《宋澤萊新著《天路拾穗》台譯版》

 | | | 轉寄

第二部：聖靈灌AK_主題12：杜慶承kah宋澤萊tī面冊談方言祈禱

作者 宋澤萊 2026.04.19




第二部 聖靈灌ak


主題12：杜慶承kah宋澤萊tī面冊談方言祈禱

踏話頭：杜慶承目前tī北師大台灣台文所攻讀博士學位，靈糧堂ê主內兄弟。最近伊kah宋澤萊做伙做一pái方言祈禱，下kha是兩人tī面冊裡ê對話：

※
杜慶承：我kah宋澤萊老師是老師mā是朋友，平平是基督徒，昨hng下晡拜訪宋老師，伊帶領我學習方言祈禱。本來我感覺bēsái，m̄koh tī伊ê引chhōa之下，嘴舌快速震動，ētàng發出單音節ê連續祈禱。今á日早起操練ê時，我奉主耶穌ê名，祈求賜我方言祈禱ê恩賜，而且求主hō͘我冰冷ê手掌有暖流通過，約10分鐘，雙手手掌真正溫暖起來。同時為我ê牽手用方言祈禱，祈禱了後，我ê頭額to̍h流chhìn汗，真正真奧妙，感謝主！

宋澤萊老師歡喜來分享方言祈禱帶來ê平安喜樂，伊講：「對方言祈禱有興趣ê人thang chhōe伊。」宋澤萊老師ê長篇小說，親像：《血色夜婆降臨ê城市》、《熱帶魔界》、《天上卷軸（上）》以及短篇小說〈變成鹽柱ê作家〉，lóng是屬tī基督教書寫ê宗教小說。研究宋澤萊小說ê碩博士論文有10 gōa本，以《血色夜婆降臨ê城市》做例，大多數研究者認為是政治小說，khau洗台灣ê烏金政治橫行，m̄koh有一位研究者認為是宗教小說。（正月19日）

宋澤萊：慶承昨hng下晡來鹿港chhōe我，阮做伙做方言（靈語）祈禱。5分鐘之內，伊to̍h ētàng講出方言，聲音非常大聲標準，m̄nā ē曉講單音節ê方言，mā小khóa ētàng講出多音節ê方言，實在是靈恩ê奇才，若是伊ētàng ta̍k工lóng做方言祈禱，to̍h ē不得了，因為方言祈禱ētàng提升信心到一个koân度，to̍h ētàng產生醫病、趕鬼chiahê神跡。恭喜慶承受聖靈ê洗，ánne，伊以後ê基督教信仰歷程to̍h ē進入新階段à。（正月20日）

杜慶承：感謝主賞賜恩典，ētàng kah老師有chit段充滿神跡ê奧妙體驗，我ē ta̍k工操練方言祈禱，親近上主，領受聖靈ê洗，多謝老師，以馬內利。（正月20日）

宋澤萊：慶承新年快樂！（1 月22日）

杜慶承：祝老師新年快樂，主恩滿出來。我ta̍k工lóng操練方言祈禱，嘴舌ê震動真快速，m̄koh目前iáu是用單音節為主。（1 月22日）

宋澤萊：Ánne真好。方言祈禱是無法度偷食步ê，一定tio̍h一點鐘一點鐘累積，chiah ētàng產生強大ê信心效果，tháu放出種種ê神跡異能。多音節祈禱，請tòe影片內ê小姐做伙ánne祈禱to̍h ēsái。單音節祈禱力量強大，tháu放緊張、操心、憂鬱、疼痛ê功能真明顯。有一種腹肚喘氣法ê方言祈禱，若是採用chit種方法做方言祈禱， ētàng輕鬆自由發揮，連續祈禱三點鐘lóng bē感覺thiám。（1 月22日）

杜慶承：老師，目前我ta̍k工早暗lóng操練方言祈禱，m̄koh iáu是以單音節為主，tang時ētàng用多音節祈禱，kám mā是聖靈ê工作？（正月26日）

宋澤萊：應該是你ê動作，你必須動用你ê嘴唇kah嘴孔，kah一般講話仝款勇敢講話，to̍h ē變成多音節ê方言à。目前你並無繁複動用tio̍h你ê嘴唇kah其它部位，kantaⁿ動用tio̍h嘴舌ê頻繁跳動。（正月26日）

杜慶承：Tio̍h，目前確實是ánne，並無繁複動用tio̍h嘴唇á是其它部位。（正月26日）

宋澤萊：咱講話一定ē動用tio̍h嘴唇á是其它部位，若無，kantaⁿ ētàng講出單音節方言。（正月26日）

杜慶承：了解，多謝老師。（正月26日）

──2023、1、16貼tī《基督教通訊》