《Kah陳小小做伙讀台語》

 | | | 轉寄

Barbie ê盛宴

作者 楊腓力（Philip Yancey），台譯：Lîm Chùn Io̍k 2022.01.29

陳小小踏話頭

真chē美好ê tāichì，發生ê hitchūn，lóng認為iáu有繼續。啥人知，kantaⁿ有hit段時間、hiah个人、ē tàng做hiah个事。這to̍h是回憶。若不時ētàng重複ê，ánne to̍h m̄是回憶。

二十gōa年前，我kah tjm tī新竹，hit時兩人是sànchhiah學生，m̄ koh tiāⁿtiāⁿ開放家庭接待學生。我總感覺上帝ê恩典m̄是kantaⁿ聖經、講道等等ê屬靈饗宴，生活中ê大細事mā lóng thang tùi其中領受上帝ê豐盛。我kohkhah想講兄弟姊妹做伙lim食交流（耶穌mā常ánne做），ē tàng多層次感受信仰ê豐富。

兩个sànchhiah學生，無錢、又koh ài招待學生，無法度ta̍k pái lóng請學生食卵花麵。M̄ koh，上帝賞賜智慧hō͘我，製造出真chē美（怪）食、創意菜單。我做過日本料理，軍艦卷、握壽司，也bat親像總鋪師推出十chhut菜，號名做「十全十美」。

魚貫á入 - 烘白帶魚

雞毛蒜皮 - 蒜頭雞湯
……

Βē tàng kantaⁿ顧tio̍h食，mā得重視體重。食了後，大家做伙phah大老二（撲克牌遊戲）。輸ê人tio̍h the倒練腰、豹形健身。Chiahê lóng成做一生難忘ê回憶。

信望愛主打文楊腓力寫ê「Barbie ê盛宴」，mā是透過好料hō͘一陣信仰有kóa僵（kiong）化ê兄弟姊妹，用另外一種方式感受上帝ê豐富恩典。親像劇中hit位將軍所講，「出tī人類ê愚戇kah目神短淺，咱竟然認為屬天ê恩典是有限ê……m̄ koh當咱眼目phah開hit一刻，咱看見mā體會tio̍h，恩典是無限ê。」

我想講chit份信仰siōng特別ê是，施恩典ê上帝無求咱任何物件，信耶穌30 gōa年，我甚至tio̍h講天父ê快樂，to̍h是看tio̍h阮chit陣gín'á活出快樂（舊約中ê平安祭，to̍h是非常快樂ê場面）。我真心ǹg望jú來jú chē人ē tàng體會tio̍h上帝ê恩典。

「Barbie ê盛宴」文/楊腓力（Philip Yancey）

出世tī丹麥ê凱倫‧布里森（Karen Blixen）嫁hō͘一位男爵，tī 1914到31年間，in tī英屬東非經營咖啡農場〔她寫ê《遠離非洲》（O͘t of Africa）敘述chiah个tāichì〕。離婚了後tńg來到丹麥，以筆名狄妮森（Isak Dinesen）用英文寫作。其中一篇故事〈Barbie ê盛宴〉（Babette's Feast）tī 1980年代拍做電影，成做經典作。

狄妮森kā她ê故事khǹg tī挪威，m̄ koh，丹麥製片人kā地點換到丹麥ê東海岸，siûⁿ lo̍plo̍p ê路kah茅舍ê貧苦漁村。Tī chitê憂鬱ê所在，一个白嘴鬚牧師帶領一小群頂真ê信義宗信徒。

Hi̍t 所在kantaⁿ有ê一點點á引誘庄ni̍h人ê屬世享樂，mā全部被chit派ê人棄sak。In lóng穿烏衫，kantaⁿ食清水煮魚，以及麵包kah水koh再加一滴酒煮ê麵糊。安息日大家聚集，唱「耶路撒冷，甘甜家鄉，我心切望」。In ê指南針已經定向新耶路撒冷，地chiūⁿ生涯就ánne當做來到天城不得不忍受ê過程。

有歲獨居ê牧師有兩个少年chabó͘ kiáⁿ：馬丁妮，號名記念馬丁路德；菲麗帕，就ánne記念路德ê門生菲利普‧墨蘭頓。兩人án怎掩khàm，mā蓋bē tiâu in迷人ê美豔；有ê人來集會，kantaⁿ為tio̍h大大ê眼福。

馬丁妮有引起一个少年iântâu ê騎士軍官注目，m̄ koh，她拒絕男方ê追求；若是ánne，啥人來照顧年老ê老父？軍官騎馬離開，娶蘇菲亞女王ê女俾。

菲麗帕m̄ kantaⁿ生做súi，iáu有kah夜鶯仝款優美ê歌聲。當她歌頌耶路撒冷，ná親像天城發出ê嘹亮聲音。Á菲麗帕認bat當時siōng有名ê法籍歌劇家阿奇葉‧帕賓（Achille Papin）。帕賓當時tī海岸地區休養，有一工行過恬chihchih小鎮ê路糊糜路，卻聽tio̍h有資格tī巴黎歌劇院演唱ê絕好聲音，hō͘伊大驚一tiô。

「請容允我教妳正當ê方法唱歌，帕賓硬勸菲麗帕。全法國lóng ē臣服tī你腳前。皇親貴族會排隊等beh見妳，妳mā ē坐馬車到富麗堂皇ê英格烈餐廳用餐。」

菲麗帕聽tio̍h受重視，soah歡喜kah bē講tit，應允上幾節課，m̄ koh to̍h上chit幾節課。唱愛情歌曲hō͘她緊張，á心內ê phokphok chháiⁿ koh khah擾亂她。當她唱了《唐‧喬凡若尼》（Don Giovanni）裡ê詠嘆調，tī帕賓ê懷中，伊ê嘴唇輕輕á拭過她ê，菲麗帕一屑á疑問都無，chiahê喜樂一定tio̍h棄絕。老父寫phoe謝絕以後ê課程，á帕賓感覺莫名其妙tńg去巴黎，ná親像phah m̄見中獎ê彩券。

十五年過去à，漁村變遷mā bē少。兩姊妹chitmá已經是中年ê老姑婆，想beh繼續亡父ê事工，m̄ koh無伊鐵腕ê領導，教會鬧kah四分五裂。有兄弟為tio̍h senglí上ê tāichì，kah另外一个兄弟有積怨。大家mā teh謠傳有兩个會友已經私通三十年；一對老夫人彼此已經十年m̄講話。安息日當然iáu有集會，唱古舊ê聖詩，m̄ koh，音樂已經失去本來ê光彩，mā無gōa chē人願意參加。Tio̍h講是問題重重，兩个chabó͘ kiáⁿ照常死忠teh安排集會，替嘴齒lak了了ê老人作水煮麵包。

有一工暗時siàng大雨，無人ē想beh chit時tī外面ê siûⁿ lo̍plo̍p路裡行，兩姊妹卻聽見門前砰一聲。In一開門，有一个chabó͘人昏倒tī hia。Kā她chhòng醒，卻發見她bē曉講丹麥話。Chabó͘人交hō͘兩姊妹一張帕賓ê phoe。菲麗帕看tio̍h伊ê名，嘴phóe to̍h禁bē tiâu起紅，手phi̍hphi̍h chhoah唸hit張紹介phoe。Chabó͘人ê名叫Barbie，翁婿kah kiáⁿ兒tī法國內戰死去，她ê性命mā有危險，一定tio̍h逃走出來。帕賓替她chhōe tio̍h船位來chia，ǹg望庄ni̍h人ē tàng可憐可憐她。「Barbie ē曉煮飯，」phoe裡寫。

兩姊妹付bē起錢，而且對chhiàⁿ女傭mā m̄是真放心。In m̄信任Barbie ê廚藝──法國人kám m̄是食馬肉，koh食水雞？M̄ koh Barbie比手劃腳teh哀求，願意做任何家事，只要供應她食kah tòa；就ánne兩姊妹心軟à。

Barbie為她們工作十二年。她們頭一pái教Barbie án怎thâi魚，煮麵包糊，她ê目chiu peh kah比啥物lóng khah大，鼻á略略á nih一下，m̄ koh lóng無質疑交hō͘她ê差事。她kā庄ni̍h ê sànchhiah人飼飽，mā擔當所有ê家事，甚至幫忙安排安息日ê集會。大陣人lóng同意，Barbie hō͘ chitê kahná死去hiah恬靜ê漁村注入生機。

Barbie前到taⁿ lóng bē提chìn前tī法國ê tāichì，所以十二年後收tio̍h第一張phoe，chiâⁿ實hō͘馬丁妮kah菲麗帕驚一tiô。Barbie讀完phoe，金金看她ê兩姊妹，無經過心思kā in講，她行大運à。巴黎有一个朋友ta̍k年用她選ê號碼買彩券，今年她贏à，而且贏tio̍h一萬法郎！

兩姊妹lia̍h-tiâu Barbie ê手，kā她恭喜，心底卻發沉。In知影Barbie ē離開in à。

Barbie中彩券hit chūn’á，兩姊妹tú好teh討論án怎慶祝老父ê百歲生日；Barbie來chhōe in請求一件tāichì。十二年來，我無ài過任何物件，她ánne講；兩姊妹tìm頭。M̄ koh chitmá我有一个請求：我願意為慶祝會做菜，為lín做一頓正宗ê法國酒席。

兩姊妹雖然對chitê計畫有淡薄á批評，m̄ koh Barbie講了無m̄ tio̍h，十二年來她無求過任何好處，所以除了答應，in iáu ē tàng講啥物？

錢tùi法國寄來，Barbie出外幾工，去辦酒席ê事宜。她tńg來了後ê幾个禮拜，村民觀看船靠岸卸落Barbie做菜用ê物件，bē tàng相信teh交換眼色。工人giú手推車，頂面貯tīⁿ一桶一桶ê細隻鳥á，kui箱ê香檳──是香檳neh！──iáu有酒mā tòe leh運到。Kui个牛頭、新鮮菜蔬、菌菰、野禽、火腿kah奇怪ê海產，iáu有一隻活龜，hàiⁿ蛇仝款ê頭。Chiahê lóng進入由Barbie統籌ê灶kha裡。

馬丁尼kah菲麗帕看見chiahê亂七八糟ê物件，緊張起來，趕緊向chitmá只chhun十一名ê臭老會友解說，in án怎講ē勉強來答應。Ta̍k人lóng kilí-kulu講諒解ê話。經過討論，大陣人同意來食chit頓飯，而且無beh評論菜ê好bái，免得Barbie想m̄ tio̍h去。嘴舌原是用來oló感恩ê，m̄是用來沉迷tī異國風味食品。

十二月十五，食飯ê hit一工落雪，古板ê小鎮帶一層銀白，顛倒有一點á受氣。兩姊妹真歡喜有不速之客參加：九十歲ê魯小姐由侄á陪來赴席。侄á to̍h是幾年前追求馬丁妮ê騎士軍官，chitmá是將軍級ê皇家侍衛à。

Barbie m̄知用啥物辦法搜集夠用ê瓷器kah水晶，而且用蠟燭kah常青植物裝thāⁿ房間。餐桌mā布置kah真súi。開始出菜ê時，庄ni̍h人ē記得in ê協議，lóng坐leh無出聲，親像kui群圍tī埤á邊ê龜。Kantaⁿ有將軍一直oló好酒好菜。「阿曼堤亞多！」伊舉起第一杯酒讚嘆講：「這是我lim過siōng純ê阿曼堤亞多。」等伊lim頭一嘴湯，伊chiùchōa lim tio̍h ê是龜肉湯，m̄ koh chia沿岸thái有龜leh？

「有夠好食！」將軍食落一chhut菜koh ánne講：「這道是Blinis Demidoff！」其他面chiūⁿ滿満是皺紋ê宴客，mā teh食仝款ê山珍海味，m̄ koh無表情mā無意見。將軍一再oló 1860年分ê香檳，Barbie ài灶kha幫忙ê chapo͘ gíná無停替伊thîn滿酒杯。Kahná kantaⁿ有伊chiah ē tàng試tam目chiu前ê好料。

庄ni̍h人雖然無品論酒菜，m̄ koh，筵席ê氣氛kahná tī in ê身chiūⁿ產生奇妙ê效果。酒lim kah耳á起燒了後，口齒mā放鬆，講起老先生iáu在世ê歲月，講起海灣結凍ê hit个聖誕節。

做senglí騙人ê hit个兄弟總算認m̄ tio̍h，兩个冤家幾nā年ê婦人mā開始講話。有一个老夫人phah e̍h，坐tī邊á ê一个兄弟一屑á都無思考，講：「哈利路亞！」

Á將軍kahná kantaⁿ知影品論酒菜。當灶kha phâng出好酒沉甕底ê菜鵪鶉，將軍叫講伊tī歐洲kantaⁿ tī一个所在見過chit種菜，to̍h是巴黎出名ê英格烈餐廳；hia有一个女廚師真有名氣。

將軍酒醉飯飽，lim kah浮浮chhèng，總算按捺bē tiâu，khiā起來發表講話。

「眾朋友，慈悲kah真理已經相tú，」伊開始講：「公義kah極樂mā beh相chim。」伊lio̍h’á停淡薄á久，koh講：「因為在下平時演講無小心準備，了解演講目標，m̄ koh tī這kah單純ê會友做伙，hitê戴滿勳章ê將軍ná親像成做傳聲筒，傳述註定由伊帶出ê信息。」將軍ê信息是恩典。

雖然hit批會友無完全聽bat將軍ê講話，m̄ koh tī hit一刻，「地chiūⁿê虛幻親像雲煙tùi目chiu前飛散，in看tio̍h宇宙ê原貌。」Chit小群人告辭，tī móamóa是閃sih ê雪花，tī繁星密佈ê天下，消失tī小鎮裡。

《Barbie ê盛宴》以兩幕情景收尾。Tī外面，chiahê老輩人圍tī噴泉激情teh唱古舊ê信心歌曲，tútú to̍h是一幕同心合意ê場面：Barbie ê盛宴開門，恩典靜chiauhchiauh入來。狄妮森koh寫講，in感覺「kahná罪已經洗清氣，潔白親像羊毛，而且重新穿無瑕疵ê衣袍，親像小綿羊一般tiô跳。」

Siōng尾一幕chiah是tī厝內，灶kha堆滿ài洗ê碗盤、油loplop ê鍋á、貝殼皮、龜甲、軟骨、phah破ê桶、菜蔬碎邊，iáu有閒矸á，ná親像發生災變仝款。Barbie to̍h 坐tī chiahê物件中間，thiám kah kahná十二年前hit暗她tú來ê模樣。兩姊妹忽然想tio̍h，ta̍k人lóng tio̍h遵守咒chōa，無對Barbie做ê菜講過半話句。

「Barbie，今á日ê暗頓非常好食，」馬丁妮有kóa躊躇講。

Barbie ê心思kahná飄往真遠，過一時á chiah講：「我chìn前是英格烈餐廳ê廚chí司。」

「Barbie，等你tńg去巴黎以後，咱iáu ē記tiâu這一暝。」馬丁妮koh講，kahná無聽見Barbie講話。

Barbie kā in講，她bē tńg去巴黎à。所有ê親友死ê死、坐監ê坐監。Koh khah何況，tńg去巴黎開銷真貴。

「妳hit一萬法郎？」兩姊妹問講。

Barbie ê話kahná投落一粒炸彈。她贏來ê一萬法郎已經lóng用tī酒席頂面，用kah一文無chhun。M̄免大tio̍h驚，她kā兩姊妹講。Chiah koh講，英格烈餐廳有這款ê十二人份暗頓，to̍h需要chiahni̍h chē錢。

Tī將軍ê講話裡，ē tàng明明確確看出，狄妮森寫《Barbie ê盛宴》m̄是講好料ê故事，卻是恩典ê譬喻：一件禮物，開銷贈與者ê所有，領受ê人分文m̄免。將軍對聚集tī Barbie桌前hit群表情嚴峻ê會友講chit段話：

咱lóng聽人講過恩典tī宇宙間thang chhōe tio̍h，m̄ koh是出tī人類ê愚戇kah目神短淺，咱竟然認為屬天ê恩典是有限ê……m̄ koh，當咱眼目phah開hit一刻，咱看見mā體會tio̍h，恩典是無限ê。列位親chiâⁿ好朋友，恩典無求咱任何物件，單單ài咱充滿信心thèng候領受，而且心存感恩講出來宣述。

十二年前，Barbie來到chit陣無恩典活氣ê人中間。做一个馬丁路德ê追隨者，in ta̍k禮拜日聽恩典ê信息，卻tī其它日子想beh藉tio̍h敬虔kah苦行beh得tio̍h上帝ê喜愛；結果恩典以筵席ê面貌臨到in。Barbie ê盛宴，千載難求ê山珍海味就ánne為一陣根本無做啥物ê人鋪張。恩典用它慣有ê方式臨到hit座小漁村：免費，無附帶條件，對方請客。