《巴克禮普世版聖經(試讀本)》

| | | 轉寄

巴克禮普世版(試讀本) 加拉太書第四章

1 Góa koh kóng, kè-sêng-jîn sui-jiân sī sán-gia̍p ê chú-lâng, i tī bī-sêng-liân ê sî kah lô͘-po̍k bô sím-mi̍h chha-pia̍t. 2 Tī lāu-pē só͘ tiāⁿ-tio̍h ê ji̍t-chí chìn-chêng, tio̍h siū kàm-hō͘-jîn kah koán-ke ê kàm-tok. 3 Lán mā chhin-chhiūⁿ án-ne, tī lêng-sèng bī-sêng-liân í-chêng, siū ú-tiū ê lêng chi-phòe chò lô͘-lē. 4 M̄-koh sî-ki nā kàu, Siōng-Chú chhe ka-kī ê Kiáⁿ, hō͘ I tùi hū-jîn-lâng lâi chhut-sì, tī lu̍t-hoat ê koán-hat chi-hā sêng-tióng. 5 Ūi-tio̍h kiù-sio̍k lu̍t-hoat chi-hā ê lâng, thang hō͘ lán chiâⁿ-chò Siōng-Chú ê kiáⁿ-jî. 6 In-ūi lín sī Siōng-Chú ê kiáⁿ-jî, Siōng-Chú ū chhe I ê Kiáⁿ ê Sèng-Sîn ji̍p lín ê sim, hō͘ lín tōa-siaⁿ hoah: "Á-pa, Thiⁿ-Pē ah." 7 Án-ne, lí to̍h bô koh chò lô͘-po̍k, sī chò kiáⁿ-jî. Kì-jiân chò kiáⁿ-jî, Siōng-Chú chiū hō͘ lí chò kè-sêng-jîn.

Pó-lô Koan-hoâi Ka-lia̍p-thài-lâng
8 Í-chêng lín m̄-bat Siōng-Chú ê sî, hō͘ hiah-ê pún-chit m̄-sī sîn ê sîn-bêng chò lô͘-lē chi-phòe. 9 M̄-koh chit-má lín í-keng bat Siōng-Chú, khah hó tio̍h kóng sī hō͘ Siōng-Chú só͘ bat, ná-ē tò-tńg khì ǹg hiah-ê nńg-chiáⁿ koh bô lō͘-ēng ê ú-tiū chi lêng, koh-chài chò in ê lô͘-lē sī-bô? 10 Lín tì-ì siú te̍k-pia̍t ê ji̍t, goe̍h, cheh kah nî. 11 Góa thè lín tam-sim, khióng-kiaⁿ góa í-chêng tī lín tiong-kan ê lô-khó͘ kang-chok ē piàn-chiâⁿ bô chhái-kang. 12 Hiaⁿ-tī chí-mōe ah, góa í-keng ū kā lín jīn-tông, khún-kiû lín mā tio̍h kā góa jīn-tông. Lín lóng m̄-bat khek-khui góa. 13 Lín ē-kì-tit góa thâu chi̍t-pái khì lín hia thoân hok-im, sī in-ūi góa ê seng-khu ū pēⁿ. 14 Hit sî, sui-jiân góa ê kiān-khong chiâⁿ-chò lín ê hū-tam, lín bô kā góa khòaⁿ-khin, mā bô kā góa kī-choa̍t. Lín tian-tò chiap-thāi góa chhin-chhiūⁿ teh chiap-thāi Siōng-Chú ê thiⁿ-sài; mā chhin-chhiūⁿ teh chiap-thāi Ki-tok Iâ-so͘. 15 Lín tong-sî ê hoaⁿ-hí kah móa-chiok taⁿ cháu khì tó-ūi? Góa káⁿ kóng, lín hit tong-sî nā tio̍h kā ba̍k-chiu ó͘ chhut-lâi hō͘ góa mā kam-goān. 16 Taⁿ góa tùi lín chiàu-si̍t kóng, góa chit-má soah chiâⁿ-chò lín ê tùi-te̍k sī-bô? 17 Kî-tha hiah-ê lâng tùi lín jia̍t-chêng m̄-sī chhut-tī hó-ì, sī ài beh keh-tn̄g lín kah góa ê koan-hē, thang hō͘ lín kah in chhin-jia̍t. 18 Siān-sū m̄-sī kan-taⁿ góa kah lín chò-hóe ê sî tio̍h chò, tio̍h put-sî jia̍t-sim khì chò. 19 Góa ê sè-kiáⁿ ah, góa ūi-tio̍h beh hō͘ Ki-tok ê pún-sèng ji̍p tī lín ê sim, góa koh chi̍t-pái keng-kòe seng-sán ê kan-khó͘. 20 Góa chin ài chit-chūn chiū khì lín hia, thang ēng bô kāng-khoán ê kháu-khì kah lín kóng-ōe. Góa si̍t-chāi m̄-chai tio̍h án-chóaⁿ lâi tùi-thāi lín.

Hā-kah Kah Sat-la̍h ê Lē
21 Lín chiah-ê ài siū lu̍t-hoat koán-hat ê lâng, tio̍h kā góa kóng, lín kám bô beh thiaⁿ lu̍t-hoat ê chheh án-chóaⁿ siá? 22 In-ūi lu̍t-hoat ê chheh ū kì-chài kóng, "A-pek-la̍h-hán ū nn̄g-ê kiáⁿ, chi̍t-ê sī lí-pī seⁿ ê, chi̍t-ê sī chū-iû ê cha-bó͘-lâng seⁿ-.ê. 23 M̄-koh hit-ê tùi lí-pī seⁿ ê sī chiàu sio̍k-sè lâi seⁿ, hit-ê tùi chū-iû ê cha-bó͘-lâng seⁿ ê sī tùi Siōng-Chú ê èng-ín lâi seⁿ. 24 Che sī chi̍t-chióng ê phì-jū: hit nn̄g-ê cha-bó͘-lâng sī tāi-piáu nn̄g-chióng khè-iok, chi̍t-ê sī Hā-kah, tāi-piáu Se-nái-soaⁿ ê iok, só͘ seⁿ ê kiáⁿ chò lô͘-lē. 25 Hā-kah sī chí A-lah-pek ê Se-nái-soaⁿ, sī teh chí hiān-kim ê Iâ-lō͘-sat-léng-siâⁿ, in-ūi i kah i ê kiáⁿ-sun lóng chò lô͘-lē. 26 M̄-koh tī thiⁿ-téng ê Iâ-lō͘-sat-léng sī chū-iû ê, sī lán ê lāu-bú. 27 In-ūi Sèng-keng ū kì-chài: Bē hoâi-īn, bē seⁿ kiáⁿ ê cha-bó͘-lâng, tio̍h hoaⁿ-hí. M̄-bat keng-kòe seng-sán thòng-khó͘ ê cha-bó͘-lâng ah, tio̍h tōa-siaⁿ hoaⁿ-hí chhiùⁿ-koa, in-ūi to̍k-sin ê cha-bó͘-lâng pí ū tiōng-hu ê khah-chē kiáⁿ-jî.( chù: ISA 54:1) 28 Hiaⁿ-tī chí-mōe ah, lín chhin-chhiūⁿ Í-sat, sī Siōng-Chú èng-ín ê kiáⁿ-jî. 29 Tong-sî chiàu sio̍k-sè lâi seⁿ ê pek-hāi tùi Siōng-Chú ê Sèng-Sîn só͘ seⁿ-.ê. Chit-má mā sī án-ne. 30 M̄-koh Sèng-keng án-chóaⁿ kóng? Sèng-keng kóng, "Tio̍h kā lí-pī kah i ê kiáⁿ kóaⁿ chhut-khì, in-ūi lí-pī ê kiáⁿ choa̍t-tùi bē-tàng kah chū-iû ê lâng ê kiáⁿ tâng-chê kè-sêng sán-gia̍p." 31 Hiaⁿ-tī chí-mōe ah, án-ne lán m̄-sī lí-pī ê kiáⁿ, lán sī chū-iû ê cha-bó͘-lâng ê kiáⁿ.