《CTT出頭天園地》

 | | | 轉寄

Tām-chúi-hô Lú-sîn..淡水河女神

作者 Chiúⁿ Ûi-bûn 2006.02.05

Lí kóng lí sī chúi chò ê,
你　講　你　是　水　做　ê
Nā bô mā bē tiāⁿ-tiāⁿ lâu ba̍k-sái.
若　無　mā bē tiāⁿ-tiāⁿ 流　目　屎
Góa kóng lí sī Tām-chúi-hô lú-sîn,
我　講　你　是　淡　水　河　女　神
Chù-tiāⁿ ài lâu-kòe Koan-im-soaⁿ,
注　定　ài 流　過　觀　音　山
Ta̍k kang tī hia ūi góa chhiùⁿ-koa.
ta̍k kang tī hia 為　我　唱　歌

Nā bô
若　無

Âng-chhiū-nâ ê chúi-pit-á mā ē ko͘-toaⁿ.
紅　樹　林　ê　水　筆　仔　mā　會　孤　單

Chhōe bô chē bangkah ê Ketagalan-lâng.
chhōe　無　坐　bangkah ê Ketagalan　人



Lí nā-sī Tām-chúi-hô lú-sîn,
你　若　是　淡　水　河　女　神

Góa chiū-sī Koan-im-soaⁿ,
我　就　是　觀　音　山

Khòaⁿ lí sái-lāng hong kap hō͘,
看　你　使　弄　　風　kap　雨

Khòaⁿ lí the tī góa ê heng-khám-chêng,
看　你　the tī 我　ê　胸　坎　前

Tiām-tiām-á thiaⁿ lí ūi góa chhiùⁿ-koa.
tiām-tiām-á　聽　你　為　我　唱　歌



Lí nā sī Tām-chúi-hô lú-sîn,
你　若　是　淡　水　河　女　神

Góa chiū sī khe-té ê hî,
我　就　是　溪　底　ê　魚
　 Múi chi̍t-ê chhoán-khùi
每　一　個　喘　氣

Lóng sī lí.
lóng　是　你

Múi chi̍t-ê tín-tāng
每　一　個　tín-tāng

Mā sī lí.
mā　是　你


--2004/05/10 乎我ê女神