《巴克禮普世版聖經(試讀本)》

| | | 轉寄

巴克禮普世版(試讀本) 羅馬書第十三章

Ho̍k-chiông Chèng-hú
1 Ta̍k-lâng lóng tio̍h khut-ho̍k chèng-hú ê koân-pèng, in-ūi koân-pèng lóng sī tùi Siōng-Chú lâi. Chiáng-koân-chiá ê koân-pèng lóng sī Siōng-Chú siat-li̍p-.ê. 2 Só͘-í hoán-khòng koân-pèng sī ûi-pōe Siōng-Chú ê kài-bēng, ûi-pōe ê lâng ē siū sím-phòaⁿ. 3 Lí nā chò-hó, m̄-bián kiaⁿ chiáng-koân-chiá, chí-ū chò-pháiⁿ ê lâng chiah tio̍h kiaⁿ in. Lí ài chò chi̍t-ê m̄-kiaⁿ chiáng-koân-chiá á-bô? Nā ài, tio̍h chò-hó, lí chiū ē tit-tio̍h po-chióng; 4 In-ūi i sī Siōng-Chú ê chhe-ēng, beh hō͘ lí tit-tio̍h lī-ek, m̄-koh lí nā chò-pháiⁿ, tio̍h kiaⁿ i. I tòa kiàm m̄-sī bô bo̍k-tek, i sī Siōng-Chú ê chhe-ēng, sī sin-oan-chiá, beh hō͘ pháiⁿ-lâng tú-tio̍h hêng-hoa̍t. 5 Só͘-í lín tio̍h ho̍k-chiông chiáng-koân-chiá, m̄-nā ūi-tio̍h kiaⁿ Siōng-Chú siū-khì, mā sī ūi-tio̍h liông-sim ê iân-kò͘. 6 In-ūi án-ne, lín mā teh la̍p-sòe, in-ūi in sī Siōng-Chú ê chhe-ēng, ūi-tio̍h I teh chip-hêng chit-ê chit-bū. 7 Tio̍h tùi chèng-lâng chīn lín ê gī-bū, lín khiàm lâng ê tio̍h hêng-chheng, eng-kai la̍p ê sòe tio̍h la̍p, eng-kai kiaⁿ-ùi ê tio̍h kiaⁿ-ùi, eng-kai chun-kèng ê tio̍h chun-kèng.

Thiàⁿ-sim Sêng-choân Lu̍t-hoat
8 Hō͘-siōng sio-thiàⁿ ê chè í-gōa m̄-thang khiàm lâng ê chè. Tùi pa̍t-lâng ū thiàⁿ-sim, chiū í-keng oân-sêng lu̍t-hoat ê iau-kiû. 9 Lu̍t-hoat ê iau-kiû sī : “M̄-thang kan-îm, m̄-thang thâi-lâng, m̄-thang thau-the̍h, m̄-thang tham-sim.”( chù: CAK20:13-15, 17; SBK 5:17-19, 21) Chiah-ê kah kî-tha ê iau-kiû lóng pau-hâm tī “Tio̍h thiàⁿ chhù-piⁿ chhin-chhiūⁿ thiàⁿ ka-kī”( chù: LBK 19:18)chit-kù ōe lāi-té. 10 Thiàⁿ chhù-piⁿ ê lâng bē chò siong-hāi pa̍t-lâng ê tāi-chì, só͘-í thiàⁿ sī sêng-choân lu̍t-hoat. 11 Lín tio̍h án-ne chò í-gōa, tio̍h ē-kì-tit chit-má sī kak-chhéⁿ ê sî-chūn, in-ūi chit-má lán pí tú-tú chiâⁿ-chò sìn-tô͘ ê sî koh-khah chiap-kīn Siōng-Chú ê chín-kiù. 12 O͘-àm-mê teh-beh kòe-khì, thiⁿ teh-beh kng ā, só͘-í lán tio̍h thoat-lī o͘-àm ê hêng-ûi, chhēng kng-bêng ê bú-chong. 13 Lán ê hêng-ûi tio̍h toan-chiàⁿ, chhin-chhiūⁿ seng-oa̍h tī ji̍t-kng tiong. M̄-thang hòng-chhiòng, chiú-chùi; m̄-thang hò͘ⁿ-sek, hòng-tōng; m̄-thang sio-cheⁿ, oàn-tò͘. 14 Tio̍h ēng Chú Iâ-so͘ Ki-tok lâi chong-pī ka-kī, m̄-thang ūi-tio̍h boán-chiok su-io̍k lâi tô͘-bô͘ jio̍k-thé ê tāi-chì.