《Kah陳小小做伙讀台語》

 | | | 轉寄

聖經是神ê話語，mā極有文學性

作者 彭彥華，台譯：Lîm Chùn Io̍k 2022.03.13

陳小小踏話頭：

古早人書寫成本、受教育成本極koân，普遍bat字率無koân，kantaⁿ有少數菁英份子受文士訓練。M̄ koh in有幾種招數，來hō͘ chih載文化ê文本，代代傳落來。

重要文件寫出來了後，由文士一遍koh一遍滿四kè去大聲誦讀hō͘普羅人民(文盲)聽。聽ê人一遍koh一遍努力背入去腦裡，m̄是聽了後kantaⁿ放tī心裡，mā tio̍h大聲朗誦(背)hō͘其他ê人聽。這to̍h是古早人ê交叉比對，提防m̄ tio̍h ê系統。

透過文本ê記憶(Memorization)kah暗唸(recital)，文化價值觀to̍h tī廣大人民中廣泛（hoat）散播，而且確保後代無錯誤ê遵照kah傳達。

為tio̍h beh hō͘ 人ē tàng記tiâutiâu，有kóa文本甚至ē配合音樂，mā to̍h是詩歌。這to̍h koh khah無簡單bē記得。希伯來文舊約聖經有四分之一以上lóng用詩體寫作，真有可能是為tio̍h beh hō͘會眾容易記憶kah誦讀，甚至mā方便tī節慶使用。

M̄ koh，言簡意賅ê詩體，翻譯挑戰難度siōng koân，就ánne世界各國其他語文譯本聖經ê讀者，chē少ē失落一kóa隱含ê深刻文意。信望愛本期電子報主打文，ài咱m̄ nā用敬畏ê心，閱讀上帝ê話語—聖經，mā tio̍h知影chitê文本極富文學性，包含多層次ê豐盛意義。咱來kah歷世歷代ê上帝子民，同情共感，閱讀神聖文本—聖經。

【聖經是神ê話語，mā極有文學性】文/彭彥華

Tī咱chitê時代，非信徒kah基督徒之間有一个khau洗ê對比，to̍h是非信徒kantaⁿ kā聖經當做文學作品來讀，親像大學ê英文系kā英文聖經當做必讀ê文學作品；另外一方面，真chē基督徒bē了解，就聖經ê體裁kah風格來講，聖經比較khah sêng一部文學作品集，m̄是一本系統神學ê冊。

咱一定tio̍h平衡chit兩種看法，明白聖經既是上主ê話語，教導咱神學ê智識，m̄ koh mā是上主透過人類寫落來ê文學作品。當咱講聖經是文學作品ê時，這是啥物意思？基本上有三方面ê意思：

1.聖經tiāⁿtiāⁿ以真實ê人類經歷做主題。

清教徒相信聖經用實際ê人類經歷做主題，這是啥物意思？意思是，聖經無用抽象ê方式來談論真理，卻是透過真實發生ê歷史故事、箴言、訓詞、勸誡kah應允，來解說上帝ê心意。因為chit種風格siōng適合所有ê人ê閱讀習慣，當聖經講述別人ê真實經歷ê時，比單純ê條列說明koh khah ē hō͘咱將心比心，而且tùi其中學tio̍h教示。

2.聖經有完美ê寫作風格kah技巧。

清教徒mā注意tio̍h聖經是用來表達真理ê藝術形式。舉例來講，有一位清教徒講詩篇是有史以來siōng優秀ê詩歌作品，超過聖經以外ê所有詩歌作品。

現代有kóa神學家想講聖經使用啥物文學形式無重要，重要ê是聖經beh傳達啥物內容，因為chiahê文學形式是出tī人ê手筆，有可能出錯。M̄ koh清教徒想講，連聖經ê文學形式mā是上帝所默示ê，值得咱注意kah oló。

3.聖經包含ê文學體裁非常多樣化，m̄ nā是論說文體á是記事文體。

清教徒mā注意tio̍h聖經使用無仝ê體裁，包括記事體、詩歌體kah書信體。無仝ê體裁kah無仝ê文學筆法ē關係tio̍h咱án怎詮釋聖經，親像詩篇內面有明喻、暗喻、誇飾、對比，若是chhòng m̄ tio̍h chiahê文學筆法，to̍h真容易錯誤解說經文，因為ánne，有一位清教徒講：「對修辭無知，ē thòaⁿ生出真chē解經ê錯謬。」

舉一个咱不時聽tio̍h ê例。箴言22章6節講：「教養gíná，hō͘伊行應當行ê道，to̍h是到老伊mā bē偏離。」若是咱bē明白箴言ê體裁kah性質，咱to̍h真容易kā chit句話當做應允，認為只要父母好好á教養kiáⁿ兒，in大漢了後to̍h一定ē成做敬虔ê基督徒。了後，若是咱koh再tùi chit句話反推tńg去，to̍h kiámchhái ē講，ē hiah chē無敬虔ê kiáⁿ兒，一定是因為父母無好好á kā in教養。M̄ koh，其實箴言ê性質m̄是應允，卻是有智慧說明一種普遍ê事實，所以bē排除有例外ê狀況發生。若是咱明白聖經各種體裁ê特點kah性質，to̍h ē tàng避免真chē解經ê錯誤。