《Kah陳小小做伙讀台語》

 | | | 轉寄

清氣聖殿！

作者 小小羊，台譯：Lîm Chùn Io̍k 2022.04.17

陳小小踏話頭：

Chit禮拜對基督徒是特別ê一周。

早起目chiu pehkim，to̍h想beh起chit四个字「刻苦己心」תְּעַנּוּ אֶת-נַפְשֹׁתֵיכֶם。

Chit禮拜我beh「刻苦己心」來記念主耶穌為咱做ê一切受苦kah犧牲。 華語翻譯，是hō͘心受苦。M̄ koh原文ê意思有hō͘肉體受苦ê意思。Á以色列人ē用「禁食」來表現chitê意思。

早頓、中晝頓，我「刻苦己心」。 Ta̍k pái「刻苦己心」，lóng hō͘我查覺kakī內底頭ê貪婪。 本期信望愛電子報，小小羊指出受難周ê美好傳統—樸素生活，jú來jú hông bē記得。我chitê聖殿，有聖靈內住，tio̍h被主來清氣。


Chit禮拜ê我，tio̍h樸素生活。 少，to̍h是chē。 少，chiah ē tàng查覺，原來自己早to̍h持有各種豐富，tī主裡。

【清氣聖殿！】文/小小羊

受難週tùi禮拜日主耶穌進耶路撒冷開始，禮拜五是受難日，主耶穌tī chit日被釘十字架受死。 了後，咱迎接禮拜日ê Koh活節。Teh受難週ê時，請大家盡量樸素生活，減少非必要ê各種喜慶活動。Chitê一向是真chē教會美好ê傳統，m̄ koh最近幾年來，hông bē記得是jú來jú嚴重。有kóa傳統，其實真美好，咱盡量繼續保留落去。

今á日咱beh來思考ê，m̄是榮光進耶路撒冷，mā m̄是苦難ê受難。阮beh思考ê，是一个真怪奇ê：清氣聖殿！

[為神ê殿，心親像火燒]

主耶穌進耶路撒冷ê時，眾人沿路歡迎，大聲hoah 和散那！奉主名來ê是應當稱頌ê！群眾自動自發kā衫褲鋪在地上，自動自發kā樹枝剉來鋪在地上。這是榮光ê時刻，榮光ê主，光榮進耶路撒冷城à。這是禮拜日。

禮拜一ê時，chitê榮光ê主，做一件非常特殊ê tāichì：祂進入來聖殿，了後受氣tehpéng椅péng桌，趕出教會中hiahê做買賣ê人。祂講：「聖經頂面m̄是記講：我ê殿kám m̄是稱做萬國祈禱ê殿？lín soahhō͘它成做賊巢！」（可 11：17）

約翰福音hō͘咱koh khah清楚看見主耶穌iáu講其他ê話：「對賣粉鳥ê講：『kā chiahê物件the̍h去！M̄thang kā我父ê殿當做買賣ê所在。』」（約2：16）而且記載門徒看見主耶穌ê行為，想tio̍h一句聖經ê話：「祂ê門徒to̍h想beh起聖經頂面記講：『我為你ê殿心內tio̍h急，親像火燒。』」（約2：17）

偤太人進聖殿獻祭ê時，是必須用牛、羊、粉鳥chit類chengseⁿ ê。Á chit類動物senglí人ê產生，對大家有真大ê利便，hō͘敬拜者m̄免親自千里迢迢帶chengseⁿ來到聖殿，卻是直接tī耶路撒冷兌換to̍h ēsái。早期，chiahê senglí人是tī離聖殿真遠ê橄欖山山坡頂排攤，後來，tī主耶穌ê時，已經徙到聖殿內à。In 排攤ê所在，m̄是khah內層ê所在（in膽無hiahni̍h大），卻是siōng外層ê所在，mā to̍h是外邦人院。

聖殿內，iáu有兌換錢銀ê senglí人。主要是因為聖殿ê奉獻á是殿稅，m̄收外邦人ê銀角á，必須用指定ê偤太人銀角á。所以，羅馬帝國各種銀角á，tī聖殿內lóng bētàng the̍h來使用，必須經過兌換。這有一點á像真chē遊樂場bē tàng使用一般銀角á，必須使用專門ê代幣仝款。當然，ánne ê兌換，必須加上手續費之類。Chiahê攤商，mā是tī聖殿內，位置是tī外邦人院。

Chiahê senglí人，是m̄是kah聖殿ê管理階層互相勾結？解經冊有人講有，有人講無。Kiámchhái，chiahê管理聖殿ê祭司之類神職人員無一定有分tio̍h senglí人ê好處，m̄ koh，chiahê攤商無經過許可，in mā bē tàng進聖殿排攤，這mā是無容允否認ê事實。

Ánne ê行為，有啥物m̄ tio̍h？主耶穌chhòng啥ánne受氣？

[清氣聖殿ê人tī tó位？]

主耶穌想講聖殿m̄是用來買賣ê所在，聖殿是用來祈禱ê所在。當hiahê senglí人佔用外邦人院ê時，這已經嚴重剝奪外邦人祭拜上帝ê權利；聖殿是用來祈禱敬拜ê所在，牛羊ê吵雜、各種交易ê聲音，lóng ē嚴重破壞聖殿祈禱敬虔ê氣氛，hō͘祈禱者無法度專心祈禱；á假使官商有勾結ê話，彼此ê貪污，ē嚴重損害h聖殿ê神聖。

這對lán，koh有啥意義？意義當然真chē。假使咱kantaⁿ知影經文意義，ánne，這kantaⁿ是「智識」；當經文應用tī咱生活裡，ánne chiah是「信仰」。假使講道kantaⁿ講到chiahê背景，ánne，這to̍h是「智識」；假使講道hō͘人聽見上帝對伊講話，hō͘人知影chitê經文kah kakī切身相關，必須應用tī生活，這to̍h是「信息」。

咱今á日思考兩个部分：

一、 清氣聖殿ê人，tī tó位？

二、 當成功神學tī教會中氾lām，當信仰成做凡若事成功幸福發大財ê教義ê時，咱是m̄是teh污穢聖殿ê清氣？

主耶穌清氣聖殿了，今á日清氣聖殿ê人tī toh？非尼哈清氣以色列人ê罪行了，今á日學非尼哈ê人tī toh？koh khah驚人ê是，現今koh有gōa chē信徒，知影聖殿是必須保持清氣ê？現今koh有gōa chē信徒，知影真chē聖殿早to̍h是無清氣ê？

非尼哈做啥物tāichì，kám知影？主耶穌kantaⁿ是péng椅péng桌、趕出senglí人而已，非尼哈是直接殺人，來達成清氣ê！

摩西kah以色列全會眾正tī會幕門前啼哭ê時，啥人知，有以色列中ê一個人，當in目chiu前，帶一个米甸chabó͘人到伊兄弟hia去。祭司亞倫ê孫á，以利亞撒ê kiáⁿ非尼哈看tio̍h，就tùi會中起來，手裡the̍h槍，跟tòe hitê 以色列人進亭á裡去，便kā以色列人kah hitê chabó͘人由腹內刺透。Ánne，以色列人中瘟疫就soah lah。Hit時染瘟疫死ê，有二萬四千人。耶和華吩咐摩西講：「祭司亞倫ê孫á，以利亞撒ê kiáⁿ非尼哈，hō͘我向以色列人所發ê怒消lah；因伊tī in中間，以我ê忌邪為心，hō͘我無tī忌邪中kā in除滅。所以你tio̍h講：『我kā我平安ê約賜hō͘伊。Chitê約hō͘伊kah伊ê kiáⁿ孫，當做永遠當祭司職任ê約；因伊為神有忌邪ê心，為以色列人贖罪。』」ná kah米甸chabó͘人做伙被thâi ê以色列人，名叫心利，是撒路ê kiáⁿ，是西緬一个宗族ê首領。 Á被thâi ê米甸chabó͘人，名叫哥斯比，是蘇珥ê chabó͘ kiáⁿ；這蘇珥是米甸一个宗族ê首領。（民25：6-15）

我m̄是講咱必須像非尼哈仝款直接殺人，請m̄ thang誤解。上帝無hō͘咱hit種權柄，咱to̍h m̄ thang掠做kakī有。M̄ koh，非尼哈為神ê忌邪之心，以神ê忌邪為心，現今iáu有gōa chē信徒有？主耶穌為天父ê聖殿被污染，心內tio̍h急，親像火燒，現今iáu有gōa chē信徒有？咱早to̍h被錯誤ê疼心lah！包容lah！沖昏頭了！咱早to̍h bē記得上帝是公義ê上帝，是忌邪ê！是要求聖潔ê！結果，咱傳講一種「你好、我好、伊mā好，你對、我對、伊mā對」、「m̄ thang論斷人」、「凡若事包容」、「m̄免認罪悔改」ê虛假疼心而已，tó是真正符合全本聖經，堪得公義chit類反合性經文檢驗ê真正疼心？

非尼哈為上帝忌邪，thâi死lâsâm群體聖潔ê人，tio̍h算chitê人貴做頭領，仝款thâi死伊以持守群體聖潔。上帝對非尼哈ê行為，竟然m̄是kā伊譴責無疼心、不包容，卻是oló伊，而且大大祝福伊。假使咱對聖經內面疼心ê觀念是錯誤ê話，chitê非尼哈ê事例，應該ē咱來頭殼清醒一kóa。

[教會成做賊巢mah？]

當祈禱ê殿變成販賣場ê時，主耶穌稱做「賊巢」，必須清氣。當今ê成功神學，kámm̄是kā教會變成販賣場？牧師帶頭做senglí人，福音是種商品，信耶穌就ē tàng保證病有救、發大財。當然，福音是免費，m̄ koh奉獻顛倒是必須，而且必須獻到教會來，bē tàng獻到其他地方去，而且借錢lóng tio̍h借來獻，奉獻金額jú高祝福jú chē。Á所傳ê所謂福音ê內容，m̄是啥物「罪—十字架—因信稱義」，卻是根本不提chitê物件，á是草草chhōa過，m̄ koh kā心力lóng集中tī「成功興旺」ê內容上。

信耶穌ê人，m̄是因為感覺kakī罪過深重，需要主耶穌ê救贖；á是因為kakī慾望必須被滿足，所以chhōe tio̍h一个ē tàng買收ê神明來交易。人ê祈禱，無koh是清氣kakī，卻是鼓勵放縱私慾；人ê祈禱，無koh是順服神ê心意，卻是上帝必須順服我ê心意。原該聖潔ê聖殿，現今已經變成siōng無清氣ê所在ā，充滿各式各種ê私慾；牧師kah信徒對財富ê渴望kah追求，早to̍h hō͘聖殿lâsâm bē堪得；聖殿內人siōng chē ê所在，早to̍h m̄是純淨ê敬拜祈禱上帝ê所在，卻是充滿銅臭kah chengseⁿ吵雜ê販賣場à。

舊約以色列人tiāⁿtiāⁿ拜ê巴力神，是迦南地ê豐裕之神，主管生產，五穀、六畜、人丁chit類豐富領域lóng屬牠管轄。現今教會流行ê成功神學，to̍h是現代ê巴力！以色列人in一面拜耶和華，一面拜巴力，問題是，上帝kám容允ánne ê屬靈淫亂？假牧師巴蘭引誘以色列人拜巴力，問題是，上帝kám容允ánne ê屬靈淫亂？刣死！刑罰！清氣！

甚至到末世ê時，聖經照常嚴厲警告m̄准跟tòe巴蘭ê路！

In棄sak正路，就行差了，跟tòe比珥ê kiáⁿ巴蘭ê路。巴蘭to̍h是ná貪愛不義之工錢ê先知。（彼後2：15）

In有災禍ā！因為行了該隱ê道路，koh為tio̍h利往巴蘭ê錯謬裡直走，而且tī可拉ê背叛中滅亡à。（iáu 1：11）

M̄ koh，有幾件tāichì我beh責備你：因為tī你hia有人服從了巴蘭ê教示；這巴蘭bat教導巴勒kā絆腳石khǹg tī以色列人面前，叫in食祭偶像ê物，行姦淫ê tāichì。（啟2：14）

Teh受難週ê時，咱沉思默想主ê受難，思念ná疼咱，為咱ê罪死tī十字架上ê主。咱懇求主恩典臨到咱身chiūⁿ，咱來清氣kakī，無跟tòe hiahê lâsâm聖殿ê人。

主ah！清氣咱！憐憫咱！

Mā求主興起非尼哈，清氣這時代ê教會！

願上帝ê恩惠kah咱同在。