《Kah陳小小做伙讀台語》

 | | | 轉寄

Bē tàng少ê神跡

作者 李粕，台譯：Lîm Chùn Io̍k 2022.04.10

陳小小踏話頭：


咱處tī華人佛道民間信仰環境，所以容易用一般宗教來理解基督信仰，追求一kóa比較khah次要ê「神跡」，á忽略ná siōng重要ê「神跡」。這mā是是án怎一定tio̍h閱讀聖經，chiah ētàng幫贊咱chhiâu正看tāichì ê眼光。

「M̄ nā ánne，hō͘耶穌tùi死人中koh活ê hit位—伊ê靈若是tòa tī lín內面，ánne，hō͘基督tùi死人中koh活ê hit位，mā kā藉tio̍h tòa tī lín內面ê聖靈，hō͘ lín ē死ê身軀得tio̍h性命。」羅馬書8:11

Siōng大ê神跡，絕對是上帝hō͘信耶穌ê人，tī受洗ê時，kah耶穌同死、同koh活，成做新創造[新造ê人]。Hit一刻，罪人ē tàng tùi死人中koh活，hit一刻起，罪人有聖靈tòa tī內面。

聖靈帶來siōng大ê禮物之一，to̍h是幫贊信徒有「罪識感」。聖靈幫贊信徒提前消滅內底頭隱á未現ê罪(貪婪、驕傲、忌妒、紛爭...)，m̄ hō͘它們結出罪惡ê kóechí，做出罪惡ê行為。人世間一切美好，就ánne無hō͘ chiahê罪惡破壞。

人ê問題，一向m̄是財富無夠chē、地位無夠高，卻是罪惡帶來ê自傷kah傷人。耶穌來，為咱死tī十架頂，祂beh解決ê是根本ê罪惡問題。

我三十gōa年前，得tio̍h chitê siōng大siōng大ê神跡。耶穌為我ê罪惡來死，聖靈保惠師內住，幫贊我人生一切美好(健康、愛情、親情、友情、財富、地位)留得tòa。Ta̍k年Koh活節，我記念chitê siōng偉大siōng偉大ê神跡，chitê「bē tàng少」ê神跡。

本期信望愛電子報，幫贊咱hō͘民間宗教混亂ê頭殼，重頭tńg來聖經對焦。親像作者李粕所寫：「咱thang病bē tàng醫、chheⁿmê.ê bē tàng看見、跛腳ê bē tàng行、死人歸tī土粉，m̄ koh保羅講，基督徒ê性命，是kah主同死同活，這tútú to̍h是咱迫切需要ê神跡，需要ná羊羔ê血，成做咱tī天父面前坦然無驚惶、永遠得救ê根據。」

【bē tàng少ê神跡】 文/李粕

受難週kah Koh活節teh-beh 到，看tio̍h兄弟姊妹走chông相關ê事務，chhàutúkhám想起iⁿ-tîⁿ心頭kúinā年ê ta̍pta̍p滴滴；m̄知tùi啥物時chūn開始，四kho͘圍ê人一知影我是基督徒，總會好奇問講：「你是m̄是經歷過啥物神跡？」

對chitê問題，我通常無辦法hō͘一个滿意ê答案。因為事實是，mài講我無經歷過啥物超自然事件，ná像病ētàng醫、chheⁿmê ētàng看見、跛腳ētàng行、死人ētàng koh活，to̍h是看mā無看過，m̄chiah我lóng真m̄願ìn講：「無。」

M̄ koh有kóa好朋友ē追問：「Lín kám m̄是講lín所信ê是獨一、全能ê神？」「祂若親像lín所講是慈愛ê，kám m̄是hō͘信祂ê得好處，親像tùi病中得tio̍h醫好之類ê？」「á是你無夠虔誠？」通常到chit種程度，已經m̄是難堪ē tàng形容à。Chiahê親chiâⁿ好朋友m̄是想講咱信ê神可能是真正，m̄ koh我個人ê信仰有問題，to̍h是質疑我信ê。Tio̍h算chiahê問者不有存惡意，m̄ koh tī in眼內，信仰生活欠缺chiahê經驗，kahná有kóa遺憾á是m̄踏實。我不得不承認，chiahê人確實問tio̍h一个結頭。

它真實發生

若講前述chiahê問題是外來ê，iáu有一个khah內在ê問題。Kah我有書信往來ê人，lóng ē注意tio̍h我真歡喜以「願你平安喜樂」作結，這是有原因ê，因為我bat無平安喜樂。

Tio̍h算tī信仰上有kóa歷練、有kóa學習，m̄ koh hit種因信基督有kah神相合、罪得赦免ê平安，因ǹg望kah主相親、平平得tio̍h將來永遠榮光ê喜樂，對我來講卻是生份ê，chiahê基督徒應該有ê表徵竟然真少出現tī我ê性命中！

我也bat試看改變kakī，卻全以失敗做結束，中間ê taktîⁿ、困惑kah滾絞m̄免加講，總ê來講，這hō͘我一度非常重視而且追求平安喜樂，á chit種嘴ta求便具體反映tī我ê用字遣詞中à。Chiahê á是內á是外ê問題，一度lóng成做我追求基督信仰時ê動機。

感謝上帝帶領，tòeleh跟tòe基督ê路jú行jú久，對聖經koh khah加一點á認bat，chiahê問題kahná有答案。若講神跡ê定義是「神所做ê工作」，ánne我是經歷過神跡ê。M̄ koh這神跡無hō͘ 我家道豐富，無hō͘我tú tio̍h啥物奇事，這神跡m̄是最近發生，á是koh khah精確地講，m̄是tī最近開始ê，這神跡發生ê時間thang追溯到兩千年前，空間就ánne tī咱真chē人m̄ bat踏kha到ê各各他山頂。

Tī hia，耶穌為眾人死，而且tī三日後koh活，按照使徒ê見證所講，成做khah súi ê祭物，hō͘神歡喜接納，這kám m̄是極大ê神跡？自創造天地以來，有啥人贏過死亡？有啥人升chiūⁿ koân天？Koh再講，這神跡所包含、bōetàng chó͘tòng ê能力，m̄ kantaⁿhō͘基督tùi死裡koh活，koh改變了真chē人ê性命。

因為這神跡，bat三pái否認主ê彼得tī眾人面前大聲講：「Lín thâi死ná性命ê主，神卻叫祂tùi死裡koh活；咱lóng是為chit項事做見證。」（使徒行傳3章15節）因為這神跡，hit个bat認為壓迫教會to̍h是事奉神ê法利賽人掃羅，幾年後見證：「kantaⁿ是我chìn前認為kah我有利益ê，我chitmá因基督lóng當做有損ê；m̄ nā ánne，我mā kā萬事當做有損ê，因我以認bat我主基督耶穌為至寶，我為祂已經棄sak萬事，看做糞埽（pùnsò），為tio̍h beh得tio̍h基督。」（腓立比書3章7～8節）因為這神跡，奧古斯丁（Augustine）懺悔罪行；因為這神跡，馬丁．路德（Martin Luther）堅定伊ê立場；因為這神跡，真chē宣教師離鄉背井、客死異鄉，為tio̍h beh回應呼召、傳揚所信。

Koh活ê大能

這神跡m̄ kantaⁿ是客觀ê歷史事實，mā是咱主觀上ē tàng因信經歷、接受ê。咱thang病bē tàng醫、chheⁿmê.ê bē tàng看見、跛腳ê bē tàng行、死人歸tī土粉，m̄ koh保羅講，基督徒ê性命，是kah主「同死同活」（提摩太後書2章11節），這tútú to̍h是咱迫切需要ê神跡，需要ná羊羔ê血，成做咱tī天父面前坦然無驚惶、永遠得救ê根據。

這神跡m̄ kantaⁿhō͘坐tī黑暗中ê人有進入奇妙光明ê ǹg望，hō͘穩死tī罪中ê人有罪得赦免ê贖價，hō͘原屬tī世界ê人仰視天頂ê家鄉，並應允人kah神ê性情有分（彼得後書1章4節）。古早人講：「江山易改，本性難移。」這神跡卻徹徹底底重生一個人，hō͘伊tī基督裡成做一个新創造ê人，親像彼得ê讚嘆，因神ê憐憫、藉tio̍h耶穌基督tùi死裡koh活，hō͘ 咱重生，hō͘咱有活潑ê ǹg望（彼得前書1章3節）。

我mā經歷這koh活大能ê改變，親像以前所述，面臨m̄ kantaⁿ有外來ê問題，mā有內在因無平安喜樂有ê taktîⁿ，m̄ koh tòeleh tī基督裡靈命成長，mā經歷主許可發生ê波折、難處，koh khah感覺這基督koh活ê大能永生。

這神跡iáu tī歷世歷代基督徒性命無停動工，hō͘屬主ê人有基督生做ê樣式，我回想早前，mā看tio̍h kakī ánne改變。一pái讀tio̍h「聖靈所結ê kóechí，to̍h是仁愛、喜樂、和平、忍耐、恩慈、良善、信實、溫柔、撙節，chit種ê tāichì無律法禁止。」（加拉太書5章22～23節）心內kahná有曉悟，ah，原來chiahê是聖靈所結ê kóechí，m̄是來自咱屬肉體ê努力、屬人意ê修養ah！

Bē tàng少ê神跡

就ánne我進一步領悟tio̍h，原來，平安喜樂m̄是我應當走chhōe ê，我應該追求ê獨獨基督而已。Hiahê屬天ê性情，是teh追chhōe基督ê過程所得ê結果，是主ê能力tī一個人身chiūⁿ所顯示ê能力、所做ê工作。阿爾伯特．班傑明．宣信（Albert Benjamin Simpson）所做ê詩歌〈今要主自己〉（Himself）見證一个真súi ê性命光景：「前所需要是祝福，今所需要是主。」

Tī chit樣ê過程中，我認bat kakī ê眼目當金金看ê，是ná tī各各他山頂ê古舊十架。咱因hitê掛tī柴頭上ê基督受tio̍h刑罰á得平安，因祂所受鞭傷á得醫。Koh khah要緊ê是，tī he三日來，一个神跡出現tī墳塋中，á這神跡是ta̍k个屬主、跟tòe基督ê人bē tàng少ê。咱thang跛腳親像雅各、潦倒親像拉撒路、被囚親像彼得、帶刺親像保羅、孤寂親像約翰，咱thang無經過歷任何超自然ê神跡，m̄ koh咱bē tàng無基督，bē tàng無kah基督同死同活。

Koh活節m̄ kantaⁿ是一个歷史事件，m̄ kantaⁿ有標誌耶穌基督得勝死亡，koh khah teh代表一个神跡，是今á日ta̍k个基督徒lóng需要ê神跡，hō͘咱因為信基督接受主所完成ê救恩，而且一生揹起kakī ê十字架跟tòe耶穌基督。Á是有起落禍福，mā難免困惑、厭倦、絆跋（poa̍h），m̄ koh總是主所帶領、所許可，á聖靈tī咱身chiūⁿ所做ê工作、所結ê kóechí，hō͘阮流露出不屬chit世界ê性命、性情，世間人tī咱身chiūⁿ因為ánne，soah看見人所無法度ê神跡。