《巴克禮普世版聖經(試讀本)》

| | | 轉寄

巴克禮普世版(試讀本) 提摩太後書第二章

Ki-tok ê Cheng-peng
1 Só͘-í, góa ê kiáⁿ ah, lí tio̍h óa-khò Ki-tok Iâ-so͘ ê un-tián kian-kiông khí-lâi. 2 Lí tī chin-chē kiàn-chèng-jîn ê bīn-chêng tùi góa thiaⁿ-tio̍h chiah-ê tāi-chì, tio̍h kau-thok hō͘ hiah-ê tiong-sìn koh ē-kham-tit kà-sī pa̍t-lâng ê lâng. 3 Lí tio̍h chò Ki-tok Iâ-so͘ ê cheng-peng lâi kah góa chò-hóe siū-khó͘. 4 Chhut-cheng ê peng nā beh hō͘ koaⁿ-tiúⁿ hoaⁿ-hí, chiū m̄-thang hō͘ sè-sū tîⁿ-kha pa̍k-chhiú. 5 Cháu-pio pí-sài ê lâng nā bô chun-chiàu pí-sài kui-chek chiū bē-tàng tit-tio̍h chióng. 6 Kut-la̍t ê choh-sit-lâng tong-jiân ē-tàng seng tit-tio̍h siu-sêng. 7 Góa só͘ kóng ê ōe lí tio̍h hó-hó-á siūⁿ, in-ūi Chú ē hō͘ lí hiáu-ngō͘ ta̍k-hāng tāi-chì. 8 Lí tio̍h ē-kì-tit góa só͘ thoân ê hok-im: Iâ-so͘ Ki-tok sī Tāi-pi̍t ê kiáⁿ-sun, Siōng-Chú hō͘ I tùi sí-lâng tiong koh-oa̍h. 9 Góa ūi-tio̍h chit-ê hok-im siū-khó͘, sīm-chì chhin-chhiūⁿ hoān-lâng hō͘ lâng kòa kha-khàu, m̄-koh Siōng-Chú ê tō-lí bô siū khún-pa̍k. 10 Só͘-í góa ūi-tio̍h Siōng-Chú kéng-soán ê chú-bîn jím-siū it-chhè, hō͘ in mā ē tit-tio̍h Ki-tok Iâ-so͘ ê chín-kiù kah éng-oán ê êng-kng. 11 Ē-bīn chit-kù ōe thang siong-sìn: Lán nā kah I tâng sí, mā ē kah I tâng oa̍h. 12 Lán nā thun-lún kàu-té, mā ē kah Iâ-so͘ Ki-tok chò-hóe chiáng-koân. Lán nā m̄ sêng-jīn I, I mā ē m̄ sêng-jīn lán. 13 Lán nā bô tiong-si̍t, Iâ-so͘ Ki-tok iû-goân sī sìn-si̍t, in-ūi I bē ûi-pōe ka-kī.

Chú só͘ Kah-ì ê Kang-lâng
14 Lí tio̍h thê-chhéⁿ in ē-kì-tit chiah-ê tāi-chì, tī Chú ê bīn-chêng bēng-lēng in m̄-thang ūi-tio̍h giân-sû sio-chèⁿ, in-ūi án-ne chò bô lī-ek, koh ē kà-pháiⁿ teh thiaⁿ ê lâng. 15 Lí tio̍h chīn-la̍t chò thang hō͘ Siōng-Chú kā lí khòaⁿ chò khó-chhú, chò chi̍t-ê bô-thang-hiâm ê kang-lâng, chèng-khak káng-kái chin-lí ê sìn-sit. 16 Tio̍h siám-phiah chho͘-sio̍k bô-lō͘-ēng ê ōe, in-ūi án-ne ē hō͘ lâng ná oán-lī Siōng-Chú. 17 Chit-khoán ê ōe ē chhin-chhiūⁿ chhng-to̍k seⁿ-thòaⁿ, Hú-bí-nái kah Hui-lí-tô͘ to̍h sī chit-khoán lâng. 18 In í-keng lī-khui chin-lí, in kóng koh-oa̍h ê tāi-chì í-keng kòe-khì, tì-sú chi̍t-kóa lâng ê sìn-gióng pāi-hoāi. 19 M̄-koh Siōng-Chú ê tē-ki kian-kò͘ bē iô-tāng, téng-bīn ū khek-jī kóng, "Chú bat I ka-kī ê chú-bîn." Koh kóng, "Kiû-kiò Chú ê miâ ê lâng tio̍h lī-khui put-gī." 20 Tī tōa-keng chhù ê lāi-bīn m̄-nā ū kim kah gîn ê khì-kū, mā ū chhâ ê kah hûi ê, ū-ê chò kùi-khì ê lō͘-ēng, ū-ê chò khah chho͘-sio̍k ê lō͘-ēng. 21 Só͘-í lâng nā chheng-khì ka-kī lī-khui chiah-ê chho͘-sio̍k ê tāi-chì, chiū ē chiâⁿ-chò kùi-khì ê khì-kū, sèng-hòa hō͘ chú-lâng ēng, thang chún-pī piān-piān lâi chò ta̍k-hāng hó-sū. 22 Tio̍h siám-phiah siàu-liân-lâng ê chêng-io̍k, lâi kah hiah-ê ēng chheng-khì ê sim-lêng kiû-kiò Chú ê lâng chò-hóe tui-kiû kong-gī, sìn-sim, thiàⁿ-sim kah hô-pêng. 23 M̄-thang chò gû-gōng bû-ti ê piān-lūn. Lí chai chiah-ê tāi-chì ē ín-khí oan-ke. 24 Chú ê lô͘-po̍k m̄-thang oan-ke, tio̍h un-jiû khoán-thāi chèng-lâng, gâu kà-sī, gâu thun-lún, 25 ēng un-jiû kéng-kài hiah-ê hoán-tùi-chiá, kiám-chhái Siōng-Chú ē hō͘ in hóe-kái, thang lâi bat chin-lí. 26 Án-ne in sui-jiân í-keng tī Mô͘-kúi ê chiáng-tiong, mā ē hō͘ Chú ê lô͘-po̍k bán-hôe lâi oân-sêng Siōng-Chú ê chí-ì.