《巴克禮普世版聖經(試讀本)》

| | | 轉寄

巴克禮普世版(試讀本)_馬太福音第19章

1, Iâ-so͘ kóng chiah-ê ē soah, chiū lī-khui Ka-lī-lī-séng, kàu Iû-thài ê kéng-lāi, Iok-tàn-hô gōa;
2, ū kui tōa tīn ê lâng tè I, chiū tī hia i-hó in.
3, Ū Hoat-lī-sài-phài ê lâng lâi chhì I, kóng, Lâng put-lūn sím-mi̍h iân-kò͘ thang lî i ê bó͘ mah?
4, Chiū ìn kóng, Lín kiám bô tha̍k-tio̍h chhòng-chō ê Chú goân khí-thâu chhòng-chō in ū lâm ū lú?
5, sòa kóng, In-ūi án-ne lâng boeh lī-khui pē-bú, kiat-liân i ê bó͘, nn̄g-ê boeh chiâⁿ-chò chi̍t thé;
6, chhin-chhiūⁿ án-ne bô koh chò nn̄g-ê, sī chò chi̍t thé. Só͘-í Siōng-chú só͘ phòe-ha̍p ê, lâng m̄-thang pun-khui i.
7, In kā I kóng, Tān-sī án-ne, Mô͘-se cháiⁿ-iūⁿ hoan-hù ēng lî-chu hō͘ i, lâi lî i ah?
8, I kā in kóng, Mô͘-se in-ūi lín ê sim ngī, chún lín lî bó͘; tān-sī tùi khí-thâu m̄-sī án-ne.
9, Koh góa kā lín kóng, Kìⁿ-nā lâng, m̄-sī ūi-tio̍h kan-îm ê iân-kò͘, lî i ê bó͘ lâi chhōa pa̍t-ê, chiū-sī kiâⁿ îm; chhōa lâng só͘ lî-chhut ê iā sī kiâⁿ îm.
10, Bûn-tô͘ kā I kóng, Lâng kap i ê bó͘ ê sū kì-jiân sī án-ne, lêng-khó͘ bô chhōa.
11, I chiū kā in kóng, Chit chióng ē m̄-sī chèng lâng só͘ ē sêng-siū ê; chí ū tit-tio̍h siúⁿ-sù ê chiah ōe.
12, In-ūi ū iam ê, tùi bú-thai chhut-sì chiū án-ne; iā ū hō͘ lâng iam ê; iā ū ūi-tio̍h Thian-kok ka-kī iam ê. Ōe sêng-siū ê tio̍h sêng-siū i.
13, Hit sî ū lâng chhōa sòe-kiáⁿ chiū-kūn I, ài I ēng chhiú hōaⁿ in, lâi kî-tó; bûn-tô͘ chek-pī in.
14, Tān-sī Iâ-so͘ kóng, Iông-ún sòe-kiáⁿ chiū-kūn góa, bo̍h-tit kìm i; in-ūi Thian-kok sī sio̍k tī chit chióng ê.
15, Chiū ēng chhiú hōaⁿ in; lī-khui hia khì.
16, Tú-tn̄g ū chi̍t lâng chiū-kūn I, kóng, Sian-siⁿ, góa tio̍h kiâⁿ sím-mi̍h hó thang tit-tio̍h éng-oa̍h?
17, I kā i kóng, Lí cháiⁿ-iūⁿ thê-khí hó, lâi mn̄g góa? Hó-ê sī chi̍t-ê. Tān-sī lí nā ài ji̍p tī oa̍h, tio̍h siú chiah-ê kài-bēng.
18, I kā I kóng, Sī sím-mi̍h ê? Iâ-so͘ kóng, Bo̍h-tit thâi-sí lâng, Bo̍h-tit kiâⁿ îm, Bo̍h-tit thau-the̍h, Bo̍h-tit lām-sám chò kiàn-chèng,
19, Kèng lí ê pē-bú, Tio̍h thiàⁿ lí ê chhù-piⁿ chhin-chhiūⁿ ka-kī.
20, Siàu-liân lâng kā I kóng, Chiah-ê góa lóng ū siú i; iáu-kú khiàm sím-mi̍h?
21, Iâ-so͘ kā i kóng, Lí nā ài chò oân-choân, tio̍h khì bē lí só͘ ū ê lâi hō͘ sàn-chhiah lâng, chiū ū châi-pó tī thiⁿ-téng; koh lâi tòe góa.
22, Siàu-liân lâng thiaⁿ-tio̍h che ōe, iu-būn chiū khì; in-ūi i sán-gia̍p chin chōe.
23, Iâ-so͘ chiū kā I ê bûn-tô͘ kóng, Góa si̍t-chāi kā lín kóng, Pù lâng ji̍p Thian-kok oh--ah!
24, Góa koh kā lín kóng, Lo̍k-tô chhng-koe3chiam-phīⁿ, pí pù lâng ji̍p Siōng-chú ê kok, khah khoài.
25, Bûn-tô͘ thiaⁿ-tio̍h tōa gông-ngia̍h, kóng, Tān-sī án-ne, chiū siáⁿ-lâng ē tit-tio̍h kiù ah?
26, Iâ-so͘ khòaⁿ in kóng, Chāi-tī lâng sī bōe-ōe, chāi-tī Siōng-chú, bān sū lóng ōe.
27, Hit sî Pí-tek ìn I kóng, Goán bat pàng-sak it-chhè lâi tòe lí, goán boeh tit-tio̍h sím-mi̍h ah?
28, Iâ-so͘ kā in kóng, Góa si̍t-chāi kā lín kóng, lín chiah-ê tè góa, kàu koh heng-khí ê sî, Jîn-chú chē I êng-kng ê chō-ūi, lín iā boeh chē cha̍p-jī ê chō-ūi, lâi sím-phòaⁿ Í-sek-lia̍t cha̍p-jī ê chi-phài.
29, Kìⁿ-nā ūi-tio̍h góa ê miâ pàng-sak chhù-the̍h, á-sī hiaⁿ-tī, chí-bē, lāu-pē, lāu-bú, kiáⁿ-jî, á-sī chhân-hn̂g, boeh tit-tio̍h pah-pē, lâi sêng-chiap éng-oa̍h.
30, Tān-sī tāi-seng ê chē-chē boeh chò lō͘-bé; lō͘-bé ê boeh chò tāi-seng.