《台灣人e5先覺─黃彰輝傳》

| | | 轉寄

普世教協神學基金會主任

黃彰輝辭去了台南神學院,就到英格蘭。伊ê新職務是tī普世教協會內ê神學教育基金會擔任副主管。M̄-koh伊ê辦事處是由伊家己選擇ê地點,工作方式kap職務分配,除了駐tī紐約ê主任(白人)以外lóng由伊負責。紐約辦事處kap主任ê主要職務,是做基金ê掌理kap款項ê捐募。黃彰輝就設立了往後繼續14年期間輔導世界神學教育活動ê中心tī肯特州布崙里市倫敦路13號ê一間教會。伊選肯特ê另外一ê重要ê理由就是因為黃家已經tī該州ê南端西福市(Seaford)買一間厝,慰爾kap兒女mā已經tī-hia定居kúi-nā年。

下圖是黃彰輝「回」英定居(1965)了後tī「家」ê花園灶腳窗前所hip留影,tò-pêng依順序是大衛,愛連,安得烈,彰輝,慰爾,麥克.(阿丹提供)

神學教育基金會是1957年年底到1958年年初,tī非洲ê Ghana開國際宣教協議會(International Mission Council)時創設ê。國際宣教協議會決定將該團體合流tī普世教會協會ê當時,特別為tio̍h『第三世界、宣教區、少年教會』開創siōng有效ê『自立、自傳』ê方法,就是設置為『努力jiok-tio̍h途中』ê教會養成:訓練神學生ia̍h-sī 在職傳道者ê機構。扮演創始ê演員,大多數lóng是歐美ê『chi̍t-kóa老先輩』,其中tùi北美參加ê,有United Board of Higher Education,尤其是做主席ê Dr. Henry Pitney Van Dusen,因為受Van Dusen ê器重,tī伊展開ê si̍t-kó͘,黃彰輝mā受邀請參加Ghana ê協會,而且tī he會內,hō͘選做神學教育研究基金會ê理事之一。Chit種ê背景hō͘黃彰輝得tio̍h罕有ê機會,有參與開創ê盛舉,並且tī 19年後ê 1977年,伊領導了神學教育基金會ê結束,勇於退讓hō͘神學教育輔導會來繼承。

開創ê siōng初期ê主任幹事是Charles Ranson博士,伊tī紐約設了辦事處,講到有kui位副主任,任事jōa久,筆者無作考究。Dr. Ranson伊bat tī 1956年,kap黃彰輝同齊tī泰國ê曼谷開了第一pái ê東南亞神學研討會。當時,tī kui-ê亞洲,iáu無授與道學碩士班課程ê神學院,但是,tùi hit一pái ê研討會,東南亞神學教育院校開始,發動聯繫合作。就tī隔年ê 1957年,成立東南亞神學院協議會(ATSEA)。一直發展到1966年,就聯合15個神學院,設立東南亞神學院校聯合協會,建立又koh授與神學碩士課程kap學位。

正當1965年,台灣基督長老教會無閒慶祝『福音來台百週年』ê行事期間,黃彰輝mā無閒準備離開台南神學院kap考慮善後ê問題。伊tī 1965年7月27日寄出hō͘眾朋友ê批內底,講伊己經接受了以倫敦為據點ê神學教育基金會(Theological Education Fund)副主任ê職位。因為是從事tī神學教育方面ê工作,伊tī批中講真希望ē-tàng tiāⁿ-tiāⁿ回到亞洲chit-ê邊來。Chit點,伊ê希望若是tńg來台灣kap台南神學院,伊就錯lah,因為tùi 1965年11月離開了台灣,就hō͘登上『烏名單』內。一直到1987年,經過當時ê副總統李登輝斡旋,特准伊入境為止,整整22年,無法度踏上故鄉ê土地。伊有自由到世界,包括亞洲各地去,但是kan-tāⁿ有故鄉台灣無歡迎伊tńg來,這是台灣人ê悲劇。

黃彰輝所愛護ê台南神學院,就由tú tī紐約協kap神學院完成神學博士課程ê宋泉盛牧師接任。像黃牧師家己當台南神學院院長ê時chūn,伊chiah 35歲,伊ê後任mā真少壯,因為伊mā chiah 36歲niâ。身為台灣基督長老教會ê議長ê伊,mā tio̍h-ài向台灣教會歷史ê第二世紀作chi̍t-ê交代。所以黃牧師決意留到11月,到完成『共同進入第二世紀』ê宣教策略會議了後chiah離去。

The̍h-tio̍h中華民國ê護照是一件真麻煩ê tāi-chì,因為該國繼續kap世界上ê國家『絕交』,hiah-ê kap『台灣』斷絕邦交ê國家,就特別留意中國ê交代,視『台灣』為無存在tī世界上ê國家,若m̄是刁難,就是拖延koh不hō͘簽証。黃彰輝經驗到án-ne多端ê見笑kap不便,就tī 1966年6月開始,向英國內政部申請歸化。經過了一年,tī 1967年6月20日,chiah接tio̍h歸化ê証冊。Tī申請歸化ê時chūn,伊mā申請將伊ê法定姓名改為Coe,大概siōng大ê理由是因為tùi 1937年到1947年ê 10年當中,伊tī英國廣泛ê為hiah-ê人se̍k-sāi為Shoki Ko,koh Coe ē-sái保留Ko ê(日本式ê)發音。

1957年年底到1958年年初,tī Ghana ê Accra開國際宣教大會,beh設立神學教育基金會ê時,授予了三ê對第三世界神學教育ê託付。成立了基金會以後,該基金會將三ê託付分做三ê時期,以圖謀有效ê進展。(參考黃彰輝主任幹事向1977年神學教育基金會最後一pái 1973年7月ê年度報告)

第一時期(1958年-1965年),mā是頭chi̍t-ê託付:神學教育基金會ê主要目標,就是tī實際可能ê範圍內,提高教育(神學)機構(院校)ê學術水準。改進kap加強本土ê神學教育,促進地域性ê責任,鼓勵發揮神學思考ê創意,又koh引進高一層ê學術水準kap 在職訓練,適合所事奉ê教會ê需要。

第二時期(1965年-1971年),mā是第二ê託付:有鑒第i̍t-ê託付傾向tī專求學術ê精練ê單面之嫌,第二ê託付強調其主要方向為,尋求出自認同當地ê社團kap狀態者。所求ê神學ê精練.就是ē-tàng引chhōa學生面對福音時,有出自家己ê思考方式kap文化背景所來ê遭遇,án-ne,ē-tàng產生教會kap其環境之間活活ê對話。Chit-ê託付,要求教學ê人kap學習ê人,仝款tī各教會ê文化kap宗教處境ê實況中,得tio̍h koh-khah深ê了解,tùi án-ne ē-tàng深切理解家己為宣教團體受派遣進入世界,tī社會ê生活內底,作koh-khah有效ê交往。

第三時期(1971年-1977年),mā是第三ê託付:繼續探討純粹出自本土ê實況化ê路途,以求神學教育ê更新kap改正。Tī chit時期,神學教育基金會盡其全力tī發掘第三世界ê神學教育所hō͘ in普世教會ê新鮮創意kap希望。

黃彰輝tī神學教育基金會做工作ê siōng頭前ê 6年期間(1965年-1971年),主任是James F. Hoppwell,總辦公處猶原是設tī紐約。Tī英國Bromley, Kent ê副辦公處是由伊負責管理。除了 Hoppwell kap黃彰輝以外,iáu有三位幹事。每chi̍t-ê人lóng負責一大洲,如:非洲、南美洲、歐洲、北美洲。黃彰輝ê主要負責區域是亞洲、澳大利亞、kap太平洋地區。因為工作上需要訪問神學教育ê施設,一年內,黃彰輝大約有一半以上ê時間是tī外地cháu-chông。

1969年9月,普林斯頓神學院院長James I. McCord以世界歸正教會聯盟主席身份,代表常置委員會,邀請黃彰輝牧師做該會ê總幹事。因為黃牧師對神學院kap神學教育ê專心斟酌,koh對教會政治無特別ê鐘愛;另外一ê大理由,就是伊無願意koh一pái kap家庭分居。tùi 1965年,伊kap慰爾就已經tī Seaford買了一間厝,叫做『The Bye』。回顧tùi 1959年到1965年ê 6年之間,kap家庭分離於兩個國家,伊真無願意搬去日內瓦,hō͘伊ê家庭koh來一pái痛苦ê調適。伊就快快回信婉謝chit-ê邀請,án-ne,伊就留落來做副手ê工作。

1971年8月,黃彰輝hō͘選做神學教育基金會ê主任,tùi-án-ni,伊就負責總攬亞、非、南美洲ê神學教育kap神職訓練事工ê提昇。雖然伊高居主管總攬ê地位,iáu保留東北亞(日本、韓國)ê事工為地區性ê指導對象。

1971年到1972年之間,黃彰輝一屑á to無猶豫,就聘請非洲ê神學教育家圖屠kap女性ê神學教育家周藤,做伊ê副手,kap前主任所留落來ê兩位副主任,伊ê副手總共是四位。In各自hō͘分派負責輔助拉丁美洲kap中東(Ahron Sapsezian),南亞、南太平洋、加利咯比區(Jun Bergquist),東南亞kap東南亞基金(周藤),非洲kap馬達加斯加(圖屠Desmond Tutu)。Chit段時期,真是神學教育基金會ê全盛期,除了主任,四位副主任以外,總共有14位工作人員tī神學教育基金會內底工作。

1975年7月,因為圖屠牧師受伊ê教會邀請,出任非洲人tī南非ê約翰尼斯堡第一位主教大教會ê主任。黃彰輝kap圖屠lóng kā這pái邀請當作是一大挑戰,同時mā是困難、勞苦重重tī頭前等待伊ê前兆。In終於同意圖屠離去神學教育基金會,邁向爭取非洲烏人ê平等kap廢棄人種歧視ê運動內去。Án-ne,圖屠就離開神學教育基金會ê職務,全家搬到約翰尼斯堡。圖屠大主教tī 1984年受選得tio̍h諾貝爾和平獎。

下圖是黃彰輝kap副主任圖屠牧師伉儷tī紐約『聖公會辦公大樓』由魏瑞明所hip ê相片。(高俊明提供)

Tī 70年代黃彰輝負責東亞區域中包括韓國ê神學教育在內。Hit ê時期韓國ê教會受tio̍h朴正熙政權ê壓迫、折磨kap阻撓。1975年4月,全國教會協會總幹事、韓國神學院ê文教授hō͘ lia̍h去,延世大學神學院ê前教務主任hō͘投入牢獄8個月了後hō͘釋放出來。另外有五位神學院教授(3位是延世大學,2位是韓國神學院)hō͘逼迫停職。

Tī黃彰輝主任ê 75年度報告內底,伊提起(雖然m̄關神學教育)kui-ê亞洲ê國家,除了日本無算之外,lóng是tī專制ê統治之下,連印度mā進入了專制政權ê集團內底。

1976年ê年會報告內底,黃彰輝主任報告圖屠前副主任tī 7月11日受封立做南非Lesotho地域ê主教。

1976年2月,黃牧師kap負責總攬拉丁美洲神學教育事工ê副主任Dr. Aharon Sapsezian牧師,tī 9、10日同齊參加tī巴西聖保羅召開ê神學教育新方法試探會,然後計劃到南美其他ê所在訪問。筆者讀到伊mā利用工作上ê行程配合,作台灣人自決運動ê巴西支部籌備會ê事工。

1977年7月31日,是黃彰輝主任結束神學教育基金會主任一職之日。伊kā tī英國ê Bromley, Kent ê辦事處終結,thang hō͘新ê機構,稱做神學教育輔導會(PTE,Programs of Theological Education)tùi 8月1日開始,koh由Dr. Aharon Sapsezian牧師接棒。該事工ê辦公處mā tùi英國搬到日內瓦。是日起,黃彰輝就擔任神學教育輔導會ê顧問,伊ê正式ê辦公處mā搬到日內瓦,但是伊除了到亞洲kap世界各地去出差,kap定期去日內瓦『上班』以外,mā ē-sái回到倫敦kap Seaford ê厝,繼續辦公,又koh kap日內瓦聯絡,辦理事務。以後ê兩年內,伊卸去主任ê重擔,tio̍h khah輕鬆lah。

依照黃彰輝主任ê 1977年度報告(1977年7月),tùi 1971年開始ê第三階段託付,tī開始ê時chūn,承接了大約美元$760,000無指定ê,kap美元$1,700,000指定ê基金款額。Tùi TEF(基金)留落來,交hō͘ PEF(輔導金)ê金額無指定ê大約有美元$700,000,指定ê大約有美元$750,000款額。Tùi基金會開始ê 1958年到1977年大約20年期間,總收支大約是一千三百萬美元,為tio̍h第一階段託付(1958年-1964年)約有美元$5,600,000收支,為tio̍h第二階段託付(1965年-1970年)約有美元$4,000,000,第三階段託付(1971年-1977年)約有美元$3,300,000。Tī伊ê報告內底,黃主任提起tī伊做主任ê期間,放款幫贊了大約700 ê第三世界tú-teh成長途中ê地區內底,有關神學教育ê事工。

台灣人民自決運動

台灣人民自決運動是以黃彰輝博士為首,黃武東博士(牧師)、林宗義博士(醫師)、kap宋泉盛博士(牧師)共同發起,tī 1973年3月20日成立ê。來自各地ê代表如田弘茂、林哲夫、黃崑嚴、周吳秀惠等二十gōa人參與。tùi頭開始,宋泉盛博士就擔任該運動ê書記,發行不定期刊物,名叫:『出頭天』(英語版),將台灣人ê意願、台灣基督長老教會ê聲明、掙扎、努力,紹介kap解釋hō͘海外ê台灣人kap世界各國ê教會領導者,喚起in ê理解kap支持。佳哉宋牧師留落來chiah-ê刊物作成合訂本,提供hō͘學習hit段自1973年3月到1980年1月ê自決運動ê人,thang追查ê記錄。Tī前言內底,宋牧師回顧in ê動機,講tio̍h:『阮同齊討論、掙扎、思考策略、互相激盪腦力。阮ê動機m̄是為家己,卻是為台灣ê政治理想。阮對台灣ê熱愛hō͘阮一定ài án-ne做,阮所做ê kan-tāⁿ是領受恩惠了後ê回饋。阮無顧家己工作ê無閒,奉獻投入自決運動,因為阮深信,作為基督徒,阮對台灣ê愛必須轉化成對鄉土ê愛。阮四人-牧師黃彰輝博士、教授林宗義博士、牧師黃武東博士、牧師宋泉盛博士,除了渴望看tio̍h台灣充滿民主自由之外,無pa̍t-ê要求。』(《出頭天》13頁)

對1971年12月29日所發表ê台灣基督長老教會ê國是宣言,自決運動ê發起人,以『基督徒ê立場』,tī 1972年12月25日,發表了『台灣人民自決運動宣言』。文中宣言道:『…這kap咱ê前途kap運命有嚴重ê關係,無論是誰,lóng bē-sái否認咱有決定家己運命ê神聖權利kap自由!因此,阮號召海內外台灣人民一致奮起,嚴肅ê向全世界表示咱爭取合理選擇ê自由kap決心。』(《出頭天》20頁)

台灣人民自決運動ê綱要為:(《出頭天》21-22頁) (一) 表明基督徒對台灣人權問題ê堅決立場。 (二) 促進台灣人民tī政治上自主自決。 (三) 為建設自由民主ê台灣社會努力。

提出了目前ê任務,為: (一) 激發台灣本島kap海外基督徒負起對台灣ê責任。 (二) 培養海內kap海外台灣人民ê政治意識。 (三) 爭取普遍ê同情kap援助-包括個人ê、團體ê kap國際ê。 (四) kap其他為同一目標奮鬥ê台灣團體合作。 (五) 促使各有關政府注意台灣人民tī政治上ê要求。

大約1973年ê四月中旬,自決運動以四位發起人ê名義,發表對台灣同胞ê公開批。茲將該信ê全文抄登如下:

敬愛ê台灣同胞:

藉tio̍h chit封公開信kap附件,阮beh向lín請安致候,而且也tio̍h kā lín講,阮為台灣ê將來所做ê一切。親像lín所知影ê,chin-má台灣tī非常關鍵性ê時刻。咱ê未來tú-the面對極緊要ê關頭。假使講阮現在iáu無行動,án-ne咱beh生存tī國際強權政治之下ê機會是真渺茫ê。只有咱ē-tàng完全意識到chit種情況ê迫切性,chiah是確保咱自由kap人權ê第一步。

Tī過去kui個月當中,阮這羣非常關心台灣運命ê人,因為台灣未來ê決定可能無阮ê參與所以感到極度驚惶。咱,to̍h是你kap我,就是無論國內國外,認為台灣為鄉土,而且仝款tī統治政權ê政治利益下hō͘ thiâu-kang規避、忽視kap hō͘剝削ê人。面對án-ne緊迫ê危機,咱iáu ē-tàng照常保持沈默?咱ē-tàng koh對hiah-ê有權力ê人衷心屈服hō͘ in蹂躪kap操縱?kám講咱無應該對阮是誰提出質疑?為什麼咱無權決定阮家己政治ê將來,顛倒ài一直假做支持『反攻大陸』ê幻想soah致使自取滅亡?ia̍h-sī咱ná-thang自欺tī台灣表面ê經濟繁榮koh認為台灣bē有災禍來臨?

答案將是千萬ê m̄ tio̍h!這是為什麼阮beh開始『台灣人民自決運動』ê原因。Mā-sī你ē-tàng詳細讀chit-ê公開批ê附件,你就ē-táng明白阮ê基本用意kap目的。自決權是全人類神聖bē-tàng剝奪ê權利。但是chi̍t-ê悲哀ê事實是chit種神聖ê人權,除非咱家己beh伊,珍惜伊,而且無惜訴諸人民ê良心為此奮鬥,若無世界上將無人會承認伊。He就是為什麼阮必須講出來,hō͘人知影阮ê動機,而且不斷將伊chhōa到世界列國ê面頭前。

為tio̍h台灣自決chit項運動,目前己經chhōe tio̍h真chē來自美國、加拿大、日本kap歐洲ê台灣人熱情強烈ê支持。而且為tio̍h chit-ê原因,今年三月二十日,阮tī華盛頓ê國家新聞協會,召開一pái記者招待會。Tùi-án-ni阮堅決保證ài繼續tī海外ê台灣人當中推動chit項運動。而且成做達成自決目標ê後盾。

阮mā請lín作阮共同努力ê後盾。因此,你應該隨時知影目前國際上發生什麼tāi-chì。你mā應該chhōe機會kap你ê朋友討論你所關心ê tāi-chì。希望咱ē-tàng切記,除非咱kā台灣ê決定權khǹg tī家己手頭,除非咱決意beh為家己ê權利去奮鬥,若無咱bē-sái期望見tio̍h chi̍t-ê光明ê將來。當決定ê時刻來臨ê時,希望咱lóng已經chhoân-piān而且團結作伙,為確保自由、權利來作正確ê抉擇。

阮時時tī祈禱kap思想中紀念lín。

黃彰輝、黃武東、林宗義、宋泉盛 敬上 (《出頭天》49-50頁)

由四位台灣人民自決運動發起人tī 1974年2月28日到3 月3日,tī德國ê伍伯塔-巴門(Wuppertal-Barmen)召集舉行『今á日台灣人民ê拯救』ê協議會。這一pái ê協議會,tùi歐洲各地有132位代表參加。會中所採納ê聲明冊就tī伍伯塔-巴門ê葛馬克福音改革教會ê禮拜中宣讀,tú好hit-ê教會是四十年前,納粹政權掌政ê時,德國告白教會對抗chit-ê hō͘千萬人遭受悲劇性苦難ê獨裁政權ê所在。(《出頭天》60頁)

當上述『今á日台灣人民ê拯救』ê協議會開會ê時,黃彰輝博士致詞如下,kā伊ê演講全文抄錄hō͘讀者分享:

敬愛ê貴賓、台灣同胞:

身為chit-pái協議會籌備會ê主席,我感覺極大ê喜樂kap榮幸來歡迎ta̍k-ke。

我特別beh誠心歡迎咱ê貴賓,mā是咱ê主人。因為tī-chia ê德國(主辦國)教會,一直teh精神上kap物質上極力支持阮,我希望代表所有ê台灣人對chit種ê支持表達siōng深ê謝意,咱共享對基督ê信仰,這信仰超越國家kap種族ê疆界。

我mā beh向hiah-ê m̄是基督徒ê台灣同胞表達特別ê歡迎,lín kap咱同齊分擔對鄉土kap人民ê運命ê深切關懷。咱誠懇ê期待,通過chit-pái重要ê協議會,tī共同ê對話kap協商當中,咱ē-tàng tī-chia關鍵ê時刻,審慎思慮咱家己ê將來,mā就是一千五百萬人民ê將來。

今á日是二月廿八日,我m̄免細講,相信ta̍k-ke lóng知影chit-ê日子tī台灣歷史當中ê意義,m̄-koh我必須為咱當中ê某一kóa外賓解說伊ê重要意涵。

二十七年前ê今á日,台灣發生了 chi̍t-ê悲劇事件。人民反抗國民黨將領陳儀手下佔領軍ê無理壓迫,陳儀kap伊手下ê所作所為,證實in m̄-nā m̄是日本專制政權ê解放者,in本身顛倒變成壓迫者。台灣人tī hit-pái反抗中付出ê代價是兩萬以上ê台灣人受tio̍h血腥ê屠殺,其中包括真chē菁英份子kap領袖。Chit-ê悲慘ê事件拍開台灣人追求自我認同kap真實解放ê新紀元。

另外,咱chin-má聚會ê所在tī伍伯塔-巴門,對德國教會歷史來講mā是意義重大。我無必要向咱ê貴賓解釋chit項tāi-chì,但是真chē咱ê台灣同鄉有可能m̄知,四十年前就tī chit ê所在,『德國告白教會』開始反對納粹政權。

了解chit pái會議ê時間kap地點了後,咱ē-tàng koh-khah進一步看出chit pái協議會ê雙重目的。一方面,咱ê協議會是beh回應名叫『今á日拯救』ê曼谷協議會ê信息-to̍h是拯救ê意涵hō͘人koh再發現而且koh再肯定為解放之意。藉tio̍h這ê解放,每chi̍t-ê人所認為人ê自我身份tio̍h hō͘確認lah。另外一方面,chit pái協議會mā是beh回應我台灣教會tī兩年前所作ê告白,確認人民決定家己運命ê權利是上帝所賦予ê。

因此,咱ê宗旨kap目的就是beh koh-khah清楚、koh-khah深入ê去瞭解這代表什麼意義,kap咱應該beh an-chóaⁿ做。

總結來講,請容許我提醒ta̍k-ke,1974年是人權紀念年,tī世界各地lóng舉行真chē協議會。因此,咱tī協議會中所努力ê一切,將對世界各無仝處境中對人權可見kap具體ê彰顯ê共同努力有幫贊。有chit種ê期待,我深切ǹg望又koh祈禱,希望咱ê聚集ē-tàng藉tio̍h所講ê kap所做ê,koh-khah顯得豐富koh有意義。(《出頭天》63-65頁)

當1974年3月,tī北美己經成立將近30個自決運動ê所在總部,tī各地負起責任來組織、活動,tī歐洲ê協議會結束ê時,mā組成了『自決運動歐洲支部』,由趙有源牧師負責聯誼kap活動。(簡摘自《出頭天》72頁)

一件『意義重大ê tāi-chì』mā tī 1974年9月6日到9日發生,就是165位台灣人tùi巴西、美國、加拿大、日本kap歐洲聚集tī奧地利ê維也納。Tī這一pái ê會中共同創立了『世界台灣同鄉會』。該會ê目標就是beh促進台灣人民之間ê交誼kap互相ê合作,團結海內外ê台灣人成做大ê家庭,盡力保護台灣同胞ê人權kap福利。Tī會中郭榮桔先生hō͘選做世界台灣同鄉會ê會長。(《出頭天》81-83頁)

1975年4月,自決運動因應中國國民黨禁止、發行,甚至沒收羅馬字台語聖經,進而展開活動,tī北美促成將近20 ê教會團體共同發出chi̍t-ê聯合聲明。

針對沒收聖經ê事實,tī 1975年11月18日,台灣基督長老教會發表了『咱ê呼籲』。對『推行華語政策』為由,kā台語白話字聖經查扣、沒收、取締一項tāi-chì,建言講:『一國ê政策,bē-sái抵觸憲法基本精神。』mā申請政府『為維謢憲法上信仰自由,發還新譯白話字聖經,又koh允准繼續出版任何語言ê聖經。』該呼籲mā重申1971年旳『國是聲明』是基於台灣基督長老教會對國家運命ê關心,mā向教會呼籲,為tio̍h挽救國家ê危機,應該精誠團結,成全教會為tio̍h維護公義、自由、和平ê任務,hō͘教會堪稱時代ê基督忠僕。

1975年11月21日到12月10日,第五屆ê普世教會協會ê總會,tī肯亞ê奈洛比會議中心開催。Tùi超過一百ê國家有近2,500名各地教會ê代表參加,台灣人有兩位登上世界教會舞台ê黃彰輝博士kap宋泉盛博士,做為領導人員參加,加添台灣人ê光彩。但是來自世界上各地區,各國ê代表看tio̍h『台灣ê基督徒竟然明顯ê缺席,是hō͘人jōa-ni̍h-á ê悲傷ah!tī chit世界ê共同體內底台灣人到底tī-hia?tī chit世界性基督團契內底,台灣基督徒koh tī-hia?東亞ê出席國家共有:日本、韓國、菲律賓、新加坡、馬來西亞、印尼等,但是soah無台灣。Hiah-ê人問到底是為什麼?in非常驚疑為siáⁿ-mih擁有廿萬信徒,一千gōa間教會ê台灣基督長老教會代表竟然缺席。缺席ê原因其實真簡單:國民黨政府拒絕台灣代表出境。』(《出頭天》133頁)

會後,因為會員台灣基督長老教會不克參加,普世教協tī 12月10日,由總幹事腓力.波特(Philip Potter)博士寫批慰問台灣長老教會總幹事高俊明牧師,mā聲明對『咱ê呼籲』ê支持。(《出頭天》p.135-136)仝款tī 12月11日,世界歸正教會聯盟mā以會長威廉.湯普森博士(Dr. William P. Thompson),總幹事艾德蒙.白逸文博士(Dr. Edmond Perret)ê名義,khà電話hō͘台灣長老教會總幹事高俊明牧師,電文中o-ló台灣長老教會ê勇氣,mā應允通過聯盟ê刊物kap政府ê管道,hō͘『咱ê呼籲』tī世界各地廣傳。(《出頭天》137-138頁)

1977年8月16日面臨美卡特總統teh-beh執行kap中國ê關係正常化ê時,台灣基督長老教會發表了『人權宣言』。Chit-ê宣言,是無論tī台灣ê歷史上,ia̍h-sī tī kui-ê教會ê歷史上,是表示tùi信仰ê立場所表達出來ê,對鄉土深情ê愛kap對強權壓迫者ê反彈ê勇敢建議,所有參與擬稿ê總會領導人lóng修好遺書,準備siōng壞ê後果降臨身上。文中siōng受人民kap政府注意ê言辭,就是:『為達成台灣人民獨立kap自由ê願望,咱促請政府tī chit-ê國際情勢危急ê時,面對現實,採取有效措施,hō͘台灣成做chi̍t-ê新而且獨立ê國家。』

續落來1978年3 月28日到31日,tī台南神學院召開25屆ê總會,tī會中做了兩件真重要ê議事決定。一是選總幹事,另外一是投票決定是m̄是接納總會常置委員會ê報告上,發表『人權宣言』ê措施。Tī謹慎kap周到ê投票程序下,總幹事連任:贊成255票,反對49票,8票空白,高俊明牧師當選。接納『人權宣言』:贙成235票,反對49票,10票空白,『人權宣言』成做台灣基督長老教會ê公式ê宣言。

這1978年ê台灣基督長老教會ê團結一致ê行動,招來中國(國民黨)政府利用1979年12月ê美麗島事件,以事件ê領導施明德先生逃匿、行頭無路ê時chūn,hō͘ in幫贊為理由,控告高俊明牧師以『藏匿叛亂犯』之罪,逮捕投獄。高牧師hō͘掠去關,是tī 1980年4月17日發生,tùi hit一工開始,黃彰輝牧師tio̍h領導台灣人民自決運動專心以赴作釋放高牧師,拯救台灣脫離束縛壓迫ê運動。其實,自決運動以高俊明牧師hō͘掠去關告一段落。自決運動ê發起人差不多無koh以自決運動ê名義展開活動,因為: 一、 tī美麗島事件內面,高俊明牧師kap kui-ê台灣基督長老教會lóng hō͘捲入台灣民主運動ê旋渦內底,中國(國民)黨藉ê高俊明kap其他教職人員為理由,無koh躊躇對教會以政治組織看待。 二、 『美麗島事件』是中國(國民)黨下工夫計劃,kā所有民主運動領導者(叛亂罪犯)一網打盡。Hō͘逮捕ê『犯人』內底,真chē是台灣基督長老教會ê教職人員kap會友。教會認為伊ê使命是kap受苦、受壓迫者,無論會內ia̍h-sī會外,共同忍受苦難ê。 三、 台灣ê民主化運動mā ē-sái講是自決運動ê社會化kap政治化,tùi án-ne phah破教會ê圍牆,hō͘ kui-ê台灣人『出頭天』ê運動吸收進而形成海內外共鳴,而且互相響應ê運動。

1979年12月15日,台灣建國陣線成立,其中主要ê而且有國際性組識ê,包括:台灣獨立聯盟、台灣人公共事務會(Formosan Association for Public Affairs)、kap台灣人民自決運動。雖然台灣人民自決運動是著重人民ê人權kap自決,未必是政治活動ê團體。但是中國(國民)黨己經指向台灣基督長老教會為『政治過於宗教』ê團體,koh藉人權日(12月10日)ê美麗島事件,逮捕bē少ê教會人士,長老教會mā己經tī人權宣言(1978年)內建議國民黨政府建立台灣為新而且獨立ê國家。教會ê信仰kap對社會ê關心,是kap其他ê組織打成一片,koh共同努力。Tùi án-ne自決運動ê領導人,尤其是黃彰輝牧師,共同展開勸募資金,圖謀替政治犯辯護,以求in ê釋放。Kap國內互動響應,通過國內外ê通信管道,促進國內外人民ê台灣意識,kap推行建國理念ê教育。所以,tùi 1980年以後,mā就是黃牧師tùi TEF退休了後,就看到黃彰輝牧師kap彭明敏教授、蔡同榮教授等人,到北美各地去遊說、號召台灣同志ê團結kap勸募基金,一直到1988年,伊過身為止。