《巫義淵台語常用字》

 | | | 轉寄

常用字_41....「號」

作者 巫義淵 2013.04.21

號有四个讀音，華語亦有兩个讀音，對華台語來比較，台語較精密，表達較清楚，用佇無共的所在，攏有無共的勾破音。這字的讀音三四十冬前，無論是佇教會抑是社會真濟(多)人會曉，近代因為受無正常的教育影響，佮低俗的廣播、電視的誤導，致使台語讀音真濟攏變聲變調！這是咱應該扑併的課題。第一個讀音：ho (蛂)是用聲抑是用手比暗號的意思。例如：旗號[kî-ho]。第二個讀音：hô (禾)是大聲呼叫[âu-kiò]。例如：號泣[hô-khip]，哀號[ai-hô]。第三個讀音：hō (賀)是記數的數字符號。例如：號碼[hō-bé]，號牌[hō-pâi]。第四個讀音：kō (翱)就是所屬的年號。例如：甚麼年號[siáⁿ-mi̍h-nî-kō]。 註：有人講[nî-koh]。

重點字詞：
【號】1.ho (蛂) 2.hô (豪) 3.hō (賀) 4.kō (翱)。
【哀號】[ai-hô] (埃禾)。
【掛號】[kòa-hō] (卦賀)。
【年號】[nî-kō] (尼翱)。
【出旗號】[chhut-kî-ho](齣其蛂)。

用例：
古早的科技無發達，人的生活攏愛靠大自然、抑是家己扑併(拼)，國家機制嘛共款受侷限佇某範圍內，若出兵去征討，統帥攏用出【旗號】[ki-ho]來指揮部隊，無法度親像這陣用無線電來指揮。通訊交通無發達，一旦若發生戰亂，無辜的老百姓死傷萬千，無奈又因戰亂致使農作欠收，民不聊生，累及婦孺老弱，叫苦連天【哀號】[ai-hô]遍野！有地方有志，出面【號召】[hō-tiàu]鄉親壯丁來扶弱救難，用來平息民怨，等候【年號】[nî-kō / koh]若變換，會當帶來新的希望。