《巴克禮普世版聖經(試讀本)》

| | | 轉寄

巴克禮普世版(試讀本) 啟示錄第十四章

Kiù-sio̍k Chi Koa
1 Góa koh khòaⁿ, ū khòaⁿ-tio̍h Iûⁿ-ko khiā tī Sek-an-soaⁿ, ū cha̍p-sì-bān sì-chheng lâng kah I chò-hóe. In ê thâu-hia̍h lóng ū Iûⁿ-ko ê miâ kah I ê Thiⁿ-Pē ê miâ. 2 Góa thiaⁿ-tio̍h ū siaⁿ tùi thiⁿ-téng chhut-lâi, chhin-chhiūⁿ tōa-chúi teh chhiâng ê siaⁿ, mā chhin-chhiūⁿ lûi teh tân ê siaⁿ. Góa só͘ thiaⁿ-tio̍h chit-ê siaⁿ chhin-chhiūⁿ khîm-chhiú teh tôaⁿ khiā-khîm ê siaⁿ. 3 In tī pó-chō kah sì-ê oa̍h-mi̍h í-ki̍p tiúⁿ-ló ê bīn-chêng chhiùⁿ chi̍t-siú sin-koa. Chit-siú koa tû-liáu tùi tē-chiūⁿ sio̍k-hôe hit cha̍p-sì-bān sì-chheng lâng í-gōa, bô-lâng ē-hiáu o̍h. 4 Chiah-ê lâng sī m̄-bat bak-tio̍h lí-sek ê tông-lâm, chiah-ê lâng kin-tòe Iûⁿ-ko khì ta̍k só͘-chāi, in sī tùi jîn-lūi ê tiong-kan sio̍k-hôe lâi chò khí-thâu-se̍k ê kóe-chí hiàn hō͘ Siōng-Chú kah Iûⁿ-ko-.ê. 5 In m̄-bat kóng pe̍h-chha̍t, lóng bô khoat-tiám.

Saⁿ-ê Thiⁿ-sài ê Sìn-sit
6 Góa koh khòaⁿ-tio̍h lēng-gōa chi̍t-ê thiⁿ-sài tī khong-tiong teh poe. I ū éng-oán ê sìn-sit beh thoân hō͘ tē-chiūⁿ ê lâng, mā hō͘ ta̍k pang-kok, ta̍k chióng-cho̍k, ta̍k-khoán gí-giân kah ta̍k-ê bîn-cho̍k. 7 Chiah-ê thiⁿ-sài tōa-siaⁿ kóng, "Tio̍h kèng-ùi Siōng-Chú, kui êng-kng hō͘ I, in-ūi I sím-phòaⁿ jîn-lūi ê sî-khek kàu à, mā tio̍h kèng-pài chhòng-chō thiⁿ, tē, hái kah chúi-goân ê Siōng-Chú." 8 Koh ū lēng-gōa tē-jī-ê thiⁿ-sài sòa lo̍h-khì kóng, "Tó lo̍h-khì lò͘! hō͘ bān-kok lim in îm-loān lia̍t-chiú ê Pa-pí-lûn tó lo̍h-khì lò͘!" 9 Koh ū lēng-gōa tē-saⁿ-ê thiⁿ-sài sòa lo̍h-khì tōa-siaⁿ kóng, "Nā ū pài hit-chiah béng-siù kah i ê chō-siōng, í-ki̍p tī thâu-hia̍h á-sī chhiú-ni̍h siū khap-ìn chò kì-hō ê lâng, 10 mā tio̍h lim Siōng-Chú tōa siū-khì ê chiú, chiū-sī thîn tī Siōng-Chú siū-khì chiú-poe ê sûn-chiú. In ē tī sèng thiⁿ-sài kah Iûⁿ-ko ê bīn-chêng siū-tio̍h hóe kah liû-hông ê khok-hêng. 11 In siū khó͘-chhó͘ ê ian chhèng chiūⁿ-koân, éng-oán bô soah. Hiah-ê pài hit-chiah béng-siù kah i ê chō-siōng í-ki̍p siū i ê miâ khap-ìn chò kì-hō ê lâng mê-ji̍t lóng bô thang an-hioh." 12 In-ūi án-ne, hiah-ê chun-siú Siōng-Chú ê kài-bēng kah tùi Iâ-so͘ tiong-si̍t ê sìn-tô͘ tio̍h ū nāi-sim. 13 Góa koh thiaⁿ-tio̍h tùi thiⁿ-téng ū siaⁿ kóng, "Lí tio̍h siá lo̍h-lâi! Tùi taⁿ í-āu ūi-tio̍h Chú lâi sòng-sit sèⁿ-miā ê lâng si̍t-chāi ū hok-khì!" Sèng-Sîn hôe-èng kóng, "Sī à, in ē kiat-sok in ê lô-khó͘ lâi an-hioh, in-ūi in lô-khó͘ ê sêng-kó ē kin-tòe in khì."

Tē-chiūⁿ ê Siu-sêng
14 Góa koh khòaⁿ, ū khòaⁿ-tio̍h chi̍t-phiàn pe̍h-hûn, hûn-téng chē chi̍t-ê lâng chhin-chhiūⁿ Jîn-chú, thâu-khak tì kim ê bián-liû, chhiú gia̍h chi̍t-ki lāi ê liâm-le̍k-á. 15 Koh ū lēng-gōa chi̍t-ê thiⁿ-sài tùi sèng-tiān chhut-lâi, tùi chē tī hûn-téng Hit-ūi tōa-siaⁿ hoah: "Tio̍h ēng Lí ê liâm-le̍k-á lâi siu-koah, in-ūi siu-koah ê sî-kî í-keng kàu, tē-chiūⁿ ê lông-chok-bu̍t lóng kàu-se̍k à." 16 Chē tī hûn-téng Hit-ūi chiū kā liâm-le̍k-á hiat lo̍h-khì tē-chiūⁿ, tē-chiūⁿ ê lông-chok-bu̍t chiū hō͘ I siu-koah khí-lâi. 17 Koh ū lēng-gōa chi̍t-ê thiⁿ-sài tùi thiⁿ-téng ê sèng-tiān chhut-lâi, i mā gia̍h chi̍t-ki lāi ê liâm-le̍k-á. 18 Koh ū lēng-gōa chi̍t-ê teh chiáng-koán hóe ê thiⁿ-sài tùi chè-tôaⁿ chhut-lâi, tōa-siaⁿ tùi gia̍h lāi ê liâm-le̍k-á hit-ê thiⁿ-sài tōa-siaⁿ hoah: "Ēng lí lāi ê liâm-le̍k-á khì siu tē-chiūⁿ kui-pha ê phû-tô, in-ūi phû-tô í-keng kàu-se̍k à. 19 Hit-ê thiⁿ-sài chiū kā liâm-le̍k-á hiat lo̍h-khì tē-chiūⁿ, kā tē-chiūⁿ ê phû-tô koah khí-lâi, chiong phû-tô hiat lo̍h-khì Siōng-Chú tōa siū-khì ê chiú-khut. 20 Hit-ê chiú-khut tī siâⁿ-gōa hō͘ lâng thún-ta̍h, chiū ū hoeh tùi chiú-khut lâu chhut-lâi, koân tāi-iok nn̄g kong-chhioh, tn̂g chha-put-to ū saⁿ-pah kong-lí.