《Kah陳小小做伙讀台語》

 | | | 轉寄

牧養我以色列民ê君王

作者 陳鳳翔，台譯：Lîm Chùn Io̍k 2022.03.06


陳鳳翔踏話頭：

詩篇23是真chē基督徒ê siōng愛，我mā無例外。Hit年生第一个gín'á，經歷十級chūn痛驚人ê 38點鐘，詩篇23一直扶持我行完hit場馬拉松走長碼，得到siōng尾ê冕旒—一个活潑koh健康ê eⁿá。

本期信望愛電子報，是tī 20 gōa年後，對詩篇23 ê領悟。上帝ê話語to̍h是hiahni̍h奇妙，人生無仝階段，lóng有無仝ê體會。

【牧養我以色列民ê君王】文/陳鳳翔

目前全世界公認siōng好ê政治制度是民主制度。M̄ koh，生活tī民主制度下ê咱，真chē人想講目前ê政治無法度表現民意，ta̍k場公投lóng反映民主制度iáu有缺陷ê事實，koh khah免講其它koh khah慘淡ê獨裁專制制度。

到chitmá 2300年前ê古希臘哲學家亞里斯多德，早to̍h發見問題無tī tó一種政治制度。伊ê《政治學》（Πολιτικά）kā政治制度分做三類：明君政制（一人統治）、精英政制（少數人統治）kah共和政制（chē人統治）。M̄ koh，君王kantaⁿ謀求kakī ê利益ê時，to̍h敗壞成做暴君政制；社會精英kantaⁿ謀求好額人ê利益ê時，to̍h敗壞成做寡頭政制；共和政制kantaⁿ謀求有公民權ê自由人利益ê時，to̍h敗壞成做民主政制。

Koân位統治者內底ê罪，hō͘ in kantaⁿ追求kakī ê私利，koh khah好ê政治制度，kantaⁿ ē成做in謀利ê工具。當今ê民主國家，kám m̄是to̍h是統治者kā個人利益khǹg tī政黨利益ê頭前，政黨利益khǹg tī全體人民利益ê頭前？Tùi頂面到下面，人人互相拚勢追求koh khah chē利益。M̄ koh，民主國家lóng是有錢ê國家，全世界大多數資源集中tī chiahê國家。所以，問題m̄是在tī利益無夠，卻是在tī罪致使利益分配無平均，貪婪之罪hō͘咱人tùi心內發出「無夠」ê呼聲，致使已經享受豐富資源ê人iáu想beh搶奪koh khah chē ê資源。

君王to̍h是牧者

世界古今，無論tó一種政體，無統治者關心kakī個人以及人民ê罪惡問題。M̄ koh聖經記載，有一位君王，伊為人民謀福利，mā推行真chē除罪ê政策，關心人民ê性命；詩篇23篇to̍h是說明chit位君王牧養人民之道。古代近東研究者發見，當時ê人民用牧者來形容君王，所以，詩篇23篇應該當做雙關語來閱讀。

詩篇23篇1～2節thang ánne理解：「上主是我ê牧者，上主是我ê君王，做祂ê子民，ta̍k項lóng 無欠缺。親像羊倒tī青草埔，有thang安歇ê水邊，lim食無限量供應ê青草kah活水，而且m̄免擔心野獸來突擊。」

詩篇23篇3節a「hō͘我ê靈魂醒起來」，נַפְשִׁי יְשׁוֹבֵב應譯做「hō͘我全人迴轉」，以往êנַפְשִׁי tiāⁿtiāⁿ譯 為「心、靈、靈魂」，m̄ koh，chit字包括「肉體」，是「kui个人」ê意思。續落來ê 3節b「為kakī ê名引chhōa我行義路」，全句thang ánne理解：「我ê君王重視祂ê名，祂引chhōa祂ê人民行正確ê路。人民行m̄ tio̍h路，祂to̍h ē hō͘其它國家嘲笑，hō͘別人看輕祂ê名。我是祂ê子民，我若行m̄ tio̍h路，祂to̍h ē hō͘我se̍htńg來，tńg來到正確ê路。」

續落來詩篇23篇3節kah 4節tio̍h同齊閱讀，m̄ thang分割。「我雖然行過死蔭ê幽谷，mā m̄驚受害，因為祢kah我同在；祢ê柺á，祢ê竿，lóng安慰我。」人民親像羊，真chē時chūn無法度判斷啥物是正確ê路，多數自認為聰明，想講是義路、正確ê路一定是好風日，沿途美景ê康莊大道。

M̄ koh，死蔭ê幽谷，mā是上帝ê路。Tú tio̍h chit種處處危險ê路，羊tiāⁿtiāⁿ驚惶失主張，亂走亂tiô，想beh行kakī認為á是魔鬼引誘講好行ê路。M̄ koh，君王用祂ê柺á擊退死蔭幽谷中ê猛獸攻擊，君王ê竿kā亂chông soah遠離原路ê我giú tńg來到祂ê路，杖kah竿hō͘我知影君王to̍h tī邊á，帶來安慰。

詩篇23篇5節：「Tī我敵人ê面前，祢為我排設筵席；祢用油抹我ê頭，hō͘我ê福杯滿出來。」「福杯」ê原文無「福」，是譯者kakī加上ê形容詞。Chit節ê意思是：「我ê君王bē除去敵人，祂beh hō͘敵人kanta癮來欣羨祂ê子民蒙福。」咱tī敵人ê面前大大食肉，大嘴lim酒，美酒chē到lóng滿出來，而且iáu thang享受珍貴ê油來抹油ê貴賓尊榮好款待。

詩篇23篇6節a：「恩惠kah慈愛一定tòe我一世人。」，「恩惠」טוֹב，指世間一切ê好處；「慈愛」חֶסֶד就ánne是teh指所有ê人際關係（親情、友情、愛情）是忠誠不離ê疼；「tòe」רָדַף就ánne有「jiok tio̍h」ê意思。

人生在世，所求ê to̍h是chit兩項？其他國家ê人民、其他神明ê信徒，費盡kakī ê力量去追求，m̄ koh上主ê子民tī人生中ê所有日子，一定有恩惠kah慈愛一直tòe咱，想beh poe̍h開都poe̍hbē掉。

詩篇23篇6節b：「我koh beh tòa tī上主ê殿中，直到永遠。」וְשַׁבְתִּי 過去想講來自 יָשַׁב，翻譯做「tòa」，m̄ koh，現代一kóa學者想講應該是 שׁוּב，翻譯做「迴轉」。支持「迴轉」ê理由是按照律法規定，無人ē tàng tòa tī聖殿，tio̍h算祭司mā bē tàng。詩篇23篇6節kui節thang ánne理解：「上主chit位君王實在真好勢，祂子民ê人際關係美滿，koh有算bē盡ê好處，我當然beh tńg去，tńg來到chit位君王ê殿，永永遠遠。」

稱頌永遠君王

「你，偤太地ê伯利恆ah，你tī偤太ê統治者中間，絕對m̄是siōng細ê，因為tùi你chia ē出一位領袖，祂ē來牧養我ê子民—以色列人。」（《全民台文聖經》馬太福音2:6）Chitê嬰á，to̍h是耶穌基督。祂本來是上帝，道成肉身來做王，beh kā祂ê子民tùi罪惡中拯救出來。三十gōa年前，我有何等ê幸運，tú tio̍h耶穌，就ánne ē tàng成做祂ê子民。祂hō͘我體會tio̍h，人生在世ê問題m̄是錢無夠，m̄是無情愛，卻是罪ē hō͘咱留bē tiâu所有ê恩典。Ná親像每一段愛情起初lóng真美好，m̄ koh，罪hō͘衝突四界發生，致使分手離異。

三十年來，我享受做耶穌子民ê各種好處，祂為我謀福利，祂幫我除罪，健全我ê性命，hō͘我ê恩典bē流失，滿kah溢出來，不時hō͘別人得福。Ta̍k工lóng有恩惠kah慈愛teh jiok我，我ê餘生iáu有啥物其它想法？當然tio̍h ta̍k工tńg來到君王耶穌ê殿中寶座前，稱頌祂ê美好，直到永永遠遠。