《巴克禮普世版聖經(試讀本)》

| | | 轉寄

巴克禮普世版(試讀本) 帖撒羅尼迦前書第五章

Chún-pī Gêng-chiap Chú Chài-lîm
1 Hiaⁿ-tī chí-mōe ah, koan-hē Chú chài-lîm ê sî kah kî, góa bô su-iàu siá tī phoe-lāi. 2 In-ūi lín ka-kī chai, Chú chài-lîm ê ji̍t ē chhin-chhiūⁿ chha̍t-á tī àm-sî bô-ì-tiong lâi-kàu. 3 Lâng tng teh kóng, "It-chhè Pêng-an ê sî", chai-hō ē chhin-chhiūⁿ seⁿ-kiáⁿ ê kan-khó͘ lîm-kàu teh-beh seng-sán ê hū-jîn-lâng, in bē-tàng tô-phiah chit-ê lân-koan. 4 M̄-koh hiaⁿ-tī chí-mōe ah, lín m̄-sī tī o͘-àm tiong teh kòe-ji̍t, hit-ê ji̍t bē chhin-chhiūⁿ chha̍t-á hut-jiân-kan lâi-kàu lín tau. 5 In-ūi lín lóng sī kng-bêng ê lâng, sī ji̍t-sî ê lâng; lán m̄-sī sio̍k tī àm-sî, mā m̄-sī sio̍k o͘-àm. 6 Só͘-í lán m̄-thang chhin-chhiūⁿ kî-tha ê lâng teh khùn, tio̍h kéng-séng kín-sīn. 7 In-ūi khùn ê lâng lóng sī àm-sî teh khùn, chiú-chùi ê lâng lóng sī àm-sî teh chùi. 8 M̄-koh lán sio̍k ji̍t-sî ê tio̍h kín-sīn, ēng sìn-sim kah thiàⁿ-sim chò chiàn-kah chhēng, ēng tit-kiù ê ǹg-bāng chò thâu-khoe tì. 9 Siōng-Chú m̄-sī kéng-soán lán lâi siū I ê hêng-hoa̍t, sī beh hō͘ lán thong-kòe Chú Iâ-so͘ Ki-tok lâi tit-kiù. 10 Ki-tok thè lán sí sī beh hō͘ lán bô-lūn teh oa̍h á-sī sí-khì, lóng ē-tàng tī I chài-lîm ê sî kah I chò-hóe oa̍h teh. 11 Só͘-í tio̍h chiàu lín chit-má teh chò ê án-ne hō͘-siōng kó͘-lē, hō͘-siōng pang-chō͘.

Chòe-āu ê Khoàn-bián Kah Chhéng-an
12 Hiaⁿ-tī chí-mōe ah, chhiáⁿ lín tio̍h kèng-tiōng hiah-ê tī lín tiong-kan teh lô-khó͘ kang-chok, mā sī Chú só͘ kéng-soán lâi kā lín chí-tō kah khoàn-bián ê lâng. 13 Ūi-tio̍h in teh chò ê kang-chok, lín tio̍h ēng siōng-tōa ê thiàⁿ-sim kah kèng-ì lâi tùi-thāi in. Lín tāi-ke mā tio̍h hô-bo̍k chò-hóe. 14 Hiaⁿ-tī chí-mōe ah, goán khó͘-khǹg lín tio̍h kéng-kài pîn-tōaⁿ ê lâng, kó͘-bú sit-chì ê lâng, hû-chhî loán-jio̍k ê lâng, ēng khoan-iông tùi-thāi múi chi̍t-ê-lâng. 15 Lín tio̍h kín-sīn, m̄-thang ēng pháiⁿ pò pháiⁿ, tio̍h put-sî hō͘-siōng hó khoán-thāi, koh hó khoán-thāi múi chi̍t-ê-lâng. 16 Tio̍h siông-siông hoaⁿ-hí. 17 Tio̍h put-sî kî-tó. 18 Bô-lūn sím-mi̍h kéng-gū lóng tio̍h kám-siā, in-ūi che sī Siōng-Chú ê chí-ì, ài lín chiah-ê sio̍k Ki-tok Iâ-so͘ ê lâng án-ne chò. 19 M̄-thang phah-hoa Sèng-Sîn ê hóe. 20 M̄-thang biáu-sī sian-ti ê ōe. 21 Ta̍k-hāng tāi-chì tio̍h siông-sè kiám-giām, hó-ê tio̍h kè-sio̍k chò lo̍h-khì. 22 Tio̍h siám-phiah ta̍k-chióng ê siâ-ok. 23 Goān siúⁿ-sù pêng-an ê Siōng-Chú chhin-chū kā lín sèng-hòa, koh goān I pó-siú lín ê lêng, hûn, thé, tī lán ê Chú Iâ-so͘ Ki-tok chài-lîm ê sî lóng tit-tio̍h pó-choân, bô thang hiâm! 24 Ho͘-tiàu lín ê sī sìn-si̍t ê Siōng-Chú, I it-tēng ē chiàu án-ne kā lín sêng-choân. 25 Hiaⁿ-tī chí-mōe ah, chhiáⁿ ūi goán kî-tó. 26 Tio̍h ēng sîn-sèng ê sio-chim lâi kā só͘-ū ê hiaⁿ-tī chí-mōe chhéng-an. 27 Góa hōng Chú ê miâ lâi hoan-hù lín, tio̍h tha̍k chit-tiuⁿ phoe hō͘ só͘-ū ê hiaⁿ-tī chí-mōe thiaⁿ. 28 Goān lán ê Chú Iâ-so͘ Ki-tok ê un-tián kah lín tông-chāi!