《宋澤萊新著《天路拾穗》台譯版》

 | | | 轉寄

第三部：聖靈內住篇_36【題目】Ē離開身軀ê to̍h m̄是真正「聖靈內住」！

作者 宋澤萊 2026.11.08






36【題目】Ē離開身軀ê to̍h m̄是真正「聖靈內住」！


聖靈內住to̍h是得救ê確實證據。祂是上主kā聖靈賜hō͘人，當做一種信徒將來定tio̍h ē得救ê證據，mā是上主hō͘人得救ê印記。將來末日審判來臨ê時，耶穌ài你the̍h出chitê證據hō͘祂看，chiah ētàng進入新天新地。若講iáu ē離開，he to̍h嚴重ā。比論講萬一tī末日審判ê時，聖靈tú好離開，he kám m̄是落入火湖地獄？若是ánne，聖靈自本to̍h bētàng講是得救ê「確實證據」ā，kám m̄是？M̄koh保羅tī伊ê〈以弗所書〉1：14講：「聖靈是得基業﹝得救﹞ê憑據！」

這to̍h是講，有一種狀況，聖靈是bē離開人ê身軀，聖靈hō͘人ê身軀永遠變成聖靈ê殿，這叫做「聖靈永住」，一般人lóng講是「聖靈內住」。Tio̍h算犯罪，祂mā bē離開，聖靈ē tī你ê內在壓迫你完全認罪悔改chiah停止。

另外，聖靈ê永住是聖靈beh hō͘信徒得tio̍h永遠ê性命是所做預備ê基礎工作，m̄免等到死了後，在生ê時聖靈to̍h ētàng賜hō͘你永遠性命，所以講，聖靈á是耶穌是「賜性命ê靈」。Chitê永遠ê性命to̍h是聖靈ê實質，也to̍h是「我是阿拉法，我是俄梅嘎」ê神聖性命。若是聖靈ē離開身軀，無法度永住，ánne將來永遠ê性命mā ē離開身軀，無法度永住，he to̍h慘loh！Hit位信徒kám m̄是to̍h ē成做有時有永遠ê性命，有時無永遠ê性命？He to̍h真艱苦心lah！

所以講，假使信徒ētàng被聖靈永住，變成聖靈ê殿，聖靈是bē離開hit位信徒ê。也to̍h是講，聖靈假使beh拯救一個人到底，祂to̍h ē永住。聖靈ētàng知影信徒ê過去kah未來，祂bē隨隨便便永住tī人ê身軀，除非chitê人是祂預定一定得救ê人！假使你真正是一定得救ê人，你犯重罪，祂都bē離開你ê身軀！

Koh來應該tio̍h知影，聖靈永住無一定ē hō͘人有講方言hit類ê屬靈恩賜，祂kah ētàng講方言、醫病、趕鬼chiahê恩賜無關係，祂ê來到非常溫和，bē叫你全身振動。祂ē先hō͘你ê石心變成肉心，叫你ê心軟化落來，ētàng注意聽祂ê指教。祂先hō͘你結聖靈ê果chí，koh來to̍h是一系列ê管教，包括認罪悔改，koh來to̍h是hō͘你永遠ê性命。這是聖靈內住ê神聖事工！

有人一直認為有聖靈ê九種恩賜to̍h是聖靈內住，這是m̄ tio̍h ê，he叫做聖靈灌ak﹝á是稱聖靈充滿﹞，m̄是聖靈內住。Ētàng講方言、做異夢、見異象、醫病、趕鬼ê屬靈恩賜是真了不起，m̄koh in共同ê現象是聖靈ē離開身軀，所以有真chē ētàng醫病ê神醫，一定tio̍h等待聖靈降臨，chiah開始kā人治病，是án怎leh？因為聖靈有時tī伊身軀裡，有時無tī伊身軀裡。Ētàng看tio̍h異象ê人mā是仝款，聖靈來to̍h看tio̍h異象；異象顯現soah了後，聖靈to̍h離開！

受聖靈灌ak á是聖靈充滿ê信徒，真chē人到siōng尾是bē得救，kah真chē ê哥林多信徒仝款。因為聖靈ē離開，聖靈to̍h無法度有一个穩固ê陣地，ētàng hō͘伊不斷治死身軀裡罪ê律，到siōng尾，假使聖靈無koh來，á是真少來，chit位信徒to̍h淪落入去被棄sak ê世界中！

咱一定tio̍h知影，「聖靈灌ak á是充滿」並m̄是「聖靈內住」，這是兩回事，mā是基督教界公認ê聖靈ê兩面作用。Tú bat聖靈ê人tiāⁿtiāⁿ kā in參插，kā in當做是一回事，siōng尾to̍h害了kakī，hō͘ kakī停tī「聖靈灌ak á是充滿」裡，縛腳縛手bē進前，á是kakī掠做滿足；到siōng尾m̄知iáu有一个koh khah koân境界ê「聖靈內住」thang追求。

Kantaⁿ知影「聖靈灌ak á是充滿」á m̄ bat「聖靈內住」ê人，ē看m̄bat保羅ê〈羅馬書〉ê第七章kah第八章，因為〈羅馬書〉第七、八兩章是講聖靈內住ê奮戰狀況ê，tùi輸陣到phah贏，清清楚楚親像一幅圖。〈羅馬書〉無法度用「聖靈灌ak á是充滿」來解說，特別是講方言ê現象來解說。可惜有某一个教會ê老大竟然用講方言ê經驗來解說〈羅馬書〉，伊所著ê冊to̍h m̄著一大堆！

我建議信徒對kakī是m̄是已經「聖靈內﹝永﹞住」，tio̍h ē謹慎評估。千萬m̄thang kā kakī評估過頭koân，ētàng為kakī保留一个thang追求進步ê空間，千萬m̄thang認為有屬靈恩賜，to̍h講啥物lóng bat，甚至講啥物lóng有。畢竟當今ê世界，五旬節教派大興，全球ētàng講方言ê人恐驚有千萬ê人數以上，chiahê ētàng講方言ê人，有真正「聖靈內住」ê恐驚bē超過幾千人！

──2019、04、0 8貼tī《基督教通訊》