《巴克禮普世版聖經(試讀本)》

| | | 轉寄

巴克禮普世版(試讀本) 約翰福音第二十一章

Iâ-so͘ Tùi Chhit-ê Bûn-tô͘ Hián-hiān
1 Chiah-ê tāi-chì í-āu, Iâ-so͘ tī Thê-pí-lī-a ê hái-piⁿ, koh hián-bêng ka-kī hō͘ bûn-tô͘ khòaⁿ; I ê chhut-hiān kì tī ē-té. 2 Ū Se-bûn Pí-tek, kiò-chò "siang-seⁿ-á" ê To-má, Ka-lī-lī-séng ê Ka-ná lâng Ná-tàn-gia̍p, Se-pí-thài ê nn̄g-ê kiáⁿ, iáu ū bûn-tô͘ nn̄g-ê lóng chò-hóe tī hia. 3 Se-bûn Pí-tek kā in kóng, "Góa beh khì lia̍h-hî." In kā i kóng, "Goán mā beh kah lí khì." Chiū chhut-khì, chiūⁿ-chûn; hit mê lóng lia̍h bô hî. 4 Thiⁿ phú-kng, Iâ-so͘ khiā tī hōaⁿ-téng, m̄-koh bûn-tô͘ jīn bē chhut I sī Iâ-so͘. 5 Iâ-so͘ kā in kóng, "Siàu-liân-lâng ah, lín lia̍h ū hî bô?" In kóng, "Bô pòaⁿ-bóe." 6 Iâ-so͘ kā in kóng, "Kā bāng pha lo̍h-khì chûn ê chiàⁿ-pêng, chiū ē pha-tio̍h hî." In pha lo̍h-khì, in-ūi pha-tio̍h chin-chē hî, hî-bāng soah thoa bē khí-lâi. 7 Iâ-so͘ só͘ thiàⁿ hit-ê bûn-tô͘ kā Pí-tek kóng, "I sī Chú." Se-bûn Pí-tek chi̍t-ē thiaⁿ-tio̍h sī Chú, in-ūi thǹg-pak-theh, chiū kóaⁿ-kín moa gōa-saⁿ, thiàu lo̍h-khì chúi-ni̍h. 8 Kî-tha ê bûn-tô͘, in-ūi lī hōaⁿ bô hn̄g, chha-put-to saⁿ-cha̍p tn̄g, ēng sè-chiah chûn-á lâi kā hî-á móa-móa ê bāng thoa chiūⁿ-hōaⁿ. 9 In chi̍t-ē chiūⁿ-hōaⁿ, khòaⁿ-tio̍h ū teh to̍h ê hóe-thòaⁿ-hóe, téng-bīn ū hî, koh ū piáⁿ. 10 Iâ-so͘ kā in kóng, "Tú-chiah pha-tio̍h ê hî, lia̍h kúi-bóe-á lâi." 11 Se-bûn Pí-tek chiū peh khí-lih chûn-téng, kā bāng thoa chiūⁿ-hōaⁿ, kui bāng tōa-bóe hî móa-móa, chóng-kiōng chi̍t-pah gō͘-cha̍p-saⁿ bóe; hî sui-jiân hiah-chē, bāng mā bô phòa-li̍h. 12 Iâ-so͘ kā in kóng, "Lâi chia̍h chá-tǹg." Bûn-tô͘ bô-lâng káⁿ kā I mn̄g, "Lí sī siáⁿ-lâng?" in-ūi in chai I sī Chú. 13 Iâ-so͘ kiâⁿ óa-lâi, the̍h piáⁿ pun hō͘ in, hî mā sī án-ne pun hō͘ in. 14 Iâ-so͘ tùi sí-lâng tiong koh-oa̍h liáu-āu, chhut-hiān hō͘ I ê bûn-tô͘ khòaⁿ-tio̍h, che sī tē-saⁿ pái.

Iâ-so͘ Kah Pí-tek
15 In chia̍h chá-tǹg liáu-āu, Iâ-so͘ kā Se-bûn Pí-tek kóng, "Iok-hān ê kiáⁿ Se-bûn, lí ū pí chiah-ê lâng khah thiàⁿ Góa bô?" Pí-tek ìn-kóng, "Chú ah, ū, Lí chai góa ū thiàⁿ Lí." Iâ-so͘ kā i kóng, "Lí tio̍h ióng-chhī Góa ê iûⁿ-á-kiáⁿ." 16 Iâ-so͘ tē-jī pái mn̄g i kóng, "Iok-hān ê kiáⁿ Se-bûn, lí ū pí chiah-ê khah thiàⁿ Góa bô?" Pí-tek ìn-kóng, "Chú ah, ū, Lí chai góa ū thiàⁿ Lí." Iâ-so͘ kā i kóng, "Lí tio̍h chiàu-kò͘ Góa hiah-ê iûⁿ." 17 Iâ-so͘ tē-saⁿ pái kā i mn̄g, "Iok-hān ê kiáⁿ Se-bûn, lí ū pí chiah-ê khah thiàⁿ Góa bô?" Pí-tek in-ūi Iâ-so͘ tē-saⁿ pái án-ne mn̄g, chiū chin iu-būn, kā Iâ-so͘ kóng, "Chú ah, Lí ta̍k-hāng lóng chai, Lí chai góa ū thiàⁿ Lí." Iâ-so͘ kā i kóng, "Lí tio̍h ióng-chhī Góa hiah-ê iûⁿ." 18 Góa si̍t-chāi kā lí kóng, lí siàu-liân ê sî ka-kī pa̍k khò͘-tòa, sûi-piān khì lí ài khì ê só͘-chāi; m̄-koh kàu nî-lāu ê sî, lí tio̍h chhun-chhiú hō͘ lâng kā lí pa̍k, kā lí thoa-kàu lí bô-ài khì ê só͘-chāi." 19 Iâ-so͘ kóng chiah-ê ōe sī chí Pí-tek ē án-chóaⁿ sí lâi êng-kng Siōng-Chú, án-nekong2 soah, Iâ-so͘ kā i kóng, "Lâi tòe Góa."

Iâ-so͘ Kah I Só͘-thiàⁿ ê Bûn-tô͘
20 Pí-tek oa̍t-tńg-sin, khòaⁿ-tio̍h Iâ-so͘ só͘-thiàⁿ ê bûn-tô͘ tòe tī in ê āu-piah. I chiū-sī chêng tī boán-chhan ê sî, khò-óa Iâ-so͘ ê heng-khám kóng, "Chú ah, sī siáⁿ-lâng beh chhut-bē Lí?" 21 Pí-tek khòaⁿ-tio̍h chiū mn̄g Iâ-so͘ kóng, "Chú ah, chit-ê lâng ē án-chóaⁿ?" 22 Iâ-so͘ kā i kóng, "Góa nā ài i oa̍h kàu Góa koh lâi, kah lí ū sím-mi̍h koan-hē? lí tio̍h lâi tòe Góa." 23 Chit-kù ōe chiū án-ne tī bûn-tô͘ ê tiong-kan liû-thoân, kóng, "Chit-ê bûn-tô͘ bē sí." Kî-si̍t Iâ-so͘ m̄-sī kóng i bē sí, sī teh kóng, "Góa nā ài i oa̍h kàu Góa koh lâi, kah lí ū sím-mi̍h koan-hē?" 24 Chit-ê bûn-tô͘ chiū-sī ūi-tio̍h chiah-ê tāi-chì chò kiàn-chèng, koh chiong chiah-ê tāi-chì siá lo̍h-lâi ê lâng, lán chai i ê kiàn-chèng sī chin-si̍t.

Kiat-lūn
25 Iâ-so͘ koh ū chò chin-chē hāng tāi-chì. Nā beh chiong chiah-ê tāi-chì chi̍t-hāng chi̍t-hāng siá lo̍h-lâi, góa siūⁿ choân-sè-kài mā bô só͘-chāi thang té hiah-ê kì-lo̍k ê chheh.