《巫義淵台語常用字》

 | | | 轉寄

常用字_38....「單」

作者 巫義淵 2013.03.31

單有四個讀音：1.tan (丹)。2.toaⁿ (端)。3.siān (善)。4.khia (迦)。這字一般社會人士多數 攏會曉三個讀音，另外一個 khia 的讀音較少人咧使用。第一個讀音：tan、是本音，有 兩個含意。(1).抵好、無欠。例如：單調[tan-tiāu]，單純[tan-sûn]。第二個讀音：toaⁿ、是 話音，有三個含意。(1).獨一個。例如：孤單[ko͘-toaⁿ]。(2).紙張的代名詞。例如：宣傳單 [soan-thoân-toaⁿ]。(3).布做的被服。例如：被單[phōe-toaⁿ]。第三個讀音：siān、是字姓 的專用音。第四個讀音：khia、是台語用字。例如：私單[sai-khia]。

重點字詞：
【單】1.tan (丹)。2.toaⁿ (端)。3.siān (善)。4.khia (迦)。
【單國璽】[siān kok-sú] (善谷暑)。
【藥單】[io̍h-toaⁿ] (鑰端)。倩鬼提藥單。
【單純】[tan-sûn] (丹巡)。

用例：
天主教教宗若望保祿二世佇1998年頒布高雄教區主教【單國璽】[siān kok-sú]晉升樞機主教，伊是1923年12月2日生於中國河南，這是有歷史以來第一位對台灣晉升的樞機。伊佇2006年8月被驗出患著末期的肺腺癌，醫生判斷伊chhun 無幾個月的壽命，m̄-koh 因為伊信仰堅定、一向攏視死如歸，所以到今仔日猶活lèng-lèng四界pha pha 走。最近全台灣的人攏為著瘦肉精佮禽流感的問題咧焦(操)心，有人足僥疑、敢講咱選馬英九來做台灣總統，是咧倩鬼提【藥單】[io̍h-toaⁿ]？若無為甚麼馬英九那會即呢堅持硬欲進口這款物件咧？一項真【單純】[tan-sûn]的牛肉進口事件，問題會變kah 即呢複雜，有人咧議論講，敢會因為馬先生有綠卡驚美國人ka 漏氣，抑是將台灣人的錢偷偷仔掩去[iap-khì]做【私單】[sai-khia]，提去寄佇美國！？