《Kah陳小小做伙讀台語》

 | | | 轉寄

相信一種無付過代價ê疼，bē tàng hō͘你改變。

作者 Virginia Yip，台譯：Lîm Chùn Io̍k 2021.12.26

陳小小踏話頭：
信耶穌ê「信」，有真深ê含意。新約聖經真chē重要涵義，tio̍h tńg來到舊約聖經chiah ē tàng理解。舊約希伯來文ê「信」，koh khah有忠信ê意思。

用翁ábó͘ 做譬喻，兩人堅持一生一世kantaⁿ有對方。何西阿書用先知ê婚姻愛情來表現啥物是「信」(忠信)。以色列人拜假神，親像有外遇ê bó͘，上帝親像受傷ê翁。基督徒應該tio̍h the̍h出忠信來「信耶穌」，跟tòe主。

目前「信」被嚴重灌水，親像本期信望愛電子報所講ê tiāⁿtiāⁿ見tio̍h錯誤ê「信，to̍h是信上帝是疼！」一kóa基督徒用chit句話來呼喚上帝來滿足kakī ê貪念，「上帝to̍h是疼ah，所以我ê祈求，祂理所當然lóng tio̍h應允。」Chit種「信」淪落比鬼魔ê「信」koh khah bē比得。


「你信上帝只有一位，ánne是tio̍h；連hiah个魔鬼mā信，koh驚kah phi̍hphi̍h chhoah。」雅各書2:19

主打文ê另外一个重點講tio̍h「贖罪重價」。犯罪是tio̍h付出代價。Tī舊約時期，ta̍k人lóng tio̍h為kakī ê罪附加牛、羊等等牲祭ê代價。換算做chitmá ê市價，to̍h是10萬(有錢人)、2萬(一般人)。想看māi，若是ta̍k人犯罪tio̍h按照kakī ê收入付出贖罪ê價錢，應該ē tàng壓制一kóa罪。M̄ koh耶穌來à，祂成做贖罪牲祭，為所有ê人付出上帝ê「贖罪重價」。這to̍h是是án怎忠信ê基督徒ē減少犯罪，bē犯罪，性命轉變，he是因為明白本來應該是kakī受tio̍h罪ê處罰，m̄ koh，chitmá chit个處罰全部落tī耶穌ê身chiūⁿ。

【相信一種無付過代價ê疼，bē tàng hō͘你改變。】作者:Virginia Yip

The reason people can know the gospel and not change their lives is because they think forgiveness is cheap. — Timothy Keller

是án怎有人ē知影福音，m̄ koh性命無改變？因為in想講，上帝赦免人只不過是一件真輕可to̍h ē tàng做到ê tāichì，無啥物了不起。— 提摩太凱樂

今á日若問華人教會ê基督徒：「罪人án怎得救？」Tī教會出入khah久一點ê信徒khah大面ē曉講「因信稱義」，m̄ koh若是koh再問in「信」指ê是啥物？In無一定ē tàng回答kah真清楚。

「信」是啥物？



有人ē講：「信to̍h是teh指『信上帝』！」Chit種回答ê人khah大面bat篤信無神論，á是以前求神拜佛，in chitmá 只不過是換一个敬拜獨一真神ê信仰。In m̄ bat「耶穌基督」，mā m̄知是án怎基督教除了上帝，iáukoh ài chhòng一个耶穌出來；簡單來講，in bē tàng算是「基督」徒。

有ê人ē講：「信to̍h是teh指『信上帝ê話』！」Chit種回答ê人khah大面是受傳統華人教會ê行為主義、律法主義影響。Tī in觀念深深ê所在，一个人得救是ài靠遵行上帝ê話語，所以in一再強調「m̄ thang kantaⁿ 聽道、iáu koh ài行道」。講tio̍h「基督」kah in ê關係？Kiámchhái基督ê救贖tī信ê hit一刻對in有意義，信了後tio̍h靠kakī努力來行道ah。

有ê人ēánne講：「信to̍h是teh指『信耶穌』！」若koh再問這是啥物意思？Kah「就/chiū」仝意思ê “to̍h”無一定聽ē tio̍h啥物答案ah。有ê人強調「信」chit个行動，kahná hō͘人得救ê是人kakī ê信心。有一pái，我tī一个主日學中聽帶領ê人講解「耶穌基督是án怎來到世chiūⁿ受死」，伊略略á提起耶穌是為tio̍h咱ê罪來死，續落來to̍h用大部分節課ê時間，用各種生動ê譬喻kah個人見證來講解咱án怎信、信是啥物、為啥物ài有信心……對chiah个人來講，「基督ê死」kantaⁿ是布景，in ê「信心」chiah是信仰ê焦點。

若是koh追問，耶穌基督是án怎來到世間受死？耶穌ê死kah咱有啥物關係？Khah常聽tio̍h ê答案是：「耶穌基督ê死是為tio̍h beh表明上帝ê疼。」這時常引用ê經文是約翰福音三章16節。若koh再問：「上帝為啥物beh犧牲kakī獨生kiáⁿ來向世間人表示疼？」he聽tio̍h ê答案to̍h koh khah顯出信徒對救恩ê tāichì有gōa霧霧無明；我聽過ê答案有：「為kakī心疼ê人犧牲性命是表達疼ê siōng koân境界！」á是「Kám m̄是有一話句講『疼kah死去活來』！」á是「因為上帝知影，看tio̍h為別人犧牲性命，對人是siōng大ê震撼，所以，祂用chit種激烈ê方式，若無，咱bē受感動！」Ánne，耶穌ê死只不過是上帝用來表達對世人ê疼ê一種齣頭而已。就ánne，信耶穌，to̍h是信上帝是疼！

掛名基督ê信仰



傳統華人教會ê行為主義者、律法主義者，m̄是m̄知罪，甚至對hiah个強調上帝是疼ê論調非常反感，m̄ koh in想講一个基督徒一旦信主，to̍h ài靠kakī努力行道來hō͘上帝歡喜。換句話來講，in猶原對kakī ê罪性認bat無明，iáu未認bat kakī到底敗壞到啥物程度，「罪」對in來講kantaⁿ是一件一件具體ê罪行，所以in khah大面bē明白恩典，甚至有人講恩典，in iáu ē受氣，因為in想講he是提倡反律法。

Tī chiah个信徒ê觀念中，基督kantaⁿ有tī in信主ê hit一刻chiah kah in有關，mā to̍h是拯救in，hō͘ in一張天國考場ê入場券。入去考場了後，in tī世間大部分ê日子，基督mā好，聖神mā好，父上帝mā好，in ê角色to̍h是加添基督徒ê力量，hō͘ in過聖潔ê生活。

華人ê福音派信仰已經漸漸變成「掛名基督」ê基督教信仰à！因為咱人嘴裡猶原不時講tio̍h「基督」，m̄ koh其實想講「基督」tī信仰中只不過是彰顯疼ê記號，á是至koân道德ê模樣，是一个象徵性、khiàn芳ê角色而已。咱人ē ánne想講，正是因為咱人對「咱是罪人，除非得tio̍h基督代贖性ê救贖，若無to̍h永遠無法度來到上帝面前hō͘ 祂接納，享受祂ê疼」chit个事實，認bat非常霧霧無明，非常膚淺，甚至一屑á都無認bat。Á相信chit種「基督教」信仰ê人，性命絕對無可能有gōa大ê改變。

認bat贖罪重價


Keller一針見血指出，對基督教信仰有認bat卻無性命改變ê原因，to̍h是出tī人kā上帝ê赦免看kah siuⁿ過sio̍k價ah。咱人感覺，既然上帝是疼，koh使用耶穌來到世間，死hō͘人看kah hiahni̍h激烈ê表達方式，ánne，一个慈愛ê上帝赦免罪人本來是天經地義ê tāichì，有啥物了不起？

一个人ê性命án怎改變？一个人án怎赦免得罪伊ê人？Án怎ē tàng捨己疼人？Án怎ē tàng無koh kā追求金錢、名利、成就看做是人生ê目的？Án怎ē tàng無koh致意別人án怎看伊？Kám是tī伊看tio̍h耶穌tī十字架頂做出ê偉大表現á是感動人事跡？你chitmá看了，了後去試行看māi？M̄ nā做bē到，koh khah ē因為發見kakī做bē到，soah感覺無比ê愧疚kah沉重ê道德壓力──若是你真正有想beh學耶穌！

M̄ koh，若是你看tio̍h耶穌tī十字架頂所做ê，乃是為tio̍h你ê緣故，祂呼求父上帝赦免ê，m̄是「in」hiah个pháiⁿ人，卻是「你」chit个罪人，你ê性命一定ē改變！有啥物比親身經歷上帝ê赦免koh khah有震撼力？基督ê死，m̄是kantaⁿ彰顯一个偉大、捨己、赦免仇敵ê疼，hō͘人看了真感動，看了後thang學而已。祂ê死彰顯ê乃是上帝對祂ê處罰，是祂用一个完全無罪ê義者身分khiā tī咱chiah个不義罪人ê地位頂面，代替咱承受處罰！Mā to̍h是講，咱ê罪ê大，本來應該受tio̍h ánne ê處罰，m̄ koh chitmá chit个處罰全部落tī基督身chiūⁿ。

上帝ê疼，彰顯tī為tio̍h beh拯救咱，竟然犧牲kakī ê獨生kiáⁿ，這乃是沉重到無法度koh再重ê代價。若是chit世間有其它方法thang救咱，父上帝絕對bē下決心犧牲祂ê kiáⁿ。Kantaⁿ有當咱認bat上帝為tio̍h救咱免受沉淪來付出gōa大ê代價，咱chiah ē tàng經歷因為赦免kah接納所帶來ê喜樂kah自由──ánne chiah是性命真正改變ê動力kah緣起！