《耶穌言行錄》

| | | 轉寄

Tē-68-chiuⁿ,Pù kap sòng-hiong ê phì-jū

作者 Ko Kim-seng. 2009.07.26

（Lō͘-ka 16：19-31）
Iâ-so͘ koh ēng phì-jū kóng，"Ū chi̍t ê hó-gia̍h lâng，pêng-sò͘ chhēng chí-sek kap iù-pò͘ ê i-chiûⁿ，ta̍k ji̍t chhia-hôa；koh ū sòng-hiong lâng miâ Lia̍p-sat-lō͘；thong seng-khu siⁿ-thiàⁿ，hō͘ lâng lok tī hit ê hó-gia̍h lâng ê mn̂g-kháu，ài chiong hó-gia̍h lâng ê toh-kha só͘ ka-la̍uh ê lân-san mi̍h lâi chí-ki，ū káu lâi chī i siⁿ-thiàⁿ ê khang-chhùi；sòng-hiong lâng sí，thiⁿ-sài hû i lok tī A-pek-lia̍p-hán ê heng-chêng；hó-gia̍h ê lâng ia̍h sí，khì bâi-chòng；tī im-kan teh siū-khó͘，kia̍h-ba̍k hn̄g-hn̄g khàoⁿ-kìⁿ tī A-pek-lia̍p-hán heng-chêng ū Lia̍p-sat-lō͘ tī-teh，chiū kiò kóng，"Góa chó͘ A-pek-lia̍p-hán ah，lîn-bín góa，chhe Lia̍p-sat-lō͘ ēng chńg-thâu-á-bé ùn-chúi，lâi tih hō͘ góa ê chhùi-chi̍h im-léng：in-ūi góa tī chit ê hé-iām put-chí chhám. "A-pek-lia̍p-hán kā i kóng，"Kiáⁿ-sun ah，lí tio̍h kì-tit chāi-siⁿ ê sî ū hióng-kè lí ê hok-khì，nā-sī Lia̍p-sat-lō͘ ū siū-kè kan-khó͘，taⁿ chit-tiáp i tit-tio̍h an-ùi，lí tú-tio̍h chhiⁿ-chhám；m̄-nā án-ni，lín kap goán ê tiong-kan ū tōa chhim-khiⁿ，só͘-í lâng ài tùi goán chia keng-kè kàu lín hia lóng bōe，tùi lín hia keng-kè kàu goán chia ia̍h bōe.

"Hó-gia̍h lâng ìn kóng，"Kì-jiân án-ni，chiū kiû góa chó͘，tio̍h chhe Lia̍p-sat-lō͘ ji̍p góa lāu-pē ê chhù；in-ūi góa iáu ū gō͘ ê hiaⁿ-tī，chiū thang chí-sī in，bián-tit in ia̍h lâi chit ê kan-khó͘ ê só͘-chāi. "A-pek-lia̍p-hán kā i kóng，"In ū Mô͘-se kap sian-ti lâng ê chheh，khó-í thang thiaⁿ. "Ìn kóng，"Chó͘ A-pek-lia̍p-hán ah，bōe：kiám-chhái lâng tùi im-kan lâi chiū-kūn in，in chiū hoán-hóe. "A-pek-lia̍p-hán kóng，"In m̄ thiaⁿ Mô͘-se kap sian-ti lâng ê ōe，chiū siat-sú û lâng tùi im-kan koh-oa̍h khí-lâi，in ia̍h m̄ thiaⁿ i kóng. ""

Lâng siông-siông lia̍h chit ê sè-kan ê hó-gia̍h chòe tùi-tiōng，lia̍h sòng-hiong chòe iàm-chiān，chóng-sī Siōng-tè m̄-sī án-ni.Lâng sui-bóng hó-gia̍h，sim nā ǹg tī sè-kan，tī Siōng-tè ê bīn-chêng sī chhin-chhiūⁿ sòng-hiong thǹg-pak-theh.Sui-bóng sòng-hiong chhin-chhiūⁿ Lia̍p-sat-lō͘ iáu-kú kèng-ùi Siōng-tè，chiàu Siōng-tè khòaⁿ si̍t-chāi sī pù，in-ūi chit hō lâng só͘ ū ê ke-gia̍p sī lâng só͘ bōe chhiúⁿ-tit—ê.Chit ê phì-jū ia̍h kà-sī lán tio̍h kín-kín hoán-hóe chōe，in-ūi sí-āu lâng ê tāi-chì í-keng tiāⁿ-tio̍h.

思羅安台語點字網站