《宋澤萊新著《天路拾穗》TOJ/台灣字版》 |
 |
 |
|
 轉寄 |
Ū phongphài ê Sènglêng kàng lo̍h lâi
作者 Sòng Te̍klâi 2025.12.07
Tē it pō͘, chhenggī titkiù 2） Ū phongphài ê Sènglêng kàng lo̍h lâi Téngbīn só͘ kóng chiahê tōlí, lóng sī liáuāu góa chiah bānbān'á liáukái ê; hit tongsî, góa siáⁿmi̍h mā m̄chai. Ēkìtit tāiiok chi̍t lépài liáuāu, koh tī ha̍khāu khòaⁿ “sèngkeng". Chit pái khòaⁿ “Chhòngsè Kì”, iā to̍h sī sèngkeng ê siōng thâuchêng kúi kù ōe, “sèngkeng “ sī ánne kóng, " Goânkhíthâu, SiōngChú chhòngchō thiⁿ kah tē ê sî, tē sī khangkhang hūntūn, chhimian ê téngbīn o͘àm; SiōngChú ê lêng ūnhêng tī chúibīn." Tng góa khòaⁿ tio̍h "SiōngChú ê lêng ūnhêng tī chúibīn" chit kù ōe ê sî, huisiông hoaⁿhí. Hutjiân, góa ìsek tio̍h “thianlêng kòa” kahná phahm̄kiàn khì, thâukhak téng khangkhang khì à, ū chi̍tê chin tōa ê le̍kliōng kàng lo̍h lâi, piànsêng chi̍tê khòaⁿ bētio̍h ê tōa "si̍tthé" khiā tī góa ê āubīn, kahná chíiàu chhiú chi̍t chhun kàu pōeāu, to̍h ētànḡ bong tio̍h I; m̄koh chinchiàⁿ khì bong ê sî, koh bong bē tio̍h. I chin koântōa, chhiongmóa jia̍tla̍t, chèngkhì límlím. Tongsî, góa ê sengkhu ū pēⁿ, chengsîn ithiòng bô hó, m̄koh pī chitê si̍tthé esin óakīn, soah kámkak kiâⁿlō͘ ū hong, kóngōe chin ū phekle̍k, chísī góa m̄chai chitê "si̍tthé" sī siáⁿmi̍h. Góa chin hò͘ⁿkî, siūⁿ beh kā chitê chōnghóng chhòng hō͘ i chhengchhó, chiū ánne chiūⁿmn̂g pàihóng, hiòng "Tēhng chūhōe só͘" ê kàuiú, "Chin Iésu kàuhōe" ê thoântō, " Lêngniûtông " ê bo̍ksu chhéngkàu chitê chōnghóng, suijiân góa chin jīnchin kóng che sī "oa̍ttho̍k sèngkeng" ê kiatkó, m̄koh tāikhài in ū in ê khiànsńg kah kuitēng, chóng sī o͘liông-se̍htoh, m̄ káⁿ chiàⁿbīn hôetap che sī siáⁿmi̍h. Góa kóng, "Lí khòaⁿ, I huisiông koântōa, hóejia̍t ū la̍t, chèngkhì límlím, íkeng tī góa ê pōeāu khiā chin kú à, khòaⁿ khí lâi iáu beh kèsio̍k lo̍h khì, chhaputto tī góa ê sengkhu āu pòaⁿê chhiúkó͘ hn̄g ê só͘chāi, lín ê kàuhōe ê lâng kám mā ū chitê kenggiām?" M̄koh, in iáu sī kóng chi̍tkóa bô koanhē ê ōe. Siōng bóe, góa iûgoân sitbōng tńgkhì chhùni̍h. To̍h tī tē saⁿ kang ê sî, góa ìsek tio̍h bētàng ánne hō͘ I ūi góa lôkhó͘, tôngsî, inūi I khiā tī āubīn, hō͘ góa ê sengoa̍h m̄ káⁿ sûipiān, kiaⁿ kā I sià bīnchú, góa to̍h kîtó kóng, "Góa íkeng chaiiáⁿ Lí sī siáⁿlâng, Lí to̍h sī Sènglêng! ūitio̍h beh hō͘ góa liáukái Lí ê chûnchāi, Lí chiū ánne tùi góa hiánhiān saⁿ kang, góa tio̍h kámsiā Lí. Khósioh góa iáu beh sengoa̍h lo̍h khì, ji̍tsiông sengoa̍h ū chin chē bô hongpiān, só͘í góa beh chhiáⁿ Lí līkhui, góa siūⁿ Lí ittēng liáukái góa ê ìsù." Ánne kóng oân, I kójiân siausit tī góa ê sengkhu āu, koh khah ánchóaⁿ to hō͘ góa kīn kīlî kámkak bē tio̍h à. Chitê kenggiām teh soatbêng siáⁿmi̍h leh? To̍h sī teh kā lán kóng, tng lí siongsìn "Iésu síkhì kohoa̍h" liáuāu, Sènglêng to̍h ē kàng lo̍h lâi ê chitê sūsi̍t. “Sùtô͘ Hêngtoān” bêngbêng-pe̍kpe̍k ū kìchài, tng chèng sùtô͘ chùbo̍k teh bāng thiⁿténg, ba̍ksàng Iésu chiūⁿthiⁿ ̄liáuāu, kàu "Gō͘sûncheh hit kang, in to̍h chūchi̍p tī chi̍tê só͘chāi. Hutjiân ū siaⁿim tùi thiⁿténg lo̍h lâi, kahná chi̍t chūn tōa hongthai sàukòe ê siaⁿim, chhiongmóa in teh chē ê kuiê chhùthe̍h. In koh khòaⁿkìⁿ hêngchōng chhinchhiūⁿ hóeiām ê chhùichi̍h, sòaⁿkhui, thêng lak tī múi chi̍tê lâng ê sengkhu téng. In lóng hō͘ Sènglêng chhiongmóa, ànchiàu Sènglêng só͘ sù ê châilêng kóngkhí pa̍tchióng ê gígiân lâi". Che to̍h sī sêngjīn "Iésu síkhì kohoa̍h" kah "Sènglêng kànglîm" chi kan ê ittēng tia̍tsū. Chòekīn, chitê lē koh hoatseng chi̍t pái, ū chi̍t pái chákhí, “Tâioân e bûngē" ê chúpian Ô͘ Tiôngsiông siansiⁿ lâi kàu góa ê chhù, i tùi Chhengtāi Chusìn giánkiùsó͘ pitgia̍p, chitmá ho̍kbū tī Hoàn’a tiānsìn, i mā sī bo̍kchêng Tâioân siōng iusiù ê siósoat ka chi it. Tng i thêkhí Kitokkàu, góa to̍h kā i kóng, "Kitokkàu ê ògī choânpō͘ lóng lôngsok tī 'Iésu síkhì kohoa̍h' téngbīn, i sī phahkhui thiantông ê chi̍t ki sósî. Lí kám ē siongsìn Iésu síkhì kohoa̍h?" I hôetap kóng, "Góa chá to̍h siūⁿkòe à, góa ētàng siongsìn." Tongsî, pēng bô sûisî hoatseng siáⁿmi̍h kîkoài ê tāichì, m̄koh tán i tńg khì liáuāu, kàu àmsî, i hoatkiàn kuiê lâng lóng piàn à, i tī tiānōe tiong kā góa kóng, "Góa hoatkiàn chitmá ê góa kah chìnchêng ê góa oânchoân bô kângkhoán loh, huisiông thóià chìnchêng ê kakī." Lán chaiiáⁿ, che to̍h sī Sènglêng khaisí tī i ê sengkhu téng teh tāngkang, hō͘ i khaisí ū hóekái kengsin ê hiānsiōng, i ê kū lâng íkeng bānbān’á teh káipiàn, choánpiàn chiâⁿchò ū sìngióng ê lâng. Góa to̍h kà i khaisí chò "Sènglêng ê kîtó", mā to̍h sī tī chhùi tiong liânsòa itti̍t chhengsiōng "Halélú’iah, oló Chú Iésu" chit kù ōe. Kiatkó, Sènglêng koh khah phongphài kàng lo̍h lâi, i sûisî kóng chhut honggiân; liáuāu, ta̍k pái lóng ētàng sú'iōng honggiân kîtó chi̍t, nn̄g tiámcheng kú. Lí khòaⁿ, che to̍h sī só͘ūi ê "lêng sé" ê kànglîm, tī kúi kang lāi, i m̄nā kengle̍k tio̍h "sìngióng" ê si̍tchè, jîchhiáⁿ kengle̍k tio̍h chi̍t chióng "hóeiām chhùichi̍h" ê sélé, hn̄ghn̄g chhiauchhut itpoaⁿ ê chìmlé. Sèkài siōng chin hántit ū chiahni̍h honghù ê biánhùi tiongtàutǹg, Iésu chi̍tsut'á to bô póliû, chò chi̍tē kā chiahni̍h chē ê inhūi pe̍hpe̍h sù hō͘ sìn I síkhì kohoa̍h ê lâng. Āu lâi góa mn̄g i, ūisiáⁿmi̍h i ētàng siongsìn Iésu síkhì kohoa̍h, i kóng, "Góa sī ūniōng útiū ê po̍kchà ê lílūn lâi kā i líkái." Che to̍h sī teh soatbêng, jīmhô lâng siongsìn Iésu síkhì kohoa̍h ê goânin sī bô kângkhoán, lí thang chhâkhó “sèngkeng", mā thang pîn lí ê tìhūi khì sukhó chi̍t hôe, ti̍tkàu siūⁿ thong liáuāu, to̍h chiâⁿchò chi̍tê Kitoktô, chinchiàⁿ kántan. Halélú’iah, lán engkai oló Chú Iésu, che itchhè ê kîchek êngkng lóng kui tī I.
