《巫義淵台語常用字》

 | | | 轉寄

常用字_42....「憚」

作者 巫義淵 2013.04.28

憚 tàn 有三个讀音：1. tàn (旦) 2.tān (誕) 3.tōaⁿ (段)。這字佇台語嘛是屬常用字。第一個讀音：tàn、有兩個含意。(1).驚惶的意思。例如：肆無忌憚[sù-bû kī-tàn]。(2).心肝焦(操)勞的款式。通作怛。例如：憚惻[tàn-chhe̍k]＝怛惻[tàn-chhe̍k]。第二個讀音：tān、是 tōaⁿ 的文音，驚困難的意思。例如：憚改[tān-kái]。第三個讀音：tōaⁿ 、是 kut-la̍t 的對反，懶惰的意思。例如：貧憚[pîn-tōaⁿ]。通作惰。

重點字詞：
【憚】1. tàn (旦) 2.tān (誕) 3.tōaⁿ (段)。
【忌憚】[kī-tàn] (伎旦)。肆無忌憚。
【貧憚】[pîn-tōaⁿ] (屏段)。
【憚改】[tān-kái] (但解)。

用例：
世界各國的族群攏有咧重視家己的歷史文化，多數的族群攏會用慎重的態度來記錄 in 的歷史文化。中國人使用的、是一種惡質的漢文化，有歷史以來攏是用威權霸道來欺騙愚民、竄改編造歷史，亦將中國歷代的帝王歸納成做龍的化身，近代佇臺灣的中國人嘛將二二八的元兇蔣介石奉為「世界的偉人，民族的救星」，其父子雙人的遺孽爪牙，到今仔日猶咧耀武揚威、靠伊來享盡榮華富貴，並且【肆無忌憚】[sù-bû kī-tàn]咧為兩蔣辯護，視其衣食父母的台灣為無物，看咱台灣人足無目睇。真濟台灣人長期被殖民，本性消失、奴隸性帶重，平時【貧憚】[pîn-tōaⁿ]研究家己的歷史文化，致使無自我的價值觀，語言文化攏屈服於殖民者，殖民者若叫咱講日語、大家就攏講日語，殖民者若叫咱講華語、咱就順從攏講華語！號稱本土的民進黨執政縣市，從政者、對殖民者所流--落來的不當語言文化政策，嘛驚困難來【憚改】[tān-kái]，in 為啥物即呢驚困難不敢改例？敢是這寡民進黨的從政者 oân-nā 被同化、完全屈服於殖民者的淫威咧！？