《巴克禮普世版聖經(試讀本)》

| | | 轉寄

巴克禮普世版(試讀本) 使徒行傳第二十七章

Pó-lô Chē-chûn Khì Lô-má
1 Chi̍t-ē koat-tēng goán tio̍h chē chûn khì Ì-tāi-lī, chiū chiong Pó-lô kah lēng-gōa kúi-nā-ê hoān-lâng, kau hō͘ hông-ka-kun Se-pa-sū-tok-iâⁿ miâ-kiò Iû-liû ê liân-tiúⁿ. 2 Goán chē chi̍t-chiah tùi A-tāi-bí-tiân lâi ê chûn, chit-chiah chûn tú beh iân A-se-a-séng hái-kîⁿ kúi-nā ê káng-kháu. Ū chi̍t-ê tùi Má-kî-tùn lâi ê Thiap-sat-lô-nî-ka-lâng A-lí-ta̍t-kó͘ kah goán chò-hóe khì. 3 Keh-tńg-ji̍t lâi-kàu Se-tùn. Iû-liû chin chhin-chhiat khoán-thāi Pó-lô, chún i lâi kìⁿ chiah-ê pêng-iú, siū in ê chiau-thāi. 4 Goán tùi hia koh khui chûn, in-ūi tùi-thâu-hong ê iân-kò͘, chiū sūn Ku-pí-lō͘-tó siám-hong hit-pêng keng-kòe. 5 Goán keng-kòe Ki-lī-ka kah Pông-hui-lī-a ê gōa-hái, lâi-kàu Lū-ka ê Múi-lah. 6 Tī hia liân-tiúⁿ tú-tio̍h chi̍t-chiah tùi A-le̍k-san-tāi lâi ê chûn, beh khui khì Ì-tāi-lī, chiū kiò goán chē hit-chiah chûn. 7 Chûn kiâⁿ chin bān, keng-kòe chin-chē ji̍t chiah lâi-kàu Kek-nî-thó͘ ê gōa-hái, in-ūi siū hong chó͘-tòng, goán chiū sūn Kek-lí-tí-tó siám-hong hit pêng, kiâⁿ tùi Sat-mô͘-nî kòe-khì. 8 Goán ê chûn iân hái-hōaⁿ kiâⁿ, bián-kióng lâi-kàu lī Lah-se-a bô jōa-hn̄g chi̍t-ê miâ-kiò "an-choân-káng" ê siâⁿ. 9 Goán í-keng chhiân chin-chē ji̍t, koh in-ūi kìm-chia̍h ê kî í-keng kòe, kiâⁿ-chûn chin gûi-hiám, Pó-lô khǹg tāi-ke, 10 kóng, "Kok-ūi, góa khòaⁿ chit-pái kiâⁿ-chûn, m̄-nā hòe-bu̍t kah chûn, liân lán ê sèⁿ-miā to ē tú-tio̍h gûi-hiám kah tōa sún-sit." 11 M̄-koh liân-tiúⁿ siong-sìn chûn-tiúⁿ kah chûn-chú ê ōe, bô beh thiaⁿ Pó-lô kóng ê ōe. 12 Koh tī chit-ê káng-kháu kòe tang-thiⁿ bô sek-ha̍p. Tōa-pō͘-hūn ê lâng chàn-sêng khui chûn lī-khui chia, ǹg-bāng ē-tàng kóaⁿ-kàu Hui-nî-ki khì kòe tang-thiⁿ. Hui-nî-ki sī Kek-lí-tí-tó ê chi̍t-ê káng-kháu, chi̍t bīn ǹg tang-lâm, chi̍t bīn ǹg tang-pak.

Tú-tio̍h Tōa Hong-éng
13 Hit sî, lâm hong bî-bî-á chhoe-lâi, tāi-ke siūⁿ-kóng ē-tàng sūn-lī kàu bo̍k-tek-tē khí tiàⁿ, chīn-liōng iân Kek-lí-tí-tó hái-kîⁿ kiâⁿ. 14 M̄-koh kòe bô jōa-kú, chi̍t-chūn kiò-chò "Iú-lah-ku-lûn" ê tang-pak kiông-kông tùi tó-sū téng-bīn sàu lo̍h-lâi. 15 Chûn chi̍t-ē hō͘ hong sàu, chih-chài bē-tiâu, chiū chhut-chāi i phiau-liû. 16 Chûn sái lâi-kàu chi̍t-ê kiò-chò Ko-tāi ê sió tó, goán bián-kióng ē-tàng siu sam-pán khí-lâi. 17 Sam-pán siu-khí-lâi chûn-téng liáu-āu, chiū ēng hong-hoat khún-pa̍k tī chûn-té, in-ūi khióng-kiaⁿ ē tī Sài-ní-tí ê soa-chiu khò-chhián, chiū kā phâng kàng-lo̍h, chhut-chāi chûn khì phiau-liû. 18 Goán hō͘ hong-éng sàu kah chin lī-hāi, keh-tńg-ji̍t tāi-ke chiū khai-sí kā hòe-bu̍t hiat lo̍h-hái. 19 Tē-saⁿ ji̍t, in koh chhin-chhiú kā chûn-ni̍h ê khì-kū tàn lo̍h-hái. 20 Goán í-keng kúi-nā-ji̍t kú bô khòaⁿ-tio̍h chheⁿ kah ji̍t-thâu chhut-hiān, hong-éng kè-sio̍k phah kah chin lī-hāi, goán tit-kiù ê ǹg-bāng lóng siau-sit khì à. 21 Chèng-lâng chin-kú bô chia̍h, Pó-lô khiā tī in tiong-kan, kóng, "Kok-ūi, lín chêng nā thiaⁿ góa ê ōe, bô khui-chûn lī-khui Kek-lí-tí-tó, chiū bē tú-tio̍h chit-chióng ê siong-hāi kah sún-sit. 22 Taⁿ góa khǹg lín the̍h-chhut ióng-khì, in-ūi lín tiong-kan bô kah chi̍t-ê lâng ē sòng-sit sèⁿ-miā, kan-taⁿ ē sit-lo̍h chit-chiah chûn niā-niā. 23 In-ūi góa só͘ sio̍k kah só͘ kèng-pài ê Siōng-Chú, I ê thiⁿ-sài cha-mê khiā tī góa sin-piⁿ, 24 tùi góa kóng, 'Pó-lô, m̄ bián kiaⁿ! lí it-tēng tio̍h khì khiā tòa Lô-má hông-tè ê bīn-chêng. Siōng-Chú í-keng chiong chûn-lāi só͘-ū ê lâng kau-thok lí à.' 25 Só͘-í lán tio̍h ióng-kám, in-ūi góa siong-sìn tāi-chì ē chiàu Siōng-Chú kā góa kóng ê lâi si̍t-hiān. 26 M̄-koh lán it-tēng ē tī chi̍t-ê hái-tó khò-chhián." 27 Kàu tē-cha̍p-sì ji̍t ê àm-sî, goán phiau-liû tī A-tí-a-hái. Chha-put-to tī pòaⁿ-mê, chúi-siú lia̍h-chò teh-beh óa-kīn lio̍k-tē. 28 chiū tàn thàm chúi-chhim ê iân-tūi lo̍h-hái, thàm-chhut ū 40 kong-chhioh chhim, koh khì lio̍h-á chìn-chêng ê só͘-chāi thàm, ū 30 kong-chhioh chhim. 29 Khióng-kiaⁿ lè-tio̍h tōa-chio̍h, chiū tī chûn-bóe pha sì-ê tiàⁿ, pek-chhiat ǹg-bāng kín thiⁿ kng. 30 Chúi-siú siūⁿ beh lī-khui chûn tô-cháu, chiū pàng sam-pán lo̍h-hái, ké-chò beh tùi chûn-thâu pha tiàⁿ. 31 Pó-lô tùi liân-tiúⁿ kah peng-á kóng, "Chiah-ê lâng nā bô lâu tī chûn-téng, lín chiū bô kiù." 32 Peng-á chiū chām-tn̄g sam-pán ê tōa-soh, chhut-chāi i lâu khì. 33 Kàu thiⁿ beh kng ê sî, Pó-lô khǹg tāi-ke tio̍h chia̍h, kóng, "Lín í-keng cha̍p-sì ji̍t kú lóng bô chia̍h, 34 só͘-í góa khǹg lín tio̍h chia̍h, che sī koan-hē lín ê tit-kiù, in-ūi lín bô kah chi̍t-ê lâng ē sit-lo̍h chi̍t-ki thâu-mn̂g." 35 Pó-lô kóng soah, the̍h piáⁿ, tī chèng-lâng ê bīn-chêng kám-siā Siōng-Chú liáu-āu, kā piáⁿ peh-khui lâi chia̍h. 36 Tāi-ke sim chiū tiāⁿ lo̍h-lâi, lóng the̍h mi̍h-kiāⁿ lâi chia̍h. 37 Kah goán kāng-chûn chóng-kiōng ū nn̄g-pah chhit-cha̍p-la̍k lâng. 38 Tāi-ke chia̍h pá, kā be̍h-á hiat lo̍h-hái, thang hō͘ chûn khah khin.

Chûn Khò-chhián
39 Kàu thiⁿ kng, chúi-siú m̄-bat hit-ê só͘-chāi, m̄-koh ū khòaⁿ-tio̍h chi̍t-ê hái-oan ū soa-than, chiū chò-hóe siūⁿ-khòaⁿ ē-tàng kā chûn sái-chiūⁿ téng-bīn á-bē. 40 In kā tiàⁿ-soh chám-tn̄g, pàng lo̍h-khì hái-ni̍h, mā tháu-khui tiàu chûn-tōa ê soh, kā chûn-thâu ê phâng tiàu khí-lâi hō͘ i chia̍h hong, kā chûn sái chiūⁿ soa-than. 41 M̄-koh chûn lè-tio̍h soa-than chiū khò chhián, chûn-thâu kā-tiâu-teh bē tín-tāng, chûn-bóe hō͘ tōa-éng phah phòa. 42 Peng-á kiaⁿ hoān-lâng siû-chúi tô-cháu, siūⁿ-beh kā in lóng thâi-sí. 43 M̄-koh liân-tiúⁿ ài-beh kiù Pó-lô, chiū kā in chó͘-tòng, bēng-lēng ē siû-chúi ê lâng seng thiàu lo̍h-chúi chiūⁿ-hōaⁿ. 44 Kî-tha ê lâng chiah lī-iōng chûn-pang á-sī chûn-téng ē phû ê mi̍h chiūⁿ-hōaⁿ. Án-ne, goán choân-pō͘ lóng an-choân chiūⁿ-hōaⁿ.