《各各他e5目屎--苦難得安慰》

 | | | 轉寄

珍視「悔改」ê資源

作者 紀福讚 2006.04.09

「上帝所愛ê祭物，就憂傷ê靈，憂傷痛悔ê人。」（詩五－17），這個獻祭觀念ê轉變，是大衛tī家己犯大罪，渴慕上帝ê憐憫，得tio̍h赦免，確信上帝疼、憐憫ê本質以後，最深沉ê洞察。大衛一生尚寶貴ê特質，就是敬畏上帝，隨時尋求上帝ê心意。出征、建聖殿ê準備，就tio̍h先徵求上帝ê意思，m̄敢按照自己ê意愛kap靠家己ê聰明、經驗去做代誌。做王四十年久，享盡人ê愛戴，kap上帝ê歡喜，用足濟thang紀念，thang獻祭，但這個犯罪 ê記錄，深沉ê體會，最會當phah動人ê心，講出濟濟人m̄敢講出ê心聲kap 苦情。親像保羅所講--ê，「我是罪魁，總是得tio̍h憐憫。」（提前一15），非常有震撼ê氣力。親像耶穌復活ê第一個見證人是犯姦淫 ê婦人人，抹大拉ê馬利亞。「憂傷痛悔ê心，耶和華無輕看」，但今á日ê教會常常忽視，m̄敢看這個憂傷痛悔ê心。Khah ài看ê是，繁榮、富足、成功ê一面，致到教會失去這種上帝尚愛ê祭物－－憂傷痛悔ê心靈。

一間教會ê富足，tī人ê觀念是有偌濟奉獻，偌濟人teh o-ló敬拜，但是上帝是看內心，m̄是看外表ê上帝，tī上帝，富足ê教會，決定tī伊有偌濟「憂傷痛悔ê心靈」。為什麼？因為「憂傷痛悔ê心靈」所獻ê祭，感謝ê質量尚濟。詩篇五二13－14「我kiám ài食公牛ê肉，喝山羊 ê血mah？我愛ê是感謝ê心意。」這位大衛ê祭司亞薩，tī執行獻祭幾十年久ê體驗，就是「出tī完全ê感謝，才會榮耀上帝」（詩五二23）。耶穌對法利賽人西門ê教訓也sio-siâng－「愛疼濟赦免濟，赦免濟愛疼濟」（路七47）。對上帝疼ê回應偌濟，在tī「體會上帝偌濟ê赦免。」體會ê赦免愈大，對上帝疼ê回應也愈強。若無這種「受赦免ê體會」所獻ê祭是「巴結神明」，是「拜偶像」，是法利賽人式ê獻祭。用好物招待耶穌，邀請有名望ê人做伴客，結果是顯明家己ê富足、愛心、好心、光榮，莫怪耶穌講「赦免少，疼也少」。伊看重、珍視卑賤ê婦仁人「悔改痛悔ê心靈」ê奉獻。Sio-siâng ê觀念，tī路加十八 9-14聖殿禮拜祈禱ê比喻表明kah非常清楚。法利賽人講：「主ah！我感謝你！」罪人kan-taⁿ講：「可憐開恩我這個罪人。」什麼是真正ê敬拜，上帝所接納ê獻祭、祈禱，tī chia表明kah非常清楚。教會所忽略，m̄敢看ê，tú好是上帝所重視--ê。

教會這種忽視，造成教會真濟ê病端。教會喪失對罪挑戰得勝ê見證，教會m̄敢面對罪ê挑戰，用疼、接納、赦免來得勝，見證基督得勝ê氣力，反轉是用逃避、指責、妥協來排斥罪人，向罪表示教會ê無奈。耶穌是接納罪人，向罪挑戰；教會相反，kap罪妥協、排斥、棄絕罪人，喪失kap撒旦戰鬥ê勇氣kap氣力。這種ê習慣，soah變做是一種無見證，無上帝祝福ê羞辱。致到教會m̄敢追求真理（實）、公義，驚了tī過程中暴露家己ê罪，失去人對家己，對教會ê尊敬kap崇拜、吸引，捏造教會是神聖、牧師是聖人ê形象，致到hō͘真正想beh接近上帝ê罪人，m̄敢親近教會，最普遍ê一句推辭去禮拜ê話：「等我行為khah好ê時，我才敢去見上帝，加入教會做好人ê行列。」所以濟濟人去教會必須戴各種溫純羊羔ê假面具，學習一寡法利賽式ê宗教術語－－疼、仁愛、公義、屬靈、光照、忍耐.... . . 等。結果是吞忍罪，對罪人刻薄，教會面對親像法利賽人ê危機－－外面粉白，內面是àu骨頭；注重外表ê聖潔，忽略內面ê清氣；人ê評價kà過頭tī對上帝ê忠誠；什麼人敢koh見證講：「我是罪魁，總是得tio̍h憐憫」來榮耀hō͘上帝。

善用「罪」付出ê代價，大衛ê犯罪代價是刀劍無離開伊ê家。這種代價何等ê大，致到咱讀詩篇ê時，得tio̍h儆醒，對相同ê罪有敏感，對撒旦ê手法咱有熟悉，免tio̍h咱接受相同ê刑罰，付出相同ê代價。聖經kiám是一本人犯罪ê記錄，hō͘人儆醒，hō͘人對上帝ê憐憫有信心，敢悔改來親近伊mah？但教會為什麼kan-taⁿ講抽象ê罪，m̄敢講真實，現實生活中ê罪，來對咱存在ê環境提出挑戰kap呼籲！互相吞忍彼此ê罪，m̄是彼此認罪、代求，hō͘撒旦無孔縫thang攻擊教會，免得外面好看，內面已經是受腐化ê àu骨頭，失去聖靈ê活力kap更新ê氣力。聖神來是為罪、為義、為審判、家己責備家己（約翰十六8）。教會若失去這種認罪、悔罪、赦罪ê功能kap見證，kiám會是耶穌道成肉身ê身軀？善用「罪」已經付出ê代價，珍視「憂傷痛悔ê心靈」ê資源，做一個敢向「罪」挑戰卻是接納罪人ê教會。