《疼你e5厝邊》

 | | | 轉寄

勇敢ê台灣人朱萬花

作者 Chuniok 2005.11.27

萬花是一個勇敢ê台灣人，伊講我mā是勇敢ê台灣人；伊是中寮鄉ê庄腳人，我是國姓鄉ê田庄人。Kah-ná南投ê庄腳人kap田庄人，lóng是勇敢ê台灣人。

想起六、七年前，我建議伊tùi按摩轉業來做節目主持人，因為伊有天分koh有興趣。Hit時我定定lóng khah長期tòa美國，台灣大環境tùi視障者ê岐視kap迫害，我真煩惱我ê建議m̄知會害伊á bē。勇敢ê南投庄腳人，憑伊堅強ê意志kap努力，看伊按呢一路辛苦行過來，有kóa不忍心；但伊一步一腳印漸漸hō͘我感覺我ê煩惱是加liáu ê。

今年三月轉來台灣，我kā萬花講 [台灣國際地位提升，世界出名ê哈佛大學開台語課，以台語ê研究做Ha-oa-i(夏威夷)大學博士論文ê李勤岸教授(正港ê勇敢ê台灣人，為tio̍h救咱台語才去讀語言學博士)受聘去教；伊mā來阮教會教同鄉台語，我tī伊ê指導下覺醒母語ê滋味kap氣力，]我開始寫台語，伊叫我將伊hit本《用心看世界》kap CD全集ê台語歌詞譯做漢羅（漢字及羅馬字混用）台語。Tī chit陣台語chiah teh發芛(íⁿ)ê坎站，伊按呢做mā是勇敢ê台灣人做法；伊chit塊CD，我敢講是世界第一塊使用漢羅台語歌詞ê開先鋒。Ǹg望chit小步會當帶動台語勇壯成長，hō͘台灣人早日出頭天!!!Mā tio̍h祝這塊CD發行大成功!!!