《《陳夫人》日譯台ê台灣小說》

《陳夫人》第一部 第七章

作者 庄司總一　著 楊東傑 指導 林俊育 台譯

過年了，安子身體ê無爽快iáu未順序，倒tī眠床頂。Mā無法度kap頂年底仝款，kap in翁作伙去街á買有吉祥對句ê春聯。其中一個春聯án-ne寫：「喜溢高堂椿萱茂，慶鐘洞府琴瑟和」，但今年無辦法有像chit款thang喜句ê情景。新正kan-ta食一塊甜粿，只有kā新年ê氣氛小khóa用舌tam一下nā-tiāⁿ。元旦hit工中晝，氣溫kôan到華氏83度，無適合新年ê氣氛。

普通ê病kiáⁿ期間已經過去，安子iáu是吐bē停，lóng無食慾，身體一工一工消瘦落去。清文漸漸變憂鬱bē爽快，無ài講話。安子想講kám是伊家己一直無爽快倒tī眠床頂，chiah致使伊無趣味去。而且看伊身體漸漸衰弱，煩惱in bó͘ ê身軀，本來歡喜安子有娠，chit-má若無tú好流產hō͘伊感覺不安。M̄-koh有一工，清文來到伊ê枕頭邊，

「你看怎樣？chhōe一工來做人工流產，gín-á mah，隨時ē-tàng koh懷孕來生，kám-m̄是？」

清文án-ne講ê時，安子心內感覺m̄是滋味，“gín-á mah”chit句話聽tio̍h ê感覺，是一種冷淡無熱切koh無謹慎ê口氣。Hit當時清文tú聽tio̍h伊有娠，伊滿心歡喜牽伊ê手講：「聖Gabrial終其尾來報喜loh!」，兩種情況比較起來差距真大，安子感覺孤單不滿。

「醫生對你講我ê身軀chih載bē-tiâu mah？伊對我講chit-má iáu未到採用最後手段ê必要。」

「講是án-ne,m̄-koh你ê身體hiah-ni̍h衰弱，我chiah想án-ne。準講忍受艱苦勉強kā gín-á生出來，mā是無法度是健全ê gín-á，你ê身體若有萬一ê tāi-chì發生，to̍h無thang補救loh。」

「無問題lah, 醫生有保證，一切lóng有神好旨意ê安排。假使知影會生出智障或殘障ê gín-á，我想這mā是咱人類tio̍h去面對來kā伊好好處理ê tāi-chì。」
「無聊！」
清文用看輕ê口氣講，kah-ná無歡喜ê pháiⁿ面chhiuⁿ。
「Ai-ah, 真失禮。無lah, 無hiah無聊ê tāi-chì？咱會生一個受祝福ê優秀ê gín-á lah, 我時時刻刻期待---gín-á若會像爸爸，勇壯ê體格，聰明ê頭腦，完全傳承你ê gín-á，我to̍h會真歡喜neh。」

He是真實ê ǹg望，lóng無phô-tháⁿ ê意思，但清文小khóa火大ê chit chūn soah感覺有phô-tháⁿ ê口氣，mā是難免ê lah。既然是án-ne,伊m̄是m̄知in bó͘ bē講白賊ê正直性格，boeh koh-khah受氣是無理。

「你最近kah-ná有啥物tāi-chì teh煩惱ê款，若是為tio̍h我是khah無要緊，是m̄是有其他煩惱ê tāi-chì neh？」
「無lah。」
「Án-ne to̍h好，若有艱苦心ê tāi-chì，請隨便kā我講講leh。我án-ne kan-ta倒tī眠床頂，hō͘你感覺真煩，koh bē-tàng kā你tàu做tāi-chì，可能án-ne hō͘你bē-tàng kap我商量tāi-chì，但....tio̍h lah, 無jōa久前ê財產問題，chit-má變án怎ah？最近lóng無聽你講起chit件tāi-chì。」

「你án-ne煩惱東煩惱西m̄好lah，對你ê身體無好。有關財產分配ê tāi-chì mah──已經bē記得ah。景文kah-ná是考慮你teh破病，最近lóng無koh來。有時相tú-tio̍h，我提起chit-ê tāi-chì，伊kah-ná無啥物心思就講tùi別項tāi-chì去。是伊家己先提起ê問題，實在真奇怪。」

清文講tio̍h kap自身有關ê tāi-chì，bē輸小弟hiah認真，chit-má soah講bē記得，顯然清文ê憂鬱kap hit-ê問題完全無關係。安子想講一定是kap伊ê職務工作有關係，前bat問過hit-ê問題，但清文含含糊糊回答，kah-ná盡量無ài去kha̍p-tio̍h chit-ê問題，看起來相當傷腦筋ê款。安子bat小khóa聽講in翁tī辦公室內無啥受歡迎，但最近引起排斥運動等等ê tāi-chì，一點á都m̄知影。既然翁婿無boeh講明，安子感覺對公務方面伊mā不便插嘴，雖然心痛mā是從án-ne無boeh提起。

Án-ne ê日子一工一工過去，安子臨盆ê日子到，非常ê難產，胎兒hō͘母體足足艱苦兩日兩暝，終其尾chiah生出來。

但是chit-ê gín-á拒絕生長做人ê光榮，卻tī暗暗ê所在來吊tāu死去，因為臍帶ân-ân捲tiâu頷頸。

男嬰ê發育相當好，夫婦兩人更加灰心失望。若是心臟小khóa有teh振動，m̄知jōa好leh，án-ne 伊to̍h會哭、會笑，讀冊、談戀愛，有優秀ê思想kap偉大ê行動，有無限發展ê可能性。Án-ne將有活命ê恩惠kap趣味，hiah-ni̍h無膽to̍h去，做老父ê感覺chit-ê嬰á實在有夠亂來，心內大受氣，但做老母ê khah單純，伊感覺連一分間ê生都m̄知ê死mā全無意義，受一個祝福都無ê嬰á，實在有夠可憐。安子無kā嬰á當做死去，kah-ná iáu活teh hō͘伊睏tī身軀邊，禁bē-tiâu kā面貼tī無血氣冰冷ê嬰á ê面。

連ta-ke阿嬌mā來到眠床頭，流目屎講真可惜，表示遺憾，講kah真怨嘆ê話。

「所以我m̄是有kā你講過，ài請道士來誦經安胎，pháiⁿ器具tio̍h貼安胎符。你感覺我講ê話無路用無boeh聽，chiah會致到chit種ê不幸。M̄-koh你iáu少年，以後iáu ē-tàng生幾nā個gín-á，但是chit-ê嬰á bē-sái án-ne khǹg teh，因為死去ê嬰á有鬼附身。」

阿嬌án-ne講了就命令cha-bó͘-kán kā死嬰tùi安子身邊the̍h走。
「Ah, chit-ê嬰á boeh kā怎樣lah？」
「Tio̍h kā伊tàn落去水裡。」
「Ai-ah, hiah殘酷！bē-sái做hiah-ni̍h可憐ê tāi-chì lah。老母，chit-ê gín-á死去ah, 我想無浸tòa水裡mā bē熱。」

「死去ê gín-á無án-ne處理bē-sái lah，若無kā死嬰á tàn落去水裡，會變做鬼來kā你作怪，你to̍h bē-tàng koh再生kiáⁿ。M̄-nā是án-ne,阮全家mā會遭遇m̄知什麼款ê災厄neh。」

「我無ài lah，請mài kā伊帶走。Lín絕對無隨便處理ê權利，伊是我ê gín-á，神ê kiáⁿ。」

安子知影台灣人迷信，mā知影chit位老大人特別迷信，但伊無法度容允chit款愚痴koh無慈悲ê迷信。安子ná親像孵卵ê雞母向侵害者做拚生死ê防衛kap獰猛ê反抗，兇kài-kài ê目chiu金sih-sih，kā嬰á攬tòa胸前保護tiâu-teh，劇烈拒絕ta-ke固執舊習慣ê要求。但是he只不過是冰冷軟sô-sô ê一塊肉，橫直iah bē-tàng kā伊飼奶，也bē-tàng永遠hō͘伊睏tī身軀邊。Tāi-chì m̄-nā án-ne,雖然m̄是阿嬌ê講法，續落來死神行óa來到母體本身。

安子起產褥熱，體溫kôan到四十度以上，開始講陷眠話，有時亂振動黑白講話，是真意外ê tāi-chì。若是病症ê 一時發作無特別奇怪，但tùi平常時hiah-ni̍h平靜優雅ê性情看起來，清文無法度相信安子會有chit款發狂亂來ê姿態出現。而且伊ê胡言亂語無完全是亂來ê妄想，清文感覺是ná親像平常時講bē出ê心思，kah-ná酒醉ê人大膽kā伊坦白拚拚出來。其中對陳家厝裡ê人不滿ê話非常刻薄pháiⁿ聽，罵in ná親像豬hiah-ni̍h低(kē)路、無知、固執、無人情味等等，終其尾對家己翁婿ê不平不滿mā lóng拚拚出來，惡毒kah卸(sià)伊ê面子，m̄知boeh怎樣。

陷眠話中間反覆出現「想boeh食蒜蔥！」但清文m̄-bat看過mā m̄-bat食過，所以m̄知伊teh講啥。In bó͘ ê命好運救活了後，伊為tio̍h探查hit句話「蒜蔥」ê祕密含意，就去恬恬去查《言海》(譯註：日本ê國語辭典)看bāi。伊查tio̍h「蔥類，葉真細，綠色，春天過了葉ê味真重，無適合食用。」

Kan-ta án-ne ê解說無法度理解到底有jōa好ê滋味，但應該是安子故鄉ê植物chiah-tio̍h，懷念hit-ê味覺ê回憶，可見tī伊ê潛在意識中有真深ê鄉愁。
安子ê健康日日回復起來，清文特別會記得hit件tāi-chì。
「你kah-ná有思鄉病，是m̄是？tńg去日本故鄉一chōa看bāi leh。」

有一工清文án-ne講，安子感覺chit句話無真體貼，無hit號心，kah-ná是teh kā伊khau洗leh。

「你講思鄉病oh，無hit-ê tāi-chì lah，你thài會忽然講chit款話neh？」

「台灣無蒜蔥chit種物，kám-m̄是真好食？你tńg去故鄉一chōa，kā伊食一下chiah tńg來ē-sái ah。」
「Ai-ah, 你講啥物話？」
「你kám bē記得ah？」清文苦笑ná像bē通tèⁿ戇講：「前你生產破病ê時，你亂講陷眠話亂嚷，所有ê tāi-chì lóng講出來。聽起來心肝真艱苦，但hia-ê話lóng是事實，hō͘我小khóa失望，感覺孤單。」

「Ai-ah, kám講kah hiah-ni̍h過份，我一屑á都bē記得，無lah, 我是知家己病發作ê時，ná起siáu teh亂來，烏白亂嚷，但是到底講甚物，我已經記bē清楚ah。」
「Kám án-ne, 你kám bē記得所講ê一切？」
「我kah-ná講真pháiⁿ聽ê話，請原諒，因為hit當時我已精神怪怪。請你kā我講我所講過ê話，koh kā我責備kah心爽，恬恬m̄講比啥物lóng khah艱苦。」

「是ah, 恬恬m̄講確實真艱苦。無lah, 我m̄是teh kā你責備，kan-ta感覺真意外soah小khóa失望。」

In bó͘ tī危險狀態ê時，清文一心kan-ta想boeh救伊ê命，根本都無心chiâⁿ去思考安子hiah-ê陷眠話。但是chit-má in bó͘回復健康，tùi危急中救tńg來，因為安心kap歡喜ê感情漸漸淡薄，soah有反常ê妄想，就kā以前買了bē記得讀ê佛洛伊德(譯註：Sigmund Freud, 德國出名ê心理學家)hit本《夢ê解析》(“Die Traumdeutung”掀開來讀。直接ê責備kap正面ê受氣是thang，但ná親像狐狸疑心重來試探bó͘ ê內心，chit種ê作法是下賤ê。是為tio̍h伊tī社會上tú-tio̍h非常ê逆境，就不得不將chiah-ê失意kap不安ê心情對in bó͘來tháu氣。

「He叫做 “subsconciousness”─潛在意識，無中無法度生出什麼物件，心內有物件chiah會講出來。你ná親像聖女hiah-ni̍h純真恬靜，溫柔koh有耐心，我真感心，mā真kā你感謝。但是，你心中若抱不滿，感覺無幸福，án-ne lóng無路用kám-m̄是？若是án-ne, 你顯然對我表示隨在你大聲亂嚷，我m̄知jōa-ni̍h-á好。」

「無lah，無lah，hit時我kui-ê頭殼變kah真怪，我m̄知你講ê潛在意識是什麼意思，但kā我起siáu所講ê話當真來責備，我感覺有小khóa khah過份。你家己最近chiah是有小khóa變，焦心koh多疑，你lóng kā tāi-chì想偏去。」

「Mā有可能，但是你看起來ná親像無幸福。你無幸福是我siōng無ài ê tāi-chì。」
「你家己若無幸福，我ná有可能幸福neh？」
「你問講我有幸福á無？我kap幸福kah-ná lóng無緣ê人。第一，咱ê結婚一開始to̍h無順利，你ê親chiâⁿ硬boeh kā你giú離開我，唯一ê理由是因為我是台灣人。我去到你ê故鄉，tī tha-tha-mih頂磕頭kā lín老父哀求，但受tio̍h極其冷淡ê拒絕。Hit種屈辱感時時kah-ná舊傷刺傷我ê心，我知影án-ne無像(sêng)基督徒ê狹(e̍h)心胸真見笑，但也無法度改善。....á hit當時你決定boeh kap我分離，ná是你ê愛kap理解有夠深，hit時我tī火車站大聲hoah唱「願主保護咱後會有期」(譯註：台語聖詩第446首)，或是發生鐵路事故也無定tio̍h，但....」

「請mài koh講hit件tāi-chì，hit時我是軟弱ê人。我無像你hiah堅強，缺乏突破命運ê氣力。我感覺對你真pháiⁿ勢，m̄-koh神若有指示咱方向，我to̍h絕對bē-koh搖動á是迷路，ǹg望你ē-tàng了解chit點。我若後悔kap你結婚，若講tī陳家生活不滿感覺艱苦，tī提出分財產你講boeh離開chit-ê厝ê時，我thài會無giâ雙手贊成neh？....你有夠神經質來掛意我ê tāi-chi3lah。你硬boeh問我講幸福á是無幸福，終其尾會hō͘我變成無幸福。ná親像無罪ê人經過拷問，mā會講出假ê告白。」

安子目屎含teh，真罕得hiah激動án-ne回答。伊不得不慎重反駁清文無合情理ê講法，家己心內kám有bē堪得hō͘清文kha̍p-tio̍h ê所在，伊時常án-ne疑問，掛tiâu tī心肝內。清文看tio̍h in bó͘無幸福，比啥物都khah艱苦心，但問題是兩人所追求ê幸福性質有真大ê距離。清文對無幸福有恐怖感，盡力boeh逃避ê態度，也就是kap世俗追求快樂ê人仝款；安子卻相反，伊m̄驚無幸福，直接面對事實，有時顛倒去接近hit-ê無幸福ê態度，也就是要求宗教上安定精神ê人。

清文ê理性知影in bó͘講了有理，但感情上卻無法度心平氣和。安子因為失落嬰á心內空虛，無容易解脫，短時間內夫婦ê感情無真融洽(ha̍p)。秋天臨到，但四界lóng無秋季ê氣氛，熱kah kap熱天差不多仝款，樹葉無變紅，mā無落葉。Kan-ta街á因為台灣人過秋節真鬧熱，廟祭ê鬧熱喧嘩免講，陳家mā是連續kúi-nā日吵吵鬧鬧ê聲音。放炮á、燒金紙銀紙ê煙充滿一四界，宴席排到半暝，吵鬧ê音樂teh響。但是，安子看台灣歌á戲無趣味，食月餅mā無感覺好食。安子目chiu金金看hiah-ê人劇烈生活慾望ê表現，koh-khah hō͘伊感覺家己ê孤單。心內tiāⁿ-tiāⁿ想起tī日本親兄弟kap眾親人ê tāi-chì，一工過一工kap in jú離jú遠，hō͘-in bē記得去ê悲哀命運，感覺心痛。伊tī病床ê無意識中講出chiah-ê鄉愁，以前一直沉tī心底ê一種無幸福，iáu無成做精神生活ê障礙來顯露tī表面，清文chiah-ê話顛倒kah-ná弄草驚蛇引起伊ê鄉愁。

清文有一工kap平常無仝ê情形ùi辦公室tńg來，興奮ê眼色，變橫ê面有小khóa ê蒼白。安子比平常時koh-khah小心，kā伊ê官服thǹg落來，已經是清涼ê季節，總是伊ê sia-chuh(shirt)卻hō͘汗隰kah是tâm-tâm lok-lok。
「你是m̄是身體無爽快？」
安子捧(phâng)加冰角ê kha-ru-phi-suh飲料hō͘ in翁，心內膽膽(tám-tám)kā伊問。

「Ngh，」清文發出曖昧ê聲，用吸管lā杯á內ê飲料，嘴角振(tín)動kah-ná想boeh講啥物話，突然，
「無路用！」
伊受氣大聲罵，因為siuⁿ過突然，安子kah-ná去hō͘電電tio̍h，感覺kui身軀麻起來。
「Chit款ê飲料kám能lim得？」
清文激動kā杯á tu還安子，安子ǹg杯á內一看，原來內底浮一隻胡蠅。

「Ai-ah, 我真無注意，m̄知tang時飛入去，我緊來換一杯。」
「我無ài ah lah。」
清文用kah-ná吐出ê口氣講了，懊惱kah目頭結結行出房間，peh起lih二樓ê書房。安子想無撇步，一時tī-hia gōng-gia̍h。清文個性相當激烈，但到taⁿ為止iáu m̄-bat對in bó͘發出hiah-ni̍h明顯ê受氣。

但是食了無味ê暗頓了後，「Tú-chiah我m̄好，請赦免我！」清文án-ne先道歉。雖bóng伊率直講出，其實心內有啥物痛苦bē堪得忍受ê款，目chiu甚至有看見目屎。

「無lah，是我無細膩，失禮lah，因為我lóng無注意tio̍h有胡蠅飛入去。」

「M̄是胡蠅ê tāi-chì，hō͘我受氣ê是人，人kah-ná胡蠅浮tī杯á裡。清文teh-boeh苦笑ê面隨時變成痛苦ê嚴肅氣氛，「安子，我決定boeh辭職無ài koh去上班lah。」

因為以前m̄-bat聽過伊講chit款話，安子真意外tio̍h驚。Chit-chūn伊chiah明白kan-ta一隻胡蠅hō͘伊hiah-ni̍h受氣ê理由。對安子本身無論如何，對清文來講有種種ê理由tī-teh，所以是大問題koh是重大ê變化，安子kan-ta感嘆一聲「ai-ah！」以外，無法度koh講落去。

「最近課長ê人事變動已經決定，你想看啥人boeh來接chit-ê缺？是kap我仝期ê大學同學，hō͘我非常憤慨。而且對方是落第兩pái ê漏屎馬neh。若無仝課iáu無要緊，卻是kap我仝課chiah害。我tio̍h每工早暗tī chit-ê以前仝期ê漏屎馬面前tòm頭，服從伊ê命令。我kám有法度忍受chit種ê侮辱？Kám-tio̍h án-ne忍受？」

「Thài會發生chiah-ni̍h奇怪ê錯誤？準講是出tī偶然mā是有khah過份。」
「並m̄是偶然。」
「Án-ne kám講是故意ê？」
「真惡毒ê計略，顯然是故意boeh惹我受氣，án-ne hō͘我tòa bē落去，kha-chhng pōaⁿ-pōaⁿ-leh偷偷á溜soan,hō͘人來kā我恥笑。」

「有夠可惡！你kám知是啥人想出chit種惡毒ê主意？你無kap人結啥物冤仇chiah-tio̍h。」

「M̄是lah，我kah-ná是容易惹人無歡喜ê人。至少對hit款社會ê人是án-ne,我無法度做到清濁合流，m̄-nā是做bē到。無ài lah, 我是討厭án-ne做。無四正、曖昧、馬馬虎虎ê tāi-chì我真討厭。我想boeh hō͘社會來肯定，kah-ná小khóa有著急，這是我ê見笑。但是，我一直要求家己ê價值肯定人，我m̄是m̄知諂媚、醜陋ê設計或利用金錢ê作法─我絕對做bē落去lah。我ê性格kap in bē合。M̄-koh chit-pái m̄是個人怨恨引起ê小khóa tāi-chì，是全體ê聯合抵制(boycott)。到chit-ê地步，我無boeh koh再厚面皮去上班。我已經看破官僚生活，所以我斷然決心提出辭職書。」

「變kah hiah-ni̍h慘！無chhái你抱tio̍h熱情kap ǹg望行chit條路，對chit件tāi-chì你tio̍h平靜落來好好á思考leh,一時 ê 感情用事來喪失生涯是算bē-hô lah。」

「M̄是一時ê感情用事，絕對m̄是。 雖然我m̄-bat對你講起，但對chit件tāi-chì,我早to̍h不斷teh思考，teh操煩。」

清文ê聲講到chia忽然變無力ê聲soeh(說)，kah-ná無boeh koh講落去ê款。 興奮ê火鎮靜落來，看起來kah-ná向oh得抵抗ê壓力àⁿ頭喪氣ê款。Chit時安子chiah清楚了解in翁ê心情，台灣人差不多l'óng無法度升任高級官員。安子以前加減有聽過 in翁bô屬tī chit款ê例，不管in翁jōa-ni̍h努力jōa-ni̍h苦心，總是有無法度超越ê障礙，伊ê升遷有一定ê限度。大約一年前開始，伊就有不安操煩ê氣色，偏見、猜疑心kap急性等性格ê缺點非常明顯，安子真無法度了解一個人變kah hiah-ni̍h無溫柔koh刺鑿，伊chit-má lóng了解lah。如果in翁若是日本內地人，tú-tio̍h siâng款ê逆境、苦惱，hit-ê程度雖bóng相同，情況會小khóa無仝chiah tio̍h。這m̄-nā是針對單純社會制度高升ê限制，頂kôan iáu有民族ê思想kap感情參雜tī-teh,仝款ê憤慨kap仝款ê苦惱，有可能呈現出複雜ê面貌。
「我雖然一直無kā你講....」清文án-ne講，伊ê 話有悲傷。
「若是 án-ne,thài 無boeh量早 kā我講neh,thài無boeh將所有ê煩惱對我講明，無ài kā全身投靠我leh?」安子an-ne埋怨。

清文不斷teh掛意ê「無幸福」，安子˜m̄-bat親像chit-má chiah有明顯强力ê形貌來感覺着。