《老人kah海》

| | | 轉寄

《老人kah海》_5 Lāu lâng chē tī í'á khùn khì/老人坐tī椅á睏去

“Ài tùi Yankees ū sìnsim, koai gín’á. Siūⁿ khòaⁿ māi leh, in ū DiMaggio neh.”
“Góa kiaⁿ Detroit ê Tigers kah Cleveland ê Indians chit nn̄g tūi.”
“Ài chimchiok, nā bô, liân Cincinnati ê Reds kah Chicago ê White Sox lí mā tio̍hkiaⁿ.”
“Lí hóhó á giánkiù chi̍tē, tán góa tńglâi ê sî chiah kā góa kóng.”
“Lí siūⁿ, lán sī m̄ sī ài khì bé chi̍t tiuⁿ bóe nn̄g jī sī 85 ê chháikoàn? bîn’áchài sī tē 85 kang ā.”
“Ēsái ô͘,”gín’á kóng.”M̄ koh, chiàu lí ê hó kìlio̍k, lán lâi bé 87 hō ê, ánchóaⁿ?”
“Hó ūn bô khólêng ē hoatseng nn̄g pái. Lí siūⁿ lí kám chhōe ē tio̍h chi̍t tiuⁿ 85 hō ê?”
“Góa ēsái kā in tēng chi̍t tiuⁿ.”
“Chi̍t tiuⁿ nn̄g kho͘ pòaⁿ, lán beh khì kā siáng chiohchîⁿ?”
“He kántan lah. Góa ētàng chioh tio̍h nn̄g kho͘ pòaⁿ.”
“Góa siūⁿ góa kiámchhái mā ēsái, m̄ koh góa chīnliōng bô beh khì chiohchîⁿ; inūi tú khaisí sī ēng chioh ê, āulâi soah tio̍h ēng thó ê.”
“Lāutōalâng, lí ài chhēng hō͘ sio ô͘,”gín’á kóng,”m̄ thang bē kìtit, lán chitmá íkeng sī káugo̍eh à.”
“Κáu.go̍eh sī tōahî óa lâi ê go̍ehhūn,”lāu lâng kóng,”tī gō͘.go̍eh, putkóan siáⁿ lâng lóng lia̍h ē tio̍h hî.”
“Taⁿ góa lâikhì lia̍h un’á.”gín’á kóng.

Gín’á tńglâi ê sî, lāu lâng chē tī í’á khùnkhì, ji̍tthâu íkeng lo̍h ā. Gín’á tùi bînchhn̂g the̍h hit niá kū kun thán, kā i khàm tī í’á āu, koh moa tī lāu lâng ê kengkahthâu. I ê kengkahthâu chin te̍kpia̍t, sûijiân ū hòe à, m̄ koh iáu sī chin ū la̍t; i ê āmkún mā iáu chin chho͘ióng, tng lāu lâng khùnkhì ê sî, thâu tàmtàm, āmkún ê jiâuhûn to̍h bô chin bênghián. Tú chhinchhiūⁿ i ê chûn phâng kāngkhóan, i chhēng ê siáchuh mā sī pó͘ liáu koh pó͘, pó͘ kòe ê só͘chāi hō͘ ji̍tthâu pha̍k kah thèsek, ū chhim ū chhián. Lāu lâng ê bīn íkeng chin lāu ā, ba̍kchiu nāsī khehkheh, i ê bīn liân chi̍ttiám’á o̍ahkhì to bô. Hit tiuⁿ pòchóa khǹg tī i ê khathâuu, i ê chhiú teh tī téngbīn, só͘í bô hō͘ àmsî ê hong chhoe cháu. I thǹg chhiahkha.

Gín’á tiāmtiām līkhui; i koh tńglâi ê sî, lāu lâng iáu teh khùn.
“Lāutōalâng, khílâi loh,”Gín’á kā i kiò, koh kā i ê chhiú tah tī lāu lâng ê khathâuu. Lāu lâng ba̍kchiu peh kim, kòe chi̍t sî á chiah tùi hn̄ghn̄g ê bāng nih chhéⁿ khí lâi. Liáuāu, i lō͘chhut chhiòiông.
“Lí the̍h siáⁿ lâi?”i mn̄g.
“Àmtǹg,”gín’á kóng,”lán lâi chia̍h àmtǹg.”


「Ài對Yankees有信心,乖gín’á。想看māi leh,in有DiMaggio neh。」
「我驚Detroit ê Tigers kah Cleveland ê Indians chit兩隊。」
「Ài斟酌,若無,連Cincinnati ê Reds kah Chicago ê White Sox你mā tio̍h驚。」
「你好好á研究一下,等我tńg來ê時chiah kā我講。」
「你想,咱是m̄是ài去買一張尾二字是85 ê彩券?明á載是第85工ā。」
「Ēsái ô͘,」gín’á講:「M̄ koh,照你ê好記錄,咱來買87號ê,án怎?」
「好運無可能ē發生兩pái。你想你kám chhōe ē tio̍h一張85號ê?」
「我ēsái kā in定一張。」
「一張兩箍半,咱beh去kā siáng借錢?」
「He簡單lah。我ētàng借tio̍h兩箍半。」
「我想我kiámchhái mā ēsái,m̄ koh我盡量無beh去借錢;因為tú開始是用借ê,後來soah tio̍h用討ê。」
「老大人,你ài穿hō͘ 燒ô͘,」gín’á講:「m̄ thang bē記得,咱chitmá已經是九月à。」
「九月是大魚óa來ê月份,」老人講:「tī五月,不管啥人lóng掠ē tio̍h魚。」
「Taⁿ我來去掠鰮á。」gín’á講。

Gín’á tńg來ê時,老人坐tī椅á睏去,日頭已經落ā。Gín’á tùi眠床the̍h hit領舊軍毯,kā它khàm tī椅á後,koh moa tī老人ê肩胛頭。伊ê肩胛頭真特別,雖然有歲à,m̄ koh iáu是真有力;伊ê頷頸mā iáu真粗勇,當老人睏去ê時,頭tàmtàm,頷頸ê皺痕to̍h無真明顯。Tú親像伊ê船帆仝款,伊穿ê siáchuh mā是補了koh補,補過ê所在hō͘ 日頭pha̍k kah退色,有深有淺。老人ê面已經真老ā,目chiu若是khehkheh,伊ê面連一點á活氣to無。Hit張報紙khǹg tī伊ê腳頭u,伊ê手teh tī頂面,所以無hō͘ 暗時ê風吹走。伊thǹg赤腳。

Gín’á恬恬離開;伊koh tńg來ê時,老人iáu teh睏。
「老大人,起來loh,」Gín’á kā伊叫,koh kā伊ê手搭tī老人ê腳頭u。 老人目chiu peh金,過一時á chiah tùi遠遠ê夢裡醒起來。了後,伊露出笑容。
「你the̍h啥來?」伊問。
「暗頓,」gín’á講:「咱來食暗頓。」