《宋澤萊新著《天路拾穗》TOJ/台灣字版》 |
 |
 |
|
 轉寄 |
Chútê 10：Lí mā ētàng kà lâng kóng honggiân（lênggí）! _5
作者 Sòng Te̍klâi 2026.04.05
Tējī pō͘ Sènglêng koànak
Chútê 10：Lí mā ētàng kà lâng kóng honggiân（lênggí）! _5
5） Kàutō thajîn kóng honggiân ê honghoat the̍h tio̍h
Góa koh kā kàutō thajîn kóng honggiân ê honghoat chóng kat tī ēbīn,
A, lán ê honggiân lâichū liāmsiōng "Halélú'iah" chit sì jī. Chitê honghoat pēng m̄sī"Chin Iésu kàuhōe"ê to̍k chhòng, khiok sī tī Chin Iésu kàuhōe sêngli̍p chìnchêng, phó͘phiàn liûhêng tī Kitokkàu kài ê chi̍tê honghoat, púnsin to̍h sī chi̍tê tāichiòng sèng ê honggiân ha̍ksi̍p hoat. Inūi ū tāichiòng ê kenggiāmsèng, tûliáu chit sì jī ígōa, lán siōng hó m̄ thang ēng kîtha ê bûnjī.
B, Teh kà ha̍kseng honggiân chìnchêng, lāusu ittēng tio̍h sīhoān kóng chi̍t piàn phiauchún ê honggiân hō͘ i thiaⁿ, jîchhiáⁿ thêchhéⁿ i, honggiân náisī chi̍t chióng tōaliōng chi̍h im ê gígiân.
C, Ittēng ài thêchhéⁿ ha̍kseng ittēng tio̍h"tōasiaⁿ tha̍k","soktō͘ kín", ánne chiah ētàng choánōaⁿ sêngkong.
D, Kàutō ê lâng ittēng tio̍h tī ha̍kseng ê sinpiⁿ, kah i chòhóe tōasiaⁿ, khoàisok kóng honggiân.
E, Tī kòethêng tiong, ittēng tio̍h tiāⁿtiāⁿ ūi ha̍kseng hōaⁿchhiú, jîchhiáⁿ kó͘lē i, "siaⁿim ke khah tōa leh", "soktō͘ ke khah kín leh".
F, Tng ha̍kseng ētàng kóng chhut honggiân ê sî, engkai kó͘lē i kèsio̍k tōasiaⁿ kóng; tôngsî kèsio̍k pôephōaⁿ i kóng honggiân, ti̍tkàu kiatsok.
Chóng kóng chi̍t kù, lán chò lāusu ê lâng ittēng tio̍h chhinchū tī piⁿ'á kó͘lē ha̍kseng, thêchhéⁿ ha̍kseng, kektōng ha̍kseng, ánne, 5 huncheng, 10 huncheng to̍h ētàng kóng chhut honggiân. Chhianbān bētàng chísī kek tiāmtiām kántan hōaⁿchhiú, á sī hòngjīm sìntô͘ chi̍tê lâng tī chhù ni̍h tanto̍k ha̍ksi̍p, nā bô, ha̍kseng khólêng tio̍h 10 nî, 20 nî, 30 nî chiah o̍h ēhiáu kóng honggiân.
Chù 1, kìⁿ “Mákhó hokim” cha̍pla̍k chiuⁿ 16 chat.
Chù 2, kìⁿ "Sùtô͘ Hêngtoān" it chiuⁿ 5－9 chat.
