê頭殼頂面，鼓勵伊加大音量，加快速度。為tio̍h無beh hō͘伊失去動力，我to̍h tī伊ê身邊做「單音節ê方言祈禱」，我用「搭、搭、搭、搭」chit種極緊ê舌音tī伊邊á大聲祈禱，叫伊ētàng超越我ê聲音ê音量kah速度。Ta̍k pái伊ê念頌ê聲音細落來á是速度慢落來，我to̍h hōaⁿ手tī伊ê頭殼頂面，kā伊講：「聲音siuⁿ細！速度siuⁿ慢！加油！Koh再加油！」我ài伊忘情祈禱，phah拚祈禱，kahná一百米走飆比賽，向前直直衝！

差不多20分鐘了後，伊ê頭額有汗，m̄koh念頌「哈里路亞」ê語音霧霧無明ā，續接伊講出幾个舌音方言，雖然無滑溜，m̄koh聲音真大。我koh叫伊大聲繼續講，伊終其尾ētàng無停講出相連續ê方言à。

大功終其尾告成lah！

這是我教世勛兄講方言ê kui个經過，mā是頭一pái教人講出方言。雖然我kah伊lóng真食力，真無簡單chiah教伊ētàng講出方言，m̄koh我iáu是驚一tiô，因為伊竟然ētàng講出相連續ê方言，kah我本來預估ê無仝款，我本來認為伊無啥可能ē當場講出方言。

我to̍h想：「真奇怪！世勛兄竟然chiahni̍h緊to̍h ē曉講方言à。我phah拚10年以上chiah ē曉講方言，伊竟然20分鐘to̍h學ē曉，真正是無公平！」M̄koh，我真正為伊真歡喜。

就tī hit當時，我意識tio̍h：原來講方言一定ài有人tī邊á教導、鼓勵，一旦欠缺教導、鼓勵，靠kakī單獨練習想beh講出方言，一定ē變kah無比ê艱難！

第二pái教導別人講方言，是tī距離鹿港無遠ê「溪湖全人關懷中心（溪湖信義會）」，時間mā是2004年。

有一pái，仁宗牧師安排我去「溪湖全人關懷中心」演講，講啥物to̍h變成難題。當時，我對基督教教理完全m̄bat，tiāⁿtiāⁿ一開嘴to̍h知影kakī講m̄ tio̍h，根本to̍h無講道ê本事。我真想mài去，卻推辭bē掉。到siōng尾，我做冒險ê決定，想beh教溪湖ê信徒講方言。

我照常m̄是真有信心，mā m̄敢講用一點鐘ê時間to̍h想beh教導gōa chē人ētàng講岀方言。M̄koh若ētàng教岀一兩个人講方言，改變一兩个人ê靈命狀況，to̍h真滿意à。因為無論án怎講，講方言對靈命ê效果來講，比聽50 pái、100 pái ê演講khah好！

教導方言ê時間是禮拜日ê早起10~11點，場面kiámchhái比較khah大，來禮拜ê人超過20人以上，有人聽講我beh教方言，甚至tùi遠遠ê所在趕來聚會。我驚一个人應付bē去，因為ánne to̍h請世勛兄kah成德兄前來幫忙，ǹg望in ētàng協助我。

果然，前來「溪湖全人關懷中心」參加禮拜ê人共有21人，差不多lóng 是bē曉講方言，chit點顛倒有kóa hō͘ 我意外，感覺信義會siuⁿ過保守lah。

我準備一塊CD，內面大部分是祈求聖靈降臨ê歌，非常好聽。Tī開始教導chìn前，我先播送chiahê歌，慢慢á等聚會ê人全數到齊。Tī放送音樂ê時，我普普á發見聖靈kahná tī禮拜堂ê頂面樑柱間teh流動，hō͘我感覺有kóa beh醉去ê hit種感覺，信心因為ánne變kah真活動。

開始教導ê時，kah教導世勛仝款，ài in念頌「哈里路亞」ê聲音tio̍h趕緊，ài大聲；我ē hōaⁿ手tī in頭殼頂面，ē tī in ê耳孔邊祈禱；in一定tio̍h kah我競爭，看啥人ê念頌聲音比較khah大，比較khah緊。

當時，我使用màikuh（華語ê「麥克風」），hō͘我ê祈禱變kah比較khah容易。

我mā先示範一遍方言祈禱，ài in注意方言祈禱to̍h是舌音ê祈禱。

In ê祈禱一開始，我輪流一个一个為in hōaⁿ手，tī in ê耳孔邊祈禱，鼓勵in大聲koh快速祈禱。M̄koh人數實在siuⁿ chē，變kah有一點á oh應付，我kantaⁿ ētàng tī某人ê邊á停留一、兩分鐘to̍h離開，koh再換到另外一人ê身邊去，kahná田嬰點水。我就ánne kā ǹg望khǹg tī màikuh頂面，我一直用màikuh做「單音節ê方言祈禱」，hō͘「搭、搭、搭、搭」ê聲音響遍室內，我一直ài in大聲koh快速祈禱，一點á都無ài in鬆lēng落來！

10幾分鐘過了，我發見有姊妹開始teh哭，mā有人一直流目屎。當我行去in身邊ka看，to̍h聽tio̍h in已經講出方言。我koh khah phah拚，照順序幫每人hōaⁿ手祈禱，一直講in ê聲音siuⁿ細，速度siuⁿ慢；一tú tio̍h已經講出方言ê人，我to̍h kā伊講已經ē曉講方言ā，ài伊koh khah大聲祈禱。

一目nih久，30分鐘過去à，我發見ē曉講方言ê人jú來jú chē，有kóa人ê聲音非常大聲，而且kui身軀震動，非常進入狀況。

45分鐘了後，我個人已經感覺chih載bē tiâu，聲音變kah有kóa弱落來，人mā thiám loh，我to̍h宣布停止祈禱，結束chit場教導。

了後，我叫已經ētàng講岀方言（tī教導過程中hō͘我清楚認定ētàng講出方言者）ê人gia̍h手，共有7人，分別是蘇金河、謝世勳、朱霈榛、蘇超聖、陳玉玲、洪玉葉、陳艷紅。中間以蘇超聖ê聲音特別大聲koh標準。另外iáu有3人是我認為óa近ētàng講方言邊緣ê人（ētàng發出無流利ê舌音），分別是李永堵、周孟軍、廖耿儀。

收成超過我ê按算，竟然有chiahni̍h chē人當場學ē曉講方言，大概是有三分之一；換話講̄，三人中間to̍h有一人ētàng講出方言；koh khah何況iáu有一kóa人mā來到講方言ê邊緣。

Chit pái mā hō͘ 我驚惶憢疑無停。

另外，tī舊年，「鹿港信義會」成立無gōa久，我koh tī聚會中做伙教導四个人，hit中間有陳文吉、陳文吉ê老母、陳文吉ê牽手ētàng講出方言，時間差不多半點鐘，以陳文吉ê聲音特別大聲koh標準。Chit pái ê比例是四分之三。

Iáu有一pái是教洪淑卿姊妹講方言，時間大約只用10分鐘左右。

Koh tī王功教余季兄弟講方言，chit pái siōng緊，余季兄弟大概kantaⁿ用2分鐘ê時間to̍h講出了方言。