《宋澤萊新著《天路拾穗》TOJ/台灣字版》 |
 |
 |
|
 轉寄 |
Chútê：23 Ông Lêngūn kah Sòng Te̍klâi tâm Sènglêng ê koànak
作者 Sòng Te̍klâi 2026.08.09
Chútê：23 Ông Lêngūn kah Sòng Te̍klâi tâm Sènglêng ê koànak
Ông Lêngūn mn̄g：Góa ū chi̍tê kúinā nî ê giâugî siūⁿ beh tī chia chhéngkàu Sòng lāusu, chhiáⁿ lí ū êng ê sî thang ūi góa soatbêng, toshiā! Kúi nî chêng, ū chi̍t ūi Tiúⁿló Kàuhōe ê bo̍ksu teh ūi góa phòapēⁿ ê a'ché kîtó, Hu̍tkàu tô͘ ê góa mā khiā tī pēⁿchhn̂g piⁿ chù’ì thiaⁿ. Tī bo̍ksu kîtó ê sî, hutjiân ū kiônglia̍t ê tiānliû tùi góa thâukhak téng koànji̍p hengpak, sòachiap tī hengpak lāi sìkè cháuchông, góa hō͘ i tiān tio̍h, siojia̍t ê ba̍ksái ti̍t lâu. Nā m̄sī kiaⁿ khì kansia̍p kiáujiáu hiāntiûⁿ, góa chin siūⁿ beh chhut siaⁿ tōa khàu. Chit káng tiānliû kàu tējī kang chiah oânchoân siausit. Sūāu góa chhéngkàu bo̍ksu, bo̍ksu kóng sī Sènglêng kànglîm. M̄koh góa mā chhéngkàu chi̍tkóa Kitoktô ê tôngsū, in khiok kóng lóng m̄bat kengle̍k lūisū ê hiānsiōng. Góa siūⁿ beh chhéngkàu ê būntê jû hā：
1. Góa siū tiānkek ê hiānsiōng sī siáⁿmi̍h? Sèngkeng lāité kám ū kângkhoán á sī lūisū ê biâusu̍t?
2. Góa ē kámsiū tio̍h pī kiôngle̍k tiānkek, sī m̄sī inūi góa ê chōehêng khah tāng?
3. Chitê tiānkek hiānsiōng íāu kám ē kohchài hoatseng?
Sòng Te̍klâi tap：Ke̍k khólêng sī Sènglêng tùi téngbīn koànak lo̍h lâi ê hiānsiōng. Lí chitê kenggiām chin sêng góa chìnchêng pī Sènglêng tà tiâu ê kenggiām, kuiê lâng kahná tīchengkhì oe ni̍h kângkhoán, chin siojoa̍h, ba̍t kah bē thanghong ê hit chióng chengkhì, siaⁿsè kiaⁿlâng, lâng ē chin chūjiân kakī hoatchhut tōasiaⁿ ê honggiân（chi̍t chióng kah sîn kauthong ê chi̍him gígiân）, hiòng thiⁿ oló. Lí ê chōnghóng engkai sī píkàu khah chhián chi̍tkóa ê Sènglêng koànak kenggiām bô m̄tio̍h, inūi tongtiûⁿ ū bo̍ksu kîtó chò chèngbêng. Bînkok 50, 60 nî chóiū, Lo̍kkáng ū chi̍t keng kàuhōe tī tōa kelō͘ piⁿ’á ê kàuhōe chò lêngun pò͘tō tāihōe, kiatkó ū chin chē khiâ thihbé ê lâng（hui sìntô͘）tùi kelō͘ kengkòe, chi̍tê-chi̍tê poa̍htó tī thô͘kha, chin kú chiah khiā ún khí lâi, kèsio̍k khiâ chhia, che to̍h sī hō͘ Sènglêng phahtó ê hiānsiōng. Hiānchāi tī Tâioân, píkàu khah kiôngtiāu Sènglêng koànak ētàng kóng honggiân（lênggí）ê kàuhōe ū "Chin Iésu Kàuhōe", nāsī lí ū sîkan thang khì kàuhōe kah in tâm Sènglêng koànak kóng honggiân ê tāichì, chin chhùbī ê. Kohchài pó͘chhiong hôetap lí the̍h ê saⁿê būntê：
1. Sènglêng koànak tī "sèngkeng" ni̍h chin chē, siōng ūmiâ ê sī “Iôel su” 2：28, Chú kóng, "Íāu, góa beh kā góa ê lêng koànak hoānnā ū hia̍tkhì ê, lín ê kiáⁿjî tio̍h kóng īgiân, lín ê lāulâng ài chò ībāng, siàuliânlâng ē kìⁿ tio̍h īsiōng." íki̍p "Sùtô͘ Hêngtoān" 2： 1~4, "Gō͘sûncheh kàu, bûntô͘ lóng chūchi̍p tī chi̍tê só͘chāi. Hutjiân, tùi thiⁿténg ū hiángsiaⁿ lo̍h lâi, kahná chi̍t chūn tōa hong chhoe kòe, chhiongmóa in só͘ chē ê chhùthe̍h, koh ū chhùichi̍h chhinchhiūⁿ hóeiām hiánhiān chhut lâi, hunkhui lak tī in kok lâng ê thâukhak téngbīn. In chiū lóng pī Sènglêng chhiongmóa, ànchiàu Sènglêng só͘ sù ê kháuchâi kóngkhí pa̍t kok ê ōe lâi."（Chù：Ūsî Sènglêng koànak bô ittēng ē kóng honggiân.）
2. Sènglêng koànak kah chōe bô koanhē, che sī sîn ê intián.
3. Sènglêng koànak liáuāu, Sènglêng to̍h līkhui sengkhu a, chionglâi iáu ē ū koh chi̍t pái koànak ê kihōe, khólêng ē koh khah sēngtāi.
──2020, 12, 30 tah tī "Kitokkàu Thongsìn"
