《耶穌言行錄》

| | | 轉寄

Tē-75-chiuⁿ,Chhiàⁿ-kang ji̍p phû-tô-hn̂g

listen

(Má-thài 20:1-15)
Iâ-so͘ ū ēng chi̍t ê phì-jū kā ha̍k-seng kóng,"Thian-kok chhin-chhiūⁿ thâu-ke chá-thâu chhut-khì chhiàⁿ-kang ji̍p phû-tô-hn̂g;kap chòe kang ê iok chi̍t ji̍t hō͘ i chi̍t-chîⁿ gûn,chiū chhe in ji̍p hn̂g.Káu tiám ê sî,thâu-ke chhut-khì,khòaⁿ-kìⁿ ū êng-êng teh khiā tī koe-chhī-nih—ê,kā in kóng,"Lín ia̍h khì phû-tô hn̂g,só͘ eng-kai hō͘ lín,góa beh hō͘ lín;"hiah ê lâng chiū khì.Cha̍p-jī tiám kap saⁿ tiám ê sî koh chhut-khì,só͘ kiâⁿ ia̍h sī án-ni.Gō͘ tiám ê sî chhut-khì koh khòaⁿ-kìⁿ ū êng-êng teh khiā—ê,kā in kóng,"Lín siáⁿ-sū chiâⁿ-ji̍t êng-êng khiā chia?"Ìn kóng,"Bô lâng chhiàⁿ goán;"i chiū kóng,"Lín ia̍h khì phû-tô-hn̂g,só͘ eng-kai hō͘ lín ê,lín thang tit-tio̍h. "

Kàu àm,hn̂g-chú kā i ê koán-siàu kóng,"Kiò chòe kang—ê,hō͘ in kang-chîⁿ;tùi lō͘-bé ji̍p hn̂g ê,chiàu pâi kàu tāi-seng—ê. "Gō͘ tiám ê sî só͘ chhiàⁿ—ê kàu,ta̍k ê niá chi̍t chîⁿ gûn.Seng kàu ê phah-sǹg só͘ ōe niá—ê tek-khak khah ke;nā-sī in ia̍h sī nái chi̍t chîⁿ gûn.Niá liáu,chiū oàn-hūn thâu-ke kóng,"Goán tng-joa̍h chiâⁿ-ji̍t tio̍h-bôa,lō͘-bé kàu—ê,chí-ū pòaⁿ-sî kú chòe kang nā-tiāⁿ,chiū hō͘ in kap goán pîⁿ mah?"Hn̂g-chú kā hit ê lâng kóng,"Pêng-iú ah,góa bē bat bô kong-tō khoán-thāi lín;lín kiám m̄-sī kap góa iok chi̍t chîⁿ gûn mah?The̍h lín ê kang-chîⁿ,chòe lín khì;góa ài hō͘ lō͘-bé kàu—ê chhhin-chhiūⁿ hō͘ lín chi̍t-poaⁿ-iūⁿ;chiong góa ê mi̍h lâi chòe góa só͘ ài,kiám ōe m̄ ha̍p-gî?Góa chòe hó,lín gîn góa sī cháiⁿ-iūⁿ?""

Lán tha̍k chit ê phì-jū,thang chai hn̂g-chú sī chí Siōng-tè,phû-tô-hn̂g pí-phēng kàu-hōe,chhiàⁿ-kang—ê sī kàu-hōe-lāi ê chèng-lâng.Lâng siū Siōng-tè ê tiàu,hit ê sî-hāu bô tiāⁿ-tio̍h,nā-sī pîⁿ-pîⁿ tit-tio̍h éng-oán-oa̍h,ia̍h lóng sī pe̍h-pe̍h ê un-tián.

思羅安台語點字網站