《宋澤萊新著《天路拾穗》TOJ/台灣字版》

 | | | 轉寄

Chútê 35：Koh chài tâm Sènglêng lāichū（éngchū）ê honghoat, phiatpō͘

作者 Sòng Te̍klâi 2026.11.01

Chútê 35：Koh chài tâm Sènglêng lāichū（éngchū）ê honghoat, phiatpō͘

Ū lâng kóng, hoānnā sìn Iésu, lânglâng lóng ētàng Sènglêng éngchū. Chitê kónghoat m̄tio̍h! Chìchió góa to̍h bô hoattō͘ ánne. Inūi góa píkàu khah pūn, ittēng tio̍h tán kàu sìn Iésu liáuāu 23 nî chóiū, Sènglêng chiah lāichū tī góa ê sengkhu ni̍h.

Mā ū lâng kóng, siūsé liáuāu, lânglâng lóng ētàng Sènglêng éngchū. Chitê kónghoat mā m̄tio̍h! Chìchió góa to̍h bô hoattō͘ ánne. Góa ittēng tio̍h tán kàu siūsé liáuāu 10 kúi nî chóiū, Sènglêng chiah éngchū tī góa ê sengkhu ni̍h.

Koh ū lâng kóng, ētàng kóng honggiân, ū ībāng īsiōng, lânglâng lóng ētàng Sènglêng éngchū. Chitê kónghoat mā m̄tio̍h! Góa seng ū ībāng īsiōng, liáuāu koh ētàng kóng honggiân, khiok ittēng tio̍h tán kàu kúinā nî liáuāu, Sènglêng chiah éngchū tī góa ê sengkhu ni̍h.

Kìjiân ánne, lán to̍h ài ū chi̍tkóa honghoat, hō͘ Sènglêng khah chá éngchū. Lán kántan lâi tâm chi̍tkóa honghoat. Tùi chi̍tê iáu kiâⁿ tī Thianlō͘ le̍kthêng téngbīn ê Kitoktô lâi kóng, khógiām kah bôaliān sī tōa ê. Bó͘ chi̍tkóa sìntô͘ suijiân íkeng chhenggī titkiù, m̄koh tī hêngûi siōng chóng sī bē ha̍h kakī ê ìsù, bó͘ chi̍tkóa hoānchōe ê ìliām kah hêngûi iûgoân kahná hūsin ê chhi, ânân khúnpa̍k kakī. Ūsî tī bó͘ chi̍tê Tōahó ê ê sîtōaⁿ, lán kahná kiâⁿ tī ji̍tkng tāitō chi hā, kámkak kakī ētàng sià lo̍h tāngtàⁿ, phuncháu tī sîn ê lō͘ ni̍h; m̄koh, tī bó͘ chi̍tê bô hó ê ê sîtōaⁿ, lán khiok kámkak bô la̍t lâi tùikhòng siâok, kámkak kiâⁿ tī chi̍t tiâu kah SiōngChú pōelî ê lō͘tô͘ tiong. Che sī inūi Sènglêng ūsî ē lâilîm tī sìntô͘ ê sengkhu téng, m̄koh ūsî Sènglêng ē koh līkhui ê iânkò͘, che to̍h m̄sī lāi（éng）chū ê hiānsiōng.

Tûliáu chinchiàⁿ Sènglêng lāi（éng）chū ígōa, Sènglêng sī ē téchiām līkhui sìntô͘ ê sengkhu. Peteloh Chiânsu 4：14 kóng, "inūi SiōngChú êngkng ê lêng, siông chū tī lín sengkhu téng." Só͘ūi ê "siông chū" to̍h sī "tiāⁿtiāⁿ tòa", ū àmsī ūsî bô thêng tī lán ê sengkhu téng. Iôhaneh Hokim 15：5, Iésu kóng," Góa sī phûtô chhiū, lín sī ki. Tiāⁿtiāⁿ tī Góa lāibīn ê, Góa mā siông tī i lāibīn, chitê lâng chiū kiat kóechí chēchē; inūi līkhui Góa, lín to̍h bô hoattō͘ chò siáⁿmi̍h." Só͘ūi "tiāⁿtiāⁿ tī" to̍h àmsī ūsî "bô tī". Siphian tē 51 phiⁿ 11 chat Tabi̍t kóng, "M̄thang khìsak góa, hō͘ góa līkhui Lí ê bīn; m̄thang tùi góa siuhôe Lí ê Sènglêng." Mā ū bêngpe̍k piáusī Sènglêng ē līkhui sìntô͘ ê sengkhu.

Chhòngsè Kì 6：3 kóng tio̍h SiōngChú, kóng, "Lâng kìjiân sio̍k hia̍tkhì, Góa ê lêng to̍h bē éngoán tòa tī i lāibīn." Sūsu Kì 16 chiuⁿ kóng tio̍h Sâmsóng pī thauthau'á chián khì 7 tiâu hoatsok liáuāu, i ê khùila̍t to̍h līkhui i, inūi "SiōngChú íkeng līkhui i ā!".

Tng Sènglêng lâi kàu sengkhu ê sî, tongjiân lán ētàng tittio̍h SiōngChú ê pangchō͘, kahná kiàn chiàn kiàn iâⁿ, kiàn kong kiàn phòa, lán ētàng téchiām khekho̍k chōehêng; m̄koh ittàn Sènglêng téchiām līkhui, lán to̍h koh hām lo̍hkhì ko͘ kun ê hùnchiàn tiong, kahná hām lo̍hkhì làm’á tē, ba̍kchiu kimkim khòaⁿ chōehêng, m̄chai beh ánchóaⁿ chiah hó.

Kìjiân ánne, lán kiùkèng tio̍h ánchóaⁿ chiah hó leh? He to̍h sī teh siū khógiām kah bôaliān ê sî, pekchhiat ǹgbāng Sènglêng ê éngchū, tio̍hsǹg tī chhun chi̍t kháu khùi ê sî, éngoán lóng m̄thang bēkìtit ū chi̍t kang Sènglêng bē kohchài līkhui góa ê sengkhu, I ē éngchū tī góa ê sengkhu ni̍h, tòa lâi itseng ê pêngan, hílo̍k, kiat chhut móamóa ê Sènglêng kóechí. Lán ánne ânân lak tiâu ǹgbāng, chiongkîbóe ū chi̍t kang, Sènglêng kójiân to̍h éngchū tī góa ê sengkhu ni̍h à.

Ǹgbāng, jímnāi to̍h sī lán ê chi̍t chióng honghoat, phiatpō͘!

Góa kí chi̍tê lē：Tī lán ê jînseng tiong, chóng ū chi̍tkóa tùi lán ū intián ê lâng, in tiāⁿtiāⁿ chiâⁿchò lán só͘ hoâiliām ê tùisiōng, siūⁿkhí chiahê lâng, lán ê simlāi to̍h chhiongmóa kámsiā kah unloán, tùi sèkài chhiongmóa sìnsim. M̄koh mā ū bē chió lâng sī hō͘ lán kámkak thònghūn, thòngkhó͘ ê lâng, chiahê lâng sionghāi góa, hō͘ góa chhinsin kámsiū tio̍h kahná hāmlo̍h tī tēga̍k itpoaⁿ ê thòngkhó͘, inūi chiahê lâng, góa chiū ánne sit khì tùi bíhó sèkài ê sióngsiōng, góa kámkak sèkài to̍h sī tēga̍k! Tāichì tongjiân chá to̍h íkeng kòekhì, m̄koh góa tùi chiahê lâng chóng sī bô hoattō͘ pàng bēkìtit. Te̍kpia̍t sī hit kóa sionghāi kòe góa ê lâng, tī góa ê sèⁿmiā tiong iûgoân ū ke̍k tōa ê sèle̍k, chi̍t siūⁿkhí in, góa to̍h thòngkhó͘ kah bē khamtit. Kitoktô ê góa, tongjiân ētàng khòtio̍h Iésu ê le̍kliōng, goânliōng hit kóa sionghāi kòe góa ê lâng, sīmchì ētàng siōng Iésu só͘ kóng ê, goânliōng in 70 ê 7 pái; m̄koh m̄thang bēkìtit, suibóng tī goânliōng in ê sî, góa chiāmsî kámkak khinsang, káithoat; chóng sī góa mā chaiiáⁿ, in iáu sī ē tńglâi góa ê náuhái. Góa tio̍hsǹg chitmá bô beh siūⁿ in, kúi kang liáuāu iáu sī ē siūⁿ tio̍h; tio̍hsǹg ji̍tsîthâu lóng bô siūⁿ tio̍h in, chòbāng mā ē bāng tio̍h. Hit sî, góa koh hām lo̍hkhì siûhūn kah àunáu ê tiongkan, góa khó͘ bētit thang kā in thâi sí! Góa chóng sī hoán lâi hoán khì, goânliōng koh hoâihūn, hoâihūn koh goânliōng, bô oânkiat ê chi̍t kang. Peteloh Hō͘su 2：22 kóng, "Ti sé chhengkhì à koh tńgkhì nòa lō͘kô͘moâi." Chitkù ōe tongjiân sī mē lâng ê ōe, m̄koh, tùi sìn Iésu ê góa lâi kóng, khiok sī bôpí che kohkhah sektòng.

Chit sî, hām lo̍hkhì khó͘kéng ê góa kaitong tio̍h ánchóaⁿ? Chia kantaⁿ ū chi̍ttiâu lō͘, to̍h sī pekchhiat ǹgbāng Sènglêng éngchū tī góa ê sengkhu, chi̍t sî'á to m̄thang līkhui góa. Halélú'iah! Kàu Sènglêng éngchū ê hit sî, góa to̍h bānbān'á thoatlī chōeliām kah chōehêng ê khúnpa̍k, chi̍t pái pí chi̍t pái koh khah chìnpō͘! Inūi, suijiân kiaⁿ o͘ ê góa ta̍k kang lóng ē tú tio̍h o͘àm mê, m̄koh chíiàu góa ētàng éngoán la̍k ū chi̍t tiámtiám’á ê kng, khòtio̍h i éngoán ê chiòkng, to̍h ētàng hō͘ o͘àm éngoán bē kīnóa sinpiⁿ, to̍h bô koh kiaⁿ siáⁿmi̍h o͘àm mê ê khúnpa̍k loh!

Tûliáu téngbīn só͘ kóng ê ǹgbāng ígōa, lán iáu ū siáⁿmi̍h thang chò ê leh?

Chi̍tê honghoat sī tha̍k keng. Te̍kpia̍t sī tùi sèngkeng ni̍h ê Páulô susìn ittēng tio̍h tiāⁿtiāⁿ tha̍k. Chhiūⁿ Lômá su tē 7 chiuⁿ, hit chióng Sènglêng ê lu̍t kah chōe ê lu̍t ê kauchiàn chōnghóng, to̍h sī lí só͘ beh chìnji̍p ê Sènglêng éngchū ê chho͘pō͘ chōnghóng. Kású lí ê siuióng ētàng chìn chi̍t pō͘, tùi tē 7 chiuⁿ kiâⁿ ji̍p khì tē 8 chiuⁿ ê sî, to̍h puttekliáu. Hit sî, Sènglêng ê lu̍t to̍h ētàng oânchoân chèho̍k chōe ê lu̍t; chit sîchūn iā to̍h sī SiōngChú teh beh chià tio̍h Sènglêng kā I éngseng bē sí ê sèⁿmiā siúⁿsù hō͘ lí ê tiāuthâu!

Lēnggōa iáu ū chi̍tê honghoat sī ke kah lāu chiânpòe kóngōe. Chin chē itseng khiânsêng sìn Iésu ê lāutōalâng, lóng ū Sènglêng éngchū ê kenggiām, lí ittēng tio̍h chhōe in kóngōe. Siàuliân ê Kitoktô chóng sī kah'ì chi̍t tōatui lâng chūchi̍p chòhóe, tapchhùikó͘ kóng chhiò, tiongkan khiok bô jīmhô chi̍t ūi lāutōalâng, che to̍h ē hō͘ lí chia̍h tōa khui! Ētàng Sènglêng éngchū thongsiông lóng sī itseng khiânsêng sìn Iésu ê kiatkó, kantaⁿ ū chhōe chiahê lāu chiânpòe tâm, lí chiah ē chìnpō͘, jîchhiáⁿ ētàng hō͘ lí thêchá chìnji̍p Sènglêng éngchū ê sînsèng kenggiām ê tiongkan!

──2014, 07, 08 tah tī "Kitokkàu Thongsìn"
──2017, 09, 29 lio̍k káisiá