《台灣人e5先覺─黃彰輝傳》

 | | | 轉寄

黃家三代牧師kap台灣

作者 張瑞雄 2009.03.08

海島台灣ê特色 台灣是chi̍t-ê海島，伊ê特徵就是海岸線真長，因此，外來ê生理人、海盜、逃難者、冒險者，甚至用武力征服ê統治者，lóng ē-tàng真簡單to̍h登入島內。16世紀，當荷蘭（佔領南部38年）kap西班牙（佔領北部17年）商業殖民主義集團入來台灣ê時期，華人iáu是chió數，大部分lóng是平埔族群。In是性情溫純、寬容、kah意和平、真簡單tio̍h來相信外來ê人，koh kap in融合。今á日ê台灣人，tī in ê根底，iáu是維持án-ne ê個性。因為平埔族kap原住民族群ê文化，無文字thang好來表達，koh因為地形khòng-khoah，所以人mā真chió，自然物產豐富，m̄免開墾做田，成做phah獵kap採集土地自然成長ê食物來生活ê社會；征服者tiāⁿ-tiāⁿ利用島民以原住民自居，m̄-bat有對外發展ia̍h-sī宣傳家己ê野心kap主張，侵略者就lām-sám扭曲解釋，故意 tùi外宣傳講台灣人是野蠻人。

以得tio̍h貿易上ê lī-sûn為目的koh霸佔台灣ê荷蘭人，為tio̍h beh生產甘蔗，製造粗糖，切割平原ê開墾地為『大結』、『中結』、『小結』koh大量『雇用』當地人，mā tùi大陸『移民』農奴入來台灣。原底tio̍h是多種族ê社會，koh-khah緊混合，慢慢á轉變做chi̍t-ê phah獵ê人kap農民共存ê社會。華人ê農民jú來jú-chē，殖民地ê管理者mā hō͘華人方便入來tòa，koh發現採用海峽對岸ê器具、方法kap語言，對生產有幫助。雖然án-ne，農耕ê華人大部分lóng是羅漢腳。In只要得tio̍h安定ê生活，koh有屯積小khóa錢財，自然就kap當地ê cha-bó͘結婚，採行多妻主義。經過兩三代以後，kui-ê平埔族群tâu-tâu..á tio̍h hō͘人來『同化』。Tùi原先tio̍h tī台灣ê人來講，這就是hō͘人征服，漸漸失去原本非漢族ê傳統文化kap認同。

下底一系列ê圖片是ùi大概75年前(1930年代)發行ê台灣風景明批片: (圖一:頂圖是台灣siōng高ê山峰玉山)

(圖二:正pêng ê圖是台灣siōng壯觀ê太魯閣山谷)

(圖三:台灣siōng水ê淡水灣)

(圖四:台灣庄腳ê農家)

(圖五:75年前ê台南赤崁樓風光)

《台灣歷史年表》附錄（《台灣歷史年表》第20頁底）內底指出：

＜台灣自古未屬王化＞1723年8月19雍正帝ê意見koh講：『台灣地方，自古m̄-bat屬於中國，皇考（康熙帝）聖略神威，放入去版圖』（＜雍正朝東華錄＞，１） 陳惪華等撰＜大清一統志＞卷271＜台灣府，建置沿革＞內底mā提起：『台灣自古是荒服ê所在，無通中國，名曰東番。明á載啟中，hō͘紅毛荷蘭夷人所佔領，屬於日本』（1774年版）án-ne講，m̄-koh 1842年版（473卷）tio̍h tû-tiāu『屬於日本』四字。

1662年，當荷蘭殖民者向鄭成功投降ê時chūn，台灣ê平埔族推算大概有四萬人。Chit種人口是延平郡王ê數目，反應tio̍h in所能統治到，koh有交往ê數目。因為koh追溯12年ê 1650年，平埔族推算óa七萬人口。真無可能tī短短ê 15年內底，殺掉三成ê人口，m̄-koh真可能台灣人民行避漢、荷兩族ê敵對仇視。Koh照陳紹馨《台灣省通志稿》ê推算，荷蘭據台ê末期，漢人人口達到25,000人，雖然比原本ê台灣人khah chió，m̄-koh真緊jek過。

《台灣歷史年表》附錄（《台灣歷史年表》第13頁）指出：

＜漢人ê態度＞因為驚鄭成功phah台灣，漢人紛紛準備逃亡。漢人領袖kā荷蘭人密告，koh指出就算國姓爺bē-sái攻占ia̍h-sī保有台灣，伊帶來ê船mā會奪走大量ê糧食、牲畜……等，以維持伊ê軍隊。由此會使看見tī荷蘭人統治時期，漢人就親像荷蘭外來人，kā台灣ê物件帶出去，mā準備逃亡。《hō͘遺忘ê台灣》

『延平王國』佔領台灣ê時chūn（1680年），台灣ê人口hō͘推算是120,000人口，到150年後ê 1830年，就增加到2,000,000，chit項tāi-chì tī移民ê國家台灣，是真自然ê代誌，m̄-koh學台灣歷史ê人tio̍h-ài會記tit，清朝tī 150年ê仝時期，向台灣『海外丸泥』《稗海記遊》（《台灣歷史年表》第24頁），實行禁止渡海政策，總共有beh一半（75年）ê日子。對清國來講，台灣是逃避罪犯，無從事正經工作ê流氓，ia̍h-sī愛冒險ê無賴漢所beh去ê所在。對定居真久ê台灣人來講，hit ê所在是『有唐人公，無唐人媽』，羅漢腳ê漢人開荒ê新天地。母系為主ê平埔族羣，算是有好ê配對，hō͘征服，mā仝時間征服異己，koh產生台灣獨有特殊ê民族kap文化。

M̄-koh，tùi鄭成功kā伊ê『延平郡王國』強制建立tī台灣人民ê頭頂以後，kā『華人』kap『華語』定..落來，製造『明清沙文主義』做伊ê統領，通行全台灣。結果就是，致使平埔族kap原住民族群公然hō͘叫做『蠻番』kā伊侮辱，以謀求漢文化ê統合，kap遵行對官吏有利『皇帝』式ê儒教倫理。Ùi 1758年到1759年，mā就是鄭成功佔領台灣後大概100年，清朝皇帝通過tī台灣ê官吏，開始普遍『賜姓』hō͘平埔族人。Tùi hit時chūn開始，thang講『平埔族羣』有決定性ê來實行漢化。Án-ne，島嶼上ê人民，tī遺傳維持平埔族kap原住民族群ê遺傳基因，tī文化kap認同上soah hō͘『漢化』。

圖一:大概80年前ê台灣庄腳ê風景

二:一百年前往來台灣kap支那(中國)之間ê船隻

第一代宗教家黃能傑牧師kap元配夫人－楊儼寒 黃彰輝ê阿公，名能傑，字誌誠，1853年出世。伊ê出世tī延平郡王國延長ê清帝國統治下，台灣南部ê東港龜怡庄。黃家祖先tùi金門移民到台灣，到黃能傑已經過七代..a，siōng-chió lóng有200年..a，tùi 1600年就住tī台灣。Án-ne，黃家是早一代ê移民者，算是己經『台灣族羣化』，mā tī文化社會上『本土化』。當地人se̍k-sāi ê伊是做道士..ê，以東隆宮（註一）為中心，服務一kóa心神不安、身軀欠佳ê人。因為，chiah-ê人通常hō͘人認是需要宗教治療。伊認為家己比別人koh-khah khiáu，有能力吸引群眾ê注意，進一步koh hō͘ in相信，伊chit位道士ê神明koh-khah厲害，koh-khah有能力。伊學tio̍h ê法術，siōng得意koh獨有特殊..ê，就是『雞卵登竹篙』ê神術。M̄-koh，後來，伊坦白講hit-ê技巧是代先準備蜘蛛絲纏tī竹竿頂頭，chia̍h kā蜘蛛放入去卵殼內底，hō͘伊做出奇蹟ê表演。黃能傑建立ê『法術』，iáu有用『醫術』做輔助治療水牛破病ê藥草。

因為伊有專長，mā有實際ê事蹟，伊家庭ê經濟iáu bē-bái。m̄-koh，tī伊ê心內，一直有講bōe出來ê空虛；一方面伊立志beh做一個ē-tàng幫助人ê導師，伊ê良心一直要求家己，講話ài老實，做代事ài認真。伊堅持chi̍t-ê原則，每一pái收費，lóng是照伊家己所開ê處方kap勸導，是m̄是對顧客有幫贊；另外一方面，伊kap in bó ê遭遇 kiáⁿ兒夭折ê痛苦，tùi án-ne心肝內一直追求一種真實、可靠ê幫贊。

英國人宣教師馬雅各醫師來台灣是1865年，hit時chūn chiah 12歲，tùi伊做道士，koh已經結婚，ǹg望ē-tàng生kiáⁿ chhī kiáⁿ ê情形來看，伊接觸基督教ê信息，大約是tī伊beh 30歲ê時chūn。照記載來看，伊是tī 1885年（hit時chūn 32歲）入學台南福音書院（今á日ê台南神學院），仝年，馬雅各來台mā已經過20年..a。黃能傑本底就是宗教家，tī倫理、道德、生活指導ê判斷頂頭，已經有bē少ê心得，koh加上tī文字kap學問方面，mā有相當ê基礎kap水準。

hit時chūn馬雅各tī台灣傳道設教，是以台南做中心點，無jōa久，tī台南受tio̍h困難，行醫傳道受tio̍h阻礙，伊轉移到高雄ê旗後。旗後ê對岸，tī打狗ê崗上，設有當時英國駐tī台灣ê領事館。後來，台南人對外國醫生ê態度漸漸轉變和善，馬雅各就轉去府城行醫、傳道。按照東港長老教會ê歷史，tī馬雅各來台三年後ê 1867年，就kap李庥牧師（Rev. Hugh Ritchie，1867年來到台灣，1879年死tī台灣）到東港行醫傳道。後來李庥牧師不sám時到東港主持禮拜，得tio̍h當地ê信徒協助傳道，租草厝舉行禮拜koh建立禮拜佈道場所。續落來tī 1871年，來chi̍t-ê牧師，名叫甘為霖（Rev. Wm. Campbell），伊tī台灣南部一帶kap台灣人交往、傳道。有一pái tī 1878年，tī台灣南部恒春縣（東港ê南）ê沿岸，台灣人發現有兩隻美國人ê船，船長企圖beh kā其中一隻phah hō͘沈..落去。In就去請英國人甘為霖宣教師來看。當時歐美對亞洲各國施行治外法權，m̄肯hō͘歐美人士受tio̍h台灣ê官吏審判，船長kā駐tī打狗ê英國領事館申訴，騙講船是hō͘台灣人phah沈..e，船長應當ē-sái領保險金。為tio̍h chit-pái ê審判，甘為霖kap當時ê恒春縣縣知kap台灣人合作，伊替台灣人翻譯兼作證，結果是美國船長敗訴。當時，黃能傑是m̄是已經kap甘牧師、李庥牧師ia̍h-sī其他ê宣教師有聯絡，hit項tāi-chì對伊kám有衝擊，無記錄ē-tàng查..a。m̄-koh當時hit項tāi-chì發生，伊ê年歲大概25歲，koh tòa tī離事件無遠ê東港，hit時chūn ê知識分子，應當是有接觸新聞ê機會。M̄-koh，ùi chit-ê tāi-chì thang證實，tī日本佔領台灣ê 20年前，台灣人社會就是án-ne，沿海就已經真chiap kap歐美kap世界各國，有事物kap人際ê交往kap接觸。

1887年，黃能傑tùi台南福音書院畢業了後，一直到伊去世，lóng總傳道40年。福音書院tī學中（註二），伊接受宣教師會（甘為霖牧師為代表人）差派去澎湖傳道，tī任職澎湖期間，伊失去ko͘-kiáⁿ約西（Iok-se）（註三）tī海難。派遣到澎湖3年後ê 1890年，第二後生受命tī東港龜怡庄出生。黃能傑前後受差派tī澎湖、竹仔腳、鳳山、楠梓，kap旗後各教會傳道kap牧會。伊hō͘封做牧師，是tī 1903年12月28日tī楠仔坑（楠梓）舉行。Hit日所hip ê記念相片，chin-má保存tī總會長老教會ê資料館內底。楠仔坑ê教會是伊、師母kap in kiáⁿ俟命所開設..ê，真感動人ê是，當時俟命iáu kan-tāⁿ是13歲ê gín-á niā-niā。

黃彰輝tī《回憶錄》提起家己ê阿祖－儼寒，tī家族內底伊是一位真重要ê長輩。根據彰輝ê母親口傳，阿公黃能傑改信基督教ê決心，背後有bó͘儼寒ê善導kap力勸，另外伊對in kiáⁿ ê教育mā真特別。

當in-ang tī福音書院求學ê時，1887年kap kō͘-kiáⁿ三ê人去澎湖，tī一pái渡海過海峽ê路途hō͘大暴風襲撃，真細漢ê獨子tī海浪下來失去生命，tī tit-boh hō͘淹死ê瞬間，m̄-nā m̄驚眼前ê死亡，iáu安慰周圍ê同難者講，主beh來接伊去..a。Tú-hó͘儼寒女士遭受喪kiáⁿ痛苦ê時chūn，伊腹肚內有妊，正是第二後生俟命─彰輝ê父親（註四）。Tī台灣聖徒ê傳記內底有記載，大概13年了後（1903年），能傑、俟命父á-kiáⁿ tī楠仔坑（今á日ê高雄市楠梓區）開設教會。俟命雖然kan-ta是小學生，伊ê活動表現，已經hō͘認定是會有成就ê宗教家，不幸儼寒女士就tī楠仔坑開設 siōng盛ê時期過身。

儼寒女士除了做『師母』、『女傳道』以外，mā是一位受庄民愛戴ê助產士。伊無推辭來為有身ê家庭服務，mā為破病ê婦女伸出幫贊ê手。當儼寒女士過身ê時chūn，根據黃彰輝牧師傳述伊母親所kā伊講ê話講：『kui-ê楠仔坑ê庄民，無論基督徒ia̍h-sī m̄是基督徒，lóng為伊ê死哀悼chi̍t-koh月久，in mā tī墓地建立chi̍t-ê碑，高十米，向(ǹg)庄ê中心大道，來記念伊。』（p.24）黃能傑牧師ê講道影響真chē ê楠仔坑庄民，m̄-koh以生活體現出道ê師母，koh-khah感化了 kui-ê庄，伊真是正港ê宗教家。

黃能傑tī財政頂頭真有能力，辭去楠仔坑教會牧會ê職位，sóa去旗了後，伊是做『非全職..ê』自由傳道。這是因為伊tī財政頂頭真優裕，m̄免óa靠教會ê謝儀來糊口ia̍h-sī養育 kiáⁿ兒。根據伊ê第三後生黃祺昌（tī 2002年ê時chun tio̍h 93歲）所講，黃能傑（父親）tī高雄市街á有厝teh出租，有租金ê收入。Koh根據伊ê孫á黃澄輝（黃俟命ê五子）所講，黃能傑（阿公）ê家庭有真chē ê田園財產，tī大戰以前，設有佃農耕作管理。

回溯100年前ê台灣，優秀ê少年人，若無地主ia̍h-sī官吏ê背景，除了行宗教家一途以外，就無其他ê出路。因為當時ê宗教家，thang兼任教育、醫療、冠婚葬祭、心理分析、占卜、氣象地理、講述、俳演等等於一身。有相當長ê海岸線ê台灣海島，對有學習心得ê黃能傑，這正是形成伊內心台灣精神ê土地，tùi伊接受基督教成做chi̍t-ê西式ê宗教家，就大大來開展伊ê眼界，致使伊ē-tàng發揮思考kap學問、奉現社會、參與社會改進等等ê志業。

Tī《回憶錄》內底，黃彰輝提起伊ê第一位神學教師，就是阿公─黃能傑。伊回憶tī 10歲到11歲ê時，阿公黃能傑約70歲，tī高雄ê旗後擔任牧師，照逐年ê例，父親黃俟命牧師一家人tī-hia渡過chi̍t-ê暑假，hit兩個熱天，孫á彰輝是獨一ê學生。旗後半島尾ê山頂有一座燈台，hia有300石階thang peh起lih。大概tī半路，tī tō-pêng有chi̍t間古廟，廟ê正pêng對面就是阿公黃能傑以前牧會ê教會，thang接納80到100人做禮拜。Kap禮拜堂連作伙ê建築物就是牧師館。教會ê邊á有一座兩層樓ê洋房，是以往英籍宣教師使用為tio̍h避jōa ê所在。Hit座樓頂有kòng闊ê陽台，ùi高雄港看去ê景緻真正是天差leh地，尤其是港ê對岸燈點..起來ê時chūn，涼風吹來，正是世上siōng好ê教室..a。阿公是講古ê高手，吸引是孫á koh是學生ê彰輝ê注意力。故事ê內容tiāⁿ-tiāⁿ是án-ne起頭：有chi̍t-ê青年本來是為非sám-chò、lōng-liú-lian，到伊tú-tio̍h chi̍t-ê人，叫做耶穌，然後伊ê生活改變..a。聽起來ná親像是一位真無聊ê人，其實m̄-nā，chit位青年出頭真chē，因為伊本底就是魔術師，會曉變魔術，親像hō͘雞卵爬上竹篙，tiāⁿ-tiāⁿ hō͘聽ê人聽kah入神。然後，koh有新ê魔術故事，koh引伊入神。講tio̍h耶穌，有反高潮（Anti-climax）ê感覺。m̄-koh，以耶穌為中心ê宗教家，像黃能傑有創意ê過來人ê經歷，bē感覺無聊，顛倒是真精彩、生動，真有啟發ê效果。

阿公黃能傑對『小神學生』所beh強調..ê，就是以前伊做道教ê宗教家ê時chūn，伊是以『學問kap神術』為貴。到tú-tio̍h基督以後，伊m̄標榜伊ê『學kap術』，koh全心、全情、全意追究宇宙ê真道kap創造主ê奧妙，mā真心誠意來服務人群。

下圖是台灣南部siōng早期牧師中ê五位.

１黃能傑牧師自述ê履歷 黃能傑ê原籍是清國福建省泉州府同安縣金門水頭鄉，主後1854年9月12日，出生tī鳳山港東中里龜怡庄。14歲tī內關帝庄拜歐陽輝做老師，學習經書八koh月。17歲拜東港街后塭庄黃再來做老師，學習法術。19歲拜師由泉州府晉江縣渡臺tī東港街ê陳烏尾，koh深入研究學習法術。m̄-koh tī伊26歲ê時，代先聽過洋人tī庄內傳道，hō͘基督教信息吸引，轉變做接受傳道師趙爵祥（註五）ê教化，歸入基督教信仰。27歲由英人巴克禮博士為伊洗禮，伊受洗ê日期為主後1881年1月16日。5年後ê 5月，當伊32歲ê時，進入台南府城內ê『英國大學』，就是日後ê台南神學校

下面ê圖是黃能傑牧師親筆自述ê履歷書

。33歲（主後1886年12月）接受英國宣教師會委任，職為傳道師，tī澎湖島媽宮街禮拜堂宣教。36歲tī台南府鳳山禮拜堂宣教。37歲tī楠梓坑街禮拜堂宣教。38歲接受委任，tī東港中里竹仔腳庄禮拜堂宣教。42歲接受委任，轉去楠梓坑街禮拜堂宣教。46歲接受楠梓坑街禮拜堂民眾ê推選，成做耶穌聖教長老（註六）。主後1903年12月28日，tī楠梓街禮拜堂受封為牧師ê時是49歲。（由黃能傑牧師ê自序文登載tī賴永祥教授ê《教會史話》第五輯。）

２一位法師歸基督ê故事 　　 chit篇黃彰輝牧師親筆寫寶貴ê文章，是伊為英格蘭長老教會讀者紹介伊阿公kap阿媽ê見證文。（原文刊載tī《遠遠ê地平線（Far Horizons）》季刊1940年10月號Page 78-79。）

　　我受委託kā bat tī一kóa教會講過，有關阿公（黃能傑）kap阿媽（儼）ê見證，寫出來分享hō͘讀者，這是我kap小弟iáu少年ê故事。Lín kám ē-tàng來想tio̍h有一間中古ê教堂，建立tī ē-sái瞭望海洋ê山崙（旗後）？附近有一棟建築物，chìn前是宣教ê醫療院，後來提供hō͘阮阿公歸家tòa，同時mā是宣教師ê休假場所。Chit間厝雖然khah舊，m̄-koh ē-sái觀看四周圍ê風景。伊有真闊ê樓臺，ē-sái瞭望山崙下腳ê海港kap對岸ê高雄。涼爽ê黃昏，是阮歡喜聚會ê良機。請畫看mài án-ne一pah畫：一陣cha-po͘-gín-á（包括堂、表弟）tī月光ē-kha，圍tī in阿公ê身軀邊，看tio̍h tùi港口出出入入ê舢板kap小篷船，tiām-tiām聽tio̍h台灣古早ê故事。

　　突然間阿公問阮講，kám知影伊tī成做基督徒以前，是做甚麼tāi-chì ê？阮驚一tiô，聽到伊以前bat m̄是基督徒，就用期待ê好奇眼光注目看伊。過了一下，伊開始講述以下ê故事：

驚hiâⁿ ê世界 　　『細漢kiáⁿ..a，我khah-chá bat是東隆宮廟內底ê法師，hiah-ê人驚我，認為我ē-tàng求風喊雨。In對我驚hiâⁿ mā怨恨，因為我bat用邪惡ê咒語kā in威脅。In tiāⁿ-tiāⁿ供奉一kóa金錢kap禮物hō͘我，以求平安。In ê驚hiâⁿ，就是我ê收入。譬如，我bat警告hiah-ê人，若無the̍h出錢來，惡鬼就會來chhōe in。有kóa人m̄相信，我就作假heh驚in，騙講惡鬼真是chit-ê時chūn來..a，一直到in相信。我會tī暗時去hiah-ê m̄信ê人in tau，kā chi̍t-kōaⁿ魚lân-chhè貼tī in ê門頂頭，tī月光下，chiah-ê魚lân-chhè會閃爍tio̍h特別ê光彩，引來夜婆群（在台灣有真chē chit種動物）ê攻擊，門就án-ne hō͘夜婆phah，門內hiah-ê人受heh驚，認為是惡鬼真正來lah。這就是我ê謀生方式，我ê生計建立tī hiah-ê人ê驚惶kap我ê假鬼假怪ê騙局頂頭。』

　　『我heh驚hiah-ê人，我家己ê驚hiâⁿ比hiah-ê人koh-khah深，因為實際上，我知影hiah-ê惡鬼是我家己編出來ê，我驚將來hiah-ê人會看破我ê騙局，若真是án-ne，我beh安怎？因為我ê罪惡kap hiah-ê人ê驚惶，我無法度kap hiah-ê人來往，感到非常ê孤單，我深受無法度知影ê烏暗ê痛苦。為tio̍h beh暫時bē記得不安ê痛苦，我就沉迷tī淫樂，親像生活tī曠野內底。因為我生活tī自欺欺人當中，koh kap至親好友斷絕來往，我ê光景就jú來jú bái。』

基督ê呼召 　　『有一工，我聽講有chi̍t-ê外貌奇特ê洋人來庄內，講述有關耶穌ê怪譚故事。令我憤怒ê是，有一kóa人tùi我chia轉向hit-ê洋人，無koh來廟nih。我決定beh到hiah-ê人kap洋人聚集ê竹圍庄鬧事。到hia，我聽看看..leh，對洋人ê面貌kap目睭kap別人無仝，感覺真趣味。我gōng-gia̍h tī家己竟然tī注意聽伊所講ê話，he是有關老生常談ê浪子故事。忽然發覺我ê憤怒消失..a，我ê心受tio̍h奇異ê感動。離開ê時，我ê鬥志kap自尊心受擊挫敗，有chi̍t-ê聲音對我teh叫：「bē-tàng聽洋教..e！」另外一個聲音輕輕..a講：「tńg來我chia，來！」hit幾工，我一直過tio̍h矛盾躊躇ê生活，當我jú抵抗hē輕柔ê呼聲，就jú受tio̍h伊吸引。』

　　『kúi-nā-pái我偷偷á到佈道所注意聽，有一工，我koh聽到仝款ê浪子kap慈父ê故事，我無法度koh再忍受落去，就偷偷á行出去，目屎chho̍p-chho̍p滴，思想浪子所講ê話：『我tit罪你，我無夠格koh做你ê kiáⁿ兒。』tńg去厝內ê路nih，我一直唸chiah-ê話，chiah-ê話就án-ne印tī我ê心肝內。Tùi hit時chūn開始，我感覺新ê生命tī我ê心內產生。雖然舊ê罪iáu刺tī心肝內，m̄-koh我感覺伊tī對我講，我是伊ê kiáⁿ兒。因為伊ê安慰，我受tio̍h撫慰（我hō͘伊ê安慰所撫慰），我每禮拜日lóng去佈道所，無koh去廟lō͘。』

　　『我厝內ê人kap庄內ê人知影我去注意聽洋教，以前驚..我庄內ê人，lóng取笑kap罵我，hiah-ê恨我ê人，chin-má看我bē起。我ê兄弟kā我heh驚講，若無停止去佈道所，ài kā我趕出家門。有一pái，伊tī我到教會ê路途中，beh kā我謀殺，m̄-koh hō͘我意外逃走去，m̄是！是神ê旨意。因為我答應一位朋友，beh chhōa伊去教會，koh行別條路。雖然有chit種ê逼害，mā bē-sái搶去我新ê生命。細漢kiáⁿ..a，tùi hit-ê時chūn，我學習koh-khah chē ê真理，我知影kap真神ê和解，就是kap人和解ê根基。』

　　hiông-hiông，阿公停..落來伊ê故事，停一下..a，tio̍h真肯定來講：『我真希望lín ê阿媽iáu活teh，伊就ē-tàng kā lín講tī伊身軀頂所發生ê tāi-chì。』伊無繼續伊ê故事，因為無lōa久以後，阿公tio̍h過身去。

家境ê改善 　　我大漢了後，有一工，阮老父kap我討論有關我未來ê工作生涯，伊提起阿公，同時真清楚來講到阿媽ê往事。伊iáu講，我ê阿公阿媽kap tú過身ê母親kap伊bat主張，我若同意，應該tio̍h做傳道人。然後，伊提起有關阿公無講出來ê阿媽ê故事。

　　『你阿公tī成做基督徒chìn前，慣勢tiāⁿ-tiāⁿ苦毒你ê阿媽。但是有一工，』阮老父繼續講：『你ê阿媽注意到，一定有什麼tāi-chì發生，hō͘一向對伊殘忍ê翁婿有改變。伊無koh到廟nih，ta̍k工tī厝，沉迷tī一本小小ê冊內底。伊一直感覺真奇怪，m̄-koh m̄敢問伊teh讀什麼冊。另外，伊ê言談kah以往lóng無仝，變kah對伊細jī koh仁慈。』

　　『一工暗時，伊無法度koh按耐看伊teh讀什麼冊ê想法，半暝，當逐個人lóng睏去，伊靜靜起床，真驚hiâⁿ掀開hit本冊，koh開始讀。（he是馬太福音書首版單行本）伊hō͘冊內ê故事感動，tùi hit時，伊每工半暝lóng起來讀hit本冊，tiāⁿ-tiāⁿ驚厝內底ê人發現伊作ê tāi-chì。一直到有一工ê暗時，當伊leh讀ê時，hiông-hiôn發覺伊翁khiā-tī伊ê後壁，伊真緊張koh驚hiâⁿ。』

　　阮老父停落來，我看伊kám-ná有什麼心思真注意leh我。過無jōa久，我輕聲問伊：『後來neh？』伊講：『in對哭來和解，tùi hit時開始，in就kā家己獻身hō͘上帝。』

　　無久了後，我ê阿公阿媽受tio̍h家庭逼迫搬出去，in所受ê逼迫，有來自親人，mā有來自朋友kap庄內ê人，m̄-koh in ang-á-bó͘之間ê恩愛，hō͘ in心內充滿tio̍h歡喜，in開始向四周圍 hiah-ê人，傳講賜hō͘ in新生命ê hit位ê故事。我ê阿公成做一位傳道人，了後做牧師（台灣siōng初期ê五位牧師之一），四十年無休睏服務真chē教會，宣講好ê信息，一直到伊蒙主恩召過身前ê兩個禮拜。

　　我來英格蘭chìn前，bat轉去阿公以前tòa ê所在拜訪眾親chiâⁿ。我去過hit-ê老廟宇，mā看tio̍h一kóa巫師對四周ê婦孺焚香唸咒，我驚kah gōng-gia̍h而且感概回想阮阿公kap伊ê厝內ê人，in mā-bat做過仝款chiah-ê tāi-chì。我歡喜感念神ê恩典，kap眾宣教師犧牲ê愛，傳達hō͘阮這重生ê生命，同時我mā問家己：這kám tio̍h是我ê恩賜kap使命？

第一代黃能傑牧師ê相片：收藏tī台灣基督長老教會資料館ê chit張相片，是1903年12月28 日，tī楠仔坑教會封牧當日所hip。當時，長男俟命（無tī-teh相片中）kap母親儼寒女士協助建設教會ê事工。這相片表明初代受封做牧師ê人穿插是漢式服裝，mā無親像color等任何牧師職ê標誌。Ē-sái看見當時tī領導地位ê宣教師會，想beh kā本地人ê宣教本土化，所代表ê chi̍t-ê例。

黃能傑牧師ê續室：tī儼女士過身以後，黃能傑牧師kap陳悅治女士結婚。圖中ê eⁿ-á是續絃後所生第一個gín-á－次女加妙。陳女士是彰化人，少女時tī彰化基督教病院做蘭醫生ê護士，tī第一任翁婿了後，做黃能傑牧師ê續絃。(黃祺昌提供)

黃能傑牧師kap kiáⁿ兒: 黃能傑牧師生育成人ê kiáⁿ lóng總有6 ê人。chit張相片當時，siōng細漢ê四男瑞慶iáu未出生。圖內底後排tò-pêng是長子俟命（抱tio̍h小妹加妙），正pêng是次子朝祥，前排tò-pêng坐leh是能傑牧師，中ng hō͘抱..lē ê是三男祺昌，前排khiā--leh手the̍h雨傘ê女子是長女依利沙白。(黃祺昌提供)

黃彰輝牧師幼年時代ê相片：chit張相片是黃彰輝牧師大概四歲ê時chūn所hip黃能傑牧師ê全家福。相片內底siōng老..ê是黃能傑牧師，hit時，伊tī旗後做牧會ê工作。前排tò-pêng第一ê gín-á是黃彰輝。（黃祺昌提供）

註一：黃能傑ê後祠認為東隆宮是過去黃能傑ê宗教職業óa靠。 註二：請看《教會公報》1886年10月。 註三：日本tī台灣開始設戶口制是1900年，以後，黃俟命是厝內siōng大ê kiáⁿ兒，所以黃能傑tī戶籍上登錄伊為長男。 註四：請看Edward Band tī 1936年tī東京ê Ginza，由Christian Literature Society所出版ê『Barclay of Formosa』－p. 77-78 註五：趙爵祥傳道師是台灣人tī長老教會高等學校ê第一任校長趙天慈ê父親。 註六：『耶穌聖教長老』言詞ùi p. 12 ê自述履歷表，其理由不詳。

第二代宗教家黃俟命牧師kap夫人－林金 黃俟命是1890年3月3日出生。He是tī清國phah輸日本，日本佔領台灣施行殖民地統治ê前5年。因為黃能傑kap儼寒ê tōa-kiáⁿ，tī澎湖ê海上遇難喪命，日本tī台灣設置戶口是tī 1900年，黃能傑就tī戶籍頂頭報黃俟命做『長男』。tùi伊出生了後，黃家經歷竹仔腳kap鳳山ê牧會kap傳道ê生活。1903年，當黃能傑受封ê時chūn，伊是13歲，iáu teh小學學校讀冊。M̄-koh按照記錄，伊是tī楠仔坑（楠梓）幫助父親開設koh建設教會ê事工。伊tī 16歲（1906年）tùi 楠梓公學校畢業，同時進入台南長中（註一），讀三年就畢業..a。

Tī黃俟命畢業長中chìn前，伊已經考tiâu台北ê醫學校。m̄-koh伊ê父親能傑牧師全力soat-ho̍k，勸伊進學台南『大學』－神學院。能傑牧師ê理由，就是伊改宗入信ê時chūn，立誓beh奉獻『長子』作上帝ê聖工。雖然俟命內心有過戰鬥、躊躇，mā經過迫切ê祈禱，伊終於決心行上chit條坎坷、pháiⁿ行十字架ê人生路。以後，當伊遇到hō͘逼辭職中學校牧，koh hō͘逼離開所建設ê台南東門教會ê時chūn，tī 1909 年所選擇ê決志浮siōng心肝頭。m̄-koh伊一再kā in kiáⁿ彰輝講，伊無後悔放棄醫業ê路，koh選擇牧師chit條路。1909年，伊tùi án-ne進入台南神學院，tī台南神學院讀4年，tī 1913年畢業。

長老教會tī台灣一向是真重視gín-ná ê教育，所以tī宣教師會內底分宣教、教育、醫療、婦女等部，每設教會ia̍h-sī佈道所，就tī禮拜日做禮拜，koh禮拜日開設附屬ê小學、中學ê主要目的之一，就是想栽培kap提供小學ê教師，koh所有ê小學mā歸中學校長管理。m̄-koh照1914年接管ê萬榮華，當時只chhun台南kap彰化兩所nā-niā。理由就是，經過18年ê統治了後，日本己經tī各主要市鎮設正規ê『公學校』，koh教會ê財政、規模kap教學內容，lóng比bē起官方設ê學校，koh失去吸引力。1913年，『大學』新畢業ê青年黃俟命，就受派到彰化教會附屬小學kap長中預備科擔任教師，就tī伊做教師ê第二年，tī 1914年生了黃彰輝。

畢業後兩年，就是1913年到1915年，伊tī彰化教會ê附設小學教冊。黃俟命kap林金ê長子，就是伊tī彰化期間，tī 1914年8月20日出生..ê。因為是tī彰化出生，所以hō͘做彰字。Koh決定所有cha-po lóng加用輝字，koh為伊起名『彰輝』。1915年到1916年，kan-ta一年tī鹽水港教會任傳道師，因為長中ê萬榮華（Edward Band）校長召請伊去擔任舍監兼任聖經教師ê職物。Tī-chia需要記一筆..ê，就是黃俟命教學所使用ê語言是台灣河洛話，所用ê文字就是漢文kap羅馬字。伊持有考取醫學專門學校ê經驗。當然，實力就是包含tio̍h使用日語ê能力。m̄-koh，因為讀神學，準備做台灣人ê傳道教師，伊就無繼續tī日語方面加強練習。身為台灣人ê悲哀之一，就是日本政府無容允台灣人用家己ê言語教授kap接受教育。伊後來就hō͘逼迫離開所執教ê中學職位。

當黃俟命失去了長中教冊ê工作，koh hō͘逼離開東門教會ê牧師職位ê時chūn，伊iáu ē-tàng自付旅費，到東京去kap長子彰輝tàu陣tòa。Tī伊siōng艱難ê時期，伊一家口á ê生活費、gín-á ê教育費、後生彰輝ê學費，lóng iáu tio̍h維持。Tī當時ê社會內底，維持án-ne ê生活、交通、gín-á教育ê費用，算是真貴..ê。Koh當時ê帝國大學無獎學金，教會mā無能力幫助傳教者ê子女。台灣長老教會第一ê傳道人，基本上是『堂會』，ē-tàng支付伊一家ê生活費，chiah得『宣教師會』hō͘伊封立為牧師..ê。M̄-koh薪水ē-sái講大部分lóng停留tī宣教師會所設定『siōng底限』。所以眾kiáⁿ兒上長中、長女、神學院，lóng由宣教師會支付獎學金註冊就學。筆者又koh無讀到宣教師會ê記錄內底，就黃彰輝ê高等學校kap帝國大學就學事項，指出『支付上高等教育學府ê獎學金』。所以真可能，黃彰輝ê全部留學、旅費kap生活費，lóng是由家產來開支..ê。可能是án-ne ê家庭背景，養成黃彰輝帶有m̄驚日本人，mā m̄驚洋人，敢主張家己ê意志，有ná『少爺』ê氣派。

Tī黃俟命任職長中教員期間，伊mā tī東門長老教會兼任牧師ê工作。1920年，南部基督長老教會中會任命伊為教師，伊受委任兼任台南東門教會負責人。因為東門教會tī地理上，最近tī長老教會ê中學kap女子中學，koh伊主張禮拜日ê禮拜，應該tī禮拜堂敬拜，所以伊致力貢獻tī募捐，來建設ē-tàng容納1,000人ê禮拜堂。禮拜堂是tī 1926年落成。經過真chē年ê經驗kap phah-piàⁿ，真無簡單tī 1927年5月12日tī該會受封立為牧師。

黃俟命就職長中ê舍監兼校牧時，chiah 26歲，校長萬榮華mā kan-tāⁿ 28歲。Tùi 1916年到1934年，lóng總做18年。萬校長tī伊ê『長榮中學歷史』內底，提起伊ê功勞，講：『tī伊任校牧ê 18年內底，lóng總有344名學生接受成做基督徒。1934年當伊離開ê時，koh tī學校ia̍h-sī升學ê人有133名，職業不詳ê人（做農ia̍h-sī經商）有65名，做牧師ê有41名，做醫生ê有37名，齒科醫生有14名，企業家23名，公務員ia̍h-sī事務員15名，教師7名，死亡9名。』

萬校長回憶講：黃校牧tiāⁿ-tiāⁿ為tio̍h學生ê違規傷心，善導in解決問題。不sám時tī深夜chhōe學生討論，mā為in ê需要走chông。有時chūn實行處罰，m̄-koh tiāⁿ-tiāⁿ善導學生祈禱。萬校長有一pái比喻in兩人tī學校ê作用，有ná『tī chi̍t-ê體內ê頭（指校長）kap心（指校牧）』。萬校長mā真滿意長中通過黃校牧kap年經ê鄭溪畔、潘道榮合作，舉辦全島主日學校教員ê訓練會、教材ê編制kap使用ê指導。In mā起用中學ê學生，到地方教會去從事宗教教育kap靈性成長上ê指導。

1934年伊ê離職，是因為日本政府強制要求教育機構ê日本化，koh皇民化當快速teh抬頭，學校內底無koh允准無使用日語ê教師。黃俟命牧師長中離職了後，就tī台南東門教會做專任牧師。雖然伊bē-sái繼續做中學教師，m̄-koh伊無放棄對市政ê參與kap關心，tùi 1933年到1935年ê兩年內，伊甚至hō͘選做台南市『東門町地方委員』（像今日ê市鎮民代表）。台灣教會ê歷史家楊士養牧師tī伊ê傳記內底，hō͘ 伊chi̍t-ê評語講：黃俟命牧師『靈命豐富，講道有力感動人心』（註二）。

第二代ê宗教家黃俟命，雖然tī真chē束縛之下，猶原ē-tàng發揮教誨、感化少年一代ê人，伊ê一生thang講是不斷tī殖民政策下抗爭，tī本地人當中宣揚kap教化基督教ê信念，家己一生過刻苦、耐勞、勤儉ê生活，m̄-koh伊hō͘真chē受伊教化ê人過tio̍h豐富ê人生。伊是chi̍t-ê完美ê基督教宗教家，當牧師做牧養人群ê典範，做教師感化求上進新一代ê世間師表。伊是所有台灣人內底、ùi頂面領受siōng大ê靈性根源ê先知，伊ê生命mā是台灣精神ê siōng大表現。

黃彰輝講，伊ê第二位ê神學教師就是伊ê父親黃俟命。伊扮演ê角色就是：父親、教師、牧師，綜合成做真完美宗教家ê榜樣。13歲ê少年黃俟命，tī楠仔坑就已經發揮領導ê天份、優秀ê宣教、傳道ê能力。伊就是tī 1903年6月17日透過宋忠堅接納成做教會成人會員，日本統治台灣滿10年ê時chūn，正是日本tī台灣ê總督府承認長榮高中做『高等學校』ê 1906年，黃俟命入學hit間學校。Tī當時ê台灣，除了神學院當時通稱『大學』ê學府外，koh無任何koh-khah koân ê人文、哲學、歷史等高等教育ê學府。所以伊tī 1909年畢業了後，續落來入學台南神學院，koh tī四年後ê 1913年ùi『大學』畢業，少年ê時chūn，已經是實踐ê宗教家，chit-má koh-khah是滿腹學問ê學者、師表。

黃俟命受派tùi彰化到鹽水港牧會，m̄-koh tī-hia kan-tāⁿ一年，因為萬榮華ài伊加入中學ê教師陣容，當聖經kap漢文ê教師mā兼寄宿生ê舍監。萬榮華講，當伊接管中學ê時chūn，學生總人數60名，所有ê學生lóng tòa tī學寮內底，黃俟命就離開了牧會ê生活，koh進入牧養學校kap學生ê生活。伊tī長中工作lóng總是18年ê光陰。

四百年來，tī殖民主義政策ē-kha ê台灣人，從來to無機會參與全島性ê政治。因為tī外來政權ê統治下，政治ê要位一向lóng是由特權者－日本人來做。好ka-chài，tī基督教會團體內底，特別tī長老教會體政內底，台灣人有機會學習民主政治。眾宗教家就得tio̍h機會，tī組織『中會』kap『大會』以後，hō͘選做教會ê議長soah成做全島、全國性ê首領。黃俟命是tī 1939年4月21日當選南部大會議長，chit時tú好世界大戰爆發前ê冬半，長男彰輝離開台灣去英國了後，經過了一年八個月，日本政府對基督教會施加壓力，致使萬榮華mā tī he年11月，結束tī台灣ê英人長老教會宣教師會，tńg去英國。

林金是黃俟命ê夫人，mā是黃彰輝ê母親。根據kiáⁿ兒ê回憶，伊是神學注釋ê老師，每一pái對『阿公』所講ê故事，ia̍h-sī對事物ê描述有疑問，伊一定會去問伊，對十歲前後ê少年，伊是百科全書，mā是解說家。做舍監夫人ê伊，實際上是寮母，ài注意關心寮內中學生ê身軀kap穿chhah、食、tòa、行ê問題，為tio̍h翁婿擔任宗教家、校牧ê職務，伊『必然』mā『應該』是專業koh無報酬ê『義工』。彰輝kap差一歲ê永輝開始有記憶ê時，就是tī學寮邊á，差不多是tòa tī玻璃窗內面ê宿舍、舍監ê背景內底生活。彰輝tiāⁿ-tiāⁿ回想伊家己kap台灣人基督徒ê認同ê根源時，tī頭殼內lóng有母親對世界、島內社會、家族kap教會ê註解、解說、ia̍h-sī關察做根底。

下面ê圖是黃俟命牧師親筆所寫ê家庭記錄，雖講是戶籍表，其實是各人ê洗禮、堅信禮等等ê記載。表內底吳櫻桃女士是黃俟命牧師ê續絃師母。
下面ê圖是黃俟命ê相片

註一：伊入學hit年，日本總督府認定hit間學校做私立台南長老教會高等學校，以後，一直到日本結束殖民統治為止lóng叫做『台南長老教中學』，以下簡稱『長中』。 註二：參看楊士養牧師所tio̍h：《台灣信仰名人畧傳》第二冊－p.83-86，kap楊牧師tio̍h、林信堅修訂本：《信仰偉人列傳》p.85。

第三代宗教家黃彰輝牧師 黃彰輝三字，tī台灣，發音作Ng Chiong-Hui，tī家庭、朋友師長kap同學、教授同僚kap學生、教會內ê同工kap會友之間，伊是hō͘人稱呼做Ng Bok-su。Tī日本ê統治之下，官界kap教育界lóng受壓迫使用日語，所以仝款ê三字，變發音作Shoki Ko。tùi伊入公學校（小學）到完成大學，甚至到英格蘭留學，kui-ê受教育ê期間，伊lóng hō͘人稱呼為Ko Shoki。Tī蔣介石統治下ê台灣，官用語是北京話，伊ê名改發音作Chang-Huei Hwang（常簡寫為C.H. Hwang）。1965年，離開台南神學院，定居tī英國以後，hō͘名Shoki Coe做法定ê名字kap稱呼。Án-ne，tī伊ê一生中，伊就有四個語言，發音ê名字。伊mā使用過三個國家，用三種無仝併音名字ê護照。黃牧師tiāⁿ-tiāⁿ感嘆講：『名字hiah-ni̍h chē，koh領過hiah-ni̍h chē國家發ê護照，m̄是彰顯台灣人榮光ê歷史，是指故鄉經歷真chē世代受壓迫ê悲哀。』

伊為tio̍h準備成做第三代傳教師，tī 1937年讀完東京帝國大學哲學系，koh再立志往劍橋ê西敏斯特學院（Westminster College）留學。黃俟命有心ài彰輝知影in厝ê根，kap tī ia̍h-bōe歸依基督教信仰以前ê宗教型態、文化情境，kap生活倫理現況。Tī往英格蘭留學chìn前，父親黃俟命ài黃彰輝到『故鄉』ê東港去訪問『郡叔公』。伊是阿公黃能傑siōng少年ê堂弟，大概大黃俟命10歲，大彰輝30 gōa歲nā-niā，生活富裕。彰輝tī『郡叔公』厝裡tòa兩三工，主要ê嚮導就是『郡叔公』ê長子天德，kan-tāⁿ大彰輝一兩歲。有一工暗時，chit位少年ê堂兄天德，找伊去看阿公能傑tī歸依基督教以前，做法師時ê廟宇。起頭，彰輝好奇，想beh向前探望，m̄-koh無久就起驚hiâⁿ ê情緒，koh變成破病仝款。伊所感受ê心理ê高昂kap憂鬱，致使伊ē-tàng體會到家庭tī信仰上ê『埃及』舊故鄉ê狀態，kap『出埃及』前後ê心路歷程。

Án-ne受高等教養造就ê黃彰輝，是黃家第三代ê宗教家。Tī 1947年，tùi英國回鄉當時，是台灣出身ê宗教厝內受siōng高ê正規教育ê人物。像伊ê父親服務長中18年，伊mā任教tī長榮中學兩年。兩年後ê 1949年，35歲，伊就受封立做牧師，koh擔任台南神學院院長。Tī台灣siōng久ê大學程度ê學府歷史內底，伊是台灣本地人第一位做院長。Tī 1949年當時，伊可能mā是siōng少年ê高等教育學府ê首長。牧師ê稱謂，是基督教會hō͘神職人員ê職稱。學者ia̍h-sī宗教家，無一定就是牧師。m̄-koh，牧師ê職份，就是一定beh向一陣ê人，負起靈性方面ê養育，生活上ê指導，顧in全部ê人ê福益ê責任。

Tī神學院做院長，mā擔任系統神學ê教授，伊ê任務影響kui-ê台灣基督長老教會。因為伊教導神、人、教會，kap社會、世界ê連貫kap互動。神學是牽連到科學、政治、經濟、醫療等等ê倫理、理念ê領域內底ê。所以伊主張神學是人tī活活ê社會、國家、世界ê實況內，不斷teh進行ê『省思kap考究』。

黃彰輝後來稱家己為『神學教育家』。ùi chit種ê稱呼，咱thang看見伊有『神學家牧師』ê志向。伊kā一生主要ê精神灌注tī『思考』、『啟蒙』、『感化』、『養育』ê工作內底。m̄-koh因為是時代ê需要，mā ài顧tio̍h『人事』、『管理』、『經營』、『硬體』方面ê院務。伊ê牧養工作，m̄-nā是學生ê功課、生活環境，延伸到in ê健康。會記得，1951年入學ê學生李培道入台南病院治療，伊聽tio̍h李需要輸血，就去病院請醫師kā伊家己ê血抽hō͘李氏。教授內底，bē少人mā得tio̍h黃院長ê『鼓勵』、『催逼』、『推薦』，去外國深造。Tī伊做院長ê 16年內，伊所接觸ê牧師、長老、教會，遍佈全台灣。伊tiāⁿ-tiāⁿ喚醒台灣ê教會：『宣揚基督教ê好消息，mài單獨行事。世界角落lóng有同道、同志、同工teh關心、祈禱，in mā需要咱關懷、代禱。』黃院長tī台南神學院任職ê期間，破例接受台灣基督長老教會總會議員推選伊兩pái（1957年kap 1965年）擔任總會議長。雖然tī伊ê時代，身為台灣人，tī政治上無法度到siōng-koân，soah tī教會內底做首長，整合會內ê各種組織、運動kap展望，koh ē-tàng對所共存ê社會kap政治團體，表明關懷。Koh-khah進一步，mā tī國際社會負擔教會領袖ê義務kap責任，參與國際教會ê外交kap合作，koh奉獻tī建立世人ê和諧、合作kap世界ê和平。

Tùi 1965年，伊辭去台南神學院，koh進入普世教會協會（World Council of Churches)內底，專職服事tī全世界上神學教育ê進展。伊做普世教會協會ê神學教育基金會ê主任幹事（原先ê名稱是：The Theological Education Fund，後來改稱做Programs for Theological Education）。Tī伊ê屬下，bat有非洲出身ê神學家圖屠牧師（Dr. Desmond Tutu），mā有亞洲出身，做過神學院院長ê女神學家周藤牧師。圖屠牧師因為是南非出身ê烏人，目chiu金金看『分離歧視烏人ê政策』，身tī倫敦以世界當做舞台，soah心tī故鄉想念千萬受歧視、壓迫ê同胞。Tī 1975年，當伊hō͘選做約翰尼斯堡第一位烏人福音派主任牧師ê時，圖屠牧師kā伊ê去留，kap對鄉土ê使命等ê煩悶，the̍h到主管黃彰輝牧師面前ê時chūn，黃牧師鼓勵伊tńg去『kap同胞同甘苦』。隔冬1976年，圖屠牧師hō͘選做賴索托主教。Tī 1984年10月，圖屠牧師因為領導以非暴力反對人種歧視壓迫ê活動，koh得tio̍h諾貝爾和平獎。

黃彰輝ê腳蹤遍佈世界各洲。伊ê任務特別注重tī幫助、加強發展中國家kap地區內ê教會kap神學教育機構培養傳道人才，tī參與歐美ê教會活動ê時，mā tiāⁿ-tiāⁿ為第三國家ê弱勢教會代言。伊tī chit-ê職位lóng總做14年，到1981年退休為止。

黃彰輝tī普世教會協會服務ê 14年內，台灣基督長老教會進入伊以前所教導ê學生做領導ê時代。In展開教會做全台灣、全島人民講出心聲，聲明台灣ê前途，應該由台灣人民來決定ê信念。以總幹事高俊明kap總會議長、總會常務委員會組成ê教會首長做決死ê覺悟，作出了三pái勇敢ê聲明。第一pái是：『國是聲明』（1971年）；第二pái是：『咱ê呼籲』（1975年）；第三pái是：『人權宣言』（1977年8月16日）。國民黨政權對長老教會出自宗教信心ê教會聲明kā伊歪曲、曲解，像面臨大敵仝款hō͘伊chiok大ê壓迫。Tī國外ê黃彰輝，熱心幫助，soah chiūⁿ國民黨ê烏名單，tiāⁿ-tiāⁿ來到東北亞kap東南亞，soah無法度回國為後輩鼓勵相助。Tùi án-ne利用一pái到紐約ê機會，tī 1972年12月25日，kap tī北美ê三位台灣人基督徒領袖，同齊發表『台灣人民自決運動宣言』，koh發起『台灣人自決運動』。這運動thang講已經是由台灣島內純粹ê宗教活動，變成世界性、國際性ê宗教人士ê政治活動。Án-ne，tī台灣，為tio̍h beh對付壓制人民400年ê外來政權，thang講是由宗教家藉tio̍h上帝所賦予心靈ê力量kap勇氣，去幫助改革舊ê專制kap壓迫ê政權，koh換來新ê民主。這是台灣ê宗教歷史上ê創舉，mā是宗教家黃彰輝所留hō͘伊ê學生kap後輩ê典範。