《巴克禮普世版聖經(試讀本)》

| | | 轉寄

巴克禮普世版(試讀本) 約翰福音第七章

Iâ-so͘ Kah I ê Hiaⁿ-tī Hiah-ê tāi-chì í-āu, Iâ-so͘ khì Ka-lī-lī-séng 1 sì-kè kiâⁿ. I bô ài khì Iû-thài-séng, in-ūi Iû-thài-lâng ài-beh kā I thâi. 2 Iû-thài-lâng ê Tah-liâu-cheh teh-beh kàu. 3 Só͘-í Iâ-so͘ ê hiaⁿ-tī kā I kóng, " Lí tio̍h lī-khui chia, khì Iû-thài-séng, hō͘ lí ê bûn-tô͘ mā thang khòaⁿ Lí teh chò ê tāi-chì. 4 Lâng nā ài chhut-miâ chiū bē tiām-tiām-á chò tāi-chì. Lí kì-jiân teh chò chiah-ê tāi-chì, tio̍h khì chò hō͘ sè-kan-lâng khòaⁿ." 5 In-ūi liân I ê hiaⁿ-tī mā m̄ sìn I. 6 Iâ-so͘ chiū kā in kóng, " Góa ê sî iáu-bōe kàu, m̄-koh lín ê sî chhìn-chhái sî to ū. 7 Sè-kan-lâng bē oàn-hūn lín. In oàn-hūn Góa, in-ūi Góa put-sî teh chí-chhut in ê siâ-ok chok-ûi. 8 Lín chò lín khì siú lín ê cheh. Góa bô ài chiūⁿ-khì siú chit-ê cheh, in-ūi Góa ê sî iáu-bōe kàu." 9 Iâ-so͘ kóng chiah-ê ōe liáu-āu iû-goân lâu tī Ka-lī-lī-séng.

Iâ-so͘ Kòe Tah-liâu-cheh
10 Iâ-so͘ ê hiaⁿ-tī khì siú cheh, I mā khì, m̄-koh m̄-sī kong-khai, sī tiām-tiām-á khì. 11 Iû-thài-lâng tī cheh-kî tiong teh chhōe Iâ-so͘. Mn̄g lâng kóng, " Hit-ê lâng tī tó-ūi?" 12 Chèng-lâng tiong-kan chin-chē lâng su-hā teh gī-lūn Iâ-so͘ ê tāi-chì. Ū-lâng kóng, " I sī hó lâng, mā ū-lâng kóng, " M̄-sī, I sī teh siàn-tōng kûn-chiòng." 13 M̄-koh in kiaⁿ Iû-thài-lâng ê iân-kò͘, bô-lâng káⁿ kong-khai kóng-khí Iâ-so͘ ê tāi-chì. 14 Kàu cheh-kî ê tiong-chām, Iâ-so͘ chiah chiūⁿ-khì sèng-tiān kà-sī lâng. 15 Iû-thài-lâng chiū kî-koài, kóng, " Chit-ê lâng bô siū kàu-io̍k, ná-ē hiah-ni̍h ū ha̍k-būn?" 16 Iâ-so͘ chiū kā in kóng, " Góa ê kà-sī m̄-sī tùi ka-kī lâi ê, sī tùi chhe-phài Góa lâi Hit-ūi ê kà-sī. 17 Lâng nā goān-ì chiàu Siōng-Chú ê chí-ì lâi chò, chiū ē chai Góa ê kà-sī sī tùi Siōng-Chú lâi, á-sī chiàu Góa ka-kī ê ì-sù teh kóng. 18 Óa-khò ka-kī teh kóng ê sī kiû ka-kī ê êng-kng. Kiû chhe-phài I Hit-ūi ê êng-kng ê lâng sī chin-si̍t. I ê lāi-bīn mā lóng bô put-gī. 19 Mô͘-se kám bô hō͘ lín lu̍t-hoat? M̄-koh lín tiong-kan bô kah chi̍t-ê lâng siú lu̍t-hoat. Lín ná-ē siūⁿ-beh thâi Góa?" 20 Chèng-lâng ìn kóng, " Lí m̄ teh khí-kông, siáⁿ-lâng ài beh thâi Lí?" 21 Iâ-so͘ ìn kóng, " Góa kan-taⁿ chò chi̍t hāng tāi-chì, lín chiū lóng kám-kak kî-koài. 22 Mô͘-se bēng-lēng lín kiâⁿ kat-lé. Lín mā tī An-hioh-ji̍t kā lâng kiâⁿ kat-lé. Sū-si̍t-siōng, chit-ê kat-lé m̄-sī tùi Mô͘-se, sī tùi lín chó͘-sian to̍h khai-sí. 23 Kì-jiân lín ûi-ge̍k Mô͘-se ê lu̍t-hoat, tī An-hioh-ji̍t kiâⁿ kat-lé, án-neGoa2 tī An-hioh-ji̍t kā chi̍t-ê pēⁿ-lâng oân-choân i-hó, lín ná-ē hiah siū-khì? 24 M̄-thang chiàu gōa-māu lâi phòaⁿ-toàn lâng, tio̍h chiàu kong-tō lâi phòaⁿ-toàn."

I Sī Ki-tok á M̄-sī?
25 Ū kóa Iâ-lō͘-sat-léng ê lâng teh kóng, " Chit-ê kám m̄-sī in siūⁿ-beh sat-hāi ê lâng? 26 Lí khòaⁿ, I hó-táⁿ teh kóng, mā bô-lâng tùi I kóng sím-mi̍h. Kám kóng chiah-ê koaⁿ-hú chin-chiàⁿ chai-iáⁿ chit-ê sī Ki-tok? 27 M̄-koh lán chai chit-ê lâng tùi tó-ūi lâi. Ki-tok lâi ê sî bô-lâng chai I tùi tó-ūi lâi." 28 Iâ-so͘ tī sèng-tiān kà-sī ê sî tōa-siaⁿ hoah kóng, " Lín bat góa, mā chai góa tùi tó-ūi lâi. Góa m̄-sī chiàu ka-kī ê ì-sù lâi. Chhe-phài Góa lâi ê Hit-ūi sī chin-si̍t, lín khiok m̄-bat I. 29 Góa bat I, in-ūi Góa tùi I hia lâi, mā sī I chhe-phài Góa lâi." 30 Hiah-ê lâng siūⁿ-beh kā I lia̍h khí-lâi, m̄-koh bô-lâng hē-chhiú, in-ūi I ê sî iáu-bōe kàu. 31 Kûn-chiòng tiong-kan chin-chē lâng sìn I, kóng, " Ki-tok lâi ê sî, kám ē pí chit-ê lâng kiâⁿ khah chē sîn-jiah?"

Kéng-ōe Siū Phài Khì Lia̍h Iâ-so͘
32 Hoat-lī-sài-phài ê lâng thiaⁿ-tio̍h kûn-chiòng án-ne teh gī-lūn Iâ-so͘ ê tāi-chì. chè-si-tiúⁿ kah Hoat-lī-sài-phài ê lâng chiū chhe kéng-ōe khì lia̍h Iâ-so͘. 33 Iâ-so͘ chiū kóng, " Góa koh kah lín chò-hóe bô jōa kú chiū beh tńg-khì chhe-phài Góa lâi Hit-ūi hia. 34 Lín beh chhōe góa, m̄-koh chhōe bē-tio̍h, in-ūi Góa beh khì ê só͘-chāi, lín bē-tàng khì." 35 Iû-thài-lâng chiū hō͘-siōng kóng, " Chit-ê lâng beh khì tó-ūi hō͘ lán chhōe bē-tio̍h? Kám siūⁿ-beh khì sì-sòaⁿ tī Hi-lia̍p siâⁿ-chhī ê Iû-thài kiâu-bîn hia, khì kà-sī Hi-lia̍p-lâng sī-bô? 36 I kóng, 'Lín beh chhōe góa, m̄-koh chhōe bē-tio̍h, in-ūi Góa beh khì ê só͘-chāi, lín bē-tàng khì.' Che sī sím-mi̍h ì-sù?"

Éng-seng Oa̍h-chúi ê Khe
37 Cheh-kî ê chòe-āu hit ji̍t, chiū-sī siōng tiōng-iàu ê ji̍t, Iâ-so͘ khiā khí-lâi tōa-siaⁿ hoah kóng, " Chhùi-ta ê lâng tio̍h lâi Góa chia lim. 38 Sìn góa ê lâng, chiàu Sèng-keng só͘ kóng, ' Ū oa̍h-chúi ê khe tùi i ê pak-lāi chhèng chhut-lâi.'" 39 Iâ-so͘ án-ne kóng sī chí sìn I ê lâng teh beh niá-siū Sèng-Sîn. Hit sî Siōng-Chú iáu-bōe siúⁿ-sù Sèng-Sîn, in-ūi Iâ-so͘ iáu-bōe tit-tio̍h êng-kng.

Chèng-lâng In-ūi Iâ-so͘ Khí Hun-cheng
40 Kûn-chiòng tiong-kan ū-lâng thiaⁿ-tio̍h chiah-ê ōe chiū kóng, " Chit-ê lâng chin-chiàⁿ sī hit-ūi sian-ti." 41 Koh ū-lâng kóng, " Chit-ê lâng chiū-sī Ki-tok." M̄-koh mā ū-lâng kóng, " Ki-tok kám ē tùi Ka-lī-lī-séng chhut? 42 Sèng-keng kám bô kóng, ' Ki-tok sī Tāi-pi̍t ê kiáⁿ-sun, sī tùi Tāi-pi̍t ê kò͘-hiong Pek-lī-hêng-siâⁿ chhut?" 43 Kûn-chiòng chiū án-ne in-ūi Iâ-so͘ lâi khí hun-cheng. 44 Kî-tiong ū kóa lâng ài beh lia̍h Iâ-so͘, m̄-koh bô-lâng hē-chhiú.

Iû-thài-kàu ê Thâu-lâng M̄-sìn Iâ-so͘
45 Sèng-tiān ê kéng-ōe tńg lâi kìⁿ chè-si-tiúⁿ kah Hoat-lī-sài-phài ê lâng. In mn̄g kéng-ōe kóng, " Ná-ē bô kā Iâ-so͘ ah tńg-lâi?" 46 Kéng-ōe ìn kóng, " Chiông-lâi m̄-bat ū-lâng kóng-ōe chhin-chhiūⁿ chit-ê lâng." 47 Hoat-lī-sài-phài ê lâng ìn kóng, " Lín mā khì hō͘ I bê-khì sī-bô? 48 Lán ê koaⁿ-oân á-sī Hoat-lī-sài-phài ê lâng, kám ū-lâng sìn I? 49 Chit tīn m̄-bat lu̍t-hoat ê gōng-lâng tio̍h siū chek-hoa̍t." 50 In tiong-kan ū chi̍t ūi bat khì kìⁿ Iâ-so͘ ê Nî-ko-tí-bó͘ kā in kóng, 51 Chiàu lán ê lu̍t-hoat, bô seng sím-mn̄g koh cha-bêng i ū chò sím-mi̍h, lán kám ē-tàng kā i tēng-chōe? 52 In chiū ìn kóng, " Lí mā sī tùi Ka-lī-lī-séng lâi ê sī-bô? Lí khì cha-khó Sèng-keng chiū chai, Ka-lī-lī-séng bô chhut sian-ti."