《宋澤萊ê台文蕃薯園》

| | | 轉寄

K對少年人談tio̍h林秉樞chit一派ê chapo͘人!

●新聊齋誌異●

今á日K tī某大學對一陣研究生講解台灣文學史,當伊講tio̍h法國小仲馬ê小說《茶花女》ê時,講tio̍h世界siōng偉大ê愛情小說,並m̄是chit本青年愛tio̍h酒家女ê小說,卻是美國小說家霍桑所寫ê《紅字》。了後竟然亂講到林秉樞ê家暴事件,伊有表示一kóa感想:

K講:「《紅字》chiah是siōng偉大ê愛情文學作品,甚至超過《羅密歐kah茱麗葉》。Tī《紅字》裡,女主角海絲特為tio̍h保護她ê男友丁梅斯代牧師ê光明前途,被法庭判kui年thàng天一定tio̍h穿一件繡有A字(注:Adulltery,通姦ê意思)ê衫,差不多hō͘她含冤一生。Á男友丁梅斯代牧師一直m̄肯棄sak海絲特,tī自責kah別人ê陷害下,身軀快速轉pháiⁿ,總算付出性命,快速衰弱來死。In頭尾體貼對方,疼惜對方,m̄ hō͘對方食一點á虧。Chit種愛情非常偉大,是一个咱應該看齊ê愛情標竿。」

K koh對chiah个少年人講: 「我其實並無同意大家使用『愛』chit字來講男女感情,m̄管是結婚ê á是未婚ê。因為咱ē誤會『愛』chit字,kā它講成 “ài” ê意思。親像講ài對方做chit个á是做hit个,來表示tùi對方ê『愛』,特別是欠缺感情教育ê台灣人,koh khah容易ánne誤會。我想講林秉樞一再 “ài”女方跪落來,伊一定想講這是對女方ê『愛』,甚至phah她、罵她、強迫她、限制她、囚禁她lóng是『愛』,因為ánne chiah歡喜ánne做bē siān,這to̍h是對『愛』ê無知。若是ē tàng,我ǹg望kā『愛』chit字,改做台灣民間所講ê『疼惜』兩个字chiah好!」

Koh講: 「Lín在場ê人tiāⁿtio̍h有真chē人iáu未結婚,iáu m̄ bat男女應該án怎互相對待之道。我想講lín應該kā『溫、良、恭、儉、讓』五字好好á記tî心內,當做準則來實踐。我顛倒無贊成一國之民lóng ē tàng『溫、良、恭、儉、讓』,因為ánne,對國家無一定有利益,無害。我mā m̄是講女方對男方tio̍h『溫、良、恭、儉、讓』,因為女性本來to̍h比較khah軟chiáⁿ;卻是講男方對女方tio̍h『溫、良、恭、儉、讓』!特別是『讓』chit字,男方一定ài ânân實踐,tio̍h『讓』到啥物程度?He就是『phah無回手,罵無應嘴』,mā無過份!」

Koh講: 「我為啥物beh提出chit个準則?因為我出身tī一个暴力家庭,受害非常深。當男方動手phah女方ê時,受害ê往往m̄ nā女方一人,iáu包括所有ê gíná lóng ē被phah。殘暴ê老父甚至ē gia̍h刀thâi死kui个家庭ê人,包括所有gíná。Chit種驚人ê後果是因為自細漢無約束做一个男性ê伊,一定tio̍h遵守『溫、良、恭、儉、讓』ê準則,特別是『讓』chit字!」

Koh講: 「因為我是暴力家庭ê gíná,自細漢我mā ē努力觀察hiah个幸福和諧ê真chē家庭,而且暗中欣羨in。是án怎有kóa家庭竟然ē hiahni̍h幸福和諧?講破原因無其它,因為阿爸遵守『溫、良、恭、儉、讓』ê準則,特別是『讓』chit字而已!」

Koh講: 「像林秉樞chit一派人ê行為是teh自掘墳墓,kā kakī ê一生徹底毀掉。一个hō͘家庭充滿兇暴氣氛ê男性,不如去死khah好。伊kā家庭chhòng kah ná流沙,hō͘ kakī無人生穩固ê基盤,khiā立lóng有問題,講beh án怎去成大功立大業?Tio̍h算成大功立大業koh是án怎!Hō͘ kakī ê家庭充滿仇恨,kahná地獄,kah死亡koh有啥物無仝?Tio̍h算做財經總管,做總統koh有啥物意義?人是會死,幾10年後,人死去,啥人iáu 致意你做過啥物?M̄ koh你kui世人lóng一定tio̍h生活tī地獄裡,無任何物件ē tàng彌補你一生ê虧損!」

Koh講: 「青年chapo͘人kantaⁿ有『溫、良、恭、儉、讓』,chiah ē tàng成就你ê家庭,chiah ē tàng有和樂健康ê家庭,tī chit个了不起ê基礎頂面,永遠無後顧之憂;假使bē tàng快速功名大發展,ánne,koh有啥物關係?因為你已經tī基礎頂面勝利à,未來iáu ē有koh khah chē ê勝利!」