《台灣人e5先覺─黃彰輝傳》

 | | | 轉寄

Tī台灣成長ê家族

作者 張瑞雄 2009.05.03

1947年當黃彰輝一家三人踏上台灣ê土地ê時，伊可能未全然準備好去承擔khǹg tī面頭前ê挑戰。Kan-tāⁿ有兩歲ê大衛，chiah teh操練一kóa單語ê發音，iáu無學習怎樣貯藏由記憶得來ê知識去比較台灣kap英格蘭ê情況。但是，對34歲ê少年媽媽慰爾，當時ê台灣經驗是足夠威脅到伊生命存活ê衝擊。因為文化、言語、食物、氣候、水土、環境等，就連吹tio̍h ê風lóng是怪異生份。物資欠缺kap無閒ê生活，不允准伊停落來學習做適應ia̍h-sī調整。Koh kui-ê台灣社會lóng受激烈ê物價膨脹衝擊，黃家tùi英格蘭chah tńg來ê儲畜換成台灣ê紙幣了後，經過幾nā月ê日子就化成無用途ê紙堆。雖然tī黃家所khiā起ê「新樓」已經來了二次大戰在台事奉ê宣教師沈毅敦、滿雄才 ang-á-bó͘等ê英國人。但是kap黃彰輝ang-á-bó͘同年輩ê「同事」lóng iáu無到場，hō͘慰爾飽受孤單ê氣味。

下圖是慰爾tú到台灣時(1947年秋天)ê容貌(張進女－阿丹提供)

到台灣beh兩年，大衛大約四歲ê 1949年5月3日，二男麥克Michael tī台南出生。Koh過兩年ê 1951年11月30日，黃家koh一pái報喜，是長女愛連Eileen ê出生。雖然院長ê宿舍就tī神學院kap新樓ê大圍牆內，夫君黃彰輝日夜lóng是為院務、教務、(教)會務，等等事工ê準備、講授、拹商、kap會議奔走，差不多lóng無家庭ê時間。慰爾mā bē-sái kan-tāⁿ管家務kap兒女ê關照教育，iáu須要應神學院ê需求，充當英語課ê老師。Tī這種繁雜、無閒ê家庭內底，黃家由石遠生醫師ê紹介，得tio̍h一位名叫張進女(偏名阿丹)ê女子做專業ê管家。阿丹性情伶俐開朗，尊重家主ang-á-bó͘，真得黃家大小ê愛載。後來mā得家主ê紹介，kap tī神學院就職ê張志重(偏名叫「丁矣」)結婚成家。

下圖是「丁矣」kap「阿丹」tī黃家主ang-á-bó͘「年老」時攝影hō͘ in做留念ê相片(阿丹提供)

下圖是當阿丹tī菜園工作，遇tio̍h腳踏車ê果子攤叫賣，慰爾開門出來買果子，順手攝相取農業社會做seng-lí女性ê鏡頭(約1950年，阿丹提供)

Tī黃家阿丹發揮伊農村出身ê本事，幫贊家主養羊取羊乳補給gín-á ê營養，種菜收成無受污染、而且防治孵寄生蟲ê生菜做沙拉。Án-ne，不時為tio̍h黃家ê餐桌，提供koh經濟koh營養ê餐食。

1947年熱天tùi英格蘭tńg來台灣ê時chūn，黃彰輝就向tī倫敦ê中華民國大使館申請「中國」護照，慰爾就申請伊本身kap 隨行ê大衛（連tī一本）ê英國護照。1947年是二二八大屠殺ê仝一年，台灣iáu是恐怖漫延全島，民心非常無安定ê時期，因此英藉ê朋友lóng苦勸黃彰輝ang-á-bó͘將慰爾kap小兒大衛ê英國國籍留leh。

到1949年，二男麥克（Michael）tī台灣由台藉ê父親而生，黃家就開始受戶口登記制度ê壓制。黃彰輝為此到台南市東區區公所去辦手續，本認為極平常ê tāi-chì，但是其後果是出乎意料之外ê，戶籍當局對黃家編造出一椿不尋常ê tāi-chì。因為個gōa月以後，市政府通知黃彰輝，講：『除非慰爾歸化，若無麥克bē-tàng登記上戶口』。這真正是青天劈靂，市政府mā講：『這是siōng高上司內政部ê指令』。Tī淡水ê英國領事bat勸告講，因為動盪中ê中國局勢，慰爾kap大衛iáu是保留tio̍h英國國籍為上策。所以黃彰輝就採取暫時ê措施，保留慰爾ê英國國籍，koh請蘭大弼醫師kap吳阿玉（Miss Gretta Gauld）護士長發hō͘ in出生證明，提交領事館，kā麥克ê國籍身份確立，koh登記入慰爾ê護照頂面，做伊ê旅行伴隨者。（《回憶錄》p.134）

下圖是約tī 1950年春天留影ê黃彰輝院長全家福(胡德提供)

下圖是1959年慰爾師母攜眷回英格蘭chin前ê全家福留影，攝這相片大約是tī 1957年。(高俊明提供)

1951年，愛蓮（Eileen）出生，koh幾年了後tī 1955年，三男(老么)安得烈（Andrew）ê出生，lóng按照麥克ê時chūn ê例去設英籍kap登記in ê名字做為慰爾ê家族。M̄-koh，麥克ê出生戶口登記事件，像chi̍t-ê起點，本來kan-tāⁿ是希求戶籍事項ê解決，反倒變成是「中央政府」攪擾黃家ê開端。

1952年kap隨後約每一年，申請「中華民國」護照ê時chūn，「中央」就hō͘伊chi̍t-ê「打擊」，tī「結婚」ê記事欄內底故意蓋上「未婚」。經過黃彰輝每pái向政府抗議，lóng無得改正。

Tùi麥克戶口登記事件算做起點，tùi「中央」通過台南東區區公所，每月lóng有「月定通告」來詢問為什麼拒絕將黃家ê兒女登記為「中國國民」，因為黃彰輝kap市政府kap區公所人員相識，伊向in說明：『m̄是我拒絕，是政府拒絕登記in做「中國」國民ê。』（《回憶錄》p.134-135）chit種ê困擾繼續了整整10年，到1959年，慰爾kap兒女離開台灣以後，hit件「月定通告」chiah終止。

M̄-koh，真遺憾ê tāi-chì，就是連tī台灣長老教會內底，mā有教會牧長kap教會人士做國民黨政權ê傳聲筒，mā做監視厝內事ê線民。因為政府通過「教派聯誼會」，尤其是「反共護教聯盟」（這是美籍傳教士麥金泰（Carl MacIntire）為首所組織ê會，mā經過長老教會總會認可過ê）傳達政府ê「風聲」講黃家有醜聞。就tī長老教會百週年（1965年）ê大慶典結束以後，黃彰輝卸任總會議長一職，去做普世教協ê神學基金會幹事後ê隔年，tī 1966年ê總會通常會議內底，有一位長老教會牧師講員（明顯是反共護教ê一員）起立，做一項臨時動議：『ài譴責黃彰輝bat kap chi̍t-ê女士同居，koh生了四個私生子。』雖然tī會中真少數ê人chhap伊kap伊ê動議，但是chit-ê tāi-chì，真hō͘教會省思，mā證明黃家tī迫害監視下所tam受ê痛苦kap冷汗。

單身ê院長（1959－1965）

Winifred chhōa兒女『tńg』去英國，he是1959年ê tāi-chì，按照英格蘭長老教會海外宣道會記錄，會方hō͘了伊需要tńg去英國ê理由。Tī宣道會圈外ê伊，mā大部分接受宣教師ê待遇，但是無宣教師ê身份。宣道會bat ài伊去受蘭大弼醫師ê健康體檢。黃彰輝為伊申請飛機票費，但是宣道會大部分kan-tāⁿ肯hō͘ i坐船ê旅費。 當時kam是決定chi̍t tńg去英國就無beh koh tńg來台灣，bē-tàng知影，但是事實上，in一tńg去英國，就無koh再tńg來台灣lah。大衛本來是會講不止á好ê台灣話，而且上了台灣人ê台南勝利國校，m̄-koh伊tiāⁿ-tiāⁿ以家己是英國人為傲。 慰爾母子對台灣ê se̍k-sāi無足，身為父親ê黃彰輝，有7年ê光陰無kap in同齊tòa，伊又koh是非常ê無閒，對家己ê囝兒，無法度親身傳授教育，連分享台灣家系歷史ê機會lóng無。黃彰輝tī回憶錄ê記載，講tio̍h bat kap大衛講起，但是因為慰爾ê影響，kap無台灣ê社會環境hō͘ in成長上ê助長，囝兒tùi父親所得有關台灣ê印象，kan-tāⁿ是南神ê外殼kap宣教師會ê點滴niā-tiā，對台灣ê環境kap歷史，lóng無收藏tī腦子內底。這mā實在是台灣人ê悲哀，就親像使徒保羅所講：『家己得tio̍h，厝內ê人soah無法度得tio̍h kap體會。』彰輝雖然是有家族，伊soah親像第一世紀ê使徒保羅仝款，世界上四界lóng去，雖夠額世界化（globalized），soah tiāⁿ-tiāⁿ lóng是tī路上奔走。

難得ê一年學業假期

1958年，黃彰輝bat想過應該經過了做神學院院長10年以後，ài放假一年。這對伊有kúi-nā層ê意義：1) tùi台南神學院ê行政、人事、教學kap建設完全脫離；2) 心靈上需要充實；3) kā過去十年當中所讀、所教kap所經驗ê，作一kóa思考上ê辨別、分析kap整理；4) 接觸世界上新ê神學家、神學教育家，kap教會領袖，進而得新ê操練、刺激、挑戰kap啟發。

Chit-ê時chūn，慰爾己經感覺精神kap身軀有kóa tòng-bē-tiâu，而且無jōa健康，需要養生。Koh gín-á，尤其是長子大衛需要有正規ê、英國ê教育（這特別是慰爾ê希望）。

當伊teh對將來ê進展考慮ê時chūn，真tú好有以下四個邀請：1) Overdale College, Birmingham ài伊做一年ê William Paton客座教授(Lectureship)。對chit項邀請，黃彰輝感覺tòa宿tī院校內供hō͘攜眷人員ê宿舍，thang保持家庭ê團圓kap溫馨ê優點。但是缺點就是，教冊十年，ká-sú koh再連續教一年，繼續作學術kap靈性上ê『付出』，就無充實家己ê機會；2) 芝加哥大學ê神學院邀請黃彰輝做客座教授。教授ê內容是關於基督教ê宣教研究kap教學。Chit項邀請，雖然有收入，但是無夠做全家庭ê旅費kap養育ê費用，koh kan-tāⁿ是一年hō͘ gín-á教育上片斷無連續ê安排，無法度圓滿，而且，這mā m̄是充實家己ê理想環境；3) 南京基金會ê卡特萊幹事提供tī杜魯大學（Drew University）神學院教冊，教關於東南亞宣教方面ê課程。Chit項條件比前者好chin-chē，但是其缺點大部分mā是kap頂一項仝款；4) 當伊iáu teh猶豫徘徊ê時chūn，tùi Dr. VanDusen（紐約協合神學院院長）來了邀請，就是以前已經向黃彰輝提過ê，但是這一pái ê邀請是真具體ê。邀請黃彰輝tī協合神學院教『向世界ê宣道學』，伊mā ē-táng自由ê tī神學院校內選修所歡喜ê科目，充實家己。

Tùi以上四項機會，伊選了第四ê邀請。但是án-ne，伊iáu是bē-sái滿足慰爾kap伊想tio̍h ê，眾細kiáⁿ應得siōng好ê生活環境kap教育機會。當然，慰爾所想ê是『kan-tāⁿ限制tī英國』ê機會。

黃彰輝就向英格蘭長老教會海宣幹事Feⁿ探聽，英格蘭長老教會海宣是m̄是ē-tàng支付黃家囝兒ê生活kap教育費用。黃彰輝tī 1958年11月10日致Feⁿ ê批內，án-ne講：『我雖然有意願beh kap家族同齊tī英國一年，我kan-tāⁿ想先路過英國kap家族同齊tòa chi̍t kò͘月。我ê行程是1960年7月tī新加坡參加神學研究會，kap東南亞大學kap神學院院長會議，然後經過英格蘭去美國。我希望我所有經由東南亞kap歐洲，往返New York ê旅費ē-táng由南京神學基金會負擔。』

Tio̍h án-ne黃家終於決定1960年到1961年，全家先『tńg去』英國，然後黃彰輝chi̍t-ê人去美國，tī紐約停留一年，tī協合神學院一面教冊，mā一面學習、研究。到一年結束了後，koh再取道英格蘭一家團圓，然後tńg來台灣。

Tī 1961年春天，加拿大杜崙多ê Knox神學院，因為黃彰輝對台灣ê神學教育、教會領導，kap tī東南亞神學上kap世界ê教會（WCC內）所做ê豐功偉業kap貢獻，授予伊榮譽神學博士學位（Doctor of Divinity）。

國民黨政府kap台南神學院

國民黨ê中華民國m̄是法治ê國家，所以一遇tio̍h難題，就kā所有ê法律根基，以吊消ê方式，又koh以權力為政者ê方法，就是戡亂時期臨時條例，ka上戒嚴令去實行。既然台灣ê菁英lóng hō͘勦滅，若koh加害有國際眼光kap關聯ê黃彰輝，專制ê政權tio̍h ē-táng高枕無憂。Chit點，tī黃彰輝kap台南神學院，算是錯失了瞄準，因為黃彰輝有留英kap tī英格蘭教會工作ê經驗。通過普世教會協會ê關聯，世界各地ê人se̍k-sāi黃彰輝，mā普遍知影台南神學院，m̄是歸屬歷史上所se̍k-sāi ê中國，tùi西歐、美洲、非洲ê教會領袖陸續來台訪問，mā建立友好ê關係。但是，kap國民黨ê中央政府，就是完全ê隔絕，無來往。台灣神學院soah因為孫雅各院長以前kap吳國楨省長tī普林斯敦大學同學過，所以tī台灣重温以往ê友情。因為in兩人ê私人關係，吳國禎省行政長官，承諾台灣神學院ê學生在學期間，容允ē-táng延緩召集到畢業了後。有一段時期，因為有án-ne ê特別優遇，一kóa學生選台神，m̄選台南去學神學。

但是tī國民黨統治下ê台灣，政府根本就無關心『宗教ê學校』，認為無chhap伊，自然tio̍h會消滅。可能就認為神學院mā是像一般ê宗教『出家者』，就無koh回到社會內去關懷教會kap社區內ê會友生活。Ia̍h-sī親像道士，根本就是以傳統ê學徒ê方式，就事就地實習出來。神學院有伊ê歷史，有伊ê傳統，有伊ê國際聯繫，mā建立kap教會kap社區ê關聯。

神學院ê教授從來無經過教育部認可、考核，教會mā m̄-bat向政府申請學生畢業時ê學位ê承認。Tī戰時期間，甚至戰後ê中華民國，無時間，mā無實際去考慮宗教學府ê督導kap學術方面ê評估由教育部承擔，就分派hō͘內政部管制。In ê部屬根本就bē-sái勝任，無老練，mā無誠意去chhap伊，án-ne，政府根本就無機會去審核神學院ê內容。

當長老教會兩位黃牧師（黃武東kap黃彰輝）參與『東海大學』ê設立ê時chūn，美國教會ê領袖（親像Stanley Smith史密斯）主張，台南神學院應該ài kap he將建立ê教派聯合ê大學合併。美國ê領袖對tī台灣ê教派ê分佈ê se̍k-sāi kap合作上lóng無一絲á ê經驗。實際上，當時tī台灣ê宣教師是爆滿了全島，除了長老教會以外，ē-sái講是宣教師ê人數thang kap諸教派內ê會員人數相比。因為tùi中國大陸真短時間內撤退到台灣，in lóng無機會恢復教派ê幕僚（uparatus），領導ê牧職人員mā siūⁿ少，而且kap社區ia̍h-sī厝邊互相無se̍k-sāi。唯獨長老教會就有600到700間教會，分散tī台灣全島。

長老教會以外ê基督教領袖，lóng是先是國民黨員，而且是擔任政府ê要職，其次chiah是隸屬教派，而且教派mā kan-tāⁿ有tī組織ê過程上ê關連niā-tiā，所以當時ê建校局勢是tī『台灣基督長老教會』kap『國民黨官員ê基督徒』兩者之間討論出來ê。當然，第三者就是美國教會聯盟（NCCUSA）下ê普世基督教高等教育基金會（United Board of Higher Education）。（1965年以後，chit-ê委員會支付了 bē少基金hō͘黃彰輝所掌管ê普世神學教育基金會。）第三者只ē-tàng夠設置『建校（東海大學）委員會』，tī認為有妥當ê繼承者ê時，就結束in ê干預，koh滙了龐大ê金額，hō͘東海大學董事會去掌理。Ta̍k-ke lòng知影，東海大學除了起頭ê幾年以外，lóng ē-sái講是國民黨員基督徒所掌理ê大學，一點lóng無地域ê教會，連聯合教派ê教會lóng無法度參與其中。

黃彰輝後來感慨無量ê講：『若當時我（kap董事會）承諾hō͘南神kap籌備會同齊建立『東海大學』，我就送掉這間神學院，koh連chi̍t-ê影像lóng bē-sái留hō͘台灣基督長老教會lah。』（參看《回憶錄》p.215-6）

黃彰輝bat問過ài得tio̍h政府（教育部）認可ê條件，就是：1. ài用滿清語（Mandarin）教學；2. ài政府政治ê干預，親像：設置軍訓教官、設軍事課、政治（洗腦）ê週會、每日ê升旗等等；3. ài採用所設置ê安全室（特務人員）；4. 可能學生ê招收lóng ē受tio̍h干涉，廢棄教會ê小會推薦，進而編入為中國(國民)黨一黨獨裁所beh求ê『聯合招生』制度。

國民黨壓制政策m̄-taⁿ tī『神學院獨自行』家己eê路，bat發佈公文命令，神學院bē-tàng使用這款ê名稱，應該改做『神學書院』。據筆者記憶，黃彰輝根本無理睬hit ê命令，無一工終止過傳統ê稱謂，koh稱伊kap長老教會所授ê神學教育ê機關為『神學書院』。長老教會kap黃彰輝院長勇氣thang嘉許。

台南神學院ê cha-po͘學生，每chi̍t-ê人lóng beh顫抖ê「等待」學業ê中斷，koh hō͘國民黨獨裁政權徵召到軍中服役。一旦hō͘徵召，tio̍h ài放下功課ê計劃，去受『中國ê洗腦』教育，『召集令』只 hō͘ hō͘徵者三、四ê禮拜ê準備期間。去，有時是四個月、六個月不等ê受訓期間，koh服役期間，自一年、二年，甚至到三年ê期間，sam-put-téng。Koh服役期間所受ê教育，就是灌輸tio̍h『共產主義ê不倫、不德、m̄是、共產黨ê為非作亂，毁壞中國ê傳統文化』。Koh來就是『提示日本ê侵略，不道德、不仁義。Kan-tāⁿ有中國國民黨chiah是好ê政府，koh有好作為，善良綱紀』。其實伊是空論，koh無什麼實踐出來ê好榜樣，就是利用權力，洗台灣青年ê腦袋，當做擋共產中國來襲ê堤防。

台南神學院ê眾學生所受ê困擾kap打擊，算是非常大。M̄-koh，tùi神學院畢業ê台灣長老教會ê傳道人，lóng克服了這種種ê坎坷，進到宣教ê前線去。

下圖是基督教tī台灣宣教百週年慶祝盛典tī台南長榮中學舉行ê一景。(摘自黃武東回憶錄)

下圖是基督教tī台灣宣教百週年慶祝盛典會場現場，1965年6月16日。 (取自長老會總會資料集)

台灣基督教宣教百年慶典（1965年）

英人醫師馬雅各來台灣行醫兼宣教是tī 1865年6月16日開始。到1965年是百週年。最後ê十年，mā作倍加運動ê策劃，tī 1965年配合tī百年盛典內慶賀。台灣長老教會ê慶典，當然是由總會議長來主持，koh hit年ê議長就是黃彰輝牧師。tùi 1951年成立台灣教會總會以來，議長寶座lóng是一位一任，kan-tāⁿ有黃彰輝是唯一破例tī第四kap第十二屆hō͘選做兩pái議長。總幹事ê職務tùi 1957年開始一直是由黃武東牧師擔任。台灣教會特別推選黃彰輝ê用意，是為tio̍h beh向世界宣揚kap感謝黃彰輝瞻前ê眼光kap領導ê能力。Ta̍k-ke對黃彰輝kap黃武東ê搭配，tī 1955年提出具體ê倍加運動計劃，記憶猶新。

台灣基督長老教會ê南北兩大會tī 1951年3月5日合一進而成立總會。其實當時ê合一是象徵ê性質無帶動全教會ê實際連結kap動力。M̄-koh，成立這一pái ê合一，就馬上『處理』好參加普世教會協會(W.C.C.)ê決意，mā傳達到日內瓦ê本部。Hit年ê熱天是台灣教會kap W.C.C.關係ê開始，mā就是黃彰輝引領台灣教會踏上普世舞台ê起點。國際性ê交流、關心、研究、支援、基金會等等lóng接踵而來。Án-ne台灣長老教會真僥倖ê比以『反共護教』為招牌刁撥、分化教會製造混亂ê份子，早一步整合步數koh逃脫了災難。Hē『反共護教』集團是親國民黨、友政權，而且是反台灣ê。In ê頭魁是所謂『傳純福音』ê麥堅泰(Carl McIntire)。Tùi台灣長老教會參加W.C.C.開始，一直到1965年內，四界lóng teh chhōe空隙、缺點、kap機會大喚m̄是koh kā伊攻擊。he一kóa『反共護教』ê兄弟，mā時常向政府奏稱W.C.C.是『親共』、『自由派』(指講chit派ê人無信聖經ê絕對權威，無信神跡，甚至命名為「敵基督」作誹謗) 。

為tio̍h beh hō͘ 1957年第四屆ê總會成做名符其實ê總會，南部大會就議決廢除大會koh hō͘屬下各中會直接參與總會，mā決定以後改為每年召開年議會。Án-ne，ē-sái講是合一後第一屆ê總會內，選出黃彰輝為議長，黃武東為第一任總幹事。倍加運動已經進入第三年，ta̍k-ke對前瞻有共識kap自信。

Koh過八年ê 1965年sī台灣基督長老教會設教一百週年ê百禧年。Tī 1963年第十屆總會議決應該隆重舉行紀念大典，又koh議決邀請各基督教會kap團體，共20 ê團會參加。1964年3月16日長老教會邀請各願意參加ê教會kap團體代表，tī台北基督教青年會召開座談會，到4月15日成立籌備委員會，公推周聯華牧師為主席，方大林牧師為書記，黃武東牧師為總幹事（註一）。真chē紀念行事中，設定6月16日到22日為紀念週，分別tī台南(16、17日)、東部(19、20日)kap台北(21、22日)等三地區舉行。Tī台南ê兩工內舉行紀念宣教大會、紀念感謝禮拜、紀念大遊行、倍加運動成就感謝禮拜、紀念音樂遊藝會、紀念歷史文物展覽會等六項節目。其中siōng精彩有意義ê行事就是過去十年來持續ê努力koh完成ê『倍加運動成就感謝禮拜』，tī 17日下晡tī長榮中學體育場，由總會議長黃彰輝主禮舉行。

擔任百週年慶祝籌備會主席ê周聯華，有以下關於伊所牽連ê報告。Tī籌備會ê起頭，就有由創設人萬國教會聯盟麥堅泰（Carl McIntire）ê組織ICCC（International Christian Council of Churches）。（註二）百週年ê慶祝行事一開始，周聯華報告講：

麥堅泰親自就任，佩了記者證來督師。頭chi̍t-ê消息傳來，有兩位蘇聯代表ài闖關。當時我非常篤定，khà電話到入出境管理局，報告in，我已經kā外交部核准ê外賓名單交hō͘管理局，『把關』m̄是我ê責任，請入出境ê移民官注意就是lah。後來，chiah知影這kui位是世界長老會（註三）總會ê總幹事kap瑞士改革會ê議長，in ê英語lóng有kóa德國kap瑞士音，誤認為蘇聯ê代表。In有護照，為什麼無用護照來審核neh？後來，in總算入境，但是這kan-ta是困擾ê開始。（《周聯華回憶錄》p.271-272）

到台南ê慶祝遊行ê前一工，周聯華hō͘警務總部參謀總長tī台北召見。參謀總長要求周聯華作以下四項承諾：

一、 lín ē-sái遊行，不准有任何ê聲音； 二、 lín tī遊行過程中，m̄准發任何宣傳品； 三、 台南小流氓真chē，lín m̄准kap任何人惹事、相phah； 四、 限tī hit暗十一點結束。 （《周聯華回憶錄》p.272-273）

周聯華回到台南飯店koh遇tio̍h棘手ê問題，就是飯店ê值班人員hō͘告知in無歡迎蘇聯人客，飯店mā已經租滿人客lah。周聯華就堅持ài hō͘ hit兩位貴賓siōng好ê套房，mā承受了ài叫美國人搬到另外一個飯店。

第二天早起，伊tio̍h-ài應付記者追問『W.C.C.親共』、『蘇聯人來賓』等問題，一直到十點鐘，tio̍h-ài到太平境教會ê慶祝禮拜以主席ê身份講道。伊bē-hù 換衫褲，就穿詩班袍上台去講道。（節錄自《周聯華回憶錄》p.274-275）

Hit暗，tī遊行開始以前，kā遊行時ài分ê傳單全部切碎，koh到印刷處所kā版子拆掉。遊行隊伍分做每隊200 ê教友，各由一位教友任隊長管理，作無聲ê遊行，連讚美詩mā bē-sái唱。M̄-koh kui-ê遊行ê紀律chin好，因為隊伍ê尊嚴，hō͘領導者心安koh佩服。無到11點，最後ê一位遊行者來到目的地，所有ê隊伍解散，劃下戒嚴時期ê宗教遊行ê盛舉，終告成果完善。講到本來預定tī花蓮舉行ê遊行，雖然得tio̍h警察局ê允准，慶祝百週年ê籌備會kap當地ê信徒商量了後，決定無beh舉行lah。（節錄自《周聯華回憶錄》p.276-277）

為tio̍h一百週年慶祝盛典，由國外應邀來台灣參加ê來賓大約有兩百gōa名。加拿大長老教會代表團30名，美國長老教會代表團30名，世界長老教會聯盟執行委員kap其他各差會議長等約40名，mā有tùi東南亞姐妹教會來ê華僑教會代表約100名，lóng踴躍來台灣參加。

美國長老教會代表團ê領導是當時ê總會議長威廉．湯普生，tī十kui年了後，伊受選擔任該會ê總幹事。伊tī一pái『教會kap人權』ê演講中，提起伊對台灣基督教百年慶典ê印象，講到：

『1965年熱天，內人kap我參加由廿七人組成ê美國代表團，訪問台灣，參加台灣宣教百週年慶典。阮實在為所遇tio̍h ê台灣基督徒ê燒熱誠、堅定ê信仰感動，阮mā因台灣基督長老教會為慶祝百週年所推動ê倍加運動ê成功來歡喜。阮到過台北、台南、高雄、台中、花蓮kap其他真chē地方，所到ê所在，阮對台灣人民ê勤奮、成就印象chin深。

對我來講，經驗ê高潮是tī台南。Tī長榮中學運動場ê大聚會了後，成千上萬參加慶典ê基督徒組隊去市街，tī演奏『我是耶穌基督精兵』ê樂隊引chhōa之下，提燈遊行。有幾十萬ê台南市民排列tī街路邊靜靜ê觀看。我ê朋友黃彰輝博士，是當時台灣基督長老教會總會ê議長，邀請作為美國聯合基督長老教會總會議長ê我，kap伊行tī遊行隊伍ê頭前。當我加入遊行隊伍ê時，我感受tio̍h充滿tī he情境中ê緊張氣氛。

我聽講有關當局真勉強ê批准該遊行。伊是頭chi̍t-ê非由政府家己主辦ê遊行。明顯ê，in煩惱伊會成做chi̍t-ê政治事件，一直到開始遊行前kui小時，政府官員iáu teh要求更改遊行路線。遊行隊伍mā hō͘禁止唱歌，所以樂隊kan-tāⁿ好重複演奏仝chi̍t-ê作曲。有一pái tī隊伍oat-oan ê時chūn，爆出kah-ná槍砲ê聲音，tī確定是旁觀者放鞭炮了後，ta̍k-ke ê憂慮chiah消除。……』（《出頭天》168-169頁）

六月ê慶典以後，八月五日tī台中舉行全台灣ê主日學大會，八月十九日tī台南舉行全島基督教青年大會，koh tī八月17日到20日，假台南長榮中學體育場舉行紀念運動會。慶祝ê各tāi-chì以10月25日到30日，tī台南神學院舉行ê，第二世紀傳道方策研究會做為結束。受邀參加該會者有各有關差會代表，kap國內各教會單位ê代表。

Tú好，tī倫敦ê英格蘭長老教會做海外宣道會幹事ê，就是tùi 1948年到1959年tòa仝樓ê厝邊，mā做過台南神學院副院長ê安慕理牧師。伊知影kui-ê台灣基督長老教會ê一百年歷史，mā徹底知影黃彰輝全家ê背景。為tio̍h英台兩教會寫簡要ê歷史，mā hō͘台灣教會史料，作展覽之用。為各合作教派kap臺灣長老教會準備，tī十月中召開宣教百週年ê過去kap將來ê研討會。

為tio̍h黃彰輝kap夫人慰爾，安慕理做了一椿非常有意義e5tai7-chì hō͘ in作慶祝百週年ê禮物。伊安排，mā tùi英格蘭長老教會海宣會捐獻hō͘慰爾回台kap做總會議長ê丈夫同齊主持慶祝ê tāi-chì。安慕理mā特別安排出資hō͘黃家ê三男安得烈(Andrew)同行。當安得烈tòe慰爾渡英ê時chūn，伊chiah四歲，這一pái tńg來台灣伊已經是bat tāi-chì ê九歲lah。Tú好tùi 6月到8月是歇熱期間，無影響伊ê功課，也thang請親戚照顧三ê兄姊而留tī英國。Án-ne黃彰輝ê家庭ê一半難得tī台灣團圓，並且作伙慶祝台灣教會ê百週年。

註一：本來另外一個台灣siōng有歷史ê真耶穌教會mā hō͘邀請參加慶祝籌備會，並且非常踴躍，但是因為kap台灣基督長老教會有史以來tī神學上kap往來上所bē-sái容忍ê對立所以撤消。 註二：萬國教聯ICCC是bē-sái kap W.C.C.比較ê，伊是小，而且『對全世界ê影響力mā無大，是chi̍t-ê相當保守，反烏人，反閃族（猶太人），反共產黨ê chi̍t-ê tùi長老會中分裂出來ê chi̍t-ê教派。正因為伊反對長老會，所以伊就beh拆散長老會。頭chi̍t-ê矛頭針對韓國，因為韓國人mā非常保守，而且是絕對反共，所以合作無間，韓國ê長老會因此受到極大ê傷害。』（《周聯華回憶錄》p.269） 註三：這是『普世歸正教會聯盟』ê誤稱。