《耶穌言行錄》

| | | 轉寄

Tē-48-chiuⁿ,Siâ-sîn miâ kiò Iâⁿ

listen

(Má-thài 8:28-34; Má-khó 5:1-21;Lō͘-ka 8:26-40).
Iâ-so͘ hō͘ hái pêng-chēng,chûn bô lōa kú kàu hit pêng hōaⁿ.Iâ-so͘ kap ha̍k-seng chiūⁿ soaⁿ,tú-tio̍h hoān siâ-sîn ê tùi bōng-nih chhut-lâi.Hit ê lâng bô khiā chhù,sī khiā tī thióng-soaⁿ,thih-liān pa̍k i bōe tiâu.Mî-ji̍t āu-kiò,ēng chio̍h ka-kī siong.Hn̄g-hn̄g khòaⁿ-kìⁿ Iâ-so͘,cháu lâi pài i,tōa siaⁿ kiò kóng,"Chì koâiⁿ Siōng-tè ê Kiáⁿ Iâ-so͘,góa kap lí sím-mi̍h kan-sia̍p?Thok-tiōng Siōng-tè ê miâ,kiû lí bo̍h-tit khó͘-chhó͘ góa.
"In-ūi Iâ-so͘ ū bēng-lēng siâ-sîn lī hit ê lâng,siâ sîn sui-bóng m̄-ài,iáu-kú bô tâ-tit-ôa tio̍h chhut.

Iâ-so͘ mn̄g kóng,"Lí sím-mi̍h miâ?"Ìn kóng,"Goán miâ kiò Iâⁿ,sī goán chiah ê put-chí chōe ê ian-kò͘. "Chhiat-ì kiû Iâ-so͘ bo̍h-tit kóaⁿ i chhut hit ê só͘-chāi.Hit sî ū chi̍t tīn ti tī soaⁿ-nih the chia̍h,kúi kiû Iâ-so͘ chún in ji̍p ti.Iâ-so͘ chún,kui2jip8 ti-kûn,ti chiū cháu lo̍h hái chìm-sí.

Chiàu Mô͘-se ê lu̍t-lē,ti sī bô chheng-khì ê cheng-siⁿ,in iáu-kú chhī.Iâ-so͘ chún kúi ji̍p ti,ū lâng phah-sǹg sī beh hō͘ in chai in ê m̄-tio̍h.

Chhī ti ê ji̍p siâⁿ kā lâng kóng,chéng-lâng chhut-lâi khòaⁿ só͘ kiâⁿ,kiû Iâ-so͘ lī-khui in ê só͘-chāi.Hit ê tāi-seng hoān-tio̍h kúi ê,chhēng saⁿ chū-chāi,kap tāi-seng lóng bô saⁿ-tâng.Siat-sú lâng ōe hiáu-tit siūⁿ hit ê tāi-chì,tek-khak m̄-ài Iâ-so͘ lī-khui;chóng-sī hit só͘-chāi ê lâng ū chhò-gō͘,to̍k-to̍k siūⁿ hit ê sit-lo̍h ti ê tāi-chì nā-tiāⁿ;m̄-nā bô hó-lé,hoán-tńg chhiáⁿ Iâ-so͘ lī-khui!

Lâng ū tit-tio̍h Iâ-so͘ kiù i thoat-lī Mô͘-kúi ê chhiú-thâu á bô,i ê só͘ kiâⁿ tek-khak ū cheng-choa̍h.Iâ-so͘ tah-chûn ê sî tāi-seng hoān kúi ê kiû kap I saⁿ-kap khì.

Lán í-keng tit-tio̍h Chú ê un,tio̍h chhin-chhiūⁿ chit ê lâng,put-chí ài chhin-kūn Iâ-so͘,m̄-kam pàng-lī.Koh lán tio̍h chhin-chhiūⁿ i ēng Chú ê hó khoán-thāi kā lâng kóng.Siat-sú bô sím-mi̍h chhim,ta̍k-lâng ōe ēng Chú khoán-thāi i pún-sin ê tāi-chì,lâi kóng hō͘ lâng thiaⁿ.

思羅安台語點字網站