《巴克禮普世版聖經(試讀本)》

| | | 轉寄

巴克禮普世版(試讀本) 啟示錄第三章

Siá Hō͘ Sat-te̍k Kàu-hōe ê Phoe
1 " Lí tio̍h siá phoe hō͘ Sat-te̍k kàu-hōe ê sù-chiá kā in kóng: Ū Siōng-Chú chhit-ê sîn-lêng kah chhit-lia̍p chheⁿ ê Hit-ūi án-ne kóng: Góa chai lí ê só͘-chò, bêng-gī-siōng lí sī teh-oa̍h, kî-si̍t sī sí-khì. 2 Lí tio̍h kéng-séng, kian-kò͘ hiah-ê teh-beh sí-khì ê khùi-si-á, in-ūi Góa khòaⁿ-tio̍h lí ê hêng-ûi, tī Góa Siōng-Chú ê bīn-chêng iáu-bōe oân-choân. 3 Só͘-í lí tio̍h ē-kì-tit lí só͘ niá-siū kah só͘ thiaⁿ-tio̍h-.ê, koh tio̍h chip-siú, mā tio̍h hóe-kái. Nā m̄ kéng-séng, Góa ē chhin-chhiūⁿ chha̍t-á lâi lí hia, lí it-tēng m̄-chai Góa sím-mi̍h-sî ē lâi-kàu lí hia. 4 M̄-koh tī Sat-te̍k iáu-ū chi̍t-kóa lâng kā in ê saⁿ-khò͘ pó-chhî kah chin chheng-khì. In ē chhēng pe̍h-saⁿ kah Góa chò-hóe sì-kè kiâⁿ, in-ūi in ē-kham-tit. 5 Tek-sèng ê lâng mā ē án-ne chhēng pe̍h-saⁿ. Góa choa̍t-tùi bē kā i ê miâ tùi oa̍h-miā-chheh chhat-siau. Góa ē tī Góa ê Thiⁿ-Pē kah I hiah-ê thiⁿ-sài ê bīn-chêng kong-khai sêng-jīn i ê miâ. 6 Ū hīⁿ-khang ê lâng lóng tio̍h thiaⁿ Sèng-Sîn kā chiah-ê kàu-hōe kóng ê ōe.

Siá Hō͘ Hui-la̍h-thiat-hui Kàu-hōe ê Phoe
7 " Lí tio̍h siá phoe hō͘ Hui-lia̍p-thiat-hui kàu-hōe ê sù-chiá kā in kóng: Sèng-kiat koh chin-si̍t, chiáng-koán Tāi-pi̍t ê só-sî, khui chiū bô-lâng ē-tàng koaiⁿ, koaiⁿ chiū bô-lâng ē-tàng khui ê Hit-ūi án-ne kóng: 8 Góa chai lí ê só͘-chò, lí khòaⁿ, Góa í-keng tī lí ê bīn-chêng kā lí khui chi̍t-ê mn̂g, sī bô-lâng ē-tàng koaiⁿ-.ê. Góa mā chai lí kan-taⁿ ū tām-po̍h-á khùi-la̍t khiok ū chun-siú Góa ê tō-lí, m̄-bat hó͘ⁿ-jīn Góa ê miâ. 9 Lí khòaⁿ, Sat-tàn ê chi̍p-thoân chū-chheng sī Iû-thài-lâng kî-si̍t m̄-sī, in sī teh kóng pe̍h-chha̍t. Góa beh hō͘ in lâi phak tòa lí ê kha-chêng, koh hō͘ in chai Góa thiàⁿ lí. 10 In-ūi lí ū chun-siú Góa ê tō-lí koh thun-lún kàu kiat-bóe, Góa mā beh pó-siú lí thoat-lī hit-ê chhì-thàm ê sî-kî. Chit-ê sî-kî beh lîm-kàu choân sè-kài, lâi khó-giām só͘-ū tòa tī tē-chiūⁿ ê lâng. 11 Góa liâm-piⁿ kàu. Lí tio̍h chhî-siú só͘-ū ê tō-lí chiah bián-tit ū-lâng kā lí ê êng-koan chhiúⁿ-khì. 12 "Tek-sèng ê lâng, Góa beh hō͘ i chiâⁿ-chò Góa ê Siōng-Chú sèng-tiān ê thiāu, éng-oán bē koh chhut-khì. Góa mā beh chiong Góa ê Siōng-Chú ê miâ kah tùi thiⁿ-téng kàng-lo̍h ê Iâ-lō͘-sat-léng-siâⁿ, í-ki̍p Góa ê sin-miâ lóng khek tī i ê sin-chiūⁿ. 13 "Ū hīⁿ-khang ê lâng lóng tio̍h thiaⁿ Sèng-Sîn kā chiah-ê kàu-hōe só͘ kóng ê ōe."

Siá Hō͘ Ló-tí-ka Kàu-hōe ê Phoe
14 " Lí tio̍h siá phoe hō͘ Ló-tí-ka kàu-hōe ê sù-chiá kā in kóng: Chò Amen, chò tiong-sìn chin-si̍t ê kiàn-chèng, chò Siōng-Chú chō-hòa ê goân-thâu ê Hit-ūi án-ne kóng: 15 Góa chai lí ê só͘-chò, lí ê sìn-gióng bô sio bô léng. Góa khah ì-ài lí he̍k-sī sio he̍k-sī léng. 16 Lí kì-jiân sī lâ-lûn-sio, m̄-chiâⁿ sio m̄-chiâⁿ léng, Góa beh kā lí tùi Góa ê chhùi phùi chhut-lâi. 17 In-ūi lí kóng, ' Góa sī hó-gia̍h, í-keng hoat-châi, lóng bô khiàm-khoeh.' Lí khiok m̄-chai ka-kī pi-chhám, khó-liân, sàn-chhiah, chheⁿ-mê koh thǹg-pak-theh. 18 Góa khó͘-khǹg lí, nā beh hó-gia̍h tio̍h tùi góa bé kòe-hóe thoàn-liān ê kim, koh bé pe̍h-saⁿ lâi chhēng thang hō͘ lí bē ū thǹg-pak-theh ê kiàn-siàu, koh bé io̍h-ko lâi boah lí ê ba̍k-chiu thang hō͘ lí ē khòaⁿ-kìⁿ. 19 Tùi góa só͘ thiàⁿ ê lâng, góa lóng kā in chek-pī kah koán-kà, só͘-í lín tio̍h jia̍t-sim, tio̍h hóe-kái. 20 Góa khiā tī mn̂g-kháu teh phah-mn̂g, thiaⁿ-tio̍h Góa ê siaⁿ lâi khui-mn̂g ê lâng, Góa beh ji̍p-khì in tau kah i chò-hóe chia̍h-pn̄g, i mā ē kah Góa chò-hóe chia̍h. 21 "Tek-sèng ê lâng, Góa beh hō͘ i kah Góa chò-hóe chē tī Góa ê pó-chō, chhin-chhiūⁿ Góa í-keng tek-sèng kah Góa ê Thiⁿ-Pē chò-hóe chē tī I ê pó-chō. 22 "Ū hīⁿ-khang ê lâng lóng tio̍h thiaⁿ Sèng-Sîn kā chiah-ê kàu-hōe só͘ kóng ê ōe."