《疼你e5厝邊》

| | | 轉寄

瞎子摸象ê誤解

悅君讀基督教辦ê惠明盲校ê時陣,就感受tio̍h上帝ê疼來洗禮成做基督徒;出社會了後雖然受tio̍h真濟無情ê打擊kap挫折,伊猶是轉來教會參加盲人詩班kap盲人查經班,tī上帝ê恩典內,伊活出有活命ê喜樂。

悅君kap in翁是惠明盲校前後期同學,厝裡lóng m̄是基督教家庭,兩人因信仰相仝來結婚,赤手空拳開創按摩事業。因為夫婦待客如賓,按摩功夫好koh認真,經過七年ê奮鬥,終於chhoân足頭款,tī中山北路二段附近買一間三十坪ê公寓。In生兩個囝,lóng活潑可愛,親朋好友來訪lóng搶teh要抱,而且lóng羨慕in翁bó͘真好命,但in lóng回答講:「Lóng是上帝ê恩典lah!」

Tī等待人客來電話叫按摩ê有閒時間,悅君lóng認真摸讀伊用四千kho͘買來ê新舊約點字聖經,同時也kap in翁分享讀經心得。In翁bó͘ lóng親身經歷社會大眾對盲人ê無了解kap歧視,in知影這是根深柢固ê人類歷史悲情,連聖經中(新約kap舊約)lóng對盲人仝款無情歧視;當耶穌醫治一個盲人來證明伊ê神聖權柄時,受益ê當然是hit個「盲人乞食」;但上代表無助kap目標茫然ê「盲人牽引盲人」chit句話,m̄是也ūi聖經來mah?但in翁bó͘相信耶穌ê復活kap得勝亦tio̍h心存喜樂,聖經hō͘ in tùi上帝來ê智慧,hō in雖然肉體目睭看無,心靈ê目睭卻是光耀明亮ê。

當盲人查經班查讀舊約ê《約伯記》時,帶領查經ê講員解釋講:「約伯kap伊三位朋友爭辯上帝hō͘約伯苦難ê意義,lóng是tùi自己狹隘ê認知觀點來陳述,tú親像中國人有一個「瞎子摸象」ê好譬如,當青暝ê人摸tio̍h象腿講象是一支大柱仔,摸tio̍h象鼻講象是一支大喇叭,摸io̍h象肚講象是大牆。」

悅君kap在場ê盲人lóng聽tī耳裡,氣tī心肝裡。講員雖然無受tio̍h聽眾ê怒目相對,但伊也感覺tio̍h氣氛ê無好,chit時悅君舉手後khiā起來,聖經ê智慧hō͘伊心平氣和來:「真失禮,我有無仝款ê看法。首先,『瞎子』是帶有歧視ê字眼,現在大家lóng改稱目睭無看ê做『盲人』或是『視障者』。Koh講這個譬如非常無適當,這是對盲人無了解而且無公平;你若hō͘盲人夠額ê時間hō͘伊摸(看)完全部ê大象,伊會kā你講大象就是大象。阮盲人[目中無人],但明眼人卻[視若無睹];請你『mài干單看tio̍h我無看ê』,人ê智慧kap能力lóng是有限ê,包括明眼人kap視障者,對代誌ê認知lóng是侷限tī一角,無辦法像上帝看到整個宇宙。你所認知ê盲人可能只是『象是大柱』,或是『象是大喇叭』,或是『象是大牆』。」

悅君坐落來,講員親像tú-tú睡醒ê囝á,kā ài睏神ê目睭揉揉leh,看tio̍h台仔腳三十幾蕊目睭對伊恥笑無停,笑伊ê無知kap愚戇。伊幾pái想欲講koh恬去,m̄知beh按怎落台,當伊àⁿ頭默默teh祈禱ê時,伊聽tio̍h上帝ê聲音才認罪。伊放落低聲講:「對不起!我用m̄-tio̍h ê譬如,我完全同意悅君ê講法,以前我無知,以後我絕對bē koh用這個譬如。Koh一pái kā大家會失禮!」