《耶穌言行錄》

| | | 轉寄

Tē-3-chiuⁿ,Sat-ka-lī-a,Í-lī-sa-pek

listen


(Lō͘-ka 1:1-23) Hi-lu̍t chòe ông ê sî,ū chi̍t ê chè-si miâ Sat-ka-lī-a,I ê bó͘ miâ Í-lī-sa-pek.Chí nn̄g lâng sī chiàu Siōng-tè ê bēng-lēng lâi kiâⁿ,lóng bô thang hiâm.Nn̄g ê í-keng lāu ia̍h bô kiáⁿ.Sat-ka-lī-a kiâⁿ chè-si ê chit,ū-sî sio-hiuⁿ,ū-sî hiàn-chè,i ê hiàn-chè sī chīn-sim,siông-siông kì-tit só͘ hisn3 ê cheng-siⁿ,sī koan-chiò Siōng-tè ê Iûⁿ-ko beh lâi sio̍k-hôe lâng ê chōe.

Ū chi̍t ji̍t,Sat-ka-lī-a tī Siōng-tè ê tiān sio-hiuⁿ,ū thiⁿ-sài chhut-hiān khiā tī hiuⁿ-tôaⁿ ê chiàⁿ-pêng,Sat-ka-lī-a khòaⁿ,chin kiaⁿ.Thiⁿ-sài kóng,"Sat-ka-lī-a ah,m̄-sái kiaⁿ,lí ê kî-tó í-keng thiaⁿ-kìⁿ lah,lí ê bó͘ Í-lī-sa-pek ōe siⁿ kiáⁿ,lí tit-beh hoaⁿ-hí khoài-lo̍k,chōe-chōe lâng ia̍h hoaⁿ-hí.I tit-tio̍h Sèng Sîn móa-móa,ōe hō͘ Í-sek-lia̍t lâng chōe-chōe tò-tńg lâi kui tī Chú.

"Sat-kak-lī-a thiaⁿ-kìⁿ chit ê siau-sit chin hoaⁿ-hí,chóng-sī ū gî-ngái kóng,"Cháiⁿ-iūⁿ ōe án-ni,in-ūi nn̄g lâng lāu?"Thiⁿ-sài ìn kóng,"Góa chiū-sī Ka-pek-lia̍t,khiā tī Sioāng-tè ê bīn-chêng ê,hōng-chhe lâi chí-sī lí,pò lí chit ê hó siau-sit;taⁿ lí ōe é-káu bōe kóng-ōe,kàu chit ê tāi-chì chiâⁿ ê ji̍t chiah soah;in-ūi lí m̄-sìn góa só͘ kóng--ê;nā-sī hit ê ōe,sî kàu tek-khak èng-giām. "

Thiⁿ-sài chiū khì;Sat-ka-lī-a liâm-piⁿ é-káu.Peh-sìⁿ tī gōa-bīn the thèng-hāu,kî-koài i hiah kú tī tiān-lāi,kàu chhut-lâi bōe kóng-ōe,peh-sìⁿ chiū chai tī tiān-lāi tek-khak ū khòaⁿ-kìⁿ sím-mi̍h.

Taⁿ chit sî Sioān-tè bô chhin-chhiūⁿ chá chhe thiⁿ-sài chí-sī lán,sī ēng Sèng-chheh.Só͘-í lūn Sèng-chheh só͘ kà-sī lán ê ōe,lán tio̍h ēng khiam-pi ê sim,lâi kiû Sèng Sîn pang-chān lán ōe bêng,ia̍h ōe sìn,in-ūi só͘ èng-ún ê líng ōe chiâⁿ,ia̍h sī put-chí koan-sia̍p lán ê tāi-chì.

思羅安台語點字網站