《CTT出頭天園地》

| | | 轉寄

I-sap 寓言 4

4. Chhī Iûⁿ-á ê Gín-á

 Ū chi̍t-ê chhī-iûⁿ ê gín-á kā i ê iûⁿ-á kóaⁿ kàu soaⁿ-kha ê chhiū-nâ khì chia̍h chháu. I kui-ji̍t lóng bô phōaⁿ, chiū siūⁿ-khang siūⁿ-phāng beh chè-chō chhì-khek. I cháu-ji̍p chng-lāi, tōa siaⁿ hoah kóng, “Ū iá-lông o͘h, ū iá-lông o͘h!” Chng-lāi ê lâng thiaⁿ--tio̍h, sûi chông--chhut--lâi; ū--ê chin kín chiū cháu kàu i hia. Chit-ê gín-á kám-kak án-ne si̍t-chāi ū-kàu sim-sek. Kòe bô kúi-ji̍t, i chiū koh chhì chi̍t-pái. Chng-lāi ê lâng iáu-sī kāng-khoán cháu-chut-lâi beh kā i tàu-saⁿ-kāng. Tāi-ke hoat-hiān chit-ê gín-á iū-koh teh kóng pe̍h-chha̍t, lóng chin siū-khì.

 Kòe bô kúi-ji̍t, chhiū-nâ lāi chiâⁿ-si̍t chhut-hiān chi̍t-chiah tōa iá-lông. Chit-ê gín-á khai-sí kín-tiuⁿ, hoân-ló i ê iûⁿ-á. Chit-pái i tong-jiân pí í-chêng koh khah tōa siaⁿ hoah, “Iá-lông lâi lah, iá-lông lâi lah!” M̄ -kú, hia-ê í-keng hō͘ i phiàn kòe 2 pái ê lâng, siūⁿ kóng chit-ê gín-á iū-koh teh chhòng-tī--lâng lah! Bô pòaⁿ-ê lâng beh chhap--i. Só͘-í, iá-lông chiū kā iûⁿ-á chia̍h liáu-liáu, chia̍h kàu pá-thong-thong.

 Tng chit-ê gín-á teh oàn-thàn bô lâng tàu-saⁿ-kāng ê sî, chng--ni̍h ê tióng-pòe kā kóng, “Chún-kóng lí chi̍t-ê pián-sian-á chit-pái só͘ kóng--ê khak-si̍t sī chin--ê, mā bô lâng ē siong-sìn lah!”