《巴克禮普世版聖經(試讀本)》

| | | 轉寄

巴克禮普世版(試讀本) 哥林多前書第十四三章

Sèng-Sîn ê Un-sù
1 Tio̍h tui-kiû thiàⁿ-sim, mā tio̍h khat-bō͘ lêng-sèng ê un-sù, iû-kî sī thoân hok-im ê un-sù. 2 Kóng kok-chióng lêng-gí ê lâng m̄-sī teh tùi lâng kóng, sī teh tùi Siōng-Chú kóng, in-ūi bô-lâng thiaⁿ ū, m̄-koh i ū teh kóng lêng-sèng ê ò-biāu. 3 M̄-koh hiah-ê thoân hok-im ê lâng sī teh tùi lâng kóng, lâi kā lâng chō-chiū, khoàn-bián kah an-ùi. 4 Kóng lêng-gí ê lâng sī teh chō-chiū ka-kī, thoân hok-im ê lâng sī teh chō-chiū kàu-hōe. 5 Góa chin ài lín ta̍k-lâng lóng ē kóng kî-biāu ê im-gí, m̄-koh koh-khah ài lín ē thoân hok-im, in-ūi kóng lêng-gí nā bô hoan-e̍k chiū bē-tàng chō-chiū kàu-hōe, án-ne thoân hok-im ê lâng pí kóng lêng-gí khah iàu-kín. 6 Só͘-í hiaⁿ-tī chí-mōe ah, góa khì lín hia, nā kan-taⁿ kóng lêng-gí, bô thoân-káng Siōng-Chú ê khé-sī á-sī tì-sek, á-sī sìn-sit, á-sī kà-sī, án-ne tùi lín ū sím-mi̍h lī-ek? 7 Hiah-ê bô oa̍h-miā ê ga̍k-khì, chhin-chhiūⁿ tōng-siau á-sī khîm, nā bô hoat-chhut koân-kē ê im, lâng ná-ē chai sī teh chàu sím-mi̍h? 8 Sàu-kak ê siaⁿ nā bô chún-khak ê im, lâng ná-ē chai thang chún-pī kau-chiàn? 9 Chhin-chhiūⁿ án-ne, lín só͘ kóng ê lêng-gí ì-sù nā bô chheng-chhó, lâng ná-ē chai lín teh kóng sím-mi̍h? Án-ne lín bē-su teh tùi khong-khì kóng-ōe. 10 Sè-kan ū chin-chē chióng ê im-gí, ta̍k-ê lóng ū ì-sù. 11 Góa nā m̄-bat hit-chióng im-gí, kóng ê lâng ē kā góa tòng-chò sī gōa-kok-lâng. Góa mā ē kā i tòng-chò sī gōa-kok-lâng. 12 Án-ne lín kì-jiân jia̍t-sim teh tui-kiû lêng-sèng ê un-sù, tio̍h koh-khah chhut-la̍t tui-kiû ē-tàng chō-chiū kàu-hōe ê un-sù. 13 Só͘-í kóng lêng-gí ê lâng tio̍h kî-kiû ē-tàng kái-soeh ê lêng-le̍k. 14 Góa nā ēng lêng-gí kî-tó, he sī góa ê lêng teh kî-tó, m̄-koh góa ê lí-tì bô hoat-seng chok-iōng. 15 Án-ne góa tio̍h án-chóaⁿ chò? Góa beh ēng sim-lêng kî-tó, mā beh ēng lí-tì kî-tó. Góa beh ēng sim-lêng gîm-si, mā beh ēng lí-tì gîm-si. 16 Lín nā kan-taⁿ ēng sim-lêng kám-siā, hiah-ê hōe-chiòng m̄-chai lí teh kóng sím-mi̍h, i ná-ē tùi lí ê kám-siā lâi kóng, "Amen"? 17 Lí ê kám-siā sī hó, m̄-koh bô hō͘ lâng tit-tio̍h chō-chiū. 18 Góa kám-siā Siōng-Chú ê sî kóng lêng-gí pí lín tāi-ke khah chē. 19 M̄-koh tī kàu-hōe tiong, góa lêng-khó kóng gō͘-kù hō͘ lâng thiaⁿ ū thang kà-sī lâng ê ōe, imā bô ài kóng chi̍t-bān-kù ê lêng-gí. 20 Hiaⁿ-tī chí-mōe ah, lín siūⁿ tāi-chì m̄-thang chhin-chhiūⁿ gín-á. Chò pháiⁿ tāi-chì tio̍h chhin-chhiūⁿ eⁿ-á, siūⁿ tāi-chì tio̍h chhin-chhiūⁿ tōa-lâng. 21 Lu̍t-hoat ū kì-chài: Chú kóng, Góa beh ēng kóng gōa-kok-ōe ê lâng, ēng īⁿ-pang-lâng ê chhùi-tûn, tùi Góa ê chú-bîn kóng-ōe, m̄-koh in iû-goân m̄-thiaⁿ.( chù: ISA 28:11-12) 22 Án-ne kóng lêng-gí ê un-sù m̄-sī beh hō͘ sìn-tô͘, sī beh hō͘ bô sìn ê lâng chò kì-hō, m̄-koh thoân hok-im ê un-sù m̄-sī beh hō͘ bô sìn ê lâng, sī beh hō͘ sìn-tô͘ chò kì-hō. 23 Choân kàu-hōe chū-hōe ê sî nā lóng kóng lêng-gí, bô liáu-kái lêng-gí ê lâng á-sī bô sìn ê lâng ji̍p-lâi, kám bē kóng lín sī teh khí-siáu? 24 Tāi-ke nā lóng teh thoân hok-im, ū bô sìn á-sī bô liáu-kái lêng-gí ê lâng ji̍p-lâi, thiaⁿ-tio̍h hiah-ê ōe chiū ē hiáu-ngō͘ ka-kī ê chōe, 25 sim-lāi ê pì-bi̍t chiū ē hián-lō͘ chhut-lâi, ē phak lo̍h-khì kèng-pài Siōng-Chú, kóng, "Siōng-Chú chin-chiàⁿ tī lín tiong-kan!"

Kàu-hōe ê Tia̍t-sū
26 Hiaⁿ-tī chí-mōe ah, án-ne tio̍h án-chóaⁿ? Lín chū-hōe ê sî, ū-lâng chhiùⁿ sèng-si, ū-lâng kà-sī, ū-lâng soan-káng Siōng-Chú ê khé-sī, ū-lâng kóng lêng-gí, ū-lâng chò hoan-e̍k. Ta̍k-hāng tāi-chì lóng tio̍h ūi-tio̍h chō-chiū kàu-hōe lâi chò. 27 Nā ū-lâng beh kóng lêng-gí, tio̍h hān-tiāⁿ nn̄g-ê, siōng-chē saⁿ-ê, mā tio̍h chiàu chhù-sū lûn-liû kóng, koh tio̍h ū-lâng lâi hoan-e̍k. 28 Nā bô-lâng thang hoan-e̍k, in tio̍h tiām-tiām, kan-taⁿ tùi ka-kī kah tùi Siōng-Chú kóng to̍h hó. 29 Tio̍h hō͘ nn̄g-ê á-sī saⁿ-ê lâi thoân-káng Siōng-Chú ê sìn-sit, kî-tha ê lâng tio̍h séng-chhat hiah-ê sìn-sit. 30 Nā chāi-chō ū-lâng tit-tio̍h Siōng-Chú ê khé-sī, hit-ê teh kóng ê lâng tio̍h thêng-chí kóng-ōe. 31 In-ūi lín ta̍k-lâng lóng thang lûn-liû thoân-káng Siōng-Chú ê sìn-sit, thang saⁿ-kap ha̍k-si̍p, hō͘-siōng bián-lē. 32 Soan-káng Siōng-Chú sìn-sit ê lâng tio̍h ài ē-hiáu iok-sok ka-kī ê un-sù, 33 in-ūi Siōng-Chú m̄-sī bô tia̍t-sū ê Siōng-Chú, sī ài lán hô-hâi ê Siōng-Chú. Kah só͘-ū Siōng-Chú chú-bîn ê kàu-hōe kāng-khoán, 34 cha-bó͘-lâng tī kàu-hōe tiong tio̍h tiām-tiām, m̄-thang hoat-giân. Iû-thài-lâng ê lu̍t-hoat mā kui-tēng in tio̍h sūn-ho̍k. 35 In nā ài beh ha̍k-si̍p sím-mi̍h, tio̍h tī ke-lāi mn̄g ka-kī ê tiōng-hu, in-ūi cha-bó͘-lâng tī kàu-hōe tiong kóng-ōe chin bô sek-ha̍p. 36 Siōng-Chú ê tō-lí kám sī tùi lín lâi-.ê? á-sī kan-taⁿ thoân hō͘ lín? 37 Nā ū-lâng siūⁿ-kóng ka-kī sī thoân-káng Siōng-Chú sìn-sit ê lâng, á-sī lêng-sèng ê lâng, eng-kai tio̍h chai góa teh siá hō͘ lín ê sī Chú ê bēng-lēng. 38 Nā ū-lâng bô kā chit-ê tāi-chì khòaⁿ-chò iàu-kín, lín mā m̄-bián kā chit-ê lâng khòaⁿ-chò iàu-kín. 39 Só͘-í góa ê hiaⁿ-tī chí-mōe ah, tio̍h pek-chhiat tui-kiû thoân-káng Siōng-Chú sìn-sit ê un-sù, mā m̄-thang kìm-chí lâng kóng lêng-gí. 40 Ta̍k-hāng tāi-chì tio̍h chiàu tia̍t-sū kui-kui kí-kí lâi chò.