《巴克禮普世版聖經（試讀本）》

 | | | 轉寄

巴克禮普世版（試讀本） 彼得前書第二章

作者 巴克禮普世版小組 2016.09.25

Oa̍h-chio̍h, Sèng-kiat ê Kok-bîn
1 Só͘-í lín tio̍h tû-khì só͘-ū ê ok-to̍k, khúi-khiat, gūi-siān, oàn-tò͘ kah húi-pòng. 2 Tio̍h chhin-chhiūⁿ tú-á seⁿ ê eⁿ-á chin ài suh sûn-kiat sio̍k-lêng ê lin, hō͘ lín thang tióng-tōa kàu tit-kiù. 3 Tú chhin-chhiūⁿ Sèng-keng kì-chài kóng, "Lín í-keng tam-tio̍h Chú sī chû-siān ê chu-bī." 4 Tio̍h chhin-kīn Chú. I sī oa̍h-chio̍h, sui-jiân hō͘ lâng khì-sak, m̄-koh hō͘ Siōng-Chú kéng-soán lâi khòaⁿ-chò sī pó-pòe. 5 Lín mā tio̍h chò oa̍h-chio̍h lâi hō͘ Siōng-Chú khí-chō sio̍k-lêng ê tiān, koh chò sèng-kiat ê chè-si, thong-kòe Iâ-so͘ Ki-tok lâi hiàn hō͘ Siōng-Chú hoaⁿ-hí sio̍k-lêng ê chè-mi̍h. 6 In-ūi Sèng-keng ū kì-chài: Khòaⁿ ah, Góa beh tī Sek-an-soaⁿ hē chi̍t-tè chio̍h, sī siū kéng-soán pó-kùi ê chhù-kak-chio̍h. Sìn-khò I ê lâng lóng bē sit-bōng.( chù: ISA 28:16) 7 Chit-tè chio̍h tùi lín chiah-ê sìn ê lâng lâi kóng sī chin pó-kùi, m̄-koh tùi hiah-ê m̄-sìn ê lâng sī: Khí-chhù sai-hū só͘ khì-sak ê chio̍h í-keng chiâⁿ-chò chhù-kak-thâu siōng tiōng-iàu ê chio̍h. 8 Tī pa̍t-ūi ê Sèng-keng ū kì-chài kóng, "Chit-tè sī poàn-kha-chio̍h, hō͘ lâng poa̍h-tó ê chio̍h." In m̄ sūn-ho̍k tō-lí lâi poa̍h-tó, che sī Siōng-Chú ê chí-ì só͘ tiāⁿ-tio̍h-.ê. 9 M̄-koh lín sī siū kéng-soán ê chéng-cho̍k, sī ông-ka ê chè-si, sī sèng-kiat ê kok-tō͘, sī Siōng-Chú ê chú-bîn. Siōng-Chú tiàu lín lī-khui o͘-àm lâi chìn-ji̍p I bî-biāu ê kng-bêng, sī ài lín soan-iông I ê úi-tāi chok-ûi. 10 Lín í-chêng m̄-sī Siōng-Chú ê chú-bîn, taⁿ sī I ê chú-bîn. Í-chêng lín bô tit-tio̍h Siōng-Chú ê liân-bín, taⁿ ū tit-tio̍h I ê liân-bín.

Siōng-Chú ê Lô͘-po̍k
11 Chhin-ài ê hiaⁿ-tī chí-mōe, lín lâi sè-kan chò kià-kha ê chhut-gōa-lâng, góa khó͘-khǹg lín m̄-thang hòng-chhiòng jio̍k-thé ê chêng-io̍k. Chit-ê chêng-io̍k put-sî teh kong-kek lêng-hûn. 12 Lín tī bī-sìn-chiá ê tiong-kan tio̍h ū hó hêng-ûi, hō͘ hiah-ê húi-pòng lín sī pháiⁿ-lâng ê lâng thang khòaⁿ-tio̍h lín ê hó phín-hēng, tī Chú chài-lîm ê ji̍t-chí kui êng-kng hō͘ Siōng-Chú. 13 Ūi-tio̍h Chú ê iân-kò͘, lín tio̍h sūn-ho̍k lâng só͘ siat ê chè-tō͘. Bô-lūn sī tùi chòe-ko thóng-tī-chiá ê kun-ông, 14 á-sī kun-ông chhe-phài lâi hêng-hoa̍t pháiⁿ-lâng kah chióng-lē hó-lâng ê koaⁿ-oân lóng tio̍h sūn-ho̍k. 15 In-ūi che sī Siōng-Chú ê chí-ì, ài lín chò hó-sū lâi hō͘ hiah-ê bû-ti ê gōng-lâng bô ōe thang kóng. 16 Lín sī chū-iû ê lâng, m̄-thang ēng chū-iû lâi jia-khàm siâ-ok, tio̍h chò Siōng-Chú ê lô͘-po̍k. 17 Tio̍h chun-tiōng só͘-ū ê lâng, tio̍h thiàⁿ Chú-lāi ê hiaⁿ-tī chí-mōe, kèng-ùi Siōng-Chú, chun-kèng kun-ông. 18 Ēng Ki-tok ê Siū-khó͘ Lâi Chò Bô͘-hoān Chò lô͘-po̍k ê lâng tio̍h ta̍k-hāng tāi-chì sūn-ho̍k chú-lâng. M̄-nā tùi siān-liông un-sûn ê chú-lâng tio̍h án-ne, liân tùi khek-po̍k ê chú-lâng mā tio̍h án-ne. 19 Lâng siū oan-óng ê sî, nā ū thé-hōe sī Siōng-Chú ê chí-ì lâi jím-siū khó͘-chhó. Siōng-Chú ē kā i chiok-hok. 20 Lín nā chò m̄-tio̍h lâi jím-siū hō͘ lâng hêng-hoa̍t ê khó͘-chhó, ū sím-mi̍h khó-chhú? Lín nā chò hó-sū lâi jím-siū chia̍h-khó͘, Siōng-Chú ē kā lín chiok-hok. 21 Siōng-Chú ho͘-tiàu lín ê bo̍k-tek sī án-ne. Ki-tok mā ū ūi-tio̍h lín siū-khó͘, lâu bô͘-iūⁿ hō͘ lín, thang hō͘ lín tòe I ê kha-pō͘. 22 Ki-tok lóng bô hoān-chōe, mā bô-lâng thiaⁿ-kòe I kóng pe̍h-chha̍t. 23 I hō͘ lâng mē bô hêng-chhùi mē lâng, siū ge̍k-thāi mā bô pàng-ōe kā lâng khióng-hat. Chí-ū chiong ka-kī kau-thok Hit-ūi chiàu kong-gī sím-phòaⁿ ê Siōng-Chú. 24 Ki-tok tī si̍p-jī-kè-téng chhin-sin tam-tng lán ê chōe, hō͘ lán thoat-lī chōe ê sí-bông, kui-hiòng kong-gī lâi oa̍h. Lín tùi I ê siong-hûn tit-tio̍h i-hó. 25 Lín í-chêng chhin-chhiūⁿ iûⁿ bê-lō͘, chit-má í-keng tńg-lâi kui tī lín lêng-hûn ê Bo̍k-chiá, mā sī Kàm-hō͘-jîn.