《巴克禮普世版聖經(試讀本)》

| | | 轉寄

巴克禮普世版(試讀本) 彼得後書第一章

1 Góa, Se-bûn Pí-tek sī Iâ-so͘ Ki-tok ê sù-tô͘ kah lô͘-po̍k, siá chit-tiuⁿ phoe kià hō͘ hiah-ê khò lán ê Siōng-Chú kah Kiù-Chú Iâ-so͘ Ki-tok ê gī, kah goán chò-hóe hun-hióng kāng-khoán pó-pòe sìn-gióng ê lâng. 2 In-ūi lín ū jīn-bat Siōng-Chú kah lán ê Chú Iâ-so͘, goān lín tit-tio̍h hong-hong hù-hù ê un-tián kah pêng-an!

Siōng-Chú ê Ho͘-tiàu Kah Kéng-soán
3 Siōng-Chú ê koân-lêng í-keng siúⁿ-sù lán kèng-khiân seng-oa̍h só͘ su-iàu ê it-chhè. Chit-ê un-sù sī thong-kòe chin-chiàⁿ jīn-bat Hit-ūi ho͘-tiàu lán lâi hun-hióng I ka-kī ê êng-kng kah liông-siān ê Siōng-Chú siúⁿ-sù-.ê. 4 Siōng-Chú í-keng chiong I èng-ín ê pó-pòe kah ke̍k-tōa ê un-tián siúⁿ-sù lán. Hō͘ lín thong-kòe chiah-ê èng-ín thang thoat-lī sè-kan ê chêng-io̍k só͘ chō-chiâⁿ ê pāi-hoāi, lâi hun-hióng Siōng-Chú ê sîn-sèng. 5 Ūi-tio̍h án-ne, lín tio̍h chīn-la̍t phah-piàⁿ, ēng tek-hēng lâi ke-thiⁿ lín ê sìn-sim, ēng tì-sek lâi ke-thiⁿ lín ê tek-hēng. 6 Ēng chún-chat lâi ke-thiⁿ tì-sek, ēng jím-nāi lâi ke-thiⁿ chún-chat, ēng kèng-khiân lâi ke-thiⁿ jím-nāi. 7 Ēng chhiú-chiok chi-chêng lâi ke-thiⁿ kèng-khiân, ēng thiàⁿ-sim lâi ke-thiⁿ chhiú-chiok chi-chêng. 8 Lín nā lóng ū chiah-ê tek-hēng koh ná chhiong-si̍t, chiū ē hō͘ lín koh-khah chek-ke̍k koh ū hāu-lêng lâi jīn-bat lán ê Chú Iâ-so͘ Ki-tok. 9 Nā bô chiah-ê tek-hēng ê lâng chiū-sī kīn-sī á-sī chheⁿ-mê, bē kì-tit in í-chêng ê chōe í-keng sé chheng-khì. 10 Hiaⁿ-tī chí-mōe ah, só͘-í lín tio̍h koh-khah phah-piàⁿ lâi chèng-bêng Siōng-Chú tùi lín ê ho͘-tiàu kah kéng-soán sī khak-si̍t. Lín nā án-ne chò chiū éng-oán bē tūi-lo̍h. 11 Án-ne Siōng-Chú chiū ē tōa-tōa sù-hok hō͘ lín thang chìn-ji̍p lán ê Kiù-Chú Iâ-so͘ Ki-tok éng-oán ê kok-tō͘. 12 Lín sui-jiân í-keng chai chiah-ê tāi-chì, koh kian-tēng chip-siú lín só͘ niá-siū ê chin-lí, góa iáu-koh tio̍h siông-siông kā lín thê-chhéⁿ. 13 Góa siūⁿ tī góa iáu oa̍h-teh ê sî, eng-kai tio̍h siông-siông kā lín thê-chhéⁿ. 14 Chiàu lán ê Chú Iâ-so͘ Ki-tok kā góa chí-sī ê, góa ka-kī chai góa lī-khui sè-kan ê ji̍t-chí teh-beh kàu. 15 Góa mā beh chīn-la̍t siūⁿ pān-hoat hō͘ lín tī góa kòe-sin liáu-āu iáu put-sî ē kì-tit chiah-ê tāi-chì.

Ki-tok Êng-kng ê Kiàn-chèng-jîn
16 Goán tùi lín kóng koan-hē lán ê Chú Iâ-so͘ Ki-tok ê tōa-koân-lêng kah chài-lîm, m̄-sī kin-kì kî-khiáu bô iáⁿ-chiah ê thoân-soat, sī goán ū chhin-ba̍k khòaⁿ-tio̍h I ê tōa ui-giâm. 17 I tùi Thiⁿ-Pē Siōng-Chú tit-tio̍h chun-kùi kah êng-kng ê sî, Hit-ūi chì-chun koh êng-kng ê Siōng-Chú ū chhut-siaⁿ tùi I kóng, "Chit-ê sī Góa só͘ thiàⁿ ê Kiáⁿ, I sī Góa chin-chiàⁿ kah-ì-.ê." 18 Goán kah I tī sèng-soaⁿ ê sî, ū chhin-sin thiaⁿ-tio̍h tùi thiⁿ-téng chhut-lâi chit-ê siaⁿ. 19 Só͘-í goán tùi sian-ti só͘ soan-pò͘ ê sìn-sit koh-khah khak-sìn. Lín tio̍h chù-ì thiaⁿ, in-ūi chit-ê sìn-sit chhin-chhiūⁿ teng-hóe chiò tī o͘-àm, chiò-kàu thiⁿ-kng, it-ti̍t kàu khé-bêng-chhiⁿ chhut-hiān tī lín ê sim ê sî. 20 Siōng iàu-kín tio̍h chai, m̄-thang sûi-piān chiàu ka-kī ê ì-sù lâi kái-soeh Sèng-keng tiong sian-ti só͘ kóng ê ōe. 21 In-ūi sian-ti ê ōe m̄-sī tùi lâng ê ì-sù kóng chhut, sī lâng hō͘ Sèng-Sîn kám-tōng lâi kóng-chhut Siōng-Chú ê ōe.